Jobi ǂkhanis ge hui da ǁkhā ǃgoma da ga tsâo

1-2. Tae-i ǃaroma i ǂhâǂhâsa î da Jobi ǂkhanisa khomai?

JOBI ǂkhanisa du nē ǁaerob ǃnâ khomai tsâ hâ? Nē ǂkhanis ge 3 500 kuriga ǃkharu hâse ge xoahe xawen ge ǂgui khoena nētsē ǁnā ǂkhanisa ǀō-aisase ra mû. ǂGui khoen ge nē ǂkhanis xoa-aoba ra koa. ǁÎb ge supuse ra ǁnâuǃāhe mîdi, îsa tsî ǀgaisa ǀamǂoasa ūhâ mîdi tsîna ra sîsenū. Moseb ge nē ǂkhanisa ge xoa xaweb ge Jehova Eloba ge mîba bi tae-eb nî xoasa.—2Tim. 3:16.

² Jobi ǂkhanis ge kaise a ǂhâǂhâsa Elobmîs ǃnâ. Tae-i ǃaroma? Nēs ge ra hui da î da ǁnâuǃā, ǀhomǃgān tsî khoen nî ǁhûibasensa, Jehovaban ǀnammi ǀkha ǃoaba tsî ǁîb ǀonsa nî ǁkhaubasa. Nē ǂkhanis ge Jehovab ǀō-aisa ǀgaugu xa ra ǁkhāǁkhā da. ǀNammi, gā-aisib, ǂhanub tsî ǀgaib khami. Aiǁgause, Jobi ǂkhanis ge Jehovaba 31 xa ǃnāsa ǃnāde “Hoaǀgaixab” ti ra ǂgai nau xoadi xa. Jobi ǂkhanis ge ra ǁguiǃā Elob tae-i ǃaroma ǃgoma ra mā-amsa. Tsî ǂhâǂhâsa dîn ǂgui khoen ūhân tsîna ra ǃeream.

3. Tae-e da Jobi ǃnaeǃkhaisa xu ra ǁkhāǁkhāsen?

³ Jobi ǂkhanisa khomaisa da ge ǃhomma ǂkharos ǀkha a ǀgopeǀnō ǁkhā. ǃHommi aits ga mâ, ots ge sa ǂnamipe ǃgâise ra mû. ǁNās ǁkhās khami da ge Jobi ǂkhanisa da ga khomai, o ra mû Jehovab mati sida ǃgomsib xa ra ǂâisa. Hā re î da ǃgaoǃgâ Jobi ǂkhanis mati a hui da ǁkhāsa ǃgoma da ga hōǃâ o. Jobi ǃnaeǃkhais xa ǁkhāǁkhāsensa mati Israelǁîna ge hui tsî mati-i nētsē hui da ǁkhā? Tsî da ge mati da nau khoena nē ǃnaeǃkhaisa xu hui ǁkhā ǀgaub xas tsîna nî ǁkhāǁkhāsen.

JEHOVAB GE RA MĀ-AM ÎB JOBA ǃGOMA HŌǃÂ

4. Mâ ǃkharagagusiba hâ Jobi tsî Egipteb ǃnâ gere hâ Israelǁîn ǁaegu?

⁴ Jobi ge Us ǃnâ gere hâ tsî ǁnās ge Arabiab ǀgūse ge hâ i. Tsî ǁnā ǁaeb ain ge Israelǁîna ǃgān ase Egipte ǃhūb ǃnâ ge hâ i. Israelǁîn ge ama tama eloga gere ǃoaba, ob ge Joba Jehovaba ǂgomǂgomsase gere ǃoaba. (Jos. 24:14; Ese. 20:8) Jehovab ge Jobi xa ge mî: “ǁÎb khami ǂnao-o khoe-i ǃhūbaib ai a ǀkhai.”a (Job. 1:8) Jobi ge ǃkhū tsî ge ǃgôahesa i hâb gere ǃās ǃnâ. (Job. 1:3) ǁGâuab ge kaise ge ǁaixa hâ i mûb gere o, Jobi ge ǂansa tsî ge ǃgôahesa i khoeba hîna Jehovaba ǂgomǂgomsase gere ǃoababa.

5. Jehovaba tae-i ǃaroma ge mā-am îb Joba ǃgomsina hōǃâ? (Job 1:20-22; 2:9, 10)

⁵ ǁGâuab ge ge mî Jobi ga ǃgomsina hōǃâ, ob Jehovaba nî ǃoaba ǀûsa. (Job. 1:7-11; 2:2-5) Jehovab ge Joba kaise ge ǀnam-i xawe ge mā-am îb ǁGâuaba ǁgau Jobi xab gere mî xū-i ge ama īsa tamas ka io gere ǂhumisa. (Job. 1:12-19; 2:6-8) Gâuab ge Jobi di xamanina ge ū, ǁîb disi ǀgôana ǃgâm tsî ge ǃaroma îb Joba tsûtsûsa khō ǀaeba hō. Xawe matikōseb ge ǁGâuaba Joba ǃgomsina hōǃâ kai xaweb ge Joba aiǃgû tsî Jehovaba ǂgomǂgomsase gere ǃoaba. (Khomai re Job 1:20-22; 2:9, 10 sa.) Jehovab ge Joba ǂgauǂgau, ǁîba ǃnāsa ǃkhūsiba mā, disi ǀgôana noxoba ǀarobabi tsîb ge Joba ǁkhāba khoen xa ǃgôasiba gere ǁgauhe. Jehovab ge Joba 140 ûikuriga ge ǀaroba. Tsî ǁnās ǀkhab ge ǁîb haka suriga ge mû ǁkhā i. (Job. 42:10-13, 16) ǂGurokam ǃoaba-aona tae-e Jobi ǃnaeǃkhaisa xū ge ǁkhāǁkhāsen tsî sida tae-e nētsē a ǁkhāǁkhāsen ǁkhā?

6. Jobi ǃnaeǃkhaisa mati Israelǁaesa ga hui hâ? (Ai-īsiba mû re.)

⁶ Israelǁaes Egipteb ǃnâ ǃgoma gere hōǃâs ge Jobi ǃnaeǃkhais xa ga hui-e hâ. Aiǁgause, Josuab tsî Kaleb tsîga ge ǁîkha ǂkhamsis ǃnâ ǃgāgu ase gere ûi. Nau Israelǁîn ge Jehovaba ǁnâuǀnamoǃnâ amaga kha ge 40 kuriga ǃgaro ǃhūb ǃnâ ge ǁan hâ i. Israelǁîn ga Jobi ǃgomsin xa hâ ǃnaeǃkhais tsî ǁîb ûib ǀamǂoas tsîna ǂan hâ, os ge nēsa ǁîn tsî hānî surib tsîna ga hui hâ în ǁnâuǃā ham-i ǁîn ǃgomsina ra ǃaromasa. ǁÎn tsîn ge ga ǁnâuǃā hâ Elob tae-i ǃaroma ra mā-amsa în khoena ǃgomsiga hōǃâ. Tsîb Jehovaba ǂgomǂgomsase ǃgomsin ǃnâ ra mâǀgai khoena ǀnam tsî nî mādawa-amsa.

7-8. Jobi ǂkhanisa mati ǁnān ǃgomsiga ra ǃkharuǃnâna a hui ǁkhā? Aiǁgau-e mā re.

⁷ ǃGâiba da ra ǀama ǀgaub. ǂGui khoen ge nētsē ra mû matin ǃgâi khoena ǃgomsiga ra hōǃâ ǀgausa. Tsî ǁnâuǃā tama hâ Elob tae-i ǃaroma nēsa ra mā-amsa. Nēs xa ǃaromahe hâsen ge Elob ǃnâ ra ǂgom ǀû tamas ka io ra ǂâi Elob khoen ǀkha ǁae tamasa. ǃGâsas Haisels, Rwandab ǃnâ ra hâs aiǁgausa ǃgaoǃgâ re. ǂKhamsis ǃnâs ge Elob ǃnâ gere ǂgom xawes ge ǂgui ǁgai xūna ge ǃkharuǃnâ. ǁÎs ǁgûra ge ge ǀgora. Tsîs ge ǁîs mamasa ǀnî hâ aoba ge ǃgame Haiselsab ǁgaise gere hâ-ūba. Ēgas ge ǀnî aob xa ge ǀgaiǃkhōhe. Haisels ge ge kerkhe ǃgû îs ǁkhaeǂgaohe xawe i ge ǁnāsa ge ī tama hâ i. Ēgas ge Haiselsa sîǂkhinisa Eloba ǃoa ge xoa. ǁÎs ge ge xoa: “ǃKhūtse satsa ǃoa ǀgore, ǃgâi xūna dītsâ xawets ge ǁgaib ǀkha ge mādawa-amte. ǁKhapa ta ge ǃoaba du tide tsî ta ge ǂkhîǂkhîde ra-e nî dī.” Haisels khamin ge nētsē ǂgui khoena Elob xa ǂhomîba ge ǁkhāǁkhāhe. Tsîn ge ra ǂgom Elob ǁîn ǃgomsina ra ǃaromasa. Kaise da ge ra tsûaǂgao ǁîn amaba Elob xa ǂan tama amaga tsî da ge ǁîna ra hui ǂgao.

⁸ Jobi ǂkhanisa xū da ge ge ǁkhāǁkhāsen Elob ǃgomsina ǃaroma tamasa xaweb ǁGâuaba ra ǃaromasa. ǁKhāǁkhāsen da ge go î da tā ǂâi khoen ǃgomsinan ga ǃkharuǃnâo, tsū xū-e dī hâsa. Elobmîs ge ra ǁgau ǃâubasen tama da hâ hînan ǁgai xūn ra īsa. (Aoǁn. 9:11; Job. 4:1, 8) Tsî da ge go ǁkhāǁkhāsen ǂgomǂgomsase da ga Jehovaba ǃgom ǁaegu ǃnâ ǃoaba ǀgara, o da ǁîba ǃēsa ra māsa îb ǁgau ǁGâuab ǂhumi-aosa. (Job. 2:3; ǂKhm. 27:11) Kaise da ge ra ǃgôaǃgâ nē xūna da ge Elobmîsa xū ǁkhāǁkhāsensa. Nēsi da ge a ǂan tae-i ǃaroma i sida tsî sida ǀnamsaben tsîna ǃgomsiga ra ǃkharuǃnâsa. ǁKhāǁkhāsens ge o, Elob ǁîs ǃgomsina ǃaroma tama hâsa, ob ge ǁîs ûiba ge dawa. ǁÎs ge ra mî: “Eloba ǃoa ta ge ǁkhawa ǀgore tsî ǁîba tsâ ta ra ǀgauba ge mîba. ǁÎba ta nî ǁnāxū ti ta ge mî o ta ge ge ǃoababi ǀû tama hâ i. Nēsa ta ge dī ǂgao tama ǂgaob ǀkha ge dī. ǁÎba ta ge ǃgâise ǂan tama hâ i amaga ta ge ǁnā xūn hoana ge mî. Nēsi ta ge ra ǁnâuǃā Jehovab a ǀnamtesa tsî ta ge kaise a ǂkhî.” Kaise da ge ra ǃgôaǃgâ ǂansa Elob sida ǃgomsiga tae-i ǃaroma ra mā-amsa. Hā re î da ǃgaoǃgâ Jobi ǃnaeǃkhais mati a hui da ǁkhāsa ǃgomsiga da ga ǃkharuǃnâo.

JOBI ǃNAEǃKHAIS RA HUI DA ǀGAUB Î DA MÂǀGAI

9. Joba tae-e ge dī ǃgomab ge hōǃâo? (Jakobub 5:11)

⁹ Mûnan-ai re Jobi ge taena ǃkharuǃnâsa. ǁÎb ge tsaob ǃnâ ge ǂnôa-i. ǁÎb soros ge ǀhabina ge ūhâ i tsîb ge kai tsûb tsîna gere hōǃâ. ǁÎb khōb ge ge ǁgai i tsîb ge ge ǂgabasa i. Jobi ge ǀgaiba ge ūhâ tama hâ i dī ǂgaob ra-e dīsa. ǁÎb ge ǂnû tsî ǁîb ǀhabide gere xoa. Hōǃâb gere tsûb xab ge ǃnāsa ǁaeba gere ǃgae. Jobi ge ǁîb ǃgomsin ǃnâ mâǀgais ǀguisa ge dī tama hâ i, xaweb ge aiǃgû tsî ǂgomǂgomsase Jehovab ǃoagu hâ tsî ǁîb ai ge ǂgomǃgâ. (Khomai re Jakobub 5:11 sa.) Tae-e Joba ge hui îb ǂgomǂgomsase hâ?

10. Joba mâǃnôa ǀhōsagusisa Jehovab ǀkha ge ūhâ i? ǁGuiǃā re.

¹⁰ Jobi ge tsâb gere ǀgauba Jehovaba ge mîba. (Job. 10:1, 2; 16:20) Aiǁgause 3ǁî danaǃâs ge ra mîba da, Jobi ge matikōse tsûaǂgao hâ īsa ǁîb ǀkha ge ī xū-i ǃaroma. Jobi ge ge ǂâi hâ i Jehovab ge ǁîb ǃgomsin hoana ǃaroma ti. Xawe i ge Jobi 3 ǀhōsaga gere mîǀgara Elob ǁîba ra ǁkhārasa ǁîb ǁoren ǃaroma. Xaweb ge Joba ǁîga gere ǃeream ǁîb Jehovab ǃoagu a ǂgomǂgomsasa. ǀNî xūn Jobi gere mîn ge ra ǁgau, ǁîb ge ǁaeroba Elob xab ǂhanu-ai gere ǂâisa. (Job. 10:1-3; 32:1, 2; 35:1, 2) Xaweb ge Joba gere mî ǀnî ǁaeb aib ge ǂâi tamase gere ǃhoasa ǂgomǂgomsaseb hâsab gere ǁgau ǂgao amaga. (Job. 6:3, 26) Jobi ge 31ǁî danaǃâs ǃnâ gere ǂhâba îb Eloba ǃeream tsî mî Jobi ǁkharahesa anu tamasa. (Job. 31:35) Xawe Jobi ge ta ga ǃâubasen hâ, Elob ǁîba ǃeream tsî nî mîbasa tae-i ǃaromab ǃgomsina ra hōǃâsa.

11. Jehovaba mati Jobi ǂhauǃnâxasib ǃoagu ge tanisen?

¹¹ Nēsi da ge ra ǁnâuǃā, Jobi ge Jehovab ǀkha gere ǃhoa ǀgaub ge ra ǁgau ǁîb ge ǀgaisa ǀhōsagusisa Jehovab ǀkha ūhâ īsa. Tsî ǁnās ǀkha gere ǂgomǃgâsa Jehovab ǁîba ǂhanu-aise nî ǀgoraǃgâsa. Jehovab ge ǁgao hâ ǂoasa ge ǃnâ-ū Jobi ǀkha ge ǃhoa xawe ge ǁguiǃā tama hâ i tae-i ǃaromab Joba ǃgomsiga ra ǃkharuǃnâsa. Tsîb ge Joba ge ǁkhara tama hâ i tsâb gere ǀgaubab ge mî o tamas ka io xū-eb dī tama hâ tib ge mîo. ǃGâi Dadasab khamib ge Jehovaba Joba ge ǁkhāǁkhā îb ǂhanu ǀgaub ǃnâ ǂâi. Nēb ge ge ǃgâi ǀgau i Joba huisa. Nēs xa ǃaromahe hâseb ge Joba ge mûǂan hoa xūnab ge ǀu īsa. Tsîb ge ǁîb ǃgâi tama ǃhoa ǀgauba xu ge ǃhobasen. (Job. 31:6; 40:4, 5; 42:1-6) Nē ǃnaeǃkhaisa xūn ga ǃkharu ge ǁaeb khoena mati ǀama hâ tsî sada mati nētsē ǁnāsa xu a ǀama ǁkhā?

12. Jobi ǃnaeǃkhaisa mati Israelǁaesa ga hui hâ?

¹² Israelǁaes ga ǃgâiba ǀama hâ ǀgaub. Israelǁîn ge Jobi ǀkha ge ī xū-e xu ga ǁkhāǁkhāsen hâ. Moseb aiǁgaus xa ǂâi re. Israelǁaesa ǂgaeǂguisa i ge Moseba ge supuba tama hâ i. ǂGui ǃnāden ge Jehovaba gere ǁnâuǀnamoǃnâ tsî Moseba gere ǂkhîoǃnâ kai. Israelǁaes ge ǃnākorobe Jehovab ǃoagu gere ǃgae ǃgomsigan gere hōǃâo. Xaweb ge Moseba ǁnā ǁaeb ai Jehovaba ǃoa gere ǀgore îb hui-e. (Eks. 16:6-8; Num. 11:10-14; 14:1-4, 11; 16:41, 49; 17:5) Jobi aiǁgaus ge Moseba ga hui hâ, Jehovab xab gere ǁnamahe ǁaeb ai. Aiǁgause Israelǁaes mîmâisa ǃhūb ǃnâ nî ǂgâs aiǃâb ge Moseba kaise ǁîn ǀkha ge ǁaixa tsî tsū mîna ge mî. ǁÎb ge Jehovaba ǁîb anu hâ ǂkhaisiba ge mā tama hâ i. (Psa. 106:32, 33) ǁNās xa ǃaromahe hâseb ge Jehovaba Moseba ge mā-am tama hâ i, îb mîmâisa ǃhūb ǃnâ ǂgâ. (Deu. 32:50-52) Nēs ge Moseba a tsûtsû xaweb ge ǃgamǃgamsenxase Jehovab ǁnamasa ge ūǃoa. Jobi ǃnaeǃkhais ge Moseb ǁaeb khaoǃgâ ge ûihâ i ǂgomǂgomsa Israelǁîna ga hui hâ. ǁÎn ge Jobi ǃnaeǃkhais xa ǂâiǃgâ tsî Jehovaba tsân ra ǀgauba ga mîba hâ. Xawes tsînan ge ǂâis ǃnâ ga ūhâ hâ ǁîn Jehovab xa ǂhanu-ai tamasa. Tsîn ge ga ǁkhāǁkhāsen hâ în ǃgamǃgamxasenxa tsî Jehovab ǁnamasa ūǃoa.

13. Jobi ǃnaeǃkhaisa mati nî hui da î da mâǀgai? (Hebreǁîn 10:36)

¹³ Sida ǃgâiba a ǀama ǁkhā ǀgaub. Nētsē da ge ǃgom ǁaegu ǃnâ ûihâ tsî da ge ǁnās ǀkha ǀgaiba ǂhâhâ î da ǂgomǂgomsase mâǀgai. (Khomai re Hebreǁîn 10:36 sa.) ǀNîsi da ge ǀaesen hâ, depresiba ūhâ tamas ka io ra ǂâiǂhânsen tsî omaris ǃnâ ǃgomsiga ūhâ. ǀNamsabe-i tamas ka io ǀhōsa-e ǁōb ǃnâ ǂoaǃnâ hâ. Tsî ǁnās ǂam-ai ǀnî hâ ǃgomsin tsîna ūhâ. ǀNî ǁaegu ai i ge ǃgoma da ra hōǃâ ǁaeb ai khoe-e xū-e mî tamas ka io a dī ǁkhā kaise a tsûaǂgao kai da ǁkhā-e. (ǂKhm. 12:18) Xawe da ge Jobi di ǂkhanisa xu ra ǁkhāǁkhāsen Jehovaba da tsâ da ra ǀgauba a mîba ǁkhāsa tsî a ǂgomǃgâ ǁkhā ǁîb ra ǁnâu da sa. (1Jhn. 5:14) Jehovab ge sida ǀkha ǁaixa tide tsâ da ra ǀgauba da ga mîo. ǀNî ǁaega da ga gâre ǃhoa aiǀgaugu tsîna ūhâ xawe. Elob ge ǀgaib tsî gā-aisib ǂhâ da hâba nî mā da î da mâǀgai. (2Kro. 16:9; Jak. 1:5) Jobab ge ǁnamas ǁkhās khamib ge sida tsîna ǂhâbasa i ga o nî ǁnama. Jobi ǂkhanis tsîn ge ra ǁkhāǁkhā da mati da nî mâǀgai ǀgausa. ǀNîsi da ga ǁnamasa ǁîb mîs, ǀapeǂkhomîs tamas ka io gagasise kaiǀoa hâ ǀhōsa-e xu ga hō o. (Heb. 12:5-7) Kaise î ge ge ǃgâi-i Jobi ge Jehovab ǁnamasa a ǃgâo. Tsîs ge nēs tsîna sada ǃaroma a ǃgâi ǃgamǃgamsenxase hâse da ga ǁnamasa a ūǃoao. (2Kor. 13:11) Nēn ge kaise ǀō-aisa xūn ǁkhāǁkhāsen ǁkhā da a na Jobi ǂkhanisa xu. Hā re î da nēsi ǃhoaǃgao mati da Jobi ǃnaeǃkhaisa a sîsenū ǁkhāsa î da nauna hui.

JOBI ǂKHANISA XU NAUNA HUI

14. Mâǀgaub ǃnâ da a ǁguiǃā ǁkhā tae-i ǃaroma i ǃgomsina hâsa?

¹⁴ ǂGui khoen ge ra dî tae-i ǃaroman ǃgâi xūna ra dī khoena ǃgoma ra hōǃâsa. Tsî da ge a ǃgâibahe ǁîna Elobmîsa xu ǃereamsa māsa. ǁÎn dîsa ǃereams ǃaroma da ge ǁîna Eden ǃkhanab ǃnâ ge ī ǃnaeǃkhaisa ǃoara ǁnaeǁgau. ǀNîsi da ge ǁîna ǁGâuab eloxoresa ǀhomǃgāb ge mati ǂguro khoera Adammi tsî Evas tsîra a ǂhommiba ǀgauba ǃoa ra ǁnaeǁgau tsîra ge mati Elob ǃoagu a khâikhâisensa. (Gen. 3:1-6) Tsî da ge ra ǁguiǃā Adammi tsî Evas tsîra ge Eloba a ǁnauǀnamoǃnâ on khoena nēsi ǃgoma tsâ tsî ra ǁōsa. (Rom. 5:12) Tsî da ge ra ǁguiǃā Elob ǁaeroba ra mā-amsa îb ǁgau ǁGâuab ge ǁîb xa mîn a ǂhomisa. Tsîb nēsi ǁaeba ra sîsenūsa în khoena ǁkhāǁkhāhe ǁîb ǀgūǁae hâ ǃgomsigu hoa ga nî ūbēsa tsî ǀamosib kōse ǃhūbaib ai nî ûisa. (J.ǂHa. 21:3, 4) Nē ǀgaub ǃnâ ǁguiǃās ge kaise a ǃgâi. Tsî i ge ǂgui khoen tsîna ge hui în ǁnâuǃā tae-i ǃaroman ǃgâi xūna ra dī khoena ǃgoma ra ǃkharuǃnâsa.

15. Mati da Jobi ǂkhanisa sîsenū ǁkhā î da khoena mîba tae-i ǃaroman ǃgâi khoena ǃgoma ra hōǃâsa? (Ai-īsiga mû re.)

¹⁵ Jobi ǃnaeǃkhaide da ge sîsenū ǁkhā khoena da ga mîǃābao, tae-i ǃaroma da ǃgoma ra tsâsa. ǂGurose da ge ǁîna mîba ǁkhā ǁnās a ǃgâi dîsa. ǁNāpaxu da ge ǁîna a mîba ǁkhā ǃgâi aob Jobi tsîn ge ge dîsen tae-i ǃaromab ǃgoma ra tsâsa. ǁÎb ge ge ǂâi hâ i Elob ǃgoma ra tsâ kai bisa. (Job. 7:17-21) ǁÎ-i ge nî ǃgâiaǂgao ǂgui khoen ga ǂanǂgao tae-i ǃaroma da ǃgoma ra tsâsa. ǁNās ǂam-ai da ge ǁî-e a ǁgau ǁkhā Jobi ǂkhanisa xu ǁGâuab ǃgoma ra ǃaromasa. ǁGâuab ge ge mî khoen ge Eloba ra ǃoaba ǁîb ǁîna ǃgâi xūna ra mā amaga, xawen ga ǁîna ǃgoma tsâ on ǁîna Eloba nî ǃoaba ǀûsa. ǁÎ-e da ge a mîba ǁkhā, Elob ǂgomǃgâsiba ūhâsa ǁîb ǃnâ ǂgomsa ra ǁgau khoen hâsa. ǁÎb ge ge mā-am îb nēsa ǁgau ǁGâuab a ǂhomi-aosa. ǀÛnigase ǁî-e mîba ǁaero i khaoǃgâb ge Jehovaba Joba a ǀkhaesa ǁîb di ǂgomǂgomsasib ǃaroma. Khoena da ge ǂkhâǃnâ tsî ra mîba sida ǃgomsin Jehovaba xu hā tamasa.

16. Aiǁgau-e mā re matis ge Jobi ǂkhanisa ǃgomsi-e ra ǃkharuǃnâ khoe-e hui ǀgausa.

¹⁶ ǃGaoǃgâ re Jobi ǂkhanis ge mati Marioba a hui ǀgausa. ǀGui tsēs ge ǃgâsasa 2021 aoǁnâ sîsen-e selfoni ǃnâ-ū gere dī. ǁÎs ge ǂgurose Mariob ǀkha ge ǀhao. ǁÎs ge Marioba, Elob hānî buruxa mîmâidi tsî ǁîb sida ǀgorede ra ǁnâu-ams xa hâ xoasa ge khomaiba. ǁÎs ge Marioba matib xoas xa ra tsâ ǀgauba ge dî. ǁÎb ge ǁîsa ge mîba sîǂkhanisab go omaris khoena xoaba tsî goro mîbasa ǀnamnîb asa ǁîb nî ǃgamsens aiǃâ. ǁÎb ge ra mî: “Tita ge Elob ǃnâ ra ǂgom xawe ta ge nētsēgam ǁgoaga goro ǂâi tita ǀkhab ǁae tamasa.” Egas ge ǃgâsasa ǁîba Jobi gere ǃkharuǃnâ ǃgomsin xa ge mîba. Mariob ge ge mîǁgui Jobi ǂkhanis hoasab nî khomaisa tsîs ge ǃgâsasa ǁîba jw.orgs ai hâ Elobmîs linka ge sîba. ǀAmǂoasa ge tae-i? Mariob ge Elobmîs ǁkhāǁkhāsa ge ūǃoa tsî ra mûǂui ǃnāsaseb ǀnamxaǃnâ ǁGûb, ǁîb ǃnâ ǃgâiǃgâibasensa ra ǁgaub xa nî ǁkhāǁkhāsensa.

17. Tae-i ǃaroma du ra ǃgôaǃgâ Jehovaba ge Jobi ǂkhanisa Elobmîs ǃnâ ǃkhōǂgāo? (Job 34:12)

¹⁷ Elobmîs ge ǀgaiba ūhâ khoen ûiga dawasa. ǁNān ǃgomsiga ra ǃkharuǃnân tsînab ge ra ǁkhaeǂgao. (Heb. 4:12) Jobi ge Jehovaba ge ǂgan îb ǁîb ǃnaeǃkhaisa Elobmîs ǃnâ xoa. Kaise da ge ra ǃgôaǃgâ Jehovab ge ǁnāsa a dīsa tsî da Jobi ǃnaeǃkhaisa nētsē Elobmîs ǃnâ a khomai ǁkhāsa. (Job. 19:23, 24) “Amase i ge a īǁoa Elob nî tsūdī ǃkhaisa.” Ti hâ ǂgomǃgâsibas ge Jobi ǂkhanisa ra mā da. (Khomai re Job 34:12 sa.) Nēs tsîn ge ra ǁkhāǁkhā da tae-i ǃaromab Eloba ǃgomsiga ra mā-amsa tsî mati da nî mâǀgaisa. Tsî ǁnās tsîn ge ra hui da î da ǃgoma ra tsâna ǁkhaeǂgao. Saora ǁkhāǁkhāǃâs ǃnâ da ge nî ǃhoaǃgao matis Jobi ǂkhanisa hui da ǁkhāsa khoe-e da ga ǀapemāo.