Keman senkis amo titechikoitaskejok

Tikitakejya tein Biblia tayolmajxitia uan millones ijkon kichiujtokejya, uan uelinij amo techikoitajok. Sayoj ke tejuan toselti, amo ueli senkis timokixtiliaj. Yejua ika, ¿toni techpaleuis?

Se kuali taixyekanalis

Ijkon kemej panouanij xiujmej, monextiani ke tekiuanij amo uelinij kichiuanij maj amo titechikoitakanok. ¿Kijtosneki ke amo akin uelis kichiuas?

Komo se taixyekankej kineki kiixpolos tachikoitalis moneki kichiuas nejin:

1. 1. Maj kinyolchikaua nochin maj kinekikan kipataskej kemej tanemiliaj uan kemej kinitaj oksekin.

2. 2. Maj techpaleui maj tikelkauakan tein kichiua maj titechikoitakan.

3. 3. Maj amo techikoitakan akin taixyekanaj.

4. 4. Maj itech taltikpak kichiua maj nochin kuali mouikakan.

Biblia techiluia ke Dios kiixtalijya se taixyekanalis tein kichiuas nochi nejin. Yejua “iTekiuajyo Dios” (Lucas 4:43, TNM).

¿Keniuj techpaleuis nejin taixyekanalis?

1. Techmachtis tein kuali

Nochin akin nemiskej itech taltikpak momachtiskej kichiuaskej tein kuali (ISAÍAS 26:9).

“Melaujkayot kichiuas maj onka yolseuilis, uan kichiuas maj onka yekyetolis nochipaya” (ISAÍAS 32:17).

¿Toni kijtosneki? ITekiuajyo Dios techmachtis tein kuali. Keman tikmatij tein kuali uan tein amo kuali, tein melauak uan tein amo melauak, mopata kemej tikinitaj oksekin. Tinochin tikmatiskej ke semi kuali maj titetasojtakan.

2. Techyolseuis

“Totajtsin kinelkaualtis de ninchokilisuan de nochi itaneltokakauan. Uan amo aken momikilis ok; uan amo aken mochoktis ok; uan amo aken motekipachos ok; uan amo aken yoltajyouis ok. Uan ijkon yeski porin nochi tajtamik ya de ne achtopa onkaya” (APOCALIPSIS 21:4).

¿Toni kijtosneki? Taixyekanalis tein Dios kiixtalijtok kitamis nochi tein techtajyouiltia porin mochiua tein amo kuali. Kichiuas maj kielkauakan uan maj amo tetauelitakanok akin kintajyouiltianij.

3. Kuali techixyekanas

“Amo tamelauas sayoj ika tein kiitas nion taajuas sayoj ika tein kikakis. Amo kinchichikouis akin amo ueli mopaleuiaj keman kinmelauas, uan ika melaujkayot kinmelauas akin nejmachmej” (ISAÍAS 11:3, 4).

¿Toni kijtosneki? Jesucristo Tekiuaj itech iTekiuajyo Dios, akin moajsi ne iluikak taixyekanas nikan taltikpak ika melaujkayot uan amo techchichikouis. Jesús amo kiita ke se altepet okachi kuali ke okse, uan kichiuas maj itech nochi taltikpak kitakamatikan itanauatiluan.

4. Amo tixexeliujtoskejok

Taixyekanalis tein Dios kiixtalijtok kichiuas maj nochin kipiakan “sanse san tamachilis. Uan [...] sanse san tetasojtalis” uan maj kipiakan “sanse san tanemilil” (FILIPENSES 2:2).

¿Toni kijtosneki? Akin mokauaskej maj kinixyekana iTekiuajyo Dios amo sayoj kinextiskej ke amo xexeliujtokej. Nochin senyetoskej porin yekmelauj motasojtaskej.