“ Gagab ge mā du ǀguiǃnâxasiba . . ǃkhōǀgara”
APOSTEL Paulub ge Xristeǁîna sao rase ge ǀapemā: “Gagab ge mā du ǀguiǃnâxasiba turaxase ǂkhîb ǃnâ ǁîǃnābe ûis ǀkha ǃkhōǀgara.”—Efe. 4:2, 3.
“ǀGuiǃnâxasib” hōǃâ da rab ge “gagaba” xu ra hā. Nēs ge ra ǂâibasen ǀguiǃnâxasib Elob ǃanu gagab xa ra īǁkhā kai-esa. Xawe Paulub ge ge ǁguiǃā, sîsenni ǂhâhe hâsa î da ǀguiǃnâxasiba ūhâ ǀgara. Xawe ham-e ǁnāsa nî dī? Mâ Xristeǁî-i hoa-i ge nî dītsâ î-i, “gagab ge mā du ǀguiǃnâxasiba . . ǃkhōǀgara.”
Mûnan-ai re khoe-i ge audosa ra mā du. Ham-i ǃereamsa nē audosa kōǃgâsa? Audosa go mā-e khoe-i ge nē ǃereamsa ūhâ. Audos ga khôa o du ge mā du go khoe-e a ǀhapiǂgā-am ǁoa, sadu go kōǃgâ ǁoa-i ǃkhais ǃaroma.
ǁNās ǁkhās khami sida ǀguiǃnâxasib ga Jehovaba xu ga hā xawe i ge mâ Xristeǁî-i hoa-e nî dītsâ nēsa ǁkhaubasa. Sida ǃgâsa-i ǀkha da ga ǂkhîb ǃnâ hâ-ū gu tama io da ge nî dîsen, ‘ǁkhāsib hoab ǀkha dītsâ tsî ta ǀguiǃnâxasiba ǀhaohâb ǃnâ ra ūhâ?’
“TURAXASE” ǀGUIǃNÂXASIBA ǃKHŌǀGARA
Paulub ge ge ǃgaoǃgâ, ǀnî ǁaegu ai da ǃgarise nî sîsensa î da ǀguiǃnâxasiba ūhâ ǀgara. Nēs ge a ǃgom ǁkhā ǃgâsa-i ga tsûtsû da o. Hoaǁae du khoe-i tawa sī tsî ǁî-e tsâ du ra ǀgauba nî mîba? Nēs ge ǂhâbasa tama. Dîsen re, ‘nēsa ta ga dī ob mâsiba nî ǃgâi tamas ka io ǁgai?’ ǀNî ǁaegu i ge kaise nî ǃgâi î da khoe-e ǀûbas ǀguisa dī tamas ka io go dī i go xū-e ǀuru.—ǂKhm. 19:11; Mrk. 11:25.
Dîsen re, ‘nē mâsib xa ǃhoasa ǀguiǃnâxasib tamas ka io ǂkhababa nî ǃaroma?’
Apostel Paulub ge xoa khami da ge ‘ǀnammi ǃnâ nî taniǀnamgu.’ (Efe. 4:2) ǀGui ǂkhanis ge ra mî, nē mîs ge ra ǂâibasen “īn a khami khoena ūǃoa.” ǀNî mîdi ǃnâ da ge ǃgâsana sida ǀoasaoǃnâ kurusa ūhâs ǁkhās khami ǁîna nî ūǃoa. Ama as ge hoa da ra dītsâsa î da ‘ǀasa khoesiba’ ana. (Efe. 4:23, 24) Xawe hoa da ge ǀoasaoǃnâ kurusa ūhâ. (Rom. 3:23) Nēsa du ga ūǃoa, oi ge kaise nî supuba du ǀûbagu tsî “gagab ge mā du ǀguiǃnâxasiba . . ǃkhōǀgara.”
ǀÛbagu tsî da ga naun ge dīsā xūna ǀuru, o da ge ‘ǂkhîba’ ǀhaohâb ǃnâ nî ūhâ. Grike gowab mîs ‘ǀguiǃnâxasib’ ti hâs Efeseǁîn 4:3 ǃnâs ge “uniǁaen” ti ra ǂnûiǃkhunihe Koloseǁîn 2:19 ǃnâ. Uniǁaedi ge kaise ǀgaisa tsî ra īǁkhā kai î-i ǂkhōga ǀguiba hâ. ǁNās ǁkhās khami î ge ǂkhîb tsî ǃgâsana da ūba hâ ǀnamma ra hui da ǁîn ǀkha da ūhâ ǀhōsagusisa ūhâ ǀgara, ǀnî ǁaegu ai da ga ǁîn ra dī xūn xa ǃgâibahe tama i xawe.
ǃGâsa-i ga ǁaixa tamas ka io ǀhūǀhū da xawe da ge nî dītsâ ǁî-e ǁnâuǃāsa, ǁgain ǀguina ôas xa. (Kol. 3:12) Hoa da ge ǀoasaoǃnâ kurusa ūhâ tsî ǀnî ǁaegu ai nauna ra tsûtsû. Nēsa du ga ǂâis ǃnâ ūhâ, oi ge nî hui du î du “gagab ge mā du ǀguiǃnâxasiba . . ǃkhōǀgara.”