TLAMACHTILI TLEN IKA PEUA
Kema se akajya miki
“Amo xichoka... ToTeotsij kimati kenke monekiyaya mikis”.
Kiampa kiiljuijkej se siuatl tlen itoka Bebe kema kitlalpachouayayaj itata, katli mijki kema yauiyaya ipan icarro.
Kej nopa kiiljuik se siuatl katli kuali mouikayaya ininuaya ichampoyouaj. Maske amo kinekiyaya kiyolkokos, Bebe tlauel moyolkokok pampa tlauel kiikneliyaya itata. Nochipa moiljuiyaya ni: “Notata amo kinamikiyaya mikis”. Kema panok se keski xiuitl, kiijkuilok tlen kiiljuijkej ipan se amochtli, nopa kinextia nojua kiyolkokouayaya pampa itata mijki.
Tlen kipanok Bebe kinextia kema se akajya miki, tlauel uejkaua timoyolkokojtokej, uan tlaj katli mijki tlauel tikikneliyayaj, nojua tlauel uejkaua timokuesojtokej. Biblia kiijtoua nopa mikilistli kejuak se ‘tokualankaitaka’ (1 Cor. 15:26). Mikilistli amo aka ueli kitsakuilia, uan maske amo timoiljuiaj tlaj panos, se akajya katli tlauel tikikneliaj uelis nima mikis, yeka tlauel timoyolkokouaj uan ayokmo kuali tiitstokej. Amo aka ueli momanauia. Kema techpano nopa, amo tijmatij tlake tijchiuasej.
Uelis ipa timotlajtlanijtok ni: “¿Uejkauas nechyolkokojtos? ¿Tlake nechpaleuis amo tlauel ma nimokuesojto? ¿Kenijkatsa uelis nikinyolchikauas katli tlauel moyolkokojtokej pampa mijki se katli tlauel kiikneliyayaj? ¿Uelis moyolkuisej katli miktokej?”.