Katli kipiaj ininsiua o ininueue tlauel kinpaleuis tlaj moiljuijtokej nochipa itstosej sansejko, sanse kej se tepostli tlen kimajkauaj atsintla kipaleuia se barco amo kana ma yaui maske chikauak tlaajaka.
KATLI MOSENKAJTOKEJ
1 Ximosentlalikaj nochipa initstosej sansejko
¿TLAKE KIIJTOSNEKI?
Tlaj katli kipiaj ininsiua o ininueue mosentlalijtokej nochipa itstosej sansejko, kinpaleuis kuali ma kiyolmatikaj. Pampa kimajtosej amo mokauasej maske kipiasej tlaouijkayotl.
Maske sekij itstokej sansejko san pampa ininchampoyouaj uan ininuampoyouaj kinchiualtiaj, inijuantij kuali itstosej tlaj moiknelisej uan motlepanitasej.
TLEN BIBLIA TETLAJTOLMAKA: “Se tlakatl [...] ma axkikaua isiua” (1 Corintios 7:11).
“Tlaj inmosentlalijtokej nochipa initstosej sansejko, inmechpaleuis amo nima ximoyolkokokaj. Nojkia inmechpaleuis nima ximotlapojpoljuikaj uan maske inkipiasej miak kuesoli amo inkinekisej inmokauasej” (Micah).
¿KENKE TLAUEL MONEKI?
Tlaj inmoiljuiaj amo nochipa initstosej sansejko, uajka kema inkipiasej kuesoli, nima inkinekisej inmokauasej pampa inmoiljuisej tlauel amo kuali kej initstokej.
“Kema monamiktiaj o mosiuajtiaj, miakej maseualmej moiljuiaj tlaj kipiasej kuesoli uelis mokauasej. Tlaj ta kiampa timoiljuia, uajka kiijtosneki amo nelnelia tijneki nochipa tiitstos iuaya mosiua o moueue” (Jean).
¿TLAKE UELISKIA TIJCHIUAS?
XIMOILJUI
¿Tlake inkichiuaj kema inmokualaniaj?
¿Timotlajtlakoltia pampa timonamiktik o timosiuajtik?
¿Timoiljuia kenijkatsa tiitstoskia tlaj timosiuajtijtoskia o timonamiktijtoskia iuaya seyok?
¿Tikiljuia mosiua o moueue “nimitskauas” o “nijtemos seyok katli kena nechiknelis”?
Tlaj kena kiampa timoiljuijtok, uajka moneki tijchiuas kampeka tijnekis nochipa tiitstos sansejko iuaya moueue o mosiua.
TLEN UELIS INMOTLATSINTOKISEJ
¿Ayokmo tijnekij tiitstosej sansejko kej achtouia? Tlaj ayokmo, ¿kenke?
¿Tlake uelis tijchiuasej uan kiampa nojua tijnekisej tiitstosej sansejko kej achtouia?
XIJCHIUA NI
Xijchiua tlamantli tlen ika tijnextis tikiknelia moueue o mosiua.
Kampa titekiti xijtlali iixkopinka moueue o mosiua.
Kema tiitstok kampa titekiti o sejkanok, mojmostla xijnojnotsa mosiua o moueue.
TLEN BIBLIA TETLAJTOLMAKA: “Nopa omej mochiuasej keja san se inintlakayo. ToTeko kinsejkotilia se tlakatl iuaya isiua; uajka ma axaka kiniyokatlalis” (Mateo 19:6).