Jonás
3 Satepan Jehová oksepa kiluij Jonás: 2 “Xiouj ueyi xolal Nínive uan xikinmatilti akin ompa nemij tein nimitsiluiti”.
3 Jonás kitakamatik Jehová uan yajki Nínive. Nejin xolal semi ueyi katka uan para se kitamipanauis se nejnemia eyi tonal. 4 Keman Jonás ajsik Nínive, nejnemik se tonal uan kijtojtiaya nejin: “Poliui 40 tonalmej para maj Dios kiixpolo Nínive”.
5 Yejua ika akin nemiaj Nínive takuaujtamatkej iuan Dios, uan kiixtalijkej maj amo akin takua seki tonalmej. Uan no kiixtalijkej maj nochin motalilikan tasal* tein teajuayotia. 6 Keman akin tekiuajtia Nínive kikakik tein Jonás kitematiltijtoya, moketsak de iueyi silla uan mokixtilij tasal tein motaliliaya kemej tekiuaj. Satepan motalilij tasal tein teajuayotia uan motalij itech koujnex. 7 Uan no, tekiuaj tanauatij maj itech nochi xolal Nínive motematiltiani nejin:
“Tekiuaj uan ueyichiuanimej tanauatiaj: amo xitakuakan nion xitayikan at. Amo xikintamakakan ichkamej,* nion kuakuejmej, nion okseki tapialmej uan amo xikinmakakan at. 8 Nochin ximotalilikan tasal tein teajuayotia uan no xikintalilikan tapialmej. Semi xiktataujtikan Dios maj techikneli, amo xikchiuakanok tein amo kuali nion xitetajyouiltikanok. 9 Komo ijkon tikchiuaj, xa Dios amo kualantosok touan, xa kipatas tein kiixtalijtok kichiuas uan amo timikiskej”.
10 Keman Dios kiitak nochi tein kichiujkej uan ke amo kichiuayajok tein amo kuali, kipatak tein kiixtalijka kichiuas uan amo kintatsakuiltijok.