Se tekiuajyot tein tamati kemej se ueyi kouit

Se youak, Nabucodonosor kikochitak se taman tein kitelmoujtij. Kinnotsak tamatinij maj kiluianij tein kijtosnekia, sayoj ke nion se uelik kimelauilij. Satepan, tekiuaj iuan tajtoj Daniel.

Nabucodonosor kiluij Daniel: “Nikochitak se ueyi kouit tein moskaltij hasta ajsik iluikak. Noyampa uelia moitaya. Kualtsin maxiujyoj katka uan kipiaya miak takilot. Tapialmej moseuiayaj itampa, uan totomej kichijchiuayaj inintapajsol itech imakoujyo. Ompa, se ángel ualpantemok uan tsajtsik: ‘¡Xiktekikan kouit uan xikmaximakan! Sayoj xikauakan tsikitsin koujtsontet ika inaluayo. Uan xikilpikan ika tepos uan cobre. Iyolo kouit mopatas. Amo yeskiok iyolo se taltikpaknenkej, ta iyolo se tapial. Uan panos chikome xiuit. Nochin kiajsikamatiskej ke Dios yejua Tekiuaj uan ke yejuatsin ueli kimaka se tekiuajyot akin kinekis’”.

Jiova kiluij Daniel tein kijtosnekia takochitalis. Keman Daniel kiajsikamatik, motelmoujtij uan kijtoj: “Tekiuaj, niknekiskia maj kinpano akin mitstauelitaj tein tikochitak, sayoj ke tejua mitspanoti. Ueyi kouit tein kitekkej mitsixnextia tejua. Tikpolos motekiuajyo uan tikuas xiuit kemej se koujtajtapial. Sayoj ke ángel kijtoj maj kikauanij se tsikitsin koujtsontet ika inaluayo. Nejon kijtosneki ke oksepa timochiuas titekiuaj”.

Se xiuit satepan, Nabucodonosor nenentoya ikalkuako uan peuak kiita xolal Babilonia. Yejua kijtoj: “¡Tel ueyi xolal nikchijchiuak! ¡Nitelueyichiujkej!”. Keman kijtojtoya nejon, se tajtol tein kisak iluikak kiluij: “¡Nabucodonosor! Axkan tikpoloj motekiuajyo”.

Ijkuak, Nabucodonosor kuatapoloj uan peuak kichiua kemej se koujtajtapial. Yejua ika kikixtijkej ichan, uan nemito iniuan koujtajtapialmej. Itson semi moskaltij kemej iijuiyo se águila, uan iistiuan tel ueyakiakej kemej iistiuan se totot.

Satepan ke panok chikome xiuit, Nabucodonosor oksepa talnamikik, uan Jiova oksepa kikauak maj tekiuajti ompa Babilonia. Ompa, Nabucodonosor kijtoj: “Nikueyitalia Jiova, Tekiuaj ompa iluikak. Yejuatsin kinpinaujtia akin moueyinekij. Axkan nikmati ke Jiova yejua Taixyekankej uan ke yejuatsin ueli kimaka se tekiuajyot akin kinekis”.