¿Kenijkatsa uelis mitspaleuis tlamaijtoli?

Pamela tlauel mokokouayaya yeka yajki kampa tepajtijketl. Nojkia momaijtok uan kiiljuik toTeotsij ma kipaleui kiijiyouis nopa kokolistli. ¿Kipaleuik pampa momaijtok?

Ya kiijtoua: “Nijpixtok cáncer uan tlauel nimomajmatiyaya kema pejki nimopajtia. Kema kiampa nijmatiyaya nimomaijtouayaya uan Jehová nechyoltlaliyaya uan nechpaleuiyaya kuali ma nimoiljui tlen nijchiuas. Maske nojua tlauel nitlakayokuajkualo, tlamaijtoli nechpaleuia amo ma nimosentlali ipan nokokolis. Kema maseualmej nechtlajtlaniaj kenijkatsa niitstok, nikiniljuia: ‘Niyolpaki maske nechkokoua notlakayo’”.

Tlen kipanok amo kiijtosneki san moneki timomaijtosej kema tijpiasej se ueyi kuesoli. Nochi tikixnamikij tlaouijkayotl, sekij uejueyi uan sekij amo, uan tijnekij ma techpaleuikaj tikijiyouisej. Uajka, ¿techpaleuia kema timomaijtouaj?

Biblia kiijtoua: “Nochi mokuesol xijkaua imako toTeko uan yajaya mitsmakas temachili. ToTeko axkikauas ma uetsi se tlen kitlepanita” (Salmo 55:22). ¡Tlauel techyolchikaua tlen kiijtoua ni texto! Uajka, ¿kenijkatsa uelis techpaleuis tlamaijtoli? Kema tijnojnotsaj toTeotsij kej kipaktia, ya techpaleuia ma tikijiyouikaj tlaouijkayotl (nojkia xikita nopa recuadro “¿Kenijkatsa techpaleuia kema timomaijtouaj?”).

¿Kenijkatsa techpaleuia kema timomaijtouaj?

Tlaseuilistli ipan totlalnamikilis

“Xijtlajtlanikaj ma inmechmaka nochi tlen moneki [...]. Intla keja nopa inkichiuaj, toTeko inmechmakas tlaseuilistli ipan inmoyolo tlen tlakamej axuelis kimachilisej. Uan nopa tlaseuilistli kiyaualtsakuas inmoyolo uan inmotlalnamikilis toTeko pampa inmechtlatskiltijtok ipan Cristo” (Filipenses 4:6, 7). Tlaj tikiljuisej toTeotsij tlen techtekipachoua, ya techpaleuis amo tlauel ma timotekipachokaj uan ma tijmatikaj tlake tijchiuasej.

Techmaka tlalnamikilistli

“Intla se tlen inmojuantij kineki achi más tlalnamikilistli pampa axkimati tlachke ipakilis toTeko ipan inemilis, ma kitlajtlani toTeko uan yajaya kimakas. Yajaya tlen temaka miak tlalnamikilistli, uan axkiajuas pampa kitlajtlania” (Santiago 1:5). Kema se tlamantli techtetsopa uelis amo kuali tijtlapejpenisej tlen tijchiuasej. Uan tlaj tikiljuisej toTeotsij ma techmaka tlalnamikilistli, ya techpaleuis ma tikilnamikikaj tlen kiijtoua Biblia.

Techyolchikaua uan techyolseuia

“Nochi niueli nijchiua ika nopa chikaualistli tlen [toTeotsij] nechmaka” (Filipenses 4:13). Jehová kipia nochi chikaualistli, yeka ya uelis techyolchikauas uan kiampa uelis tikixnamikisej uan tikijiyouisej tlaouijkayotl (Isaías 40:29). Biblia kiijtoua toTeotsij Jehová eli “katli techtlasojtla uan tlatoktsitsij techyoltlalia. Yaya techyoltlalia ipan nochi nopa tlaouijkayotl katli techpanotiuala” (2 Corintios 1:3, 4, Icamanal Toteco).