Deuteronomio
32 “Xikakikan akin nanyetokej iluikak, nitajtoti,
uan maj nikan taltikpak kikakikan tein nikijtoti.
2 Tein nitamachtis uetsis kemej kiouit,
notajtoluan chalaniskej kemej ajuach,
kemej mixkiouit tein uetsi itech xiuit
uan kemej chikauak kiouit tein uetsi koujtaj.
3 Porin nejua nikteixmatiltis itokay Jehová.
¡Xikteixmatiltikan ke toDios semi ueyichiujkej!
4 Yejua kemej se ueyi tet,* amo keman mopoloua,
porin nochipa kichiua tein kinamiki.
Yejua se Dios akin uelis iuan se takuaujtamatis uan amo keman techichikouia.
Tein kiixtalia uan kichiua kuali yetok.
5 Namejuan nankichiujkej tein amo kuali.
Amo nanikoneuan; namejuan namotajtakol.
¡Tel amo nanyolkualmej uan nantajtakolchiuanij!
6 ¿Ijkon nankitaxtauiaj Jehová?
Amo nankuatamatij uan amo nanyektanemiliaj.
Yejua namoTajtsin akin kichiuak xinemikan,
akin namechchijchiuak uan namechtalij kampa nochipa nanyetoskej.
7 Xikelnamikikan tein panok ne uejkauj,
xiknemilikan tein panok keman nemiaj namouejkaujtatuan.
Xikintajtanikan namotatuan uan yejuan namechtapouiskej;
xikintajtanikan akin xiuejkejya uan yejuan namechiluiskej.
8 Keman Dios akin okachi ueyichiujkej kixejxeloj tal para sejse altepet,
keman kinxexeloj ikoneuan Adán,
yejua kiitak kanachimej katkaj ikoneuan Israel
para kiixtalis hasta kani tamis sejse xolal.
9 Porin Jehová kinxeloj para maj iaxkauan;
kemaj, moxelouilij Jacob.
10 Yejua kiajsik itech se tal kampa tauaktok,
kampa amo teyi onkak uan tsajtsitokej tapialmej.
Kimatampauij, kiyekpiak
uan kipaleuij kemej yeskia iixtololouan.
11 Kemej se águila tein mopapatatsa,
tein kinmachtia ipiluan maj patanikan,
kipataua iajtapaluan, kinkitskia
uan kinuika ipanko,
12 sayoj Jehová kiyekantiaya Jacob;
amo iuan yetoya okse dios.
13 ToDios kichiuak maj mokuili tepemej,
yejua ika kikuaj tein mochiua itech nejon tal.
Kitamakak ika nekti* tein onkak itech tepejxit
uan ika aceite tein onkak itech tet,
14 ika mantequilla* de kuakuemej uan ika leche de ichkamej.*
Kitamakak ika ichkamej tein okachi kuajkualmej,
ika ichkaueuetkej tein takuajtinemiaj ompa Basán uan chivos,
uan ika trigo tein okachi kuali.
Uan tayik vino tein kisa den uvas.
15 Keman Jesurún* motomauak kiixnamikik iteko uan peuak tatejteliksa.
(Tejua timotomauak, satichikaktik timoitaya uan tiixuik).
Uan yejua kikauak Dios, akin kichijchiuak,
kiixtopeuak akin kemej yeskia ueyi tet tein kimakixtia.
16 Yejuan kitelkualantijkej Dios keman kinueyichiujkej okseki dioses;
kitelkualantikej porin kichiujkej tein tel pitsotik.
17 Amo teyi kimaktilijkej Dios, ta kinmaktilijkej miak taman amo kuali ejekamej,
dioses tein amo kinixmatiaj,
dioses tein yankuikej tein yekin kinixmatkaj,
dioses tein ininuejkaujtatuan amo kinixmatiaj.
18 Tikelkauak moDios akin kemej yeskia ueyi tet, akin kichiuak xinemi
uan amo tikelnamikik Dios akin mitsyolitij.
19 Keman Jehová kiitak nejin, kinixtopeuak,
porin iokichpipiluan uan isiuapipiluan kitelkualantijkaj.
20 Yejua ika kijtoj: ‘Amo nikinpaleuis
uan nikitas keniuj tamij.
Porin tel amo yolkualmej,
kemej konemej akin amo tatakamatij.
21 Yejuan nechtelkualantijkej keman kiueyichiujkej se tein amo yekdios;
nechkualantijkej porin kinueyichiujkej tiotsitsin* tein nenkaj yetokej.
Nikinkuajkualantis porin nikintatiochiuiti akin amo israelitas;
nikintelkualantis porin nikintatiochiuiti akin amo yektanemiliaj.
22 Porin nokualanyo tatikuiltij
uan tachichinos hasta kampa okachi uejkatan den Miketekoch,*
kitamis taltikpak uan nochi tein kitemaka
uan tatikuiltis hasta kampa peuaj tepemej.
23 Nikchiuas maj okachiok tajyouikan
nikintamotilis nochi noflechas.
24 Mayan kichiuas maj kuetauikan,
uan chikauak totonik kinmiktis uan tamiixpoliuiskej.
Nikintitanilis tekuanimej
uan kouamej tein kipiaj veneno uan moxoxolatsaj talpan.
25 Kalampa, akin kintauelitaj kinmiktiskej ininkoneuan,
uan kalijtik mojkamikiskej
telpochmej uan ichpochmej,
konemej uan tatajtsitsin.
26 Nejua nikijtoskia: “Nikinmoyauas*
uan nikchiuas maj amo akinok kinelnamiki”.
27 Sayoj ke nechtekipachouaya tein kijtoskiaj akin kintauelitayaj,
porin akin kinixnamikiaj ueliskia kinemiliskej okse taman.
Ueliskia kijtoskej: “Tejuan tikintankej;
Jehová amo kichiuak nochi nejin”.
28 Porin yejuan amo yektanemiliaj*
uan amo teyi kiajsikamatij.
29 ¡Majkan yeskiaj tamatinij! Itech tanemiliskiaj nochi nejin.
Kinemiliskiaj keniuj tamiskej.
30 Se takat amo ueliskia kintokatias mil israelitas,
uan ome takamej amo ueliskia kineualtiskej diez mil israelitas.
Sayoj ueliskia komo Dios akin kemej yeskia ueyi tet kinnamakaskia
uan komo Jehová kintemaktiskia iniuan akin kintauelitaj.
31 Porin inindioses amo kemej toDios. Yejua kemej se ueyi tet.
Hasta akin techtauelitaj kimatij nejon.
32 Yejuan tamatij kemej uvajkoujmej de Sodoma,
den talmej de Gomorra.
Ininuvas tepajuiaj
uan chichikej.
33 Ininvino kemej yeskia ininveneno kouamej,
temiktia kemej ininveneno cobras.
34 Nejua niksentilijtok nochi tein kichiuaj,
uan kuali nikpixtok.
35 Nejua nimomakepas uan nikintatsakuiltis
keman ixyetok maj mometsxolauakan,
porin ejkotokya tonal keman kinpanos tein amo kuali
uan amo uejkaua mochiuati’.
36 Porin Jehová kiitas toni kinnamiki kiseliskej akin iaxkauan,
uan kiniknelis itekitikauan
keman kiitas ke amo chikaujkejok
uan ke sayoj mokauaj akin amo ueli mopaleuiaj.
37 Uan kijtos: ‘¿Kani yetokej inindioses
tein kinemiliayaj ke kinpaleuiskiaj?
38 ¿Kani yetokej dioses tein kikuayaj ininmantecayo* tapialmej
uan tayiaj vino tein kinmaktiliayaj?
Maj yejuan namechpaleuikij.
Iniuan ximopaleuitij.
39 Xikitakan axkan ke nejua niDios,
uan amo moajsi okse Dios.
Nejua nikchiua maj aksa* miki, uan nikchiua maj aksa nemi.
Nejua nitekokoua uan nejua nitepajtis,
uan amo akin ueli nechmakuilia aksa para kimakixtis.
40 Nimomaajokui
uan nikyekijtoua ke, “ijkon kemej nejua yekmelauj nochipa niyoltok”,
41 keman niktentis noespada* tein milini
uan keman nikyektalis tein amo kuali yetok,
nikintaxtaualtis akin nechixnamikij
uan nikintatsakuiltis akin nechtauelitaj.
42 Nikinajakis noflechas itech esti,
itech ininesyo akin kinmiktijkej uan akin tsaktokej.
Ika noespada niktejtekis nakat
uan inintsontekon taixyekananij akin nechtauelitaj’.
43 Namejuan akin nanemij itech okseki altepemej, xiyolpakikan iniuan akin iaxkauan Dios,
porin yejua kintaxtaualtis akin kinmiktijkej itekitikauan,
kintaxtaualtis akin kiixnamikij
uan kiixpolos tajtakol* kampa nemij akin iaxkauan”.
44 Moisés kiniluito israelitas nochi tein kijtouaya nejin tatsotson. Uan iuan yajki Hosea* iokichpil Nun. 45 Keman Moisés kintamiiluij israelitas nochi nejin, 46 no kijtoj: “Amo xikauilmatikan nochi tein namechnejmachtijtok axkan uan xikinnauatikan namokoneuan maj kiyekchiuakan nochi nejin tanauatilmej. 47 Porin amo nenkaj nochi tein namechiluijtok, ta namechpaleuis xiyoltokan. Uan komo nankitakamatij nochi nejin, uejkaua nanemiskej itech tal tein namokuilitij keman nankipanauiskej ueyiat Jordán”.
48 Nejon tonal Jehová tajtoj iuan Moisés uan kiluij: 49 “Xipankisa itech nejin tepet de Abarim, itech tepet Nebo (tein yetok itech tal tein poui Moab, taixpan de Jericó). Ompa tikitas tal tein poui Canaán tein nikinmakati israelitas. 50 Uan timomikilis itech nejon tepet kampa tipankisati, ijkon kemej Aarón momikilij itech tepet Hor. 51 Ijkon yeski, porin tejua uan Aarón amo nanechtakamatkej ininixpan israelitas keman kisak at ompa Meribá tein yetok Cadés, itech tal kampa tauaktok uan motanotsa Zin. Amo nanechueyitalijkej ininixpan israelitas. 52 Tikuejkaitas tal tein nikinmakati israelitas, sayoj ke tejua amo tiajsis ompa”.