¿Kenijkatsa uelis techpaleuis amatlajkuiloli tlen eltok kampa timosentiliaj?

¿Mitspaktiskia tijmatis sekinok tlamantli ipan Biblia? ¿Tijnekiskia tijmatis kenijki moixtoma se versículo, kuali tikixmatis se akajya, se altepetl o seyok tlamantli tlen uala ipan Biblia? Uan tlaj tijpia se kuesoli, ¿tijnekiskia tijmatis kenijkatsa tijsenkauas ika toTeotsij iTlajtol? Tlaj tijneki tijmatis, kualtiaskia tikitati kampa kitlajtlalijtokej amatlajkuiloli kampa timosentiliaj.

Uelis tijtemosej amatlajkuiloli tlen tlauel techpaleuis. Maske uelis amo tijpia nochi amatlajkuiloli tlen kichijtokej Jehová itlajtoltemakauaj ika tlajtoli tlen tijmati, ipan kali kampa timosentiliaj eltok amatlajkuiloli tlen namanok kistok. Uelis nojkia eltok sekinok Biblias, se diccionario kampa tijtemos tlajtoli tlen amo tijkuamachilia uan sekinok amatlajkuiloli. Uelis tijtekiuis kema ayamo peua tlanechikoli o kema tlamis. Tlaj eltok se computadora, uelis kipia nopa programa Watchtower Library, ni kipia miak tlamachtili tlen uala ipan amatlajkuiloli uan nopaya amo ouij tijtemos se tlamachtili ika itoka, se tlajtoli o se versículo.

Tlauel kinpaleuia katli moijkuilojtokej ipan tlanechikoli Kej Timonejnemiltiaj uan Titlajtolmoyauaj. Uelis tijtekiuis nopa amatlajkuiloli tlen eltok ipan kali kampa timosentiliaj uan kiampa tijkualchijchiuas motlamachtil. Katli kiyakana nopa tlanechikoli Kej Timonejnemiltiaj uan Titlajtolmoyauaj kiuika amatlajkuiloli tlen namanok kistok uan nojkia kitlachilia kuali ma elto. Ya o katli mitsmachtia mitsnextilisej kenijkatsa uelis tijtemos se tlamachtili tlen tijneki. Xijmajto nopa amatlajkuiloli amo uelis tijuikas mochaj, moneki tijmaljuis uan amo uelis tijuasanis.

Biblia kiijtoua moneki tijtemosej toTeotsij kej ‘tijtemoskiaj miak tomij tlen motlatijtok’ uan kej nopa ‘tikixmatisej toTeko’ (Proverbios 2:1-5). Uan ipan kali kampa timosentiliaj tlauel kuali tijtemosej tlamachtili tlen tijnekij.

• ¿Ika tlake uelis tijtemos tlamachtili ipan kali kampa timosentiliaj?

• ¿Ajkia uelis mitspaleuis tijtekiuis amatlajkuiloli katli eltok kampa timosentiliaj?