Se templo kampa kiueyichiuaskej Jiova

Keman Salomón peuak tekiuajti Israel, Jiova kitajtanij: “¿Toni tikneki maj nimitsmaka?”. Salomón kinankilij: “Nitelpochok uan ayamo nikyekmati keniuj kuali nikchiuas teisa. Ika kualtakayot, xinechmaka tamatilis tein nechpaleuis maj nikyekpia moxolal”. Jiova kiluij: “Kemej tinechtajtanij tamatilis, nikchiuas ximochiua takat akin okachi tamatkej itech nochi taltikpak. No nikchiuas xikpia miak tomin, uan no tinemis miak xiujmej komo tinechtakamati”.

Salomón peuak kichijchiua templo. Kitekitiltij oro, plata, kouit uan tet tein okachi kuali. Tel miakej takamej uan siuamej akin tel kuali tekitiaj tapaleuijkej itech kalchiualis. Chikome xiuit satepan kitamichijchiujkej templo. Ompa ejkok tonal keman kimaktiliskiajya Jiova, yejua ika kitalijkej nemaktilmej itech altar. Salomón motankuaketsak iixpan altar uan kitataujtij Dios: “Jiova, tejua moneki tikpias se templo okachi ueyi uan kualtsin ke nejin. Sayoj ke, ika kualtakayot, xikseli totaueyichiualis uan xikaki tonetataujtiluan”. ¿Toni tiknemilia? ¿Kiuelitak Jiova templo? ¿Kikakik inetataujtil Salomón? Satepan ke Salomón kitamichiuak netataujtil, ualtemok tit uan kinchichinoj nemaktilmej. Ijkon Jiova kinextij ke kiuelitaya templo. Keman israelitas kiitakej nejon, semi yolpakkej.

Tekiuaj Salomón kitelixmatkej itech nochi xolal Israel uan okachi uejuejka porin tel tamatkej katka. Taltikpakneminij yayaj kiitatij maj kinpaleui maj kiyektalikan ininkuejmoluan. Hasta siuat akin tekiuajtia Seba kiitato ox ueliskia kinankilis seki netajtanilmej tein tel ouijkej. Keman kikakik itanankililuan Salomón, kijtoj: “Amo nikneltokaya tein nechtapouijkaj, sayoj ke axkan nikita ke okachi titamatkej ke tein nechiluijkaj. MoDios, Jiova, mitstatiochiuijtok”. Itech xolal Israel nochin kualtsin nemiaj, uan yolpakiaj. Sayoj ke amo uejkaua yaya mopatati nochi.