Tamachtilis 12
Maj tikpoujkaitakan nemilis uan esti
¿Keniuj moneki maj tikitakan nemilis? (1) ¿Uan tamayouilis ika se konet? (1)
Tein kichiuaj kemej Cristo, ¿keniuj kinextiaj ika kiyekitaj maj amo onka teisa tein uelis ika mokokoskej? (2)
¿Kuali maj se kinimikti tapialmej? (3)
¿Toni tachiualismej kinextiaj ika amo tikpoujkaitaj nemilis? (4)
¿Katiyejua itanauatil Dios ika esti? (5)
¿Iuantia no maj techpanoltilikan esti? (6)
1. Jiova techmakatok tonemilis. Nochi tein yoltok, inemilis kitauikilia Dios (Salmo 36:9; Hechos 17:24, 25). Yej kiita ika nemilis kitelpia ipatiuj. Jiova kiita ika no kitelpia ipatiuj inemilis se konet tein ayamo nemi. Iixpan Dios, amo kuali maj tikyokolikan tikmiktikan se konet tein ayamo nemi (Éxodo 21:22, 23, NM; Salmo 127:3).
2. Tein yekmelauj kichiuaj kemej Cristo, kiyekitaj maj amo onka teisa tein uelis ika mokokoskej. Kiyekitaj imin teposuan oso imin kali maj amo onka teisa tein uelis ika moxokoliskej (Deuteronomio 22:8). Tein kitekitiliaj Dios amo kichiuaj nionteyi sayoj ika tanejnekilis oso neixpetanilis kampa uelis mokokoskej. Yejika amo teuantij itech niose neauiltilis tein mochiua ika eliuisyot kampa kinkojkokouaj oksekin. Kitalkauiaj neixpetanilis tein uelis kiniuikas itech eliuisyot (Salmo 11:5; Juan 13:35).
3. Tein Kichijchiuj nochi tein onkak kiita ika imin nemilis tapialmej no kitelpia ipatiuj. Tein kichiua kemej Cristo uelis kimiktis se tapial komo kikuati, ika motakentiti, ika mopajtiti oso mopaleuiti maj amo kiijtako (Génesis 3:21; 9:3; Éxodo 21:28; Marcos 1:6). Sayoj ika amo kuali maj se kintajyouilti tapialmej oso maj se kinimikti sayoj komo se kineki imika se moixpetanis (Proverbios 12:10).
4. Tein kichiuaj kemej Cristo, amo kuali maj tachichinakan, maj kikuikan drogas sayoj ika tanejnekilis. ¿Keyej amo kuali nejin tachiualismej? 1) semi ouij maj kikaua, 2) kiijtakouaj inakayo uan 3) tel pitsotikej (Romanos 6:19; 12:1; 2 Corintios 7:1). Semi ouij tikauaskej nejon tachiualismej, sayoj ika komo tiknekij tikyolpaktiskej Jiova moneki maj tikchiuakan.
5. Iixpan Jiova esti no kitelpia ipatiuj. Yej kijtoua ika nemilis moajsi itech esti. Yejika amo kuali maj tikuakan. Amo no kuali maj tikuakan inakayo se tapial komo amo tikyekeskixtijkej. Komo se tapial takechtilan oso mikiksaj maj amo se kikua. Uan komo se tapial tikmiktijkej ika se charpe oso ika se tepostatopon, moneki maj niman se kieskixti uan ijkon uelis se kikuas (Génesis 9:3, 4; Levítico 17:13, 14; Hechos 15:28, 29).
6. ¿Kuali maj techpanoltilikan esti? Xikelnamiki ika Jiova techtajtania maj amo tikuakan. Nejin no kijtosneki maj amo techpanoltilikan iesyo aksa itech tonakayo, niono toesyo tein techkixtilijkajya uan kieujtoyaj (Hechos 21:25). Yejika tein yekmelauj kichiuaj kemej Cristo amo mokauaj maj kinpanoltilikan esti itech imin nakayo. Sayoj ika kemaj mokauaj maj kinpajtikan ika okse taman pajti tein amo kipia esti. Kinekij nemiskej, sayoj ika amo kinemiliaj momakixtiskej uan maj kitapanauilikan itanauatiluan Dios (Mateo 16:25).
[Tajtolmej itech página 25]
Komo tiknekij tikyolpaktiskej Dios, moneki maj amo techpanoltilikan esti itech tonakayo, maj amo titachichinakan, niono maj tikchiuakan teisa tein amo moneki kampa uelis timokokoskej