Tlen maseualmej kinekij kimatisej

¿Uelis se Cristo itokilijka kipias se pistola, se rifle o seyok tlamantli tlen ika momanauis?

Maske Cristo itokilijkauaj uelis kitlapejpenisej kenijkatsa momanauisej, amo kinamiki kiixpanosej tlen Biblia kiijtoua. Biblia kinextia amo kinamiki kipiasej pistolas, rifles o seyok tlamantli tlen ika uelis momanauisej. Ma tikitakaj se keski tlamantli tlen techpaleuis kuali ma tijtlapejpenikaj tlake tijchiuasej.

Jehová kiita tlatsejtseloltik nemilistli, uan tlauel kipatiita ininnemilis maseualmej. Tlanauatijketl David kimajtoya Jehová yaya katli ‘techmaka yolistli’ (Sal. 36:9). Yeka tlaj se toikni kitlapejpenis kenijkatsa momanauis o kimokuitlauis tlen kipixtok, moneki kichiuas kampeka amo kimiktis se maseuali uan kiampa “axkiuikas tlajtlakoli” (Deut. 22:8; Sal. 51:14).

Maske se maseuali uelis kimiktisej ika tlen ueli tlamantli, nimantsi mikis tlaj kitoponisej ika se pistola, maske uelis amo kinekiyayaj kimiktisej.a Nojkia, tlaj katli tlachteki achi majmajtok uan kiita nopa seyok nojkia kipia se pistola, uelis panos tlen amo kuali uan se akajya mikis.

Kema Jesús kiniljuik itokilijkauaj ma kipiakaj se espada, amo kinekiyaya kiniljuis ika nopa ma momanauikaj (Luc. 22:36, 38). Ya kiniljuik nopa pampa kinekiyaya kinmachtis se tlenijki tlen tlauel ipati: amo kinamikiyaya momakuepasej maske sekinok kinteuiskiaj ika tepostli (Luc. 22:52). Kema apóstol Pedro kinakastsontejki itlatekipanojka sumo sacerdote, Jesús kiiljuik: “Xijkalaki momachete ipan ikuetlaxo”. Teipa kiijtok se tlamantli tlen nelia melauak, se tlamantli tlen kinyakantok Cristo itokilijkauaj ipan ni tonali: “Tlen tlateuiaj ika machete, nojkia kinmiktisej ika machete” (Mat. 26:51, 52).

Kej kiijtoua Miqueas 4:3, toTeotsij itekipanojkauaj ‘kitejtejtsonaj inintepos tlen ika tlateuiyayaj’ uan kichijchiuaj tepostli tlen ika tekitisej. Maseualmej kimatij Cristo itokilijkauaj kinpaktia itstosej ika tlaseuilistli. Kichiuaj tlen apóstol Pablo tetlajtolmakak: “Amo kema xikinkuepilikaj tlen inmechchiuilijtokej tlen axkuali” uan “xiitstokaj ika yejyektsi ika nochi tlakamej” (Rom. 12:17, 18). Pablo kiixnamijki miak tlaouijkayotl, kej kema mopantik “ininuaya tlachtekinij” (2 Cor. 11:26). Maske kiampa kipanok, amo kema kiixpanok tlen Biblia kiijtoua san pampa kinekiyaya momanauis. Ya motemachik ipan toTeotsij uan ipan tlen Biblia kiijtoua, pampa “más kuali se kipias tlalnamikistli que tepostli tlen ika [se] tlateuis” (Ecl. 9:18).

Cristo itokilijkauaj tlauel kipatiitaj nemilistli uan amo tlamantli tlen kipiaj. Tijmatij se maseuali amo uelis “kipantis yolistli” san “pampa kipia miak tlamantli” (Luc. 12:15). Tlaj se akajya techtlachtekilia uan kipia se tlenijki tlen ika uelis techkokos o techmiktis, kinamiki yamaktsi tijnojnotsasej. Tlaj amo techkaua, uajka kinamiki tijnextisej tlalnamikilistli uan tijchiuasej tlen Jesús tetlajtolmakak: “Amo ximomakuepakaj ika tlen inmechchiuilia tlen axkuali”. Ni kiijtosneki moneki tijkauasej ma kiuika nochi tlen tijpiaj (Mat. 5:39, 40; Luc. 6:29).b Yeka nochipa ma tijnextikaj tlalnamikilistli uan amo ma tijnextijtinemikaj tlen tijpiaj o tlen tijuikaj, kiampa tlachtekinij amo tleno techchiuilisej. Nojkia amo tleno techpanos tlaj tokalnechkauaj kiitasej tojuantij techpaktia tiitstosej ika tlaseuilistli pampa tijtekipanouaj Jehová (Prov. 18:10; 1 Juan 2:16).

Cristo itokilijkauaj kitlepanitaj tlen sekinok moiljuiaj (Rom. 14:21). Tlaj se toikni kipiaskia se pistola pampa kineki momanauis kema se akajya kineki kichiuilis tlen amo kuali, uelis sekij toikniuaj moyolkokosej kema kimatisej nopa. Tlaj tikinikneliaj toikniuaj, uajka tijchiuasej tlen sekinok kinpaleuis uan amo tijchiuasej san tlen tojuantij tijnekij maske tekichiuanij amo tleno kiijtouaj (1 Cor. 10:32, 33; 13:4, 5).

Cristo itokilijkauaj kichiuaj kampeka kuali monejnemiltisej (2 Cor. 4:2; 1 Ped. 5:2, 3). Ma timoiljuikaj se Cristo itokilijka kipia se pistola pampa kiampa uelis momanauis. Tlaj toikniuaj kitlajtolmakaj ika Biblia, uan nojua kipia nopa pistola, uajka sekinok ayokmo kitlepanitaskiaj. Yeka, ayokmo ueliskia tlatekipanos ipan tlanechikoli. Nojkia kiampa panoskia iuaya se Cristo itokilijka katli kipia se tekitl kampa kiiljuiaj moneki kinemiltis se pistola. Yeka, tlaj se toikni kipia se tekitl kampa moneki kinemiltis se pistola o seyok tlamantli, uajka kualtiaskia kitemos seyok tekitl.c

Sejse Cristo itokilijka moneki kitlapejpenis kenijkatsa momanauis ya uan kinmanauis ichampoyouaj, kenijkatsa kimokuitlauis tlen kipia uan tlake tekitl kiselis. Maske iselti kitlapejpenis tlake kichiuas, moneki kiitas tlake tetlajtolmaka Biblia uan kiampa kinextis tlalnamikilistli uan tlaiknelili, kej Jehová kinextia. Cristo itokilijkauaj katli kuali tlaneltokaj moyakanaj ika tlen Biblia tetlajtolmaka, yeka amo kipiaj se pistola o seyok tlamantli tlen ika momanauisej kema sekinok kinekij kinchiuilisej tlen amo kuali. Kimatij teipa nochipa kuali itstosej tlaj motemachisej ipan Jehová uan tlaj kichiuasej tlen Biblia tetlajtolmaka (Sal. 97:10; Prov. 1:33; 2:6, 7).