¿Kenijkatsa mitspaleuis tlaj timonechikos touaya?

Miakej ayokmo monechikouaj ipan ininreligión pampa amo kinnankiliaj tlen tlauel ipati yon amo kinyolchikauaj. Uajka, ¿kenke kualtiaskia timonechikos ininuaya Jehová itlajtoltemakauaj? ¿Kenijkatsa mitspaleuis?

Tiyolpakis ininuaya katli kipiaj kuali ininyolo uan teikneliaj. Kema itstoyaj nopa achtoui Cristo itokilijkauaj, onkayaya se keski tlanechikoli, kema mosentiliyayaj kiueyichiuayayaj toTeotsij, momachtiyayaj toTeotsij iTlajtol uan sansejko moyolchikauayayaj (Hebreos 10:24, 25). Kema nochi monechikouayayaj kiyolmatiyayaj kipixtoyaj kuali ininuampoyouaj pampa nochi moikneliyayaj (2 Tesalonicenses 1:3; 3 Juan 14). Tojuantij nojkia kej nopa tijchiuaj nama, yeka nojkia tiyolpakij.

Tijmatis kenijkatsa uelis tijchiuas tlen tlamachtia Biblia. Kej uejkajkia monechikouayayaj, ipan ni tonali tlakamej, siuamej uan konemej nojkia timonechikouaj kampa tikintlakakiliaj katli kuali tlamachtiaj. Ni techpaleuia ma tijkuamachilikaj kenijkatsa tijchiuasej ipan tonemilis tlen tlamachtia Biblia (Deuteronomio 31:12; Nehemías 8:8). Nochi katli timonechikouaj uelis titlanankilisej kema tlajtlanij se tlamantli uan nojkia tiuikasej sansejko, kej nopa nochi tijnextiaj timotemachiaj ipan toTeotsij (Hebreos 10:23).

Nojua tlauel kuali tijneltokas toTeotsij ika nochi moyolo. Kema apóstol Pablo kintlajkuiljuilik ipan se tlanechikoli, kiniljuik kinekiyaya kinitas pampa kej nopa sansejko moyolchikauaskiaj. Uan pampa kinitaskia kenijkatsa kuali tlaneltokayayaj ya nojkia kipaleuiskia kuali tlaneltokas (Romanos 1:11, 12). Yeka kema tiitstokej ininuaya toikniuaj ipan tlanechikoli techpaleuia nojua tlauel kuali ma tijneltokakaj toTeotsij uan ma timonejnemiltikaj kej tlamachtia Biblia.

Kualtiaskia tias kampa timonechikouaj uan kiampa ta tikitas kenijkatsa tijchiuaj nopa. Tlaj tias, timitsselisej ika miak pakilistli. Nopaya amo tlainamaj uan nojkia amo tlajtlanij tomij.

• ¿Kej ajkia inijuantij tijchiuaj kema timonechikouaj?

• ¿Kenijkatsa techpaleuia kema timonechikouaj?