Tanojnots 12
Taltikpakneminij kichijchiujkej se ueyi kaltachialoyan
KEMAN panok miak xiujmej, ikoneuan Noé kinpiakej miakej konemej. Kemej ixuimej moskaltijkej uan no kinpiakej miakej konemej, ijsiujka momiakilijkej taltikpakneminij.
Ikoneuj Noé tein motokaytij Cam kipiak se iixuiuj tein motokaytij Nemrod. Yej amo katka yolkuali uan kinimiktiaya tapialmej uan takamej. Nemrod no mochiuak tekiuaj uan ijkon kinixyekanak taltikpakneminij. Nemrod amo kiyolpaktiaya Dios.
Itech nejon xiujmej, nochin taltikpakneminij tajtouayaj se tajtolsaj. Nemrod kinekia kinolochpias uan ijkon ueliskia kinixyekanaskia. Yejika, ¿tikmati toni kichiuak? Kiniluij maj kichiuanij se altepet uan ompa maj kichijchiuanij se ueyi kaltachialoyan. Xikita itech taixkopin keniuj kichijchiujtokej tein ika kichijchiuaskej ueyi kaltachialoyan.
Jiova Dios amo kiyolpaktij imin tekiuj. Yej amo kinekia maj nemikan taltikpakneminij itech sayoj se altepet, ta yej kinekia maj nemikan semanauak Taltikpak. Sayoj ika, yejuan kijtojkej: ‘¡Kemaj! Maj tikchijchiuakan se altepet uan se kaltachialoyan maj tel uejkapantik uan maj ikuapan ajsi iluikak. ¡Uan timochiuaskej tiuejueyimej!’ Kinekiaj moueyichiuaskej yejuasaj, uan amo Dios.
Yejika Dios amo kinkauak maj kisentokakan kichijchiuakan nejon ueyi kaltachialoyan. ¿Tikmati toni kichiuak? Kichiuak maj sepasaj tajtokan tataman tajtolmej, uan ijkon amo moajsikamatiajok. Yejika imin altepeuj motokaytij Babel, oso Babilonia, tein kijtosneki “Nepojpololis”.
Satepan kiskej kampa nemiaj uan yajkej nemitoj seseko. Mosejsentilijkej tein moajsikamatiaj uan nemitoj seseko.