Tātsē da ge ǀguri hâ tama

1-2. (a) Tae-i ǃaroma da a ǂgomǃgâ ǁkhā ǀguri da hâ tamasa ǃgomsina da ga hōǃâ o? (b) Tae-e da nē ǁkhāǁkhāǃâs ǃnâ nî ǃhoaǃgao?

KAI ǃgomsiga da ga hōǃâ, o da ge ǃgarob ǃnâ kā tsî da ǁnāpaxū ǂoa hō ǁoa khami a tsâ ǁkhā. Xawe da ge ǀguri hâ tama. Sida ǀhomsi ǁGûb ge ǃkharuǃnâ da ra ǃgomsina mû tsî ra hui da. Jehovab ge ǀnamxa ǀgaub ǃnâ ǁîb di ǂgomǂgomsa ǃoaba-aona ra mîba: “Tita ge . . nî hui tsi.”—Jes. 41:10.

² Nē ǁkhāǁkhāǃâs ge nî ǃhoaǃgao matib Jehovaba (1) daoǁgau da, (2) sida ǂhâsiga kōǃgâ, (3) ǁkhauba da tsî (4)  ra ǁkhaeǂgao da ǀgausa. Jehovab ge ǂgomǃgâsiba ra mā da, ûib ǃnâ da ga ǃkharagagu ǃgomsina hōǃâ xaweb ǀūru da tidesa. ǁÎb ge hugas tsîna ǁnāxuǃgâ da tide. ǁNā-amaga da ge ǀguri hâ tama.

JEHOVAB GE RA DAOǁGAU DA

3-4. Jehovaba mati ra daoǁgau da? (Psalmdi 48:14)

³ Khomai re Psalmdi 48:14 sa. Jehovab ge a ǂan aitsama da a daoǁgausen ǁoasa tsî da ǁîb xa daoǁgauhesa ǂhâ hâsa. Nētsēb ǁîb di ǂgomǂgomsa ǃoaba-aona mati ra daoǁgau? ǀGui ǀgaub ǁnāsab ra dīs ge Elobmîs ǃnâ-ūsa. (Psa. 119:105) Jehovab ge Elobmîsa ra sîsenuse ra hui da î da ǃgâi mîǁguiga dī tsî ǁîb khami tanisen tsî ǂâi. ǁÎb Elobmîs ǃnâ ra mî xūna da ga ǁnâuǀnam, o da ge nēsi ǃgâi ûiba ūhâ tsî hānîǁaeb ǃnâ ǀamose a ûi ǁkhā.a Aiǁgauseb ge ra ǁkhāǁkhā da î da nauna ǀûba tsî tā ǁaixa hâse hâ. Î da ǂhauǃnâ dī da ra xūn hoan ǃnâ tsî nauna ǂgaob ǃgamsiba xu ǀnam. (Psa. 37:8; Heb. 13:18; 1Pet. 1:22) Nē ǀgaugu ǃnâ da ga taniseno da ge ǃgâi ǁgû, ǃgamme khoe tsî nî ǀhōsa kai.

⁴ Elobmîs ǃnâb ge Jehovaba sida khami ī tsâsin tsî ǃgomsina gere hoǃâ khoen xa ra mîba da. (1Kor. 10:13; Jak. 5:17) Nē khoen di ûigu xa da ga khomai tsî ǁkhāǁkkhāsen da ra xūna ûiǂuio da ge ǀgam ǀgaugu ǃnâ ra ǀama. ǂGurose da ge ra ǁnâuǃā sida ǀguida ûib ǃnâ ǃgomsina ūhâ tama hâsa. ǀNîn ge ǁkhā ǃgomsiga ge ūhâ ī tsî Jehovab huib ǀkha ge mâǃkharu. (1Pet. 5:9) ǀGamǁîse da ge ra ǁkhāǁkhāsen tae-i nî hui da sa î da sida ǃgomsina mâǃkharu tsî ǂkhîse hâ ǀgara.—Rom. 15:4.

5. Ham-eb Jehovaba ra sîsenū îb daoǁgau da?

⁵ Jehovab ge ǃgâsan tsîna ra sîsenū în daoǁgau da.b Aiǁgause, ǃnarimâra mûǂam-aogu ge ǁaeba xu ǁaeb ǀkha ǀhaohâga ra sari î gu ǂkhâǃnâ da. ǁÎgu ra mā ǃhoadi ge sida ǂgomsa ra ǀgaiǀgai tsî ra hui da î da ǀguiǃnâxase hâ ǀgara. (ǃNǃkh. 15:40–16:5) ǀHaohâb ǃûi-aogu tsîn ge ǃgarise ra sîsen î-i mâ ǃgâsa-i hoa-e Jehovab ǀgūse hâ ǀgara. (1Pet. 5:​2, 3) ǁGûn ge ǁîn ǀgôana ra ǁkhāǁkhā în Jehovaba ǀnam, ǃgâi mîǁguiga dī tsî ǃgâi ǁnaedīga ūhâ. (ǂKhm. 22:6) Gagasise ǀgaisa ǃgâsadi ge ǁîdi aiǁgaus ǃnâ-ū, ǂkham ǃgâsade ra hui ǀapemās ǃnâ-ū tsî ra ǂkhâǃnâ di.—Tit. 2:​3-5.

6. Tae-e da nî dī î da Jehovab daoǁgausa xu ǀama?

⁶ Jehovab ge ǂhâ da hâ daoǁgausa mā da hâ, î da ǃgâi mîǁguiga dī ǁkhā tsî ǂkhî ûiba ūhâ. Mati da a ǁgau ǁkhā ǁîb di huib tsî ǀapemāsa da ra ǃgôaǃgâsa? ǂKhoamîdi 3:​5, 6 ge ra mî: “Sa ǂgaob hoab ǀkha ǃKhūba ǂgomaiǂnûi, î tā sa ǁnâuǃāb ai ǂgomǃgâ.” ǁNāsa da ga dī “ob ge sida di daogu hoaga nî ǂhauǂhau.” ǁNās ge ra ǂâibasen ǁîb ge nî hui da î da ǃgomsina xu ǂgōsen tsî ǂkhî ûiba ūhâ. Kaise da ge ra ǃgôaǃgâ Jehovab ǂan da tsî a ǀnam dasa tsîb mâ ǀguiǀguibe khoe-i hoa-e ǀapemāde ra māsa.—Psa. 32:8.

JEHOVAB GE SIDA ǂHÂSIGA RA KŌǃGÂ

7. Mâ ǀgaugu ǃnâb Jehovaba ra kōǃgâ da? (Filipeǁîn 4:19)

⁷ Khomai re Filipeǁîn 4:19 sa. Jehovab ge gagasise ǀgui kōǃgâ da tama hâ. ǁÎb ge ra hui da ǃgarise da ra sîsen ǁaeb ai î da ǂûn, saran tsî hâ ǃkhai-i tsîna ūhâ. (Mat. 6:33; 2Tes. 3:12) Khoeda ase da ge nē xūn ǃaroma ra ǂâiǂhansen xawe Jehovab ge ǂhâba tama hâ î da ǁnātikōse nē xūn xa ǂâiǂhânsen. Tae-i ǃaroma? Sida Îb tātsē ǁîb di ǂgomǂgomsa ǃoaba-aona ǁnāxuǃgâ tide xui-ao, ǁîn ǂhâsigan ūhâ ǁaeb ai. (Mat. 6:8; Heb. 13:5) ǁÎba da ge hoase a ǂgomǃgâ ǁkhā mîb gao sida ǂhâsigab nî kōǃgâsa.

8. Jehovaba Davida tae-e ge dība?

⁸ ǂÂiǃgâ re Jehovab ge Davida mati hui ǀgausa. ǁÎb ge ǃgomsina hōǃâ kurigu ǃnâ, Gao-aob Saula xub gere ǃkhoeo. Jehovab ge ǁîb tsî ǁîb khoega ǂhâ gu hâ xūn ǀkha ge hui î gu ûi. Davidi gere ǂâiǃgâo Jehovab xab ge mati gere kōǃgâhe sa ob ge ge mî: “ǂKham ta ge ge i, tsî ta ge nēsi kaira hâ xawe ta ge ǂhanu-ain ge ǁnāǃgâhe hâ i tsē-i, tamas ka io ǁîn ôan ge pere-e ǂgan hâ i tsē-e a ǀū.” (Psa. 37:25) Davidi khami du ge ǀnîsi sadu tsîna mû hâ Jehovab mati ǀnamxaǃnâ ǀgauba sada tsî nau ǃgâsana kōǃgâ hâsa ǃgom ǁaegu ǃnâ.

9. Jehovaba mati nētsē ǁîb khoena ra kōǃgâ tsūkeǃgâb ga hā o? (Ai-īsiga mû re.)

⁹ Jehovab ge ǁîb khoena tsūkeǃgâb ga hâ o ra kōǃgâ. Aiǁgause, ǂgurogam ǁaeb di Xristeǁîn Jerusalems ǃnâ ge hâ in ge ǃâtsūǀkhāba gere hōǃâ, on ge ǃkharagagu ǃāde xu ǃgâsana ǁîna ǂûna gere sîba ǂhâsib ǃnân ge hâ io. (ǃNǃkh. 11:​27-30; Rom. 15:​25, 26) Elob khoen ge nētsē ǁkhā ǀgauba ūhâ tsî ǃgâsan ǂhâsib ǃnâ hâna ra hui. Tsūkeǃgâb ga hâ, ob ge Jehovaba ǀnamxaǃnâ ǀgaub ǃnâ ǁîb khoena ra ǂkhâǃnâ în ǂû-i, ǁgammi, saran tsî sōǀôan tsîna tsūkeǃgâb xa go tsâǀkhāhe khoena sîba. Tsîn ge om ra ǃgâsana salgu tsî omna ra dī-unu. Jehovab khoen ge a ǃhae ǁkhaeǂgaos tsî ǂkhâǃnâsa Elobmîsa xu ǁnān hîna go ǁîn omdi tsî ǀnamsaben tsîna ǂoaǃnâ māsa.c

10-11. Tae-e du Borisi aiǁgausa xu ra ǁkhāǁkhāsen?

¹⁰ Jehovab tsîn ge ǀnamxaǃnâ ǀgaub ǃnâ ǁîba noxopa ǃoaba tama khoen tsîna ra kōǃgâ. Jehovaba da ge ra ǁgae ǂgao tsî ǀgauga ra ôa ǂgao ǁîba noxoba ǃoaba tama khoena khoexaǃnâse hâ-ūsa. (Gal. 6: 10) Nēsa da ga dī, o da ge hui nî ǁkhā în ǃnāsase Jehovab xa ǁkhāǁkhāsen. Borisi aiǁgaus xa ǂâi re, skolhoofie hîna Ukraini ǃnâ ra hâba. Borisi ge Jehovab ǃoaba-ao tama hâ xaweb ge hoaǁae Jehovab ǃoaba-ao ǀgôana khoexaǃnâse gere hâ-ū tsî ǁîn ǂgomǀgauga ǃgôasiba gere ǁgau. Torob xa ǃaromahe hâseb ge mîǁgui o, ǁan ǃnâb ra ǃāsa xu doesa îb ǃnōrasa ǃkhai-e ǃoa ī, on ge sida ǃgâsana ǁîba ge hui. Egab ge Borisa Jesub di ǁōb ǂâiǂâisensa ge hâǃnâ. Sida ǃgâsan xab ge dībahe xūn hoan xab ga ǂâi ob ge ra mî: “Jehovab khoen ge kaise a khoexaǃnâ tsî ǃgâise gere kōǃgâ te. Jehovab ǃoaba-aona ta ge ra gangan.”

¹¹ Hoa da ge sida ǀkhomxaǃnâ ǀhomsi ǁGûba a ǁgae ǁkhā, nau khoena ǀnamma ǁgaus ǃnâ-ū ǂhâsiban ga ūhâo. Nēsin ga sida ǂgomǀgauba ǂkhâǃnâ tamas ka io ǂkhâǃnâ tama īs hoas ǃnâ. (Luk. 6:​31, 36) ǂHâba da ge ra în ǁgau nî da ra ǀnammi xa ǂkhâǃnâhe în Jehovab xa ǁkhāǁkhāsen tsî ǁîba sida ǀkha ǀguiba ǃoaba. (1Pet. 2:12) ǁÎn ga Jehovaba ǃoabas mîǁgui tama īs hoas ǃnâ da ge, ‘mās hōs ǃgâ-ai a ǃgâi xui-ao’ ǂkhîba nî hōǃâ.—ǃNǃkh. 20:35.

JEHOVAB GE RA ǁKHAUBA DA

12. Jehovaba mâ ǀgaub ǃnâb ǁîb khoena nî ǁkhaubasa ra mîmâi? (Psalmdi 91:​1, 2, 14)

¹² Khomai re Psalmdi 91:​1, 2, 14 sa. Jehovab ge nētsē mîmâi hâ ǁîb khoenab gagasise nî ǁkhaubasa. ǁÎb ge mā-am tide îb ǁGâuaba ama ǃoabasa ūbē. (Jhn. 17:15) ǂGomǃgâsiba da ge ūhâ ǁkhā kaiǁgâiǀāb ga tsoatsoa, ob Jehovaba mîmâib ge khami ǁîb khoena gagasise ǀgui kōǃgâ tidesa xawe ǁîna sorosises tsîna nî ǁkhaubasa.—J.ǂHa. 7:​9, 14.

13. Mâǀgaugu ǃnâb Jehovaba mâ ǀguiǀguibe khoe-i hoa-e ra ǁkhauba?

¹³ Jehovaba mâǀgaugu ǃnâ mâ ǀguiǀguibe khoe-i hoa-e ra ǁkhauba? Jehovab ge ǁîb mîsa ge māda î-i hui da mûsa tae-i ǂhanus tsî tae-i a tsūsa. (Heb. 5:14) Elobmîsa xu da ra ǁkhāǁkhāsen xūna da ga sîsenǂui, o da ge Jehovab ǀkha da ūhâ ǀhōsagusisa ra ǁkhauba. Nēs tsîn ge ra hui da ǃgâi mîǁguiga dīsa, î da ǂkhîb ǃnâ ûi tsî ǃgâi ǂurusiba ūhâ. (Psa. 91:4) Jehovab ge ǀhaohâb ǃnâs tsîna hui ba ra mā da tsîs ge nēsa ra hui da î da ǂgomǂgomsase ǁîb ǃoagu hâ. (Jes. 32:​1, 2) Sida ǃgâsan ǀhaohâb ǃnâ hân ge Jehovaba a ǀnam tsî ǁîba ra ǁnâuǀnam. ǁÎn ǀkha da ga ǀhaodi tsî ǁkhoaxa ǁaeba ūhâ, os ge nēsa ǂkhâǃnâ da tsî ra hui da tsūna xu ǂgōsensa.—ǂKhm. 13:20.

14. (a) Tae-i ǃaromab Eloba ǁgai xūna xu ǁkhauba da tama hâ? (b) Psalmdi 9:10 sa mâ ǂgomǃgâsiba ra mā da?

¹⁴ ǃKharu ge ǁaeb ǃnâb ge Jehovaba ǀnî ǁaega ǁîb khoena tsûtsûhes tamas ka io ǃgamhesa xu ge ǁkhauba. Xaweb ge nēsa hoaǁae ge dī tama hâ i. ǀNî ǁaega da ge ǂhanu tama “ǁaeb tsî mâsib” ǃnâ ra hōsen. (Aoǁn. 9:11) ǁGâuab a ǂhumî-aosa ǁgaus ǃnâ-ūb ge Jehovaba ge mā-am î-i ǁîb ǃoaba-aona ǃgôaǃgonhe tsî ǁō. (Job. 2:​4-6; Mat. 23:34) Jehovab ǃoaba-aon ge ǃkharu gere ǁaeb ǃnâ nēsa gere hōǃâ khamis ge ǁnās tsîna sida ǀkha nētse a īǁkhā. Jehovab ga sida ǃgomsina ūbē tama ī xawe da ge a ǂgomǃgâ ǁkhā, ǁnān ǁîba a ǀnamnab tātsē ǁnāxuǃnâ tidesa.—Psa. 9:10.

JEHOVAB GE RA ǁKHAEǂGAO DA

15. Mati da ǀgores, Elobmîs tsî sida ǃgâsan tsîn xa ra ǁkhaeǂgaohe? (2 Korinteǁîn 1:​3, 4)

¹⁵ Khomai re 2 Korinteǁîn 1:​3, 4 sa. ǀNî ǁaegu ai da ge ǃoab, ǂâiǂhâsendi tamas ka io tsûaǂgao kai da ra xūna ra hōǃâ. ǀNîsi du ge nēsi tsûaǂgao kai du ra mâsiba hōǃâ tsî ra ǀguritsâsen. Khoe-e xare ra ǁnâuǃā tsâ du ra ǀgauba? Jehovab ge ra ǁnâuǃā. Jehovab ge sida tsûb ǀguiba hōǃâ tama xaweb ge mâ ‘ǃgomsigu hoagu ǃnâ ra ǁkhaeǂgao’ da. Mâ ǀgaub ǃnâ? ǂGaoba xu da ga Jehovaba ǃoa ǀgore, ob ge “ǂkhîb Elob dib ǁnâuǃāb hoaba ǃnā hâba” ra mā da. (Fil. 4:​6, 7) Elobmîsa da ga khomai, os tsîna da ge ra ǁkhaeǂgaohe. ǁÎb mîs ǃnâb ge Jehovaba ra mîba da matikōseb a ǀnam dasa. ǁÎb tsîn ge ra ǁkhaeǂgaoda mati da gā-aisiba nî ūhâsa tsîb ge ǃâubasens tsîna ra māda. ǀHaodi dawa da ge ǁkhaeǂgaohe tsî ǂkhâǃnâ da ra xūna Elobmîsa xu ra ǁkhāǁkhāhe, ǀnam da a ǃgâsan ǀkha ǀguiba.

16. Tae-e da Nathani tsî Priscilas hâra aiǁgausa xu ra ǁkhāǁkhāsen?

¹⁶ Nathani tsî Priscilas tsîra aiǁgausa xu da ge ra ǁkhāǁkhāsen matib Jehovaba ǁkhaeǂgao tsî ra ǂkhâǃnâ dasa Elobmîsa xu. ǂGui kuriga ǃkharu hâse ra ge ge mîǁgui îra aoǁnâ-aon ǂhâsib hâba sī aoǁnâ. Nathani ge ra mî: “Sîm ge ge ǂgomǃgâ hâ i Jehovab sîm doesa nî ǀkhaesa.” ǁAeroba ra ǀasa ǁgaumâis dawa sī toa hâs khaoǃgâ ra ge ǃgomsiroba ge hōǃâ. Aiǁgause mari-i tsî ǀaeb mâsigu tsîna. Ega ra ge omsa ǃoa ge oa xawe ra ge noxoba mari ǃgomsiga gere hōǃâ. Nathani ge ra mî: “Dîsen ta ge gere tae-i ǃaromab ge Eloba ǂâim ge hâ i khami sîma ǀkhae tama hâ isa. Tsū xū-e ta dī hâ tita ge gere ǂâi.” Nathani tsî Priscillas tsîn ge ge mûǂan tsoatsoa Jehovab ge ǂhâsib ǁaeb ǃnâ ǁîra tātsē ǁnāxuǃnâ tama hâ isa. Nathani ge ra mî: “ǁNā ǃgom ǁaegu ǃnâs ge Elobmîsa gā-ai ǀhōsa-i khami ge î-i hîna ge ǁkhaeǂgao mî tsî gere daoǁgau mîsa. Jehovab ge huim îm mâǀgai, ǀgaub ai ǂâisa ǂûis ge ge huim îm tā sîm ǃgomsin xa ǀgui ǂâi. Xawe ǂgomǃgâsiba ūhâ Jehovab hānîǁaeb ǃnâs tsîna nî hui mî ǃkhaisa.”

17. Helga ti ǀonhâ ǃgâsasa mati ge ǁkhaeǂgaohe? (Ai-īsiba mû re.)

¹⁷ Sida ǃgâsan ge ǃkharagaǃnâgu ǀgaugu ǃnâs tsîna a ǁkhaeǂgaoda ǁkhā. Mâ ǀgaub ǃnâ? Aiǁgause Helga ti ǀonhâ ǃgâsas aiǁgausa ǃgaoǃgâ re Hungarib ǃnâ ra ǁansa. ǂGui kurigas ge ǂâiǂhânsen tsî xu tamase ra tsâ kaisi ǃgomsina gere hōǃâ. Xawe ǁnā ǁaegu xas ga ǂâi os ge ra mûǂan, matib ge Jehovaba ǀhaohâb ǃnâ hâ ǃgâsan ǃnâ-ū a ǁkhaeǂgaosi ǀgausa. ǁÎs ge ge xoa: “Sîsenni, ti ǀaesen hâ ǀgôaba kōǃgâs tsî nau ǃgomsigu xa ǃaromahe hâse ta gere ǂkhabuǂâisab gere mû, ob ge Jehovaba gere ǀgaiǀgaite. Mâ tsēs hoasa nē ǃkharu hâ 30 kurigu ǃnâb ge Jehovaba ǁkhaeǂgao teb nîs di mîmâisa dīǀoaǀoa hâ. Jehovab ge ǃnāsa ǁaeba naun di khoexaǃnâ tsî ǃgôaǃgâsiba ra ǁgau mîdi ǃnâ-ū ra ǂkhâǃnâte. ǂHâ ta hâ ǁaeb ai ta ge sms, sîǂkhanis tamas ka io naun ra mî ǃgâi mîdi xa ra ǂkhâǃnâhe.”

18. Mati da nauna a ǁkhaeǂgao ǁkhā?

¹⁸ Nau khoena ǁkhaeǂgaos ǃnâ-ū da ge ra ǁgau, sida Eloba da ra ǁgaesa nēb ge kai aiǂhanuba. Nēsa da mati a dī ǁkhā? ǁÎna da ge ǃnūǃnâxase ǃgâ, khoexaǃnâse ǃhoa-ū tsî ǀnîhâ ǀgaugu ǃnâs tsîna a hui ǁkhā. (ǂKhm. 3:27) Aiǃgû tsî da ge hoana nî ǁkhaeǂgao, ǁnān Jehovaba noxoba ǃoaba tama hân tsîna. Sida ǁanǁare-aon ga ǀnîsi ǁōb ǃnâ ǀnamsabe-e a ǂoaǃnâ, ǀaeb mâsiba hōǃâ tamas ka io ǂâiǂhâsendi xa ūhâ-e, o da ge ǁîna sari, ǃgâ tsî Elobmîsa xu a ǂkhâǃnâ nî ǁkhā. Jehovab “ǁGûb ǀkhomxaǂgaosigu” diba da ga ǁgae, o da ge sida ǃgâsan ǀguina hui tama hâ ǃgomsin ǃnâ mâǀgaisa. Xawe da ge ǁîba ǃoaba tama hân tsîna ra hui în ǁîb xa ǁkhāǁkhāsen ǂgao.—Mat. 5:16.

JEHOVAB GE HOAǁAE NÎ HUI DA

19. Jehovaba tae-e sida ra dība tsî mati da ǁîba a ǁgae ǁkhā?

¹⁹ Jehovab ge ǁîba ǀnamna ra tsâba. ǁÎb ge ǁnāxuǃnâ da tide ǃgomsina da ga hōǃâ o. ǀNamxaǃnâ ǁgû-i ǁî-i ǀgôa-e ra kōǃgâs, ǁnās ǁkhās khamib tsînab ge Jehovaba ǁîb ǂgomǂgomsa ǃoaba-aona ra kōǃgâ. ǁÎb ge daoǁgau, kōǃgâ, ǁkhauba tsî ra ǁkhaeǂgao da. Sida ǀhomsi ǁGûba da ge ra ǁnae, nauna da ga hui tsî ǂkhâǃnâo ǃgom ǁaegu ǃnâ. Nē ǃhūbaib ǃnâ da ge ǃgomsiga ra hōǃâ xawe da ge ǂgomǃgâ ǁkhā Jehovab sida ǀkha hâsa. ǁÎb ge mîmâiba da hâ: “Tā ǃao, tita sats ǀkha hâ xuige.” (Jes. 41:10) Nē mîmâis ge ǂgomǃgâsiba ra māda. Jehovab ǀkha da hâsa tsî da ǀguri hâ tama hâsa.