“Elob a ǀnam tsi xui-ao”

1-2. Tae-e hui da ǁkhā î da ǂgomǃgâ Jehovab ǀnam dasa?

JEHOVAB ge kaise ǁîb khoena a ǀnam. Xawen ge ǀnîna ǁnāti tsâ tama. Nēs ge ǀnîsi khoen xan ra hâ-ūhe ǀgaub xa ǃaroma-e hâ. Sadu tsîna ti ra tsâ? Tae-e nî hui du î du ǂgomǃgâsiba ūhâ Jehovab a ǀnam du sa?

² ǀGui xū-i hui du ǁkhā i ge Elobmîs ai ǃgaoǃgaosa ǃnaeǃkhaide khomaisa, ǁgau ra de Jehovab mati khoena ǃgâise hâ-ū tsî ra mû sa. Jesub ge khoena ǃgôaǃgâsiba ǁgau tsî khoexaǃnâ ǀgaub ǃnâ gere hâ-ū. Nēsa dīs ǃnâ-ūb ge ge ǁgau, ǁnān xū tamase ra tsân, ǁîb tsî ǁîb dadasab xa ǀnam-esa. (Jhn. 5:19; Heb. 1:3) Nē ǁkhāǁkhāǃâs ǃnâ da ge nî ǃhoaǃgao: (1)Matib ge Jesuba khoena huisa în mû Jehovab a ǀnam nî sa. (2)ǂGomǃgâsiba da ge ūhâ ǁkhā Jehovab sida tsîna a ǀnamsa.—Hag. 2:7.

JESUBA MATI KHOENA GE HUI ÎN MÛǂAN ǀŌ-AISAN A SA?

3. Jesuba mati ǁîba ǃoa ge sī Galileaǁîna ge hui?

³ Jesub ge Galileab ǃnâ hâ i, on ge ǂgui khoena ǁîba ǃoa hā, ǃgâ tsî gere ǂgauǂgauhe. Jesub ge ge mî, ǁîn “tsau hâ tsî ǁnāxūhe hâ gūn, ǃûi-ao-i ose hân khamin ge ī i.” (Mat. 9:36) Kerkheb ǂgaeǂgui-aogu ge ǁîna “ǀâxarexūhe hâ khoen!” khami gere mû. (Jhn. 7:​47-49) Jesub ge ǁînab a ǀnamsa ge ǁgau. ǁAeba ǁamaǂui tsîb ge ǁîna ǁkhāǁkhā tsî ge ǂgauǂgau. (Mat. 9:35) ǂGui khoena huis ǃaromab ge ǁîba apostelga ge ǁkhāǁkhā, î gu aoǁnâ sîsen-e dī, khoena ǁkhāǁkhā tsî ǂgauǂgau.—Mat. 10:​5-8.

4. Tae-e da Jesub ge ǁîb ǃgâ-aona gere hâ-ū ǀgauba xu ra ǁkhāǁkhāsen?

⁴ ǁÎb ǃgâ-aona ǃgôasib tsî khoexaǃnâse hâ-ūs ǃnâ-ūb ge Jesuba ge ǁgau, xū tamase naun xa ra hâ-ūhe khoenab ǀnamsa. Jehovaba du ra ǃoaba, xawe du ga îganǀgēo ǁîb ǀnam du tamasa, o ǂâi-oa Jesub ge mati ǁnā khoena gere hâ-ū sa. Nēsa du ga dī, o du ge nî mû Jehovab mati a ǀnam du sa.

5. Tae-e da Jesub ge Galileab ǃnâ ǀhao-ū kaikhoes xa a ǂan?

⁵ Jesub ge ǂnubis khoen ǀguina ge ǁkhāǁkhā tama hâ i. Xaweb ge ǀguri hân tsîna gere hui. Aiǁgauseb ge Jesuba Galileab ǃnâb gere aoǁnâ o, 12 kuriga ge ǀaoǂnâba ūhâ-i kaikhoes ǀkha ge ǀhao. (Mrk. 5:25) ǂHanub ǃoagus ge ǁîsa ge ǃanuoǃnâ-i tsî ǁîsa gere tsâna khoe-i tsîn ge ge ǃanuoǃnâ-i. Nēs xa ǃaromahe hâses ge ǁîsa ǀnîsi ǀguri gere hâ. Sinagogeb ǃnâs tsînas ge naun ǀkha Jehovaba ge ǃoaba tama hâ i. (Lev. 15:​19, 25) Nē kaikhoes ge ǀaesens ǀguisa ge ī tama hâ i xawe ǀnam-e tamas hâ khamis tsîna gere tsâ.—Mrk. 5:26.

6. Nē kaikhoesa tae-e ge dī îs ǂgauǂgau-e?

⁶ Nē kaikhoes ǃgoma gere tsâs ge gere ǂhâba îb Jesuba ǂgauǂgausi. Xawes ge ǁîba ge ǂgan tama hâ i, is ǂgauǂgauhe. Tae-i ǃaroma? ǁÎs ge ǀnîsi ǀaeb xa gere tao. ǁÎs ge ǀnîsi gere ǃao, Jesub nî ǃkhaebēsi sa ǃanuoǃnâs a hînas ge ǂnubis ǃnâ ǂgâ ǃkhais ǃaroma. ǁÎs ge Jesub saraba ge tsâǀkhā, ǂans ge i xui-ao ǁîb nî ǂgauǂgausi sa. (Mrk. 5:​27, 28) ǁÎs ǂgoms ge ǁîsa ge ǂgauǂgau. Jesub ge ge dî ham-e go tsâǀkhāte, ǁîs ge ǃeream tsî dīs ge xū-e ǁîba ge mîba. Jesub mati ge tanisen?

7. Jesuba mati nē ǃgoma gere tsâ kaikhoesa ge hâ-ū? (Markub 5:34)

⁷ Jesub ge nē kaikhoesa khoexaǃnâ tsî ǃgôasib ǀkha ge hâ-ū. ǁÎb ge ge mûǂan ǁîs gere ‘ǃaosa.’ (Mrk. 5:33) ǁÎb ge ǁîs ǃoagu ge khoexaǃnâ-i tsî ǁîsa gere ǂkhâǃnâ. Ti “ôase” ti hâ mîsab ge sîsenū, ob ge Jesuba ǃgôasib ǀguiba ge ǁgau tama hâ i xawe khoexaǃnâsib tsî ǀnammi tsîna ge ǁgau. (Khomai re Markub 5:34 sa.) Nēs ge ge ǂguroǃnā-i Jesub ge nē kaikhoesa ti ôa ti a ǂgaisa. ǀNîsib ge nē mîsa ge sîsenū mûb ge o nē kaikhoes ge kaise a ǃaosa. ǁÎs ge ge ǂkhî, Jesub ge ǀnamxaǃnâ tsî khoexaǃnâ ǀgaub ǃnâ ǃhoa-ūsi amaga. Mîb ge mîdi ǃnâ-ūb ge ǁîsa ge ǂkhâǃnâ tsîs ge ǁgaise ge tsâ tama-i ǁîb sarabas ge tsâǀkhā o. Jesub ge ǁîsa ǂgauǂgaus xa ǃnāsa-e gere dība ǂgao. ǁÎb ge ge ǂhâba hâ-i, is mûǂan ǀhomsi ǁGûb ǁîsa a ǀnamsa.

8. Mâ ǃgomsigas ge Brasili ǃnâ ra hâ ǃgâsasa hōǃâ?

⁸ Nētsē i ge Jehovab ǃoaba-aon tsîna ǀaeb ǃgomsiga ūhâ tsîn ge ǁnās xa ǃaromahe hâse xū tamase ra tsâ. ǃGâsas Marias,a aimâba-aos Brasili ǃnâ ra ǁans ge ǀnūgu tsî ǁareǀkhāb ǃommi tsîna ūhâ tamase ge ge ǃnae. ǁÎs ge ra mî: “ǃHora ta a ǃkhais ǃaroma ta ge skoli tawa gere ǁore-e. Tsûtsûsa ǀonde ta ge gere ǂgai-e. Ti ǀaokhoen tsîn ge ǃgâi tama ǀgaub ǃnâ gere hâ-ūte.”

9. Mariasa mati ge hui-e îs mû Jehovab a ǀnamsisa?

⁹ Mariasa mati ge hui-e? Jehovab di ǀhûǀguitimî-ao kais ge, on ge ǁîs ǀhaohâb ǃnâ hâ ǃgâsana ge huisi îs Jehovab ǁîsa ra mû ǀgaub ǃnâ mûsen. ǁÎs ge ra mî: “Kaise ta ge ra ǃgôaǃga, Jehovab ge ǃgâi omarisa ǀhaohâb ǃnâ māte o. ǂGui ǃgâsan ge ge hui te.” ǁNā ǃgâsan ge Marisa ge hui îs mûǂan Jehovab a ǀnamsisa.

10. Mâ ǃgomsinas ge Maria Magdalenesa hōǃâ? (Ai-īsiga mû re.)

¹⁰ ǃGaoǃgâ re Jesub ge mati Maria Magdalensa hui ǀgauba. ǁÎs ge 7 demonga ge ūhâ-i. (Luk. 8:2) Marias ge īǁkhāsib ga hâ o, ǃgâi tama ǀgaub ǃnâ gere tanisen, demongas ge ūhâ-i amaga. Tsî ǁnās xa ǃaromahe hâsen ge khoena ǁîsa xu ǃnūse gere hâ. ǁÎs ge ǃgoma tsâ tsî gere ǃao khoe-i huisi tide tamas ka io ǀnamsi tidesa. Jesub ge ǁîsa demonga xu ge ǃnora kai tsîs ge ge ǁîb saosabe kai. Mâ ǀnî ǀgaub ǃnâb ge Jesuba Maria Magdalenasa hui îs mûǂan Elob a ǀnamsi ǃkhaisa?

11. Jesuba mati ge ǁgau Maria Magdalenas Jehovab xa ǀnam-e sa? (Ai-īsiga mû re.)

¹¹ Jesub ge Maria Magdalensa aiǂhanuba ge mā, îs ǁîb tsî ǁîb ǁkhāǁkhāsabegu ǀkha aoǁnâ.b ǁÎs ge gere ǃgâ, Jesub ge mati nauna gere ǁkhāǁkhā ǀgausa. Jesub ge khâisab ge māhe o, ǁîs tawa ge sī. ǁÎs ge ge ǂguro ǁkhāǁkhāsabe-i Jesub ge ǁnā tsēs ai ǃhoa-ū sa. Jesub tsîn ge ǁîsa ge ǂgan îs nau apostelga sī mîba khâisab ge hōsa. Nē ǀgaugu hoa gu ǃnâb ge Jesuba ge ǁgau, îs mû Elob a ǀnamsisa.—Jhn. 20:​11-18.

12. ǁGuiǃā re tae-i ǃaromas ge Lidiasa ǀnam-e tamas hâ khami gere tsâsa?

¹² Maria Magdalenas khamin ge ǂguina nētsē ǀnam-e tama khami ra tsâ. ǃGâsas Lidias Spanjeba xu ra hās ge ra mî, mamasas ge ǁîsa gere āǁnâ ǂgao. ǂKhariros ge ios ge Lidiasa ra ǂâihō mamasas ge mati ǃgâi tamase hâ-ū si tsî ǁgai mîde gere mîsi ǀgausa. ǁÎs ge ra mî: “Ti mamas ge ǀnamma ǁgaute tama hâ-i, amaga ta ge hoaǁae gere ǂhâba în nau khoena ǀnamte tsî ti ǀhōsa kai. ǃAo ta ge gere tae-i ǀgui-e ta ga dī xawen khoena ǀnamte tidesa.”

13. Tae-e Lidiasa ge hui îs mû Jehovab xas ǀnam-e ǃkhaisa?

¹³ Lidias ge Elobmîsa ǁkhāǁkhāsen tsoatsoa, on ge xūna ge tawa. Jehovaba ǃoa ǀgores, Elobmîsa khomai tsî ǃgâsan khoexaǃnâ mîdi tsî dīgu tsîn ge ge huisi îs ǁnâuǃā Jehovab ǀnamsisa. ǁÎs ge ra mî: “Ti aob ge hoaǁae ra mîba te ǀnamteb asa. ǁAeba xu ǁaeb ǀkhab ge ti ǃgâi ǀgaugu xa ra ǂâiǂâiǃnâ te. Sîm ǀhōsan tsîn ge ǁkhā xū-e ge dī.” Khoe-i xa du a ǂâi ǁkhā, hui ǁkhā du a-e î-i ǁnâuǃā Jehova Elob ǁî-e ǀnamsa?

JEHOVAB RA MÛ DU KHAMI MÛSEN

14. 1 Samueli 16:7 mati ra hui da Jehovab khoena ra mû ǀgauba ǁnâuǃāsa? (Boksis “Jehovaba tae-i ǃaroma khoen xa ǀō-aisaba-e?” ti hâsa mû re.)

¹⁴ ǂÂis ǃnâ ūhâ Jehovab ge ǃhūbaib ra mû du khami mû du tama. (Khomai re 1 Samueli 16:7 sa.) ǂGui khoen ǃhūbaib ǃnâ hân ge ǂhâǂhâsase ra mûhe. Mûsenan ra ǀgaub, ūn hâ mari-i tamas ka io ǀgapi ǁkhāǁkhāsensan ga ūhâo. Xaweb ge Jehovaba ǁnāti mû du tama. (Jes. 55:​8, 9) Dītsâ re Jehovab ra mû du khami mûsensa tsî ǃhūbaib ra mû dus khamis ose. Elobmîs ge xū tamase gere tsâ khoen aiǁgaude ūhâ, Eliab, Naomis tsî Hanas aiǁgaus khami. ǁÎn xa du ga khomai, o ǃgaoǃgâ re Jehovab ge matikose ǁîna ǀnam isa. Sadu ûib ǃnâ ge ī xūna xoaǁnâ re, ǁgau rana Jehovab amabes ǃnâ a ǀnam dusa. ǁNās ǂam-ai du ge ǃgâi ǀgaub ǃnâ sadu xa nî ǂâi kai du ǂkhanina khomai ǁkhā ǀapeǂhomisa xu.c

15. Jehovaba tae-i ǃaroma Daniela ge ǀnam-i? (Danieli 9:23)

¹⁵ Sadu ǂgomǂgomsasib ge Jehovab aiǃâ ǀō-aisa. Danieli ge 90 kurixa iob ge kaise tsau tsî ge ǂkhabuǂâi. (Dan. 9:​20, 21) Jehovaba mati ǁîba ge ǂkhâǃnâ? Elob ge ǀhomǃgāb Gabriela ge sî, îb Daniela ǂâiǂâiǃnâ ‘Elob a ǀnambisa’ tsî i ǁîb ǀgorede ǁnâu-amhe hâsa. (Khomai re Danieli 9:23 sa.) Daniela tae-i ǃaroma Elob xa ge ǀnam-e i? Danieli ge ǂhanu-aisib tsî ǂgomǂgomsasib tsîna ge ǀnam i. (Ese. 14:14) Jehovab ge nē mîdi ge xoamâi kai, sida ǁkhaeǂgaos ǃaroma. (Rom. 15:4) Jehovab ge sadu ǀgorede ǃgâ tsî ǀō-aisaba-e, sadu ǀnammi hîna du ǃgâina dīs tsî ǁîba ǃoa ǂgomǂgomsase hâs ǃnâ-ū.—Mix. 6:8; Heb. 6:10.

16. Tae-e nî hui da î da Jehovaba ǀnamxaǃnâ dadasab ase mû?

¹⁶ ǀNam du ǁGûb ase Jehovaba mû. ǁÎb ge ra hui du ǂgao tsî tsū xū-e sadu ǃnâ mû tide. (Psa. 130:3; Mat. 7:11; Luk. 12:​6, 7) ǂGuin ge ǁnās xa ǃgamse ǂâis xa ge hui-e, în tā ǁgaise ǁîn xa ǂâi. Aiǁgause, ǀgui ǃgâsas Spanjeb ǃnâ ra hâs Michelle ti ǀon hâs ge ǂgui kuriga ǁîs aob xa ǁgaise hâ-ūhe tsî ǁgai ǀondi tsîn gere ǂgai-e. Tsîs ge nēsa ǁîsa xū tamase gere tsâ kai. ǁÎs ge ra mî, “ǁgaise ta ga tsâ, o ta ge ra mûnan-ai, Jehovab tani te tsî ra ǁkhaubate ǀgausa.” (Psa. 28:9) ǃGâsas Laurens Suid-Afrikab ǃnâ ra hâs ge ra ǂâiǂâiǃnâsen, “Jehovaba ga tita ǀnammi ǃnâ ǂgae, hui te î ta ǁîb ǀgūse hâ tsî sîsenū te î ta nau khoena ǁkhāǁkhā, ob ge amase tita ǀō-aisase ra mû.”—Hos. 11:4.

17. Tae-e hui du ǁkhā î du ǂgomǃgâsiba ūhâ Jehovab xa du ra ūǃoahesa? (Psalmdi 5:12) (Ai-īsiba mû re.)

¹⁷ ǂGomǃgâsiba ūhâ Jehovab xa du ra ūǃoahesa. (Khomai re Psalmdi 5:12 sa.) Davidi ge Jehovab xa ūǃoahesa kai “ǁkhaukhōs” Elob ǂgomǂgomsa khoena ra ǁkhaubas ǀkha ge ǀgopeǀnō. Jehovab ūǃoas tsî ǂkhâǃnâsa da a ǂans ge hui da ǁkhā, î da tā ǃgôaǁnâsen. Mati du a ǂan ǁkhā Jehovab xa du ra ūǃoahesa? Mû da go khami Jehovab ge ǂgomǃgâsiba ra mā da ǁîb mîs ǃnâ-ū. ǁNās ǂam-aib ge ǀhaohâb ǃûi-aogu, ǀgū ǀhōsan tsî naun tsîna ra sîsenū î da ǂâiǂâiǃnâ-e Jehovab a ǀnam da sa. Mati du ǁnāti-i ǂkhâǂnâsa nî ūǃoa?

18. Tae-i ǃaroma du khoexaǃnâ mîde nî ūǃoa?

¹⁸ Khoen ga khoexaǃnâ tamas ka io ǃgâi mîde mîba du, o tā ǂâi ǁîn ra ǂhumi ti. Jehovab ge ǁnā khoena sîsenū ǁkhā, î du hui-e tsî ǂanǃgâ Jehovab ra ūǃoa du sa. Michelles ǃkharugo xoaǀgoras ǃnâ go hâ is ge ra mî: “Ti ǂgaob ǃnâ ta ge ǂkharibese khoexaǃnâ mîde ra ūǃoa tsoatsoa. ǀNî ǁaegu ai i ge a ǃgom xawe ta ge ǂan Jehovab ra ǂhâbasa î ta ǁnā-e dī.” ǀHaohâb ǃûi-aogu tsîn ge ǁîsa ge hui, îs mûǂan Jehovab xas a ǀnam-e ǃkhaisa. ǁÎs ge nētsē aimâba-aos ase ra ǃoaba tsî omsa xu Betelsa ra sîsenba.

19. Tae-i ǂgomǃgâsiba da nî ūhâ Jehovab ǀnam da sa?

¹⁹ Jesub ge khoexaǃnâ mîdi ǀkha ra ǂâiǂâiǃnâ da, Jehova Elob sida ǀnamsa. (Luk. 12:24) ǂGomǃgâsiba da ge ūhâ ǁkhā Jehovab amabes ǃnâ ǀnam da sa. Tā da nēsa ǀuru. A da ǁkhā da-e dī tsî nau khoena hui în mû Jehova Elob ǀnam nî sa.