¿Kenijkatsa techpaleuia kema timomaijtouaj?

Kema tijchiua tlen amo kema tijchijtok, uelis timotlajtlania: “¿Kenijkatsa nechpaleuis?”. ¿Kinamiki timoiljuisej nopa kema timomaijtosej? Kemantika amo kenijki, pampa tijnekij tijmatisej kenijkatsa techpaleuis. Job nojkia motlajtlanik: “Tlaj nijnojnotsaskia, ¿nechnankiliskia?” (Job 9:16, TNM).

Ipan tlamachtili tlen panok, tikitakej kema timomaijtouaj amo tijchiuaj san pampa timomajtokej o pampa tijnekij kuali tijyolmatisej. ToTeotsij techtlakakilia kema timomaijtouaj, tlaj tijchiuaj kej kinamiki uan tijtlajtlaniaj tlen kipaktia. Uan ya techiljuia ma tijnechkauikaj (Sant. 4:8). Uajka, ¿tlake uelis tijchiasej tlaj nochipa timomaijtosej? Ma tikitakaj.

Kichiua ma tijpiakaj tlayolseuilistli

¿Tlauel mitstekipachoua kuesoli o tlaouijkayotl? Biblia kiijtoua: “Ximomaijtojtinemikaj [...] ajachika” uan “xijtlajtlanikaj ma inmechmaka nochi tlen moneki” (1 Tes. 5:17; Filip. 4:6). Uan katli kiiljuiaj toTeotsij ma kinpaleui, Biblia kiniljuia: “ToTeko inmechmakas tlaseuilistli [...]. Uan nopa tlaseuilistli kiyaualtsakuas inmoyolo uan inmotlalnamikilis” (Filip. 4:7). Uelis timoyoltlalisej tlaj timomaijtosej uan tikiljuisej toTeotsij nochi tlen techtekipachoua. Yeka Biblia kiijtoua: “Nochi mokuesol xijkaua imako toTeko uan yajaya mitsmakas temachili” (Sal. 55:22).

Nama tlauel miakej kiyolmatij nopa kema momaijtouaj. Hee Ran katli eua Corea del Sur, kiijtoua: “Maske nijpia uejueyi kuesoli, kema nimomaijtoua nechpaleuia nimoyoltlalis uan nikijiyouis”. Uan Cecilia, katli eua Filipinas, kiijtoua: “Tlauel nechtekipachoua tlen ueliskia kinpanos noichpokauaj. Nojkia nijmokuitlauia nonana, katli ayokmo kuali nechixmati. Pampa nimomaijtoua, ueli nimoyoltlalia uan nijchiua nopa tekitl. Nijmati Jehová nechpaleuis nikinmokuitlauis”.

Techyolchikaua kema tijpiaj tlaouijkayotl

¿Tlauel timotekipachoua, timoiljuia uelis mitspanos se tlenijki o mitspanotok tlen tlauel amo kuali? Tlaj tijnojnotsas toTeotsij katli “ajachika techyoltlalia” tlauel mitsyolchikauas. Biblia kiijtoua ya “techyoltlalia ipan nochi” tlaouijkayotl (2 Cor. 1:3, 4). Kema Jesús tlauel motekipachojtoya, “motlankuaketski, uan pejki momaijtoua”. Yeka, “ualajki se iluikaejketl [...] uan kimakak fuerza” (Luc. 22:41, 43). Nehemías nojkia tlaijiyouik pampa kiiljuiyayaj kichiuiliskiaj tlen amo kuali tlaj amo kikauaskia kitekipanos toTeotsij. Kema momaijtok, kiijtok: “Achi más nimoyolchikajki”. Tlen panok teipa kinextia toTeotsij kipaleuik ayokmo majmauis uan kiampa kichijki tlen kinauatijtoya (Neh. 6:9-16). Reginald, katli eua Ghana, kiijtoua: “Tlaj nimomaijtoua kema tlauel nimotekipachoua, nijyolmati kejuak nijpouilik nokuesoljuaj se katli uelis nechpaleuis uan nechiljuia amo ma nimotekipacho”. Ni kinextia toTeotsij techyolchikauas tlaj timomaijtosej.

Kichiua ma titlalnamikikaj kej toTeotsij

Tlen tijtlapejpenisej uelis kichiuas ayokmo ma tiitstokaj kej achtouia. ¿Kenijkatsa uelis amo timokuapolosej? Biblia kiijtoua: “Intla se tlen inmojuantij kineki achi más tlalnamikilistli [kema kipia tlaouijkayotl], ma kitlajtlani toTeko uan yajaya kimakas. Yajaya tlen temaka miak tlalnamikilistli, uan axkiajuas pampa kitlajtlania” (Sant. 1:5). Tlaj tijtlajtlanisej toTeotsij tlalnamikilistli, techpaleuis ika itonal kuali ma tijtlapejpenikaj tlen tijchiuasej. Yeka, Jesús kiijtok ‘toTata kinmakas itonal nochi tlen kitlajtlanisej’ (Luc. 11:13).

Jesús nojkia kiiljuik iTata ma kipaleui kema kitlapejpeniskia tlen kichiuas. Yeka kema kintlapejpenik nopa 12 apóstoles, ‘seyoual momaijtok’ (Luc. 6:12).

Miakej nojkia moyoltlaliaj kema kiitaj toTeotsij kinpaleuia kuali kitlapejpenisej tlen kichiuasej. Regina, katli eua Filipinas, kiijtoua tlake kuesoli kipanotok. Monejki iselti kiniskaltis ikoneuaj kema mijki iueue uan kikixtijkej kampa tekitiyaya. ¿Tlake kipaleuik? Ya kiijtoua: “Kema nimomaijtoua nikiljuia Jehová ma nechpaleui”. Kwabena, katli eua Ghana, kiijtoua kenke kiiljuia Jehová ma kipaleui: “Kampa tikalchiuayayaj tlauel kuali nechtlaxtlauiyayaj uan nechkixtijkej. Yeka, kema nijtemok seyok tekitl, nochipa nikiljuik toTeotsij ma nechpaleui kuali nijtlapejpenis tlen nijchiuas. Nimotemachia Jehová nechpaleuik kuali nijtlapejpenis se tekitl tlen ika ueli nimopanoltia uan tlen nechkaua ma nijtekipano toTeotsij”. Jehová mitsyakanas tlaj tikiljuis ma mitspaleui tijchiuas tlen ika uelis kuali timouikas iuaya.

Tikitakej san se keski tlamantli tlen kinextia kenijkatsa techpaleuia kema timomaijtouaj. (Ipan nopa recuadro “¿Kenijkatsa techpaleuia kema timomaijtouaj?” tikitas kenijkatsa nojkia techpaleuia.) Tlaj tijneki ma mitspaleui kema timomaijtos, achtoui moneki tikixmatis toTeotsij uan nochi tlen kiijtoua kichiuas. Kualtiaskia tikiljuis se tlen Jehová itlajtoltemakauaj ma mitspaleui tikixmatis Biblia.a Nopa ueliskia achtoui tijchiuas tlaj tijneki tijnechkauis katli ‘technankilia kema timomaijtouaj’ (Sal. 65:2).