¿Tlake kinpanok pampa kitlakakilijkej Satanás?

Adán uan Eva mijkej pampa amo kineltokakej toTeotsij (Génesis 3:6, 23)

Eva kitlakakilik nopa kouatl uan kikuajki se achi nopa kuauitl itlajka. Teipa, kimakak Adán uan ya nojkia kikuajki.

Tlen kichijkej amo kuali. Elki se tlajtlakoli. ToTeotsij kinkixtik ipan nopa xochimili kampa itstoyaj.

Inijuantij uan ininkoneuaj tlaijiyouijkej. Ueuejtixkej uan mijkej. Amo kana yajkej pampa tlanki ininnemilis.

Katli miktokej mokauaj kej tlali uan ayokmo tleno uelij kichiuaj (Génesis 3:19)

Timikij pampa nochi tiikoneuaj Adán uan Eva. Katli miktokej amo uelij tlachiaj, amo tlakakij yon amo tleno uelij kichiuaj (Eclesiastés 9:5, 10).

Jehová amo kinekiyaya ma mikikaj maseualmej. Yeka nechka kinyolkuis katli miktokej. Tlaj kineltokasej, amo kema mikisej. Inijuantij nochipa itstosej.