Naui telpochmej kitakamatij Jiova

Nabucodonosor kinuikak Babilonia telpochmej akin katkaj uejueyi chiuanimej kayomej Judá uan kiixtalij se itekitikauj akin motokaytiaya Aspenaz maj kinita. Uan no, kinauatij maj itech nejon uejueyi chiuanimej kintemouani telpochmej akin amo mokokouayaj uan kipiayaj tamatilis. Kinmachtiskiaj eyi xiujmej uan satepan kipiaskiaj uejueyi tekimej ompa Babilonia. Monekia ueliskej kiixtajtoltiskej, kijkuiloskej uan tajtoskej tajtol acadio tein mokuia Babilonia. No monekia kikuaskej tein kikuayaj ichan tekiuaj. Naui nejin telpochmej motokaytiayaj Daniel, Hananías, Misael uan Azarías. Sayoj ke Aspenaz kintalilij tokaymej tein mokuiaj ompa Babilonia: Beltsasar, Sadrac, Mesac uan Abednego. ¿Tiknemilia ke nejon tamachtilis tein yaya kiselitij ueliskia kichiuas maj amo kiueyichiuanijok Jiova?

Nejin naui telpochmej kinekiaj kitakamatiskej Jiova. Kimatiaj ke monekia amo kikuaskej tein kikuaya tekiuaj porin iTanauatil Jiova kijtouaya maj amo kikuanij seki nejon takual. Yejua ika kiluijkej Aspenaz: “Ika kualtakayot, amo xikchiua maj tikuakan tein kikua tekiuaj”. Sayoj ke Aspenaz kiniluij: “Komo amo kuali nantakuaj, uan tekiuaj kiita ke nesi ke nanmokokouaj, nechmiktis”.

Daniel kinemilij se taman. Kiluij Aspenaz: “Ika kualtakayot, sayoj xitechmaka kilmej, tatet uan at 10 tonalmej. Uan satepan xitechita keniuj tiyetokej tejuan uan keniuj yetokej okseki telpochmej akin kemaj kikuajkej tein kikua tekiuaj”. Aspenaz kuali kiitak nejon.

Majtakti tonalmej satepan, Daniel uan eyi itasojikniuan okachi kuali moitayaj ke okseki telpochmej. Jiova kiyolpaktiaya maj kitakamatinij. No kimakak Daniel tamatilis tein kipaleuiskia maj kiajsikamatini tataman takochitalismej.

Keman tamik ininnemachtil, Aspenaz kinuikak telpochmej iixpan Nabucodonosor. Tekiuaj iniuan tajtoj uan kiitak ke Daniel, Hananías, Misael uan Azarías kipiayaj okachi tamatilis ke okseki telpochmej. Yejua ika kinixpejpenak maj tekitinij ichan. Tekiuaj miakpa kintajtaniaya maj kiyolmajxitianij itech miak taman tein motelnekia. Jiova kichiuak maj kipiakan okachi tamatilis ke nochin tamatinij uan naualmej akin kitekitiliayaj tekiuaj.

Maski Daniel, Hananías, Misael uan Azarías amo yetoyaj itech ininaltepeuj, nochipa kielnamikiaj ke pouiaj itech ixolal Jiova. ¿Uan tejua? Keman motatuan amo mouan yetoskej, ¿no nochipa tikelnamikis Jiova?