Kiixpolouaj Jerusalén

Akin nemiaj Judá miakpa mouejkatilijkej iuan Jiova uan peujkej kinueyichiuaj tiotsitsin. Itech nejon xiujmej, Jiova kitemoj kinpaleuis. Kintitanik miakej tanauatianij maj kinnejmachtitij, sayoj ke amo kinkakiaj uan kinkejkelouayaj. Jiova kinekia maj amo kinueyichiuanijok tiotsitsin. ¿Keniuj kichiuaskia?

Nabucodonosor, akin tekiuajtia Babilonia, moaxkatilijtiyaya xolalmej. Keman yekinika moaxkatilij Jerusalén, kinkitskij tekiuaj Joaquín, uejueyi chiuanimej, tateuianij uan tamachijchiuanij, uan kinuikak Babilonia. No kiuikak nochi tein kipiaya ipatiuj tein moajsia itech itemplo Jiova. Ompa, Nabucodonosor kiixtalij Sedequías maj tekiuajti ompa Judá.

Yekinika, tekiuaj Sedequías kitakamatia Nabucodonosor. Sayoj ke tanauatianij akin takajkayauayaj uan akin nemiaj itech xolalmej tein ompakauin moajsiaj kiluiayaj Sedequías maj kiixnamikini Nabucodonosor. Jeremías kinejmachtij: “Komo tikixnamiki, onkas mikilis, mayan uan kokolismej Judá”.

Satepan ke tekiuajtitoya chikueyi xiujmej, Sedequías kiixnamikik Nabucodonosor, uan kintajtanij tateuianij kayomej Egipto maj kipaleuianij. Yejua ika, Nabucodonosor kintitanik itateuijkauan maj kinteuitij akin nemiaj Jerusalén. Tateuianij kayomej Babilonia kitalijkej inintakenkaluan kalampa itech xolal. Jeremías kiluij Sedequías: “Jiova kijtoua ke komo timotemaka ininmako babilonios, nochin nanmakisaskej. Sayoj ke komo amo timotemaka, babilonios kichichinoskej Jerusalén uan mitsuikaskej”. Sedequías tanankilij: “¡Amo nimotemakas!”.

Se xiuit uan tajko satepan, babilonios sekopa kitamotkej tepamit tein kiyoualouaya Jerusalén. Ompakauin kalakkej uan kichichinojkej. No kichichinojkej templo, miakej kinmiktijkej uan tel miakej kinuikakej.

Sedequías choloj, sayoj ke babilonios kikitskitoj keman ajsitiyaya Jericó uan kiuikakej iixpan Nabucodonosor. Tekiuaj kichiuak maj Sedequías kiitani keniuj kinmiktiayaj ikoneuan. Satepan, kikixtilij iixtololouan uan kitsakuak. Ompa momikilij Sedequías. Sayoj ke Jiova motenkauak iniuan akin nemiaj Judá: “Satepan ke panoskej 70 xiujmej, oksepa namechuikas Jerusalén kampa nanmochan”.

¿Toni panoskia iniuan telpochmej akin kinuikakej Babilonia? ¿Kisentokaskiaj kitakamatiskiaj Jiova?