“ToTeko [...] mitsmakas tlen moyolo kineki”

1. 1) ¿Tlake moneki kitlapejpenisej telpokamej? 2) ¿Kenke amo kinamiki majmauisej? (Xikita nopa achtoui tlaixkopinkayomej).

TELPOKATL, tlaj tijneki tias tipaxaloti uejka, tijmati achtoui moneki kuali timoiljuis kanke tias uan tlake tijchiuas. Nochi tlen tijchiuaj ipan tonemilis eli kej kema tiauij uejka, uan moneki kuali timoiljuisej tlake tijchiuasej teipa kema nojua titelpokamej. Uelis tijmatij ouij timoiljuisej tlake tijchiuasej ipan tonemilis. Se ichpokatl katli itoka Heather kiijtoua: “Nijmakasi nimoiljuis tlake nijchiuas ipan nonemilis”. Tlaj nojkia kiampa tijyolmati, xikilnamiki Jehová kiijtoua: “Amo ximajmauikaj pampa na niitstok inmouaya. Amo ximokuesokaj pampa na niinmoTeko. Niinmechfuerzajmakas [uan] niinmechpaleuis” (Is. 41:10).

2. ¿Kenijkatsa tijmati Jehová kineki xiyolpakto ipan monemilis?

² Jehová kineki kuali ximoiljui tlake tijchiuas teipa (Ecl. 12:1; Mat. 6:20, TNM). Ya kineki xiyolpaki. Uan ni uelis tijmatis pampa tikita, tijkaki uan tikajuiakmati nochi tlen kichijchijtok. Xikilnamiki ya nojkia techmokuitlauia uan technextilia kenijkatsa kuali tiitstosej. Xikita tlake kiniljuia katli amo kinekij kichiuasej tlen tetlajtolmaka: “Inkitlapejpe[nijkej] inkichiuasej tlamantli tlen inkimatiyayaj para na tlauel nechkualankamaka. [...] Inmojuantij inkipiasej kuesoli uan pinaualistli, pero yajuantij kipiasej pakilistli. Nojkia notlatekipanojkauaj uikasej ika pakilistli” (Is. 65:12-14). Kema kuali tijtlapejpeniaj tlen tijchiuasej ipan tonemilis, tijueyichiuaj Jehová (Prov. 27:11).

¿TLAKE TLAMANTLI TLEN UELIS TIJCHIUAS MITSPALEUIS XIYOLPAKTO?

3. ¿Tlake kineki xijchiua Jehová?

³ ¿Tlake mitsyololinia Jehová xijchiua? Ximoiljui ipan ni tlamantli. ToTeotsij kichijki tlapialmej san ma kinekikaj tlakuasej, atlisej uan momiakilisej. Tojuantij amo kiampa techchijchijki, pampa kimajtoya onkaskia sekinok tlamantli tlen tlauel ipati tlen kichiuaskia ma tiyolpakikaj, kej tikixmatisej uan nochipa tijtekipanosej (Sal. 128:1; Mat. 5:3). Biblia kiijtoua toTeotsij, katli tlauel “teiknelia” uan katli tlauel yolpaki, kinchijchijki maseualmej kej “itlachialis” (2 Cor. 13:11; 1 Tim. 1:11, TNM; Gén. 1:27). Uajka tlauel tiyolpakis tlaj tijchiuas kej toTeotsij kichiua. ¿Ipa tijyolmajtok o mitspanotok tlen kiijtoua iTlajtol: “Más pakilistli kiselia tlen temaka se tlenijki, uan axkeja tlen kiselia”? (Hech. 20:35). Tlen kiijtoua ni texto nelia melauak. Yeka, Jehová kineki tlen timosentlalis tijchiuas teipa ma kinexti nelia tikiknelia uan tikiniknelia sekinok (xijpoua Mateo 22:36-39).

4, 5. ¿Kenke Jesús tlauel yolpajki?

⁴ Tlen kichijki Jesús tlauel mitspaleuis. Kema eliyaya okichpil, nojkia mauiltiyaya uan moyolpakiltiyaya. Kej kiijtoua Biblia, “onka tonali para tiuetskas” uan “onka tonali para timijtotis” (Ecl. 3:4). Jesús nojkia momachtik toTeotsij iTlajtol uan kuali mouampojchijki iuaya Jehová. Kema kipixtoya 12 xiuitl, katli tlamachtiyayaj ipan teokali “kisentlachiliyayaj ika itlalnamikilis uan ika itlajtol” pampa kuali kiixmatiyaya miak tlamachtili (Luc. 2:42, 46, 47).

⁵ Kema Jesús motlakachijki, nelia tlauel yolpakiyaya. ¿Kenke tlauel kuali kiyolmatiyaya? Pampa kichiuayaya tlen iTata kinekiyaya, kimajtoya monekiyaya kiniljuis “tlakamej tlen teikneltsitsij itlajtol toTeko” uan kinchikauas “popoyotsitsij para uelisej tlachiasej” (Luc. 4:18). Salmo 40:8 kiijtoua kenijkatsa kiyolmatiyaya: “¡NoTeko Dios! Nechpaktia nijchiuas mopakilis, uan motlamachtil nijuika ipan noyolo”. Jesús tlauel kipaktiyaya kinmachtis maseualmej ajkia eliyaya Jehová (xijpoua Lucas 10:21). Se tonali, kema kinextilijtoya se siuatl kenijkatsa kinamikiyaya kiueyichiuas toTeotsij, kiniljuik itokilijkauaj: “Kema nijchiua ipakilis noTata tlen nechtitlanki uan kema nijtlamichiua iteki, nechmaka chikaualistli keja tlakualistli nechmakaskia” (Juan 4:31-34). Tlauel yolpajki pampa kiiknelik toTeotsij uan kiniknelik maseualmej. Ni tlamantli nojkia uelis kichiuas tlauel xiyolpaki.

6. ¿Kenke tlauel kuali tlaj tikiniljuisej toikniuaj katli kuali tlaneltokaj tlake tijnekij tijchiuasej ipan tonemilis?

⁶ Miakej Cristo itokilijkauaj mochijkej precursores kema eliyayaj telpokamej, yeka tlauel yolpaktokej. ¿Timoiljuia kualtiaskia tikiniljuis inijuantij tlake timoiljuijtok tijchiuas ipan monemilis? Proverbios 15:22 kiijtoua kema se akajya tlajtlani “miak consejos tlen tlalnamikinij, nochi tlen kichiua kisa kuali”. Nopa toikniuaj katli kuali tlaneltokaj mitsiljuisej tlaj senkistok tijtekipanos toTeotsij, tijyekos miak tlamantli tlen mitspaleuis ipan nochi monemilis. Jesús kiyekok miak tlamantli kema itstoya ipan iluikak iuaya iTata. Uan kema itstoya ipan Tlaltipaktli nojua kiyekok sekinok tlamantli. Kiitak kenijkatsa iTata yolpakiyaya pampa nopa tlamachtili tlen ya tlamachtiyaya asiyaya ipan ininyolo maseualmej uan nojkia pampa amo kitlauelkajki maske tlauel tlaijiyouik (xijpoua Isaías 50:4; Heb. 5:8; 12:2). ¿Kenke tlauel tiyolpakis tlaj senkistok titlatekipanos? Ma tikitakaj.

¿KENKE TLAUEL TIYOLPAKIJ TIKINPALEUISEJ SEKINOK?

7. ¿Kenke miakej telpokamej tlauel kinpaktia kinmachtisej maseualmej?

⁷ Jesús kiijtok monekiyaya tiasej uan tikinmachtisej tlen melauak nochi maseualmej uan kiampa ma mochiuakaj itokilijkauaj (Mat. 28:19, 20, TNM). Tlaj tijneki timosentlalis tijchiuas ni tekitl, tlauel tiyolpakis uan tijueyichiuas toTeotsij. Kej pano ika sekinok tlamantli, monekis panos tonali uan kiampa tijyekos kuali tijchiuas ni tekitl. Xikita tlake kiijtok se toikni tlen itoka Timothy, katli mochijki precursor kema eliyaya piltelpokatsi: “Nechpaktia senkistok nijtekipanos Jehová pampa kiampa nijnextilia kenijkatsa tlauel nikiknelia. Kema nijpeualtik, amo aka nijmachtiyaya. Teipa niajki ipan seyok tlanechikoli uan nopaya, san ipan se metstli, pejki nikinmachtia miakej maseualmej. Se tlen inijuantij pejki mosentilia touaya. Teipa niajki nimomachtia ipan Escuela Bíblica para Varones Solteros,a uan techtitlankej ipan seyok tlanechikoli. Nopaya pejki nikinmachtia nauij maseualmej. Tlauel nechpaktia nikinmachtis tlen melauak pampa nikita kenijkatsa toTeotsij itonal kinpaleuia ma kipatlakaj ininnemilis” (1 Tes. 2:19).

8. ¿Tlake kichijtokej se keskij telpokamej pampa kinekij kinmachtisej sekinok?

⁸ Sekinok telpokamej kiyekojtokej se yankuik tlajtoli. Se toikni katli eua Norteamérica kiijtok: “Kema nijpixtoya chikome xiuitl, katli ininuaya nimomachtiyaya escuela euayayaj Vietnam. Na nijnekiyaya nikiniljuis ajkia eliyaya Jehová, yeka nijchijki kampeka nijyekos nopa tlajtoli. Uelki nijyekok nopa tlajtoli pampa nijtlachilijtiauiyaya pilamochtsi Tlen Tematiltia ipan inglés uan ipan vietnamita. Nojkia nimouampojchijki ininuaya se keskij toikniuaj katli itstoyaj ipan se tlanechikoli kampa motekiuia tlajtoli vietnamita. Kema nijpixtoya 18 xiuitl nimochijki precursor. Teipa nimomachtito ipan Escuela Bíblica para Varones Solteros. Tlen nopaya nijyekok nechpaleuik ma nijchiua noteki ipan nopa tlanechikoli kampa nama nitlatekipanoua. Nojkia nitlatekipanoua kej precursor uan san na niueuejtlakatl ipan nopa tlanechikoli. Miakej katli euaj Vietnam mosentlachiliaj pampa nijyekok inintlajtol. Nechtlaneuij ininchaj, uan miakej pejtok nikinmachtia ika Biblia. Se keskij tlen inijuantij ya moatsonpoliuiltijkej” (nojkia xikita Hechos 2:7, 8).

9. ¿Kenijkatsa mitspaleuia kema tikinpaleuia sekinok ma mochiuakaj Cristo itokilijkaj?

⁹ Kema tikinpaleuia sekinok ma mochiuakaj Cristo itokilijkauaj, nojkia mitspaleuia xijyeko sekinok tlamantli. Mitspaleuis xijyeko kuali tijchiuas se tekitl, kuali timokamanaljuis ininuaya sekinok, amo timajmauis tijchiuas se tlenijki uan amo tikinyolkokos sekinok (Prov. 21:5; 2 Tim. 2:24). Kema tijchiua ni tekitl nojkia kichiua xiyolpaki pampa mitspaleuia kuali xikixmati tlen Biblia tlamachtia. Uan nojkia mitspaleuis kuali xijtekipano Jehová (1 Cor. 3:9).

10. ¿Kenke uelis tiyolpakis kema titlajtolmoyauas maske amo nochi mitstlakakilisej?

¹⁰ Tlaj kampa tiitstok amo nochi kinpaktia mitstlakakilisej kema titlajtolmoyaua, ta uelis tiyolpakis. ¿Kenke? Pampa nochi timosentikapaleuiaj kema tikintemouaj maseualmej katli kuali ininyolo. Maske san se toikni kipantis se akajya katli kineki kiixmatis tlen melauak, nochi tijchiuaj nopa tekitl uan nochi tiyolpakij. Ma tikitakaj tlen kipanok se toikni katli itoka Brandon. Ya tlatekipanok chiknaui xiuitl ipan se altepetl kampa maseualmej amo kinekiyayaj kikakisej nopa kuali tlamachtili. Ya kiijtoua: “Nechpaktiyaya nitlajtolmoyauas pampa Jehová kineki ya nopa ma tijchiuakaj. Nimochijki precursor kema nikiski escuela. Tlauel nechpaktiyaya nikinpaleuis sekinok telpokamej uan nikitas kenijkatsa teipa kuali kitekipanouayayaj toTeotsij. Kema tlanki nimomachtia ipan Escuela Bíblica para Varones Solteros, nechtitlankej sejkanok kampa nitlatekipanoskia kej precursor. Maske na amo aka nijpaleuijtok ma moatsonpoliuilti, sekinok toikniuaj kena. Uan tlauel niyolpaki pampa nimosentlalik senkistok nitlatekipanos uan nikinpaleuis sekinok ma mochiuakaj Cristo itokilijkauaj” (Ecl. 11:6).

SEKINOK TEKITL TLEN UELIS TIJCHIUAS

11. ¿Tlake tekitl kichiuaj se keskij telpokamej uan kiampa kitekipanouaj Jehová?

¹¹ Onka miak tlamantli tlen uelis tijchiuas uan kiampa senkistok tijtekipanos Jehová. Ma timoiljuikaj ipan tlen kichiuaj se keskij telpokamej. Pampa nojua moneki tijpiasej sekinok kali kampa timosentiliaj, miakej telpokamej ika nochi ininyolo tlapaleuiaj kema mochiua se Kali kampa mosentiliaj Jehová itlajtoltemakauaj. Tlaj nojkia titlapaleuis, tijueyichiuas toTeotsij uan nojkia tiyolpakis kema tiitstos ininuaya toikniuaj. Tlaj titlapaleuis kampa mochijchiua kali kampa timosentiliaj, uelis tijyekos kenijkatsa titekitis uan kuali tijchiuas se tekitl. Uan nojkia mitspaleuis tijchiuas tlen sekinok mitsnauatisej.

12. ¿Tlake sekinok tekitl ueliskia tijchiuas tlaj peuas titlatekipanos kej precursor?

¹² Se toikni katli itoka Kevin kiijtoua: “Kema nieliyaya okichpil, nijnekiyaya senkistok nijtekipanos Jehová. Kema nijpiayaya 19 xiuitl pejki nitlatekipanoua kej precursor. Nitekitiyaya san se keski tonali iuaya se toikni katli kichijchiuayaya kali uan nimopanoltiyaya ika nopa tomij tlen nijtlaniyaya. Nijyekok nijtsontsakuas kali, nijtlalis ventanas uan puertas. Teipa, nitlapaleuik ma kikualchijchiuakaj kali kampa timosentiliaj uan toikniuaj ininchaj kampa tetlasosoljuilik se chikauak ajakatl. Kema nijmatki ipan Sudáfrica monekiyaya ma tlapaleuikaj kampa kichijchiuaj kali kampa timosentiliaj, nijtitlanki se solicitud, uan teipa nechtlanejkej. Ipan África, se keski semanas nitlapaleuia kampa mochiua se kali uan teipa nia kampa kichijchiuaj seyok. Katli ininuaya nitekiti nikinita kej nochampoyouaj. Sansejko timokauaj ipan san se kali, sansejko timomachtiaj Biblia uan sansejko titekitij. Nojkia sejse semana nechpaktia nitlajtolmoyauas ininuaya toikniuaj katli euaj ipan nopa altepetl. Nelia tlauel niyolpaki pampa kuali nijtlapejpenik tlen nijchiuas ipan nonemilis maske nojua niokichpil nieliyaya”.

13. ¿Kenke tlauel yolpakij telpokamej katli tlatekipanouaj Betel?

¹³ Miakej toikniuaj katli mochijkej precursores, nama tlatekipanouaj ipan Betel. Nopaya tlauel yolpaktokej, pampa nochi tlen nopaya kichiuaj tlauel kiyolpakiltia Jehová. Nojkia, nochi katli itstokej nopaya techpaleuiaj ma tijpiakaj tlamachtili. Se betelita katli itoka Dustin kiijtoua: “Kema nijpixtoya 9 xiuitl, nimosentlalik senkistok nitlatekipanos. Kema tlanki nimomachtia ipan escuela, nijpeualtik nitlatekipanoua kej precursor. Kema panok se xiuitl uan tlajko, nechtlanejkej Betel. Nikaj nijyekok nitekiti ipan prensas rotativas, uan ma nijkualtlali programas ipan computadoras. Tlauel nechpaktia se tlamantli ipan Betel, tojuantij achtoui techmatiltiaj kenijkatsa tlajtolmoyaualistli momoyaua ipan nochi Tlaltipaktli. Tlauel nechpaktia niitstos nikaj pampa ika toteki tikinpaleuiaj maseualmej ma mouampojchiuakaj iuaya Jehová”.

¿TLAKE TIMOSENTLALIS TIJCHIUAS TEIPA?

14. Tlaj tijneki senkistok titlatekipanos, ¿tlake uelis tijchiuas?

¹⁴ ¿Tlake uelis tijchiuas tlaj tijneki senkistok titlatekipanos? Achtoui moneki tijnextis kuajkuali tlamantli ipan monemilis. Nopa mitspaleuis kuali tijtekipanos Jehová. Yeka, nochipa ximomachti toTeotsij iTlajtol, kuali ximoyoliljui ipan tlen tijpoua uan xijchiua kampeka tijnextis nelia tijneltoka tlen tijpoua kema titlanankilis ipan tlanechikoli. Tlaj timomachtia ipan escuela, uelis tijyekos miak tlamantli uan nojkia tijyekos nojua kuali titlajtolmoyauas. Xijnexti mitstekipachoua tlen kinpano maseualmej, yeka ika miak tlatlepanitakayotl xikintlajtlani se keski tlamantli uan kuali xikintlakakili kema mitsnankilisej. Nojkia uelis titlapaleuis ipan kali kampa timosentilia, kej kema tlachpanaj uan kikualchijchiuaj. Jehová tlauel kipaktia kintekimakas katli amo moueyimatij uan katli kinekij tlapaleuisej (xijpoua Salmo 110:3; Hech. 6:1-3). Apóstol Pablo kitlanejki Timoteo ma yaui iuaya kej misionero pampa toikniuaj “kamatkej kuali tlen Timoteo” (Hech. 16:1-5).

15. ¿Tlake uelis tijchiuas uan kiampa timopanoltis kampa titlatekipanos?

¹⁵ Nochi katli senkistok tlatekipanouaj moneki tekitisej uan kiampa uelis mopanoltisej (Hech. 18:2, 3). Uelis tijyekos tijchiuas se tekitl uan kiampa titekitis se keski tonali kampa tiitstok. Xijtlatsintoki toikni katli mitspaxaloua chijchikuasej metstli o sekinok precursores katli itstokej ipan mocircuito ipan tlake ueliskia titekitis. Uan kej kiijtoua Biblia, “nochi tlen ta timoiljuia para tijchiuas xijkauili imako toTeko para mitsyakanas, uan yajaya mitspaleuis para kisas kuali tlen timoiljuijtok” (Prov. 16:3; 20:18).

16. ¿Kenijkatsa mitspaleuis teipa tlaj tijpeualtis senkistok titlatekipanos kema nojua titelpokatl?

¹⁶ Uelis timotemachis Jehová kineki xijtlapejpeni tlen kuali ipan monemilis uan kiampa tiitstos ika pakilistli (xijpoua 1 Timoteo 6:18, 19). Kema senkistok titlatekipanoua, tikinixmati sekinok katli nojkia senkistok tlatekipanouaj. Nopa mitspaleuia nojua kuali xitlaneltoka. Katli mosenkajtokej kimatij nama tlauel kinpaleuijtok kuali ma itstokaj ininuaya ininsiua o ininueue pampa kipeualtijkej senkistok tlatekipanouaj kema nojua eliyayaj telpokamej. Uan katli elij precursores, kema mosenkauasej nojua uelis kiampa tlatekipanojtosej (Rom. 16:3, 4).

17, 18. ¿Tlake moneki tijchiuas tlaj tijneki Jehová ma mitsmaka tlen moyolo kineki?

¹⁷ Tlen timosentlalia tijchiuas kinextia tlen tijpia ipan moyolo. Salmo 20:4 kiijtoua ni tlen Jehová: “Ma mitsmakas nopa tlen moyolo kineki. Ma kichiua ma kisa kuali nochi tlen timoiljuijtok tijchiuas”. Yeka kuali ximoiljui tlake tijneki tijchiuas ipan monemilis, uan ximoiljui ipan tlen toTeotsij kichijtok ipan ni tonali uan ipan tlen ta tiuelis tijchiuas ipan itlanechikol. Teipa ximoiljui kenijkatsa tijchiuas tlen Jehová kipaktia.

¹⁸ Tlaj senkistok tijtekipanos Jehová, nelia tlauel tiyolpakis, pampa tijueyichiuas ika tlen tijchiuas ipan monemilis. Yeka, “ximouampojchiua iuaya toTeko, uan yajaya mitsmakas tlen moyolo kineki” (Sal. 37:4).