Jesub sida ǀkhomxaǃnâ ǀGapipristeri

1-2. (a) Jehovaba tae-i ǃaroma ǁîb ǀgôaba ǃhūbaiba ǃoa ge sî? (b) Tae-e da nē ǁkhāǁkhāǃâs ǃnâ nî ǃhaoǃgao? (Hebreǁîn 5:​7-9)

JEHOVAB ge 2 000 kurigu ǃkharuhâse ǁîb ǀgôaba ǃhūbaiba ǃoa ge sî. Tae-i ǃaroma? ǀGui ǃaromas, Elob ge khoena ǁoreb tsî ǁōba xū gere ore ǂgao. Tsî ǁGâuab ra ǃaroma ǃgomsin tsîna xū. (Jhn. 3:16; 1Jhn. 3:8) Jehovab ge ge ǂan-i Jesub ga khoe-i ase ǃgomsina hōǃâ, ob Jesuba nî aiǂhomisa sida ǀGapipristeri ase. Jesub ge 29ǁî kurib ǁîb ǁāǁnâs khaoǃgâ ge ǀGapiprister kai.a

² Nē ǁkhāǁkhāǃâs ǃnâ da ge nî ǃhoaǃgao tae-i ge Jesuba huisa ǃhūbaib aib ge hâ io, îb ǀkhomxaǃnâ ǀGapipristeri ase ǁgaumâihe. ǁNā-amaga i ge a ǂhâǂhâsa î da nēsa ǁnâuǃā. Tsî Jehovaba ǃoa ǀgore sida dīsādi xa da ga ǂâiǂhânsen o.—Khomai re Hebreǁîn 5:​7-9 sa.

ELOB ǀNAMǀNAMSA ǀGÔAB GE ǃHŪBAIBA ǃOA RA ǀKHĪ

3-4. Jesuba mâ buruxa ǀkharaǀkharana ge dī ǃhūbaib aib ge hā o?

³ Hoa da ge ǀkharaǀkharana sida ûib ǃnâ ra hōǃâ. Aiǁgause ǀnam da a ǃkhai-e xu da ga doe tamas ka io ǂan da khoena xu da ga doe o. ǁNā ǀkharaǀkharana dīs ge supu tama hâ. Jesub ge ǂgui ǀkharaǀkharana ǁîb ûib ǃnâ ge ūhâ i. ǁÎb ge ǂguro tsî ǂhâǂhâsa ǀhomǃgā ge i. Jehovab ge ǁîba kaise ge ǀnam i tsîb ge ǁîba hoaǁae gere ǃgâiaǂgao, ǁîb îb ǀkhab gere sîsen amaga. (Psa. 16:11; ǂKhm. 8:30) Xawe Filipeǁîn 2:7 ge ra ǁgau ǁîb ge “ǃgamǃgamsen” tsî ǀhommi ǃnâb ge ūhâ i ǁgaumâisa ǁnāxu tsî ǃhūbaiba ǃoa a hāsa. ǁÎb ǀoasaoǃnâ kurusa ūhâ khoen ǁaegu nî hâse.

⁴ ǂGuro kurin Jesub ge ǃhūbaib ai hâ în xa ǂâi re. ǁÎb ge ǀgâsa omarisa xū gere hā. Nēsa da ge a ǂan ǁîb ǁgûra ge ǀgam ǂkhariro anira tempeli tawa a ǁguiba amaga. (Lev. 12:8; Luk. 2:24) ǁGai Gao-aob Herodi ge Jesub ǃnaes xa a ǂan ob ge ǁîba gere ǃgam ǂgao. ǁÎb ûiba sâus ǃaroman ge ǁîb omaris khoena ǃhūsaben ase ǁaeroba Egipteb ǃnâ ge hâ. (Mat. 2:​13, 15) Jesub ǃhūbaib ai gere ûiǀgaub ge ǀhommi ǃnâb gere hâ ǀgauba xu ge ǀkhara i.

5. Jesuba taena ǃhūbaib ai ge mû tsî ǁnāsa mati ge hui bi îb aiǂhomisen ǁgaumâisa ǀGapipristeri ase? (Ai-īsiba mû re.)

⁵ Jesub ge ǃhūbaib aib ge hâ io, ǃgoma ra tsâ khoena gere mû. Jesub ge ge ǂan i mati i ra tsâsa ǀnamts a khoe-i ga ǁō-o ǁîb dadasab Josefi khami. Jesub ge ǀaesen, ǃhora tsî ǀgôana ǁōb ǃnâ ǂoaǃnâ hâna gere ǀhao-ū ǁîb aoǁnâ sîsenni ǃnâ. (Mat. 9:​2, 6; 15:30; 20:34; Mrk. 1:​40, 41; Luk. 7:13) Ama as ge Jesub ge ǃgoma ra hōǃâ khoena a mûsa ǀhommi ǃnâb hâ hîna. ǃHūbaib aib ge hā, ob ge khoen gere tsâ ǀgauba gere ǁnâuǃā. (Jes. 53:4) Jesub ge gere ǁnâuǃā khoen ge mati ǃkharagagu mâsigu ǃnâ gere tsâ ǀgauba tsî matikō ǃgomsina gere hōǃâsa. Nau khoen khamib ge Jesuba tsau, ǂâiǂhansen tsî gere ǁaixa.

JESUB GE KHOENAB RA TSÂBASA GE ǁGAU

6. Jesajab kēbos ǃnâ da tae-e ra ǁkhāǁkhāsen Jesub ge khoena ūba hâ-i ǀnammi xa? (Jesajab 42:3)

⁶ Jesub ge aoǁnâ sîsenni ǃnâ ge ǁgau ǁgaise ra hâ-ūhe khoenab ra tsâbasa. Nēsa dīs ǃnâ-ūb ge Jesuba kēbosa ge dīǀoaǀoa, Jehovab ge kēbo-aob Jesajab ǃnâ-ū māsa. Hebreǁîn ǂkhanidi ǃnân ge ǁnān ǀgaisa ǂgomsa Jehovab ǃnâ ūhâna, ǀnî ǁaegu ai ǂâuna ǁgamma ra māhe hain ǀkha ra ǀgopeǀnōhe. (Psa. 92:12; Jes. 61:3; Jer. 31:12) Xawe huisen ǁoa khoen tamas ka io ǃgâise hâ-ūhe tama khoen ge khôahâ ǂāb tsî ǀari ǂgao ra ǃnâb ǀamps dib ǀkha ra ǀgopeǀnōhe. (Khomai re Jesajab 42:3 sa; Mat. 12:20) Jehovab ge nē aiǁgaude ge sîsenu îb ǁgau, Jesub ǁnā ǁgâiǀāhera na mati nî hâ-ūsa.

7-8. Jesuba mati Jesajab kēbosa ge dīǀoaǀoa?

⁷ Mateub ge ge ǁgau Jesub Jesajab kēbosa ra dīǀoaǀoasa: “ǀKhana hâ ǂābab ge khôa tide tsî khauǀû ra tsuriǃâro-eb ge ǀari tide.” Jesub ge ǂgui buruburu xa xūna ge dī ǁnān hîna khoen xa ǃgâi tamase gere hâ-ūhena tsî ǁnān hîna ǃâubasen-e ûib ǃnâ ge ūhâ tama hâ îna. Aiǁgause Jesub ge ǁkhōǁkhōsa ǀaeba ūhâ khoeba ge ǀhao-ū tsî ǁnās xa ǃaromahe hâseb ge khoen ǂnamibe ge hâ ǁoa i. ǁÎb ge gere tsâ ǂgauǂgauheb tidesa tsîb ǁîb omaris tsî ǀhōsan ǀkha hâ tidesa. (Luk. 5:​12, 13) Sao raseb ge ǃgomme tsî ǂganaǂgae hâ khoeb tsîna ge ǀhao-u. Mûnan-ai re matib gere tsâsa mûb gere o nau khoen ra ǃhoasa xaweb ge ǁîn gere mî xūna ge ǁnâuǃā tama hâ i. (Mrk. 7:​32, 33) ǁNās ǀguis ge ge ī tama hâ i.

⁸ Jesub tsēdi ǃnān ge Jodeǁîna gere ǂgom ǁnān hîna ǀaesen tsî ǃhora hân ge ǁîn tamas ka io ǁîn ǁgûn ǁoren ǃaroma ra ǁkharahe. (Jhn. 9:2) Nē ama tama ǂgoms ǃaroman ge gere ǂkhabuǂâi tamas ka io ǃgâi tamase tsâ. Jesub ge ǁîna ge ǂgauǂgau în ǂan Elob ǁîn ǀkhā ǁae hâsa. Nēsa mâ ǂgomǃgâsiba ra mā da?

9. Hebreǁîn 4:​15, 16 sa mati ra ǁgau sada ǀGapipristeri ǀkhomxaǂgaosiba ǀoasa kurusa ūhâ tama khoen ǃoagu ra ǁgausa?

⁹ Khomai re Hebreǁîn 4:​15, 16 sa. ǂGomǃgâ ǁkhā da ge a Jesub hoaǁae sida ǀkha nî ǀkhomxaǃnâsa. ǁNāsa tae-e ra ǂâibasen? ǀKhomxaǃnâ khoe-i ge ra tsâǀkhāhe nau khoe-i ra hōǃâ ǃgomsib xa tamas ka io nau ǁîn ra tsâ ǀgaub xa. Paulub ge ǁkhā Grike gowab mîsa ge sîsenu Hebreǁîn 4:10 ǃnâ îb ǁgau ǁnān hîna ǃkhō-oms ǃnâ hāna da ra tsâbasa. Elobmîs ǃnâ da ga khomai Jesub ge mati khoen xa gere tsâ ǀgausa, o da ge ra mû khoenab ra tsâbasa. ǁÎb ge ǂgaoǀkhāheb gere amaga ǀgui khoena ge ǂgauǂgau tama hâi xaweb ge ǁîna gere hui ǂgao. Aiǁgause, ǂhâbasa tama i ge ge hâ-i îb Jesuba nē khōb ǀaeba ūhâ khoeba tsâǀkhā xaweb ge ge tsâǀkhā bi. Tsî ǀnîsi ǂguro ǃnās ǂgui kurin khaoǃgâb ge khoe-i xa tsâǀkhāhesa. ǂGanaǂgae hâ khoebab gere hui o îb ǁnâu, ob ge ǃnōsa ǃkhai-e ǃoa ge ī-ū bi. ǁGai xūna gere dī xawe ge ǃhobasen hâ i kaikhoes ǀkha ge ī xu-i xa ǂâi re, Jesub ǂaide ǁîs ǁgamron ǀkha gere ǁāsa. Fariseb ge ǃgâi tamase hā-ūsi ob ge Jesuba ǁîsa ge ǁkhauba tsî Fariseba ge mî-unuba. (Mat. 8:3; Mrk. 7:33; Luk. 7:44) Jesub ge ǀaesen hâ khoen tsî ǀgaisa ǁorena gere dī khoena xu ge hâ bē tama hâ i. ǁÎb ge gere ǂhâba în ǁîna ǁîba ǃoa hā îb ǁîba ǁînab ūba hâ ǀnamma ǁgau nî. ǂGomǃgâsiba da ge ūhâ ǁkhā ǁîb tsîn sida ǃoagu a ǀkhomxaǂgaosa.

SIDA ǀGAPIPRISTERA DA NĒTSĒ ǁGAE ǁKHĀ ǀGAUB

10. Tae-e da nētsē sîsenū ǁkhā î da ǂganaǂgae hân tsî ǂgīn tsîna hui? (Ai-īsiga mû re)

¹⁰ Jesub aiǁgausa da ra ǁgae ǂgao amaga da ge ǃgarise ra dītsâ î da ǀnammi tsî tsâbaǁhaoxasib tsîna ǁgau. (1Pet. 2:21; 3:8) Buruxa dīna da ge ǂgīn tsî ǂgāna ǂgaena dība ǁoa xawe da ge hui nî ǁkhā în Jehovab xa ǁkhāǁkhāsen tsî ǁîba ǃoa ǀgū. Aiǁgause, Elobmîs ai ǃgaoǃgaosa ǂkhanin ge nēsi 100 xa ǃnāsa ǃgome gowagu ǃnâ hâ. ǃGâise mû tama hân tsî ǂgīn ge 60 xa ǃnāsa ǀō-aisa ǂkhanina hō ǁkhā. Tsî ǂgī khoen ǃaroman ge vidiona hâ ǃgâise ra ǁguiǃāna tae-i ra īsa. În ǂgāna ǂgae tsî ǂgīn tsîna Jehovab tsî ǁîb ǀgôaba ǃoa ǀgū.

11. Jehovab ǀapeǂhomisa mati Jesub ge ūhâ i ǀnamma ra ǁgau? (ǃNaeǃkhaidi 2:​5-7, 33) (Ai-īsiga mû re.)

¹¹ Jehovab ǀapeǂhomis ge ra dītsâ în hoa khoena hui în Jehovaba ǃoa ǀgū. ǂÂihō i du ra Jesub khâis khaoǃgâb ge ǃanu gagaba ǁnān hîna ǁâudīb ǃaroma ge ǀhao hâ ina ge hui în ǃgâiǂhôasa ǁîn gowagu ǃnâ ǁnâu. (Khomai re ǃNaeǃkhaidi 2:​5-7, 33 sa.) Jesub daoǁgaus ǃnāga i ge nētsē ǀapeǂhomisa Elobmîs ai a ǃgaoǃgaosa ǂkhanina 1 000 xa ǃnāsa gowagu ǃnâ hâ. Nēs ge ǂkhari ǃgôas khoen tsîna ǃkhōǂgâ hâ. Aiǁgause, Amerindian gowab ge ǂkhari ǃgôab khoen xa ra ǃhoahe hîna Amerikab nordes tsî suides ǃnâ ra han xa. ǀApeǂhomis ge 160 xa ǃnāsa ǂkhanina ǁnā gowab ǃnâ ūhâ în khoena ǃgâiǂhôasa ǁnâu. Sida ǂkhanin tsîn ge 20 xa ǃnāsa Romeǁî gowagu ǃnâ ra hō-e. ǂGuin ǁnā gowaba ra ǃhoan ge Jehovaba ge ǃoaba tsoatsoa.

12. Jehovab ǀapeǂhomisa tae-i tsîna nētsē khoena ra dība?

¹² Khoena huis ǂam-ain ge Jehovab khoena tsūkēǃgâgu ǃnâ hâ khoen tsîna ra hui. ǁNās xa ǃaromahe hâsen ge ǂgui ǃgâsana māsenxase naun ǂhâsib ǃnâ hâna ra hui. ǀApeǂhomis ge ǀgui ǃgupu ǃoaba ǃkhaiba ra mā, în khoena Elob ǁîna ūba hâ ǀnammi xa ǁkhāǁkhāsen.

SIDA ǀGAPIPRISTERI GE HUI DU ǁKHĀ

13. Jesuba mâ ǀgaugu ǃnâ ra hui da?

¹³ Jesub sida ǃgâi ǃûi-aob ge ra dītsâ î da ǂhâ da hâ xūn hoana ūhâ tsî Jehovab ǀgūse hâ ǁkhā. (Jhn. 10:14; Efe. 4:7) ǀNî ǁaegu ai da ge mâsib xa ǃaromahe hâse ǂkhabuǂâi tsî khôahâ ǂāb tamas ka io ǀari ǂgao ra ǃnâb ǀamps dib khami ra tsâ. ǀNîsi da ge a ǂkhabuǂâi ǁkhā ǀaesen da ga o xū-e dīsa tsî ǀhaohâb ǃnâ hâ khoe-i ǀkha ǁnâusāgu o. ǀNî ǁaegu i ge ǃgomba da ǁkhā î da sada ǂâisa hānîǁaeb ǃâubasens ai ǂnûi tsî nētsē da ra hōǃâ ǃgomsin ose. ǂÂis ǃnâ ūhâ re Jesub ge mû tsî ǃkharuǃnâ du ra ǃgomsina ra ǁnâuǃā hui du ǂgaob da amaga. Aiǁgauseb, ge ǃanu gagaba a sîsenū ǁkhā îb hui du ǂkhabu du ga o. (Jhn. 16:7; Tit. 3:6) ǁNās ǀkhab ge Jesuba “khoena māde ge mā” ǃgâsan ǀhaohâb ǃnâ hân tsîna i du ǂkhâǃnâhe.—Efe. 4:8.

14. Tae-e da nî dī ǂkhabuǂâi da ga o?

¹⁴ ǂKhabuǂâi du ga o ǂâihō re, Jesub a sida ǀGapiprister ǃkhaisa tsî ǁnās tae-e sida ǃaroma ra ǂâibasensa. Jehovab ge Jesuba ǃhūbaiba ǃoa ge sî tama hâ i îb ǁîb ûiba xoremarib ase mā. Xawe îb ǀoasa kurusa ūhâ tama khoen ǃgomsin tsîna ǁnâuǃā. ǂKhabuǂâi da ga o sida ǁoren tamas ka io ǂkhabusasigu xa, ob ge Jesuba nî hui da ǂhâb ǁaeb ǃnâ.—Heb. 4:​15, 16.

15. Tae-e ǀgui ǃgâsaba ge hui îb ǀhaohâba ǃoa oaǀkhī?

¹⁵ Jesub ge khoena ra daoǁgau în ǁnān hîna ge Jehovaba ǁnāxuna ǁîba ǃoa ǁkhawa oaǀkhī. (Mat. 18:​12, 13) ǃGaoǃgâ re Stefanobb aiǁgausa. Disiǀgamǀā (12) kurigab ǀhaohâba xū ūǂuihe hâs khaoǃgâb ge ge mîǁgui ǀhaodeb ra hâǃnâ ǂgaosa. Nēs ge ge supu tama hâ i xawe ta ge Jehovaba ti ǃgâsan ǀkha gere ǃoaba ǂgao. Tita ǀkha ge ǀhao ǀhaohâb ǃûi-aogu ge tita ǁkhoreǁharesase gere tsâ kai. ǀNî ǁaega ta ge ǁgaise ra tsâ Jehovaba ta ge ǁnāxū o. Xawe ǀhaohâb ǃûi-aogu ge ge ǂkhâǃnâ te î ta tā ǀûsen. ǀHaohâba ǃoa ta ge oaǀkhī on ge khoena tita tsî ti omaris tsîna ǀnammi ǀkha ge ǃkhōǃoa. Ti kaikhoes ge Elobmîs ǁkhāǁkhāsa ge ūǃoa tsî da ge nētsē Jehovaba ǀguiba ra ǃoaba omaris ase. Sida ǀGapipristeri ge kaise a ǂkhî ǁnān hîna ge ǃhobasen tsî ǂhân hâ huiba ra hōsa în ǀhaohâba ǃoa oaǀkhī.

16. Tae-i ǃaroma du ra ǃgôaǃgâ ǀkhomxaǃnâ ǀGapipritsera du ūhâ o?

¹⁶ ǃHūbaib aib ge hâ iob ge Jesuba ǂgui khoena gere hui. Nētsē da ge ǂgomǃgâsiba ūhâ Jesub nî hui dasa. ǀAsa ǃhūbaib ǃnâb ge nî hui da, î da ǀoasa kurusa ūhâ ǁkhā. Jehovaba da ge ra gangan ǁnātikōseb a ǀnamda sa îb ǁîb ǀgôaba ǀkhomxaǃnâ ǀGapipritseri ase mā.