Tekiuajyot tein uejkauas nochipaya

Se youak, tekiuaj Nabucodonosor kikochitak se taman tein amo kiajsikamatik. Kemej semi kitekipachouaya, amo uelia kochia. Kinnotsak naualmej uan kiniluij: “Xinechmelauilikan tein nikochitak”. Yejuan kiluijkej: “Xitechtapoui tein tikochitak, tekiuaj”. Sayoj ke Nabucodonosor kiniluij: “¡Amo! Namejuan xinechiluikan tein nikochitak, komo amo nanechiluiaj, namechmiktis”. Yejuan oksepa kiluijkej: “Sayoj ke xitechilui tein tikochitak, uan satepan timitsiluiskej tein kijtosneki”. Yejua kinnankilij: “Nankinekij nanechkajkayauaskej. ¡Xinechiluikan tein nikochitak!”. Yejuan kinankilijkej: “Amo akin itech taltikpak ueli kichiua tein titajtani. Amo akin ueli”.

Nabucodonosor tel kualanik uan tanauatij maj kinmiktikan nochin tamatinij. No kinmiktiskiaj Daniel, Sadrac, Mesac uan Abednego. Sayoj ke Daniel kiluij tekiuaj maj kinchiani tepitsin. Ompa yejua uan itasojikniuan kitataujtijkej Jiova maj kinpaleui. ¿Toni kichiuak Jiova?

Jiova kiitaltij Daniel tein Nabucodonosor kikochitak uan kiluij tein kijtosnekia. Mostika, Daniel iuan tajtoto itekitikauj tekiuaj uan kiluij: “Amo xikmiktikan nion se tamatkej, nejua uelis nikmelauilis tekiuaj tein kikochitak”. Takat kiuikak Daniel iixpan Nabucodonosor. Daniel kiluij tekiuaj: “Dios mitsmatiltij tein panoti satepan. Yejua nejin tein tikochitak: tikitak se ueyi takat tein itsontekon chijchiujtoya ika oro, iyolixko uan imauan ika plata, ipox hasta ikesuan ika cobre, itankuayuan hasta ikotsko ika tepos uan imetsuan ika tepos tamanelol ika sokit. Ompa, se tet kisak itech se tepet uan tel chikauak kimotak imetsuan. Ueyi takat tamachijchiuj tatapakak uan kuechiuik, uan ejekat kimoyauak italnexyo. Tet mochiuak se ueyi tepet tein moajsik itech nochi taltikpak”.

Satepan, Daniel kijtoj: “Tein tikochitak kijtosneki nejin: motekiuajyo moixnextia ika tsontekon tachijchiuj ika oro. Tein chijchiujtok ika plata kiixnextia se tekiuajyot tein moajsis satepan ke tamis motekiuajyo. Cobre kiixnextia okse tekiuajyot tein moajsis satepan uan taixyekanas itech nochi taltikpak. Tekiuajyot tein satepan moajsis yeski tel chikauak kemej tepos. Ika tamis se tekiuajyot xejxeliujtos uan kipias seki taman tein chikauak kemej tepos uan seki taman tein amo chikauak kemej sokit. Tet tein mochiua se tepet kiixnextia iTekiuajyo Dios, tein kinixpolos nochi okseki tekiuajyomej uan uejkauas nochipaya”.

Nabucodonosor motankuaketsak uan moixpiloj iixpan Daniel, uan kijtoj: “MoDios mitsmelauilij takochitalis. Amo onkak okse dios kemej yejua”. Tekiuaj amo kimiktij Daniel, ta kiixtalij maj kinixyekana nochin tamatinij uan maj taixyekankej sayoj itech xolal Babilonia. ¿Tikitak keniuj Jiova kinankilij inetataujtil Daniel?