¡Amokuali ejekamej temiktiaj!
Satanás uan iamokuali ejekauan kisentokaj tetajyouiltiaj uan semi tamouililmej. Ne uejkauj Satanás kinimiktij itapialuan uan itekitikauan Job tein amo kikauaya Dios. Satepan kichiuak maj se “chikaujkaejekat”, kiuetsiltiani kali kampa yetoyaj majtakti ikoneuan Job uan kinimiktij. Satepan kikokolispeualtij Job “ika uejueyi kokomej tein kipeualtij itech ixokpaltampa hasta itech itsontekoj” (Job 1:7-19; 2:7).
Itech itonaluan Jesús, amokuali ejekamej kichiuayaj maj sekin taltikpakneminij amo uelinij tachianij niono maj tajtouanij (Mateo 9:32, 33; 12:22). Se takat kitajyouiltiayaj uan kichiuayaj maj motejtekini ika tet (Marcos 5:5). Uan no se telpoch kichiuayaj maj tsajtsi chikauak, kitaluitekiaj, eliuis ‘kitsetselouayaj’ uan kiyolpololtiayaj (Lucas 9:42).
Ne uejkauj amokuali ejekamej kinkokolispeualtijkej sekin taltikpakneminij uan oksekin eliuis kintsetselouayaj uan kinyolpololtiayaj
Axkan Satanás uan iamokuali ejekauan, kisentokaj temiktiaj kemej ipa kichiujtiuitsej. Tein melauj, imin amo kuali tachiualisuan okachi peuak momiakilia keman kinkixtijkej ne iluikak. Tein mochiujtok semanauak taltikpak kinextia ke tel amo yolkualmej. Sekin taltikpakneminij kinkokolispeualtiaj. Oksekin kinkuejmolouaj youak keman amo kinkauaj maj kochikan oso tel pitsotik kintakochitaltiaj. Oksekin iminka mauiltiaj. Uan oksekin kinkuatapololtiaj, kichiuaj maj temiktikan oso maj yejuan imiselti momiktikan.
Axkan amokuali ejekamej kichiuaj maj sekin taltikpakneminij tateuikan, uan oksekin kinkuejmolouaj youak keman tel pitsotik kintakochitaltiaj
Lintina, se siuat tein nemi Surinam, kijtoua ke se amokuali ejekat oso se espíritu amo yolkuali, kinimiktij 16 ichankauan uan kitajyouiltij yejua uan kitajyouiltij itech itanemilil 18 xiujmej. Ika tein kipanok, kijtoua ke amokuali ejekamej “kiuelitaj kintajyouiltiskej taltikpakneminij maski amo kinekij hasta kinimiktiaj”.
Sayoj ke Jiova ueli kinpaleuia itekitikauan maj amo teyi kinchiuili Satanás (Proverbios 18:10).