Jehovab ge ‘tsûaǂgao hâna ra ǂgauǂgau’

1. Jehovaba mati ǁîb ǃoaba-aon xa ra tsâ?

JEHOVAB ge ǁîb ǃoaba-aon hoan ra ǃkharuǃnâ xūna ra mû. ǁÎb ge ǃgâiaǂgao tsî da ga tsûaǂgao o ra mû. (Psa. 37:18) ǁKhā da a-i hoa-e da ga hōǃâ da ra tsûaǂgaob ǂam-ai ǁîb ǃoabas ǃnâ dītsâ, ob ge kaise sida ǀkha a ǂkhî. ǁÎb ge ǃnāsase ǁnās ǂam-ai hui tsî ra ǁkhaeǂgaoda ǂgao.

2. Jehovaba tae-e tsûaǂgao hâna ra dība tsî da mati ǁîb kōǃgâsa xu ǃgâiba ra ǀama?

² Psalmdi 147:3 ge ra mî Jehovab ge tsûaǂgao hâna ra “ǂgauǂgau.” Nē xoas ge ra ǁguiǃā matib Jehovaba tsûaǂgao hâna ra kōǃgâ ǀgausa. Tae-e da nî dī î da hōǃâ Jehovab ra kōǃgâ da ǀgauba? Sao ra aiǁgaus xa ǂâi re, ǀaedī-aob ge tsû hâ khoe-e a hui ǁkhā î-i ǂgau. Tsû hâ khoe-i ge ǀaedī-aob go mā daoǁgausa i ga ǂōrisase sao-ai o ǀgui nî ǂgau. Nē ǁkhāǁkhāǃâs ǃnâ da ge nî mû Jehovab tae-e tsûaǂgao hâna ra mîbasa. Tsî da ge nî ǃhoaǃgao mati da ǁîb di ǀnamxaǃnâ daoǁgausa nî sîsenūsa.

JEHOVAB GE ǀŌ-AISA DA ASA RA ǂÂIǂÂIǃNÂ DA

3. Tae-i ǃaroman ǀnî khoena xū tamase ra tsâ?

³ Tsûaǂgaoxasen ge khoena nē ǃhūbaib ǃnâ ǀnamgu tama. ǁNās xa ǃaromahe hâsen ge ǃâi tamase hâ ūhe tsî xū tamase ra tsâ kaihe. Helena ti ǀon hâ ǃgâsas ge ra mî: “Ti ǁgûra ge ǀnama ge ǁgaute tama hâ i. Ti dadab ge kaise ge ǃkhamxa i tsî tsēs hoasa gere mîba da, xu tama da hâsa.” ǀNîsi i ge khoe-e ǁgaise hâ-ū tsi, hoaǁae mîǁgaiǁgai tsî xū tamase gere tsâ kai tsi. ǁNāti i ga ī, o i ge kaise a ǃgom khoe-i ama ǀnam tsisa ǂgomsa.

4. Psalmdi 34:18 ǃoagub Jehovaba mâ ǂgomǃgâsiba ra mā da?

⁴ Nau khoen ga ǃgâi tamase hâ-ū tsi xawets ge ǂgomǃgâsiba a ūhâ ǁkhā Jehovab a ǀnam tsi tsî ra ǃgôaǃgâ tsisa. ǁÎb ge “khôaǂkhūsan ǀgūse hâ.” (Khomai re Psalmdi 34:18 sa.) Xū tamasets ga tsâ o ǂâis ǃnâ ūhâ re, Jehovab ge sats ǃnâ ǃgâiba ge mû tsî ǁîb ǃoa ge ǂgae tsi. (Jhn. 6:44) ǁÎb ge hoaǁae ra hui tsi ǂgao ǁîb kaise a ǀnamtsi amaga.

5. Tae-e da Jesub ge ǃgôaǁnâhe ra khoena hâ-ū ǀgauba xu a ǁkhāǁkhāsen ǁkhā?

⁵ Jehovab ra tsâ ǀgauba da ge a ǁkhāǁkhāsen ǁkhā Jesub di aiǁgausa ǃgaoǃgâs ǃnâ-ū. ǃHūbaib aib ge hâ i, ob ge Jesuba nau khoen xa gere ǃgôaǁnâhe khoena, khoexaǃnâsiba gere ǁgau. (Mat. 9:​9-12) ǀGui tarekhoes ǀaoǂnāba ge ǀaesen hâ īs ge ǂgauǂgauhes nî ǃkhaisas gere ǂgom amaga Jesub di saraba ge tsâǀkhā. Ob ge Jesuba ǁîsa ǁkhaeǂgao tsî ǁîs ǂgoms ǃaroma ge koa. (Mrk. 5:​25-34) Jesub ge ǀoasase ǁîb ǁGûba gere ǁgae. (Jhn. 14:9) ǂGomǃgâ ǁkhāts ge a Jehovab aiǃâts a ǀō-aisasa tsîb ge sa ǃgâi ǀgauga ra mû, ǁnās ge ǂgoms tsî ǁîbats ūba hâ ǀnammi tsîna.

6. Tae-ets a dī ǁkhā, xū tamasets ga tsâ o?

⁶ Tae-ets a dī ǁkhā xū tamasets ga tsâ o? Jehovab aiǃâts a ǀō-aisas xa hâ xoade khomai tsî ǂâiǃgâ re.b (Psa. 94:19) Tā naun ǀkha ǀgopeǀnōsen tsî dī ǁoats a xūn ai ǂâisa ǂnûi. Jehovab ge dīho ǁkhāts an ǂam-ai ǃnāsa-e ǂgaoǀkhā tsi tama hâ. (Psa. 103:​13, 14) ǃkharu ge ǁae i ga khoe-e ǂnau tsi tamas ka io ǀnîsi ǀgaiǃkhō tsi, o tā nēs xa ǀhapiǂgā-amsen re. ǁNā ǀgaub ǃnâ tsūdīhesats ge anu tama hâ. ǂÂis ǃnâ ūhâ Jehovab ge ǁnān hîna nauna ra tsūdīna ǀhapixase nî ǀgoraǃgâ. Xaweb ge tsûtsûhe hâna nî hui. (1Pet. 3:12) Sandras, ǀgôaros a hîna ge ǁgai ǀgaub ǃnâ hâ ūhes ge ra mî: “Hoaǁae ta ge Jehovaba ra ǀkhoma îb huite î ta tita ūhâ ǃgâi ǀgauga mû ǁkhā.”

7. Sada ûib ǃnâ da ge ǃkharuǃnâ xūnab mati Jehovaba ǁîb ǃoabas ǃnâ a sîsenū ǁkhā?

⁷ ǂGomǃgâ re Jehovab ge satsa a sîsenū ǁkhā îts nauna hui. ǁÎb ge aoǁnâ sîsenni ǃnâ sats ǀkha ǀguiba sîsenǁares aiǂhanuba mā tsi hâ. (1Kor. 3:9) Sats ge ǃkharu ǃnâ ǃgom mâsigu ge supusupuba tsi ǁkhā îts ǃgoma ra tsâ khoena ǁnâuǃā ǁkhā. ǂGui ǀgaugu ǃnâts ge ǁîna a hui ǁkhā. Helens ǃhoaǃgao da gos ge huiba ge ǃkhōǃoa tsîs ge nēsi naun tsîna a hui ǁkhā. ǁÎs ge ra mî: “Xū tama i khami ta gere tsâ xaweb ge Jehovaba ǀnam-e ta a khami ra tsâ kaite tsî ra sîsenūte î ta nauna hui ǁkhā.” Helens ge kaise ra ǃgâiaǂgao ǁnaetisa aimâba-aos ase ǃoabas ǃnâ-ūs nau khoena ra huisa.

JEHOVAB ǀÛBASA ŪǃOA

8. Jesajab 1:18 tae-i ǂgomǃgâsiba ra mā da?

⁸ Jehovab di ǃoaba-aon ǀnîn ge ǁāǁnâs aiǃâ tamas ka io ǁāǁnâs khaoǃgân ge dī ǁoren xa ra ǀhapitsâsen. Xawe da ge tā nî ǀuru Jehovab kaise a ǀnam dasa tsîb ge ǁnās ǀkha Xoremarib ǁguibasa a māsa în sida ǁorena ǀûbahe ǁkhā. Amaseb ge ǁîba ra ǂhâba î da ǁnā ǀkhaeba ūǃoa. Jehovab ge ǂgomǃgâsiba ra mā da ǃgomsiga da ga ǁîb ǀkha hoase “ǃhoaǂui”c ob nî ǀûba dasa. (Khomai re Jesajab 1:18 sa.) Kaise da ge ra ǃgôaǃgâ sida ǀnamxaǃnâ ǁGûb Jehovab sida ǁorena ra ǀûbasa. ǁKhā ǁaeb aib ge ǁîba dī da ra ǃgâina ǀuru tama hâ.—Psa. 103:​9, 12; Heb. 6:10.

9. Tae-i ǃaroma da ǃkharu ge ǁaeb ǃnâ da ge dī ǁoren xa ǂâi tide?

⁹ ǃKharu ge ǁaeb ǃnâts ge dī ǁoren xats ga ǂâiǂhâsen o ǃgarise dītsâ tsî nēsis tsî hānîǁaeb ǃnâts nî dī xūn xa ǂâiǃgâ re. Apostel Paulub aiǁgausa ǃgaoǃgâ re, Xristeǁînab gere ǃgôaǃgons xab ge ǁîba kaise gere ǃhausen xaweb ge ge ǂan i Jehovab ge ǁîba a ǀûbasa. (1Tim. 1:​12-15) ǁÎba aiǃgû tsî dīsab ge ǁoren xa gere ǂâi? ǁÎb ge nēsa ge dī tama hâ i. Xūn hînab ge dī îb Farise kain xab ge ǂâiǃgâ tama hâ i khami. (Fil. 3:​4-8, 13-15) Paulub ge aiǃgû tsî ǁkhāb ana aoǁnâ sîsenni ǃnâ dī tsî hānîǁaeba ǃoa gere kō. ǁÎb khamits ge ī ge xūna a ǀkharaǀkhara ǁoa xawets ge nēsi Jehovaba koa tsî a ǂkhîǂkhî ǁkhā. ǁÎb hānîǁaeb xa mîmâi hâ buruxa mîmâidi xas tsînats ge a ǂâiǃgâ ǁkhā.

10. Tae-e da dī ǁkhā ǃkharu ge ǁaeb ǃnâ da ge dī xūn ga nauna tsûtsû o?

¹⁰ ǀNîsits ge ǃkharu ge ǁaeb ǃnâts ge nauna a tsūdī ǀgaub xa a ǂâiǂhâsen ǁkhā. Tae-e a huitsi ǁkhā? ǁKhāts an hoana dī, ǁîn ǀkha xūna ǃgâiǃgâi tsî ǂgaob ǃgamsiba xu ǀûbaba ǂgan re. (2Kor. 7:11) Jehovaba ǂgan re îb sats xa ge tsūdīhena hui. ǁÎb ge sada hoada hui ǁkhā î da aiǃgû tsî ǁîba ǂkhîb ǃnâ ǃoaba.

11. Tae-e da kēbo-aob Jonab di aiǁgausa xu a ǁkhāǁkhāsen ǁkhā? (Tsoatsoas ai hâ ai-īsiba mû re.)

¹¹ ǃKharu ge ǁaeb ǃnâts ge dīsa xūna xu ǁkhāǁkhāsen re. Tsî mā-am re îb Jehovaba sîsenū tsi ǁîb ra ǂhâba ǀgaub ai. Kēbo-aob Jonab di aiǁgausa ǃgaoǃgâ re, Elob ge Jonaba ge mîmā îb Ninevesa ǃoa ī xaweb ge ǁîba ǀnî hâ ǃāsa ǃoa gere ī ǂgao. Jehovab ge Jonaba ge ǁnama tsîb ge ǁîb dīsāna xu ge ǁkhāǁkhāsen. (Jon. 1:​1-4, 15-17; 2:​7-10) Jehovab ge aiǃgû tsî Jonaba kēbo-aob ase ge sîsenū. Jehovab ge ǁkhapa ge mîba bi îb Ninevesa ǃoa ī. Nē ǃnās aib ge ge ǁnâuǀnam, dīsab ge xū-i xab gere ǃhausen xaweb ge Jonaba Jehovab ge ǂgānbi xū-e ge dī.—Jon. 3:​1-3.

JEHOVAB GE ǃANU GAGAB ǃNÂ-Ū RA ǁKHAEǂGAODA

12. Jehovaba mati ǂkhîba ra māda ǃgomsiga da ga hōǃâ ǁaeb ai? (Filipeǁîn 4:​6, 7)

¹² Jehovab ge ǁîb ǃanu gagab ǃnâ-ū ra ǁkhaeǂgao da ǁgai xū-i ga sida ǀkha ī o. Ronni tsî Carols aiǁgaus xa ǂâi re, ǁîra ǀgôab ge ge ǃgamsen. ǁÎra ge ra mî: “ǀNaim ge ǃgomsina hōǃâ tsâ hâ xawe i ge nēs ǀkha a ǀgopeǀnōhe ǁoa. ǁOm hō tamam ge hâ i om ge Jehovaba ǃoa gere ǀgore. Tsîm ge amase ǁnā ǂkhîb Filipeǁîn 4:​6, 7 ǃnâ ra ǃhoaǃgaoheba ge hōǃâ.” (Khomai re.) Tsûaǂgao kai tsi ra ǃgomsi-ets ga ǃkharuǃnâ ǁaeb ai Jehovaba tsâts ra ǀgauba mîba re. ǁÎb ǀkhats ge hoaǁae a ǃhoa ǁkhā. (Psa. 86:3; 88:1) Jehovab ai ǁîb ǃanu gagaba ǂgan ǀgara re, ǁîb ge tātsē ǃnōxu tsi tide.—Luk. 11:​9-13.

13. ǃAnu gagaba mati a hui da ǁkhā aiǃgû tsî Jehovaba ǂgomǂgomsase ǃoabas ǃnâ? (Efeseǁîn 3:16)

¹³ ǁKhōǁkhōsa mâsibats hōǃâ tsâ hâ tsîts xū-e dīs ǀgaibats ūhâ tama khami ra tsâ? ǃAnu gagab ge ǁnā ǀgaiba a mā tsi ǁkhā îts aiǃgû tsî Jehovaba ǂgomǂgomsase ǃoaba. (Khomai re Efeseǁîn 3:16 sa.) Flora ti ǀon hâ ǃgâsas aiǁgausa ǃgaoǃgâ re. Khoe-aoguse ra sîsabese ra ǃoaba hînab ge aoba ge ǀai tsî ra ge ǁnās ǀkha ge ǀgora. ǁÎs ge ra mî: “ǁÎb ge dī xū-i ge kaise ge ǁaixa kaite tsî ta ge ǁnās xa ǀgui gere ǂâi. Jehovab ai ta ge ǁîb ǃanu gagaba ge ǂgan îb huite mâǀgaisa. Jehovab ge kaise ge ǁkhaeǂgaote nēs ge īǁoa a khami gere mûsen xawe.” ǀGai tsî ta ge ǁîb huib ǀkha ge mâǀgai. Floras ge ra mî, Elob ge ge huisi îs ǁîb ǃnâ ǂgomǀgara tsîs ge ra ǂgomǃgâ ǁîb aiǃgû tsî ǃgomsigu ǃnâ nî huisisa. ǁÎs ge ra ǀaro: “Psalmdi 119:32 ǃnâ hâ mîdi ge tita ǃoa hâ. Nē ǁaraǃās ge ra mî, ‘sa mîmādi di daob ai ta ge turaxase ra ǃgû; sats ra ti ǂgaoba harahara xui-ao.’”

14. Mati da a mā-am ǁkhā îb Elob ǃanu gagaba hui da?

¹⁴ Jehovab ǃanu gagabats ga ǀgores ǃnâ ǂgan toas khaoǃgâts tae-e nî dī? Elob ǃanu gagaba ǃkhōǃoas ǀkha nî hui xūn ǃnâ ǃnāsase ǁhao re. Nēs ge ǀhaode hâǃnâs tsî aoǁnâs tsîna ǃkhōǂgā hâ. Elobmîsa tsēs hoasa khomai, nēs ge nî hui tsi ǁîb ǂâiǀgaub xa ǂâiǃgâsa. (Fil. 4:​8, 9) Elobmîs khomaiǃâsats ra khomai khami ǃgaoǃgâ re ǁnān hîna ge ǃgomsina a hōǃân xa. Tsî Jehovab ge ǁîna hui ǀgaub xa ǂâiǃgâ re. Sandras ǃhaoǃgao da gos ge ǂgui ǃgomsina ǁîs ûib ǃnâ ge hōǃâ. ǁÎs ge ra mî: “Josefi xa hâ ǃnaeǃkhais ge kaise ra ǂkhâǃnâte. ǁÎb ge ge mā-am tama hâ i în ǃgomsin hînab gere hōǃâna Jehovab ǀkhab ūhâ ǀhōsagusisa ǂkhabu kai.”—Gen. 39:​21-23.

JEHOVAB GE ǃGÂSAN ǃNÂ-Ū RA HUIDA

15. Ham-e xu da ǁkhaeǂgaosa a hō ǁkhā tsî ǁîna mati a hui da ǁkhā? (Ai-īsiba mû re.)

¹⁵ ǃGomsina da ra hōǃâ ǁaeb ǃnân ge sida ǃgâsana ‘kai ǁkhaeǂgaos’ ase nî ī. (Kol. 4:11) Sida ǃgâsan ǃnâ-ūb ge Jehovaba amase ra ǁgau ǀnamdab asa. ǁÎn ge sida sari tsî tsâ da ra ǀgauba da ra ǁgâiǂûisen ǁaeb ai ra ǃgâ. ǃGâsan ge Elobmîs xoasa khomai tamas ka io sida ǀkha a ǀgore ǁkhā.d (Rom. 15:4) ǀNî ǁaeb ai i ge ǃgâsa-e Jehovab ǂâiǀgaub xa a ǂâiǂâi da ǁkhā. Tsîs ge nēsa a hui da ǁkhā ǃnomsase mâǀgaisa. ǃGâsan ge ǀnî ǁaegu ais tsîna ǀnî ǀgaugu ǃnâ a hui da ǁkhā aiǁgause, ǂû-e mādas tsîna.

16. Tae-e da nî dī î da nauna xu ǂkhâǃnâsa hō ǁkhā?

¹⁶ ǀNî ǁaegu ai da ge huiba aitsama ǃgâsana xu nî ǂgan. Sida ǃgâsan ge a ǀnamda tsî ra hui da ǂgao. (ǂKhm. 17:17) Xawen ge a ǀū mati da ra tsâs tamas ka io tae-e da ǂhâ hâsa. (ǂKhm. 14:10) ǂÂiǂhansents ga ǁaeb ai ǃgâi ǀhōsan ǀkha ǃhoa tsî ǁîna tsâts ra ǀgauba mîba re. Tae-i satsa a hui ǁkhās tsîna ǁîna mîba. ǀNîsits ge ǀgū ǀhōsa-i asets ra mû ǀhaohâb ǃûi-aob ǀkha a ǃhoa ǁkhā. ǀNî ǃgâsadi ge kaise ǃgâise ra tsâ gagasise ǀgaisa Xristeǁî ǃgâsadi ǀkha di ga ǃhoa o.

17. Mâ xūna a ǃgomǃgom ǁkhā î da ǂkhâǃnâsa tā hō tsî nē xūna da mati a sîsenǂam ǁkhā?

¹⁷ Tā ǀguriǀgurisen. ǀNî ǁaegu aits ge ǁnātikōse a ǁaixa ǁkhā tsî naun ǀkha ǀguiba hâ ǂgao tide. ǀNî ǁaegu ais tsînan ge ǃgâsana sats ra tsâ ǀgauba ǁnâuǃā tide tamas ka io tsûtsû tsi ǁkhā xūna a mî ǁkhā. (Jak. 3:2) Xawe hâs ge tā sa ǃgâsana xu hâbe, Jehovab ge ǁîn ǃnâ-ū a ǂkhâǃnâ tsi ǁkhā. Gavin ti ǀon hâ ǃgâsab dipresiba ūhâb ge ra mî: “ǃNāsa ǁaeba ta ge ti ǀhōsan ǀkha ǃhoa tamas ka io sari ǂgao tama hâ.” Xaweb ge Gavina ǀûsen tama, ǁîb ǃgâsan ǀkha hâ ǀhaosa. Tsîb ge kaise ǃgâise ra tsâ ǁnāsab ga dī o. Ami ti ǀon hâ ǃgâsas ge ra mî: “ǃKharu ge ǁaeb ǃnâ ta ge hōǃâ tsûaǂgaob ge ge ǃaroma î ta tā nau khoena ǂgomǃgâ. Xawe ta ge nēsi ra ǁkhāǁkhāsen ti ǃgâsana Jehovab a ǀnam nî khami ǀnamsa. ǂAn ta ge a nēs ge Jehovaba ra ǂkhîǂkhîsa tsî ta ge tida tsîna ra ǃgâiaǂgao.”

JEHOVAB MÎMÂIDI XA ǁKHAEǂGAOHE

18. Tae-e da hānîǁaeb ǃnâ ra mûǂûi tsî tae-e da nēsi nî dī?

¹⁸ Jehovab ge ǀgūǁae ǂâiǂhansen kai da ra xūn tsî tsûn hîna da ra hōǃân tsîna nî ūbē. (J.ǂHa. 21:​3, 4) Tsûtsû da ra xūn ge ǁnā ǁaeb ai “ǂâihō-e tide” sida ǂgaogu ǃnâ. (Jes. 65:17) Xawe nēsis tsînab ge Jehovaba ǃgomsiga da ga hōǃâ o ra kōǃgâ da. Jehovab ra mā da ǀnamǀnamxa huiba ǁkhaeǂgaos ase ūǃoa re. Tā îganǀgē “ǁîb sado ra ǂhansenba xuige.”—1Pet. 5:7.