Octubre

Tinochin ueli titapaleuiaj itech nechikolmej keman timokuikatiaj uan keman achto kuali timomachtiaj tein titanankiliskej. Seki tokniuan semi ouij kinkisa mokuikatiskej uan tanankiliskej itech nechikol. ¿No ijkon mitsonpanoua? Komo kemaj, xikonita tein kichiuanij oksekin maj amo mouikanok. Keman timokuikatiaj, sekin kinpaleuianij mokuikatiskej ika nochi ininyolo. Xikonelnamiki ke timokuikatiaj itech nechikolmej porin ika tikueyichiuaj Jiova. Yejua ika, keman timomachtiaj tein moitas itech nechikolmej no timomamachtiaj nekuikatilmej uan tikitaj keniuj mouika ika tein motajtos itech nechikol uan maj okachi itech titanemilikan tein moijtoua itech nekuikatil uan amo kemej timokuikatiaj. Xionmochikaua nochipa tiontanankilis. ¿Toni mitsonpaleuis? Xikonelnamiki ke amo moneki uejkauas nion se kijtos miak taman. Jiova kineki maj tikchiuakan nochi tein tiueliskej uan semi kipatiuita keman timochikauaj titanankiliskej itech nechikolmej. w22.04 7, 8 § 12-15

Tajtol “nechpaleuia”, mokui keman ika motajtoua aksa akin tsikuini para kipaleuis aksa akin tajtani maj kipaleuikan. Xikonnemili keniuj Jehová ijsiujka kipaleuia aksa akin semi motekipachojtok. Nejin kinextia ke Jehová yekmelauj kineki techpaleuis. Keman Jehová techpaleuia ueli tikxikouaj tein yeski ouijkayot uan ueli tiksentokaj tiyolpakij. ¿Keniuj techpaleuia Jehová? Itech amatajkuilol Isaías techiluia keniuj. Miak taman tein Jehová achtook kimatiltij tanauatijkej Isaías semi kinpaleuia itekitikauan Dios axkan. Uan no, miakpa kikuik tajtolmej tein amo ouij se kiajsikamati keman ika tajtoj keniuj tamati Jehová. Kemej neskayot, itech capítulo 30, Isaías kijtoj seki taman tein kualtsin tein ika kimelauak keniuj Jehová kinpaleuia itekitikauan. Yejua kijtoj ke Jehová 1) techkaki uan technankilia keman tiktataujtiaj, 2) techixyekana uan 3) techtatiochiuia axkan uan satepan. w22.11 8 § 2, 3

Jesús kiniluij tokniuan itech nechikolmej Esmirna uan Filadelfia. Kiniluij maj amo kimouilianij maj kintajyouiltikan porin Jiova kintatiochiuiskia komo amo kikauayaj (Apoc. 3:10). Ke moneki tikmatiskej ke techtajyouiltiskej uan moneki titaxikoskej (Mat. 24:​9, 13; 2 Cor. 12:10). Itech amatajkuilol Apocalipsis kijtoua ke itekitikauan Dios kintajyouiltiskiaj itech “itonal toTekotsin”, oso itech nejin tonalmej (Apoc. 1:10). Itech capítulo 12 kijtoua ke ompa iluikak “mochiuak [se] ne teuilis” tepitsin satepan ke Jesús peuak tekiuajti itech iTekiuajyo Dios. Miguel, oso Jesucristo, uan iángeles moteuijkej iuan Satanás uan iamokuali ejekauan keman mokepak ompa iluikak (Apoc. 12:​7, 8). Nejon kichiuak maj Satanás uan iamokuali ejekauan akin kiixnamikij Dios kinpantamotanij nikan taltikpak kampa semi kintajyouiltiaj taltikpakneminij (Apoc. 12:​9, 12). w22.05 5 § 12, 13

Jiova nochipa kiixtalia tein kuali. Yejuatsin amo techichikotasojta. Para kitapojpoluis aksa, Jiova amo kiita keniuj ixtamati, ox kipia tomin, ox miakej kiixmatij uan ox ueli kichiua miak taman (1 Sam. 16:7; Sant. 2:​1-4). Amo akin uelis kichiualtis teisa Jiova nion kikajkayauas ika tomin. Amo kiixtalia teisa ika tein kimachilia (Éx. 34:7). Jiova yejua akin kuali tamelaua porin kuali techajsikamati uan kimati nochi tein tikpanouaj (Deut. 32:4). Akin kijkuilojkej Escrituras Hebreas kimattoyaj ke amo akin tetapojpoluia kemej Jiova. Se amatajkuilol kijtoua ke tajtol hebreo tein kemansa kikuikej sayoj mokui keman ika motajtoua ke Dios tetapojpoluia. Nejon amatajkuilol no kijtoua: “Amo keman mokui keman ika motajtoua keniuj motapojpoluiaj taltikpakneminij”. Sayoj Jiova ueli senkis kitapojpoluia aksa akin moyolnonotsa. w22.06 4 § 10, 11

Komo tikoniskaltijtok mokoneuan moselti oso monamik amo kitekitilia Jiova, xikonelnamiki ke tein tikonchiua uelis kinyolchikauas oksekin. ¿Uan komo tikonita ke amo kipaleuia mokonetsin tein tikonchiua? Xikonelnamiki ke amo ueli ijsiujka se kimachtia se ikonetsin. Keman tejuatsin tikontoka teisa, xa kemansa tionmotajtania ox tein ixuas kitemakas takilot. Maski amo tikonmati ox kitemakas takilot tikonsentoka tikonatekia porin ijkon uelis moskaltis (Mar. 4:​26-29). No ijkon, kemej temomaj kemansa xa tionmotajtania ox tein tikonchiujtok kipaleuijtok mokonetsin. Melauj ke tejuatsin amo uelis tikonixtalis toni kiixpejpenaskej mokoneuan. Sayoj ke, komo tikonsentoka tionmochikaua kuali tikonmachtis mokonetsin uelis kipaleuis maj kuali mouika iuan Dios. w22.04 19, 20 § 16, 17

Keman Salomón kuali kitekitilijtoya Jiova, moitaya kemej monekia. Keman katka telpoch uan peuak taixyekana, kimatia ke amo nochi uelia kichiuaya uan kitajtanij Jiova maj kiixyekana (1 Rey. 3:​7-9). Uan no, kinextij ke kiajsikamatia ke semi amo kuali maj se moueyimati. Sayoj ke satepan kielkauak tein kijtojka. Keman tekiuajtitoyaya seki xiujmej, peuak moueyimati uan peuak amo kitakamatiok itanauatiluan Dios. Kemej neskayot, tanauatil kijtouaya ke se tekiuaj hebreo amo monekia “kinpias miakej isiuauan, uan ijkon amo kiyolkepaskej” (Deut. 17:17). Salomón amo kitakamatik nejin tanauatil uan monamiktij iniuan 700 siuamej uan kinpiak okseki 300 siuamej (1 Rey. 11:​1-3). Satepan, ipa tajyouij porin kikauak Jiova (1 Rey. 11:​9-13). w22.05 23 § 12

Itech nejin tonalmej nochin moneki kiixpejpenaskej ox kikauaskej maj Jiova kinixyekana kemej taixyekankej itech nochi taltikpak, oso mokauaskej maj kinixyekana Satanás, akin semi kiixnamiki Dios. Itech nejin taman amo uelis tikijtoskej ke amo tikpaleuiaj nion se. Ika tein tikixpejpenaskej uelis tinemiskej nochipaya oso amo (Mat. 25:​31-33, 46). Itech okachi ueyi tajyouilis tinochin techneskayotiskej, nejon kinextis ox timomakixtiskej oso techixpoloskej (Apoc. 7:14; 14:​9-11; Ezeq. 9:​4, 6). Komo tionmokauaniya maj mitsonixyekana Jiova, semi kuali tein tikonixpejpenak. Uan axkan tikonneki tikonpaleuis oksekin maj no ijkon kichiuakan. Tatiochiualismej kiseliskej akin mokauaj maj kinixyekana Jiova. Semi kuali komo timomachtiaj nochi nejin porin techpaleuis maj senkis tikixtalikan tiksentokaskej tiktekitiliskej Jiova. Uan no, ika tein timomachtianij uelis tikinpaleuiskej oksekin maj kiixtalikan kitekitiliskej Jiova uan maj amo keman kikauakan. w22.05 15 § 1, 2

Moneki tikakiskej Jiova uan amo akin techtauelitaj. Job kikakik Jiova keman kinojnotsak. Kemej kinekia maj tanemili, yejuatsin xa kiluij se taman kemej nejin: “Nikita nochi tein tikpanotok. ¿Tiknemilia ke amo uelis nimitspaleuis?”. Job kinextij ke katka yolyemanik uan ke semi kitasojkamatia ke Jiova yolkuali, yejua ika kiluij: “Achto nikakia ke moka tajtouayaj, sayoj ke axkan nimitsita” (Job 42:5). Keman Job kijtoj nejin xa tokotsyetoyaok itech koujnex, kipiaya miak kokomej uan semi tayokoxtoya. Keman kipanotoya nochi nejin, Jiova kimatiltij ke kitasojtaya uan ke kiyolpaktiaya tein kichiuaya (Job 42:​7, 8). Itech nejin tonalmej, sekin xa techuijuikaltiskej uan techitaskej ke amo teyi tichiuanimej. Xa kitemoskej maj amo kuali techitakanok tejuan uan inechikol Jiova. Tein kipanok Job techmachtia ke Jiova kimati ke amo tikauaskej maski tikpanoskej ouijkayomej. w22.06 24 § 15, 16

Uan maski ne iluikak semi yolpakiskej keman ixpoliuis Ueyi Babilonia, onkas okse taman tein kichiuas maj okachi yolpakikan (Apoc. 19:​1-3). Itech amatajkuilol Apocalipsis ika motajtoua keman monamiktia “ichkatsin”, uan nejin yejua tein okachi tayekantok. Maski 144,000 taixpejpenalmej yetoskejya iluikak tepitsin achto ke peuas Armagedón, ayamo ijkuak monamiktis (Apoc. 21:​1, 2, TNM). Monamiktis keman panosya Armagedón uan keman kinixpoloskejya nochin akin kiixnamikij Dios (Sal. 45:​3, 4, 13-17). ¿Toni panos keman monamiktis “ichkatsin”? Ijkon kemej se takat uan se siuat monamiktiaj, Jesús kemej tekiuaj, kemej yeskia monamiktis iuan ‘inovia’ oso 144,000. Ika nejin tein mochiuas, Jesús uan 144,000 taixpejpenalmej peuas taixyekanaskej nikan taltikpak 1,000 xiujmej (Apoc. 20:6). w22.05 17 § 11-13

Jesús kijtojka ke itech itamian tonalmej kiixtaliskia se “takeual takuaujtamach uan tamatkej” akin techmakaskia tamachtilis tein techpaleuiskia maj kuali timouikakan iuan Jiova (Mat. 24:45). Yejua ika axkan monekiskia semi tekititos uan ijkon kichiujtok. Jesús kinixtalij seki tokniuan taixpejpenalmej akin amo miakej maj kinmakakan tamachtilis itekitikauan Dios uan no akin kinekij kiixmatiskej. Nejin takamej amo kinemiliaj ke tokniuan moneki takuaujtamatiskej kemej yejuan kinekij (2 Cor. 1:24). Kimatij ke Jesucristo yejua akin kinixyekana itekitikauan Dios (Is. 55:4). Itech xiuit 1919 hasta axkan “takeual takuaujtamach uan tamatkej” kikixtiani miak amaixmej tein ika kinpaleuianij miakej maj kiixmatikan Dios. Itech xiuit 1921, “takeual takuaujtamach uan tamatkej” kikixtij itech tajtol inglés amatajkuilol El Arpa de Dios tein kinpaleuij miakej maj kiixmatikan tamachtilismej tein tayekantokej itech Biblia. Ijkon kemej panouanij xiujmej mokixtiani okseki amatajkuilolmej. ¿Katiyejua amatajkuilol mitsonpaleuij xikonixmati uan xikontasojta Jiova? w22.07 10 § 9, 10

Amo akin semi kiuelita kitemakas teisa kemej Jehová. Uan tein tikonmakas, yeski miak oso amo, yejuatsin nochipa mitsonmakas okachi (Mar. 10:​29, 30). Maski tinemij kampa mochiujtok tein amo kuali, Jehová mitsonpaleuis kualtsin xionnemi, xionyolpaki uan kuali xionmomachili. Uan amo sayoj nejon. Amo keman tikonkauas tikontekitilis moTajtsin. Ijkon kemej panotias xiujmej, Jehová okachi mitsontasojtas uan tejuatsin no, uan ijkon kemej yejuatsin, uelis tionnemis nochipaya. Keman tionmotemaktia uan tionmoauia, ueli tikonmaka Jehová teisa tein kitelpia ipatiuj. Jehová mitsonmakani nochi tein kuali tein tikonpia uan nochi tein kichiua xionyolpaki. Uan tejuatsin uelis nochipa tikontekitilis uan amo keman tikonkauas akin iaxka iluikak uan taltikpak, nejin se taman tein ayamo kipia (Job 1:8; 41:11; Prov. 27:11). Yejua tein okachi kuali tein uelis tikonixtalis tikonchiuas. w23.03 6 § 16, 17

Keman aksa telpoch oso ichpoch, xa okachi kinejneki motekas iuan aksa. Xa oksekin mitschikaujkauiskej xiauilnemi uan Satanás kineki xikchiua nejon. ¿Toni mitspaleuis xikixtopeua? (1 Tes. 4:​3, 4). Keman tiktataujtis Jiova, xikilui keniuj timomachilia uan xiktajtani maj mitspaleui xiyolchikauak (Mat. 6:13). Xikelnamiki ke Jiova kineki mitspaleuis, amo sayoj kichixtok ximopolo (Sal. 103:​13, 14). Amo moneki moselti tikyektalis mokuejmoluan. Xikintapoui motatuan tein tikpanotok. Maski tipinauas semi moneki xikchiua. Komo tikixtajtoltia Biblia uan itech titanemilia tein tayolmajxitia, amo ouij mitskisas tikixpejpenas tein kiyolpaktis Jiova. Tikitas ke amo moneki maj ijkuiliujto nochi tein moneki tikchiuas. Nejin kinextis ke okachi kuali timouika iuan Jiova. w22.08 5 § 10-12

Tokniuan takamej akin kinixyekanaj ininchankauan kintekipachoua keniuj kinixpanoltiskej. Komo tejuatsin tikonixyekana mochankauan, xa mitsontekipachouaya ox ueliskia tikonixpanoltis mochankauan oso ox tikonpiaskia kani nannemiskej. Uan xa tikonnemiliaya ke komo mitsonkuiliayaj tekit tein tikonpia, xa amo tikonajsiskiaok okse. Oso xa tikonnemiliaya ke amo mitsonajsiskia tomin. Miakej ijkon momachilianij, yejua ika Satanás kichiuani maj amo kitekitilikanok Jiova. Satanás kineki maj tiknemilikan ke Jiova amo toka motekipachoua uan ke amo techpaleuis maj tikinixpanoltikan tochankauan. Komo peua tikneltokaj nejon, xa tiknemiliskej ke moneki tikchiuaskej tein yeski para amo techkuiliskej totekiuj, maski amo tikchiuaskejok tein Biblia kijtoua. w22.06 15 § 5, 6

Tikmatij ke Jiova “se Dios teiknelijkej, amo niman kualani uan inetasojtalis tein amo tami semi ueyi uan nochipa kijtoua tein melauj” (Éx. 34:6). Yejuatsin nochipa kineki maj mochiua tein kuali (Is. 61:8). Kiyolkokoua keman kiita ke titajyouiaj uan kineki kiixpolos nochi tein techtajyouiltia keman ajsis tonal tein kiixtalijtok (Jer. 29:11). ¡Semi tiknekij maj ejkoya nejon tonal! Nejin kichiua maj semi tiktasojtakan Jiova. No tikpatiuitaj tamachtilis tein melauak porin semi techpaleuia. Kemej neskayot, itech Biblia timomachtianij ke uelis tikchiaskej maj mochiua tein kuali amo uejkaua. Se tepos tein ika motsikoua barco kipaleuia maj amo semi moolini nion maj moixkepa, no ijkon tein tikchiaj techpaleuia maj tiyolseujtokan keman tikpanouaj ouijkayomej. Itech tajkuilol tein axkan timomachtiaj, tatitanil Pablo kijtoj nejin ininka tajtojtoya akin kichiaj nemiskej iluikak. Sayoj ke tein kijtoj no kinpaleuia akin kichiaj nemiskej nochipaya nikan taltikpak itech se xochital (Juan 3:16). Kemej tikchiaj tinemiskej nochipaya techpaleuia maj tiyolpakikan axkan. w22.08 14, 15 § 3-5

Komo tikintasojtaj tokniuan uelis titakuaujtamatiskej iniuan. Itech 1 Corintios capítulo 13 ika tajtoua tein kichiua aksa akin tetasojta. Komo tikchiuaj tein ompa kijtoua techpaleuis maj okachi titakuaujtamatikan iniuan tokniuan oso maj oksepa iniuan titakuaujtamatikan komo kichiujkej teisa tein techyolkokoj (1 Cor. 13:​4-8). Kemej neskayot, itech versículo 4 kijtoua ke “akin tetasojta amo yolijsiui uan kualtakat”. Jehová amo yolijsiui touan maski tikchiuaj teisa tein kiyolkokoua. Yejua ika tejuan amo no moneki tiyolijsiuiskej iniuan tokniuan komo kichiuaj oso kijtouaj teisa tein techyolkokoua oso techkualantia. Versículo 5 no kijtoua ke akin tetasojta “amo niman kualani. Amo kipoujtiuj tein kichiuiliaj”. Amo tiknekij tikpoujtiaskej tein techchiuiliaj tokniuan, tein kijtosneki ke amo tiksentokaj tikelnamikij tein techchiuilijkej. Eclesiastés 7:9 kijtoua ke maj amo niman tikualanikan. Okachi kuali maj tikinitakan tokniuan kemej Jehová kinita. Yejuatsin kintasojta uan amo kisentoka kielnamiki tein amo kuali tein kichiuaj. Yejua ika tejuan no moneki ijkon tikchiuaskej (Sal. 130:3). Amo moneki tikitaskej toni ika mopolouaj, ta moneki tikitaskej ininkualneskayouan (Mat. 7:​1-5). w22.09 4, 5 § 6, 7

Itech amatajkuilol Daniel moijtoua keniuj mochiuas seki taman itech itamian tonalmej. Kemej neskayot, Daniel 12:1 kijtoua ke Miguel oso Jesucristo, ijkatok porin kinpaleuia itekitikauan Dios. Nejin peuak mochiua itech xiuit 1914, keman Jesús peuak taixyekana ompa iluikak. Sayoj ke Daniel no kiluijkej ke Jesús moketsaskia keman onkaskia “ueyi tajyouilis kemej amo keman mochiuani desde ke peuak moajsi se xolal hasta ijkuak”. Nejon tonalmej yejua “tetsaujkatajyouilis” tein ika tajtoua Mateo 24:21. Jesús moketsa oso kinpaleuia itekitikauan Dios keman tami nejon ueyi tajyouilis oso itech Armagedón. Apocalipsis kijtoua ke yejuan akin “tel miakej” uan “makiskej keman mochiuak tetsaujkatajyouilis” (Apoc. 7:​9, 14). w22.09 21 § 4, 5

Nejin kijtosneki ke Jehová uelis kiixpolos itokay aksa akin ijkuiliujtokya itech nejon amatajkuilol, kemej yeskia kijkuilojtoskia ika lápiz (Apoc. 3:5). Yejua ika moneki tikchiuaskej tein moneki para maj totokay kisentoka ijkuiliujto itech nejon amatajkuilol, hasta keman Jehová kemej yeskia kijkuilosya ika lapicero uan amo keman kiixpolosok. Oksekin akin inintokay ijkuiliujtokya itech amatajkuilol kampa ixnesij akin nemiskej, yejuan akin kinixpejpenkej oso kinijitakej maj tekiuajtikan iuan Cristo ompa iluikak. Ijkon kemej tatitanil Pablo kiniluij itekitikaikniuan akin nemiaj Filipos, akin kinixpejpenkej maj tekiuajtikan iuan Cristo ijkuiliujtokejya itech nejon amatajkuilol (Filip. 4:3). Sayoj ke komo kinekij maj inintokay kisentoka ompa ijkuiliujto, moneki amo kikauaskej Jehová. Uan keman kintaliliskejya ininsello, kijkuiloskej inintokay itech amatajkuilol kemej amo ixpoliuisok. Nejin panos achto ke momikiliskej oso achto ke peuas tetsaujkatajyouilis (Apoc. 7:3). w22.09 14 § 3; 15 § 5, 6

¿Toni kijtosneki nejin? Maj tiknemilikan ke aksa techchijchiuilij se tapalol tein semi tikueliliaj. Sayoj ke kemej tiijsiujtokej uan itech titanemilijtokej okseki taman, ijsiujka tikuaj uan nion tikyekouaj. Keman tiktamiajya, tiknemiliaj ke semi ijsiujka titakuajkej uan ke okachi kuali yeskia maj yolik titakuanij para kuali tikyekoskiaj. Keman tikixtajtoltiaj Biblia no uelis ijkon techpanos. Komo ijsiujka tikchiuaj amo ueli tikyekitaj tein Jehová techmachtia. Yejua ika, moneki maj amo ijsiujka tikixtajtoltikan, ta maj tiknemilikan keniuj mochiuak tein tikixtajtoltijtokej, kemej yeskia maj tikinkakikan akin tajtouaj uan maj itech titanemilikan nochi tein tikixtajtoltiaj. Komo ijkon tikchiuaj, okachi tiyolpakiskej. Jesús kiixtalij “takeual takuaujtamach uan tamatkej” maj techmaka tamachtilis keman moneki uan semi kuali techmachtia (Mat. 24:45). Nochi tamachtilis mokixtia itech Biblia (1 Tes. 2:13). w22.10 7, 8 § 6-8

Biblia kijtojka ke itech itamian tonalmej onkaskiaj akin takejkeloskiaj (2 Ped. 3:​3, 4). Yejuan ‘kichiuaj nochi tein amo kuali tein kinejnekij’ (Jud. 7, 17, 18). ¿Toni techpaleuis maj amo tikchiuakan kemej akin takejkelouaj? Kemej neskayot, maj amo timouikakan iniuan akin nochipa kijtojtokej tein amo kiuelitaj (Sal. 1:1). Nejin kijtosneki ke amo tikakij nion tikixtajtoltiaj tein kiteixmatiltiaj akin kikaujkej uan kiixnamikij tamachtilis tein melauak. Komo amo timoyekpiaj, xa no peuas titaijijtoskej uan amo tikneltokaskej tein Jehová uan inechikol techiluiaj. Para amo no ijkon tikchiuaskej, uelis timotajtaniskej: “¿Nochipa nikijtoua teisa tein amo kuali keman techmelauiliaj oso technauatiaj se taman? ¿Nikita tein amo kuali tein kichiuaj tokniuan akin techixyekanaj?”. Komo niman tikpataj tein moneki, tikyolpaktiskej Jehová (Prov. 3:​34, 35). w22.10 20 § 9, 10

Nejon chikaualis kipaleuij maj ueli kinnojnotsani judíos akin amo teyi kinekiaj “kiyekkakiskej uan yoltakuaujkej” katkaj. Jehová kiluij: “Nikchiuak xiixtakuauak kemej yejuan ixtakuaujkej uan xiixkuatakuauak kemej yejuan ixkuatakuaujkej. Nikchiuak maj moixkuako moita kemej se tetsin, maj okachi takuauak ke se tet. Amo xikinmouili, uan maj ininixko amo mitsmojmoujti” (Ezeq. 3:​8, 9). Kemej yeskia Jehová kiluij: “Maski yejuan yoltakuaujkej, amo ximosenkaua. Nejua nimitspaleuis”. Ijkuak, ichikaualis Dios kichiuak maj Ezequiel yani kampa monekia tanojnotsas. Yejua kijkuiloj: “Ichikaualis Jehová semi nechpaleuij”. Monekik panos se semana para maj tanauatijkej Ezequiel kuali kiajsikamatini tein monekia kitematiltis (Ezeq. 3:​14, 15). Satepan, Jehová kiluij maj yani kampa amo tepeyoj uan ijkuak ichikaualis peuak kipaleuia (Ezeq. 3:​23, 24). Ezequiel ueliskiaya tanojnotsas. w22.11 4, 5 § 8, 9

Tanauatijkej Habacuc kipanok miak ouijkayomej. Nesi ke hasta kinemilij ke Jehová amo ika motekipachouaya. Yejua ika kitapouij keniuj momachiliaya. Jehová kinankilij nejin itekitikauj akin amo keman kikauak (Hab. 2:​2, 3). Satepan ke Habacuc itech tanemilij keniuj Jehová kipaleuijka ixolal, oksepa yolpakik. Uan senkis kineltokak ke Jehová ika motekipachouaya uan ke kipaleuiskia maj kixiko tein yeski ouijkayot tein kipanoskia (Hab. 3:​17-19). ¿Toni techmachtia nejin? Keman tikpiaskej kuejmolmej, maj tiktataujtikan Jehová, maj tiktapouikan keniuj timomachiliaj uan maj tikauakan maj techpaleui. Uelis titakuaujtamatiskej ke yejuatsin techpaleuis maj titaxikokan. Uan keman tikitaskej keniuj Jehová techpaleuia, okachi titakuaujtamatiskej iuan. Komo tikonsentoka tikonchiua nochi tein mitsonpaleuis kuali xionmouika iuan Jehová, amo tikonkauas maski tikonpias kuejmolmej oso tionomeyolouas (1 Tim. 6:​6-8). w22.11 15 § 6, 7

Jesús uan ome tachtekinij akin yetoyaj inajnakastan momikilijtoyajya (Luc. 23:​32, 33). Nejin ome takamej amo katkaj imomachtijkauan Jesús porin kikejkelojtoyaj (Mat. 27:44; Mar. 15:32). Sayoj ke semej moyolpatak porin kijtoj: “Jesús, xinechelnamiki keman titaixyekantosya kemej tekiuaj”. Uan Jesús kinankilij: “Axkan nimitsyekiluia: nouan tietos itech Xochital” kemej kijtoua tajkuilol tein axkan timomachtiaj (Luc. 23:​39-42). Tein Jesús kiluij nejin tachtekkej moneki kichiuas maj itech titanemilikan keniuj tinemiskej itech xochital. Uelis tikchiuaskej nejin komo tikelnamikij keniuj israelitas yolseujkanemiaj keman Salomón taixyekanaya. Biblia kijtoua ke Jesús “okachi tayekantok ke Salomón”. Yejua ika uelis tikneltokaskej ke Jesús uan akin iuan taixyekanaskej kichiuaskej maj semi takualtsinkan nikan taltikpak (Mat. 12:42). “Okseki ichkamej” moneki kitemoskej kimatiskej toni kichiuaskej para nemiskej nochipaya itech xochital (Juan 10:16). w22.12 8 § 1; 9 § 4

Isaías techmatiltia ke Jehová kuali kikaki keman tiktataujtiaj uan niman technankilia. Tanauatijkej no kijtoua: “Keman mitskakis, niman mitsnankilis”. Nejin techelnamiktia ke Jehová amo sayoj kineki kinpaleuis akin kitajtaniaj maj kinpaleui, ta yekmelauj kineki kichiuas. Tikmatiskej nejin techpaleuia maj titaxikokan uan maj tiksentokakan tiyolpakikan keman tikpanouaj ouijkayomej. Jehová kuali kikaki keman tiktataujtiaj tisejsemej. ¿Keniuj tikmatij nejin? Porin ipeujyan Isaías capítulo 30 Jehová kijtoua “namejuan”, porin kiniluia nochin itekitikauan. Sayoj ke itech versículo 19 kijtoua “tejua”, porin kiluijtok sejse itekitikauj. Isaías kijtoua: “tejua yekmelauj amo tichokasok”, “yejuatsin mitsiknelis”, “mitsnankilis”. Kemej Jehová toTajtsin toka motekipachoua tisejsemej, uan techkaki keman tisejsemej tiktataujtiaj (Sal. 116:1; Is. 57:15). w22.11 9 § 5, 6

Keman tikteixmatiltiaj iTajtol Dios uan ika titamachtiaj maski techixnamikij, kichiua maj tiyolpakikan uan maj tiyolseujtokan. Itech yekinika siglo, keman taixyekananij judíos kinnauatijkej tatitanilmej maj amo tanojnotsanijok, yejuan kitakamatkej Dios. Kisentokakej tanojnotskej uan yolpakkej (Hech. 5:​27-29, 41, 42). Moneki tikelnamikiskej ke keman tekiuanij amo techkauaj maj tikueyichiuakan Jehová, moneki kuali tikitaskej keniuj uelis titanojnotsaskej. Komo timochikauaj tikchiuaskej nejin uelis tiyolseujtoskej porin tikmatij ke tikyolpaktiaj Jehová uan tikinpaleuiaj oksekin maj momakixtikan. Maj senkis tikneltokakan ke hasta keman tikpanotoskej uejueyi ouijkayomej uelis tiyolseujtoskej. Ijkuak moneki tikelnamikiskej ke moneki maj Dios techyolseui porin sayoj yejua ueli yekmelauj teyolseuia. Maj titakuaujtamatikan iuan Jehová keman mochiuas se ueyi kokolis, se tetsauit oso keman techtajyouiltiskej. Maj tiktakamatikan tein technauatiskej itech inechikol uan maj itech titanemilikan tein tikseliskej satepan. Komo ijkon tikchiuaj, “Dios akin teyolseuia” touan yetos (Filip. 4:9). w22.12 21 § 17, 18

Yejua ika moneki tikchiuaskej seki taman. Kemej, amo tiyolkualantinemiskejok, nion titetauelitaskejok nion titauelmiktinemiskejok (Efes. 4:​31, 32). Sayoj ke, ¿keyej xa ouij techkisas amo tikchiuaskej? Porin seki taman ipa ouij se mokixtilis. Biblia ika tajtoua akin “niman kualani” uan akin “niman kualantikisa” (Prov. 29:22). Satepan ke timoauiaj moneki tiksentokaskej timopataskej (Rom. 7:​21-23). Maj tikiluikan Jehová toni ouij techkisa tikpataskej. Uelis tikyekmatiskej ke yejuatsin techkakis uan techpaleuis (1 Juan 5:​14, 15). Maski Jehová amo kichiuas maj sepasan timokixtilikan, kemaj techpaleuis maj amo tikchiuakanok maski ouij techkisas (1 Ped. 5:10). Maj tikchiuakan tein tiktajtaniaj Jehová, uan maj amo tikchiuakan teisa tein uelis kichiuas maj oksepa tiknekikan tikchiuaskej tein tikpatakajya. Uan no, maj amo itech titanemilikan tein amo kuali (Filip. 4:8; Col. 3:2). w23.01 10 § 7, 9, 10

Tiknextiaj ke titetasojtaj keman ika yolpakilis akin yeski tiktapouiaj tein kijtoua Biblia. Tikinnojnotsaj akin taman ixtamatij, akin taman kemej nemij, akin ueyichiuanimej uan akin amo, akin kipiaj tomin oso akin amo kipiaj. Ijkon, titekitij iuan Jehová, “porin yejua kineki maj akin yeski momakixti uan maj kuali kiixmati tein melauak” (1 Tim. 2:4). No tiknextiaj ke tiktasojtaj Dios uan Cristo keman tikintasojtaj tokniuan. Tiknextiaj keman ininka timotekipachouaj, uan tikinpaleuiaj keman kipanouaj ouijkayomej. Tikinyolseuiaj keman momikilia se akin kitasojtaj, tikinkalpanouaj keman mokokouaj, uan tikchiuaj nochi tein tiuelij para tikinyolchikauaskej keman moyolkokojtokej (2 Cor. 1:​3-7; 1 Tes. 5:​11, 14). No ininka timotataujtiaj porin tikmatij ke “semi tapaleuia keman chikauak motataujtia akin yolmelauak” (Sant. 5:16). w23.01 28, 29 § 7, 8

Ijkon kemej panouaj tonalmej, se akin kalchiua okachi kuali kichiua itekiuj. No ijkon, tejuan uelis okachi kuali tikinyolchikauaskej tokniuan. Maj tikintapouikan keniuj taxikojkej seki itekitikauan Dios, nejon xa kinyolchikauas para uelis taxikoskej keman kipanoskej ouijkayomej (Heb. 11:​32-35; 12:1). Uelis titapaleuiskej maj tinochin kuali timouikakan keman tikijtouaj tein kuali tein kichiuaj tokniuan, komo amo tikauaj maj teisa techxexelo uan komo tikyektaliaj kuejmolmej tein tikpiaskej iniuan oksekin (Efes. 4:3). Uan uelis tikinpaleuiskej tokniuan maj okachi takuaujtamatikan iuan Jiova komo ika tikinnojnotsaj tamachtilismej tein tayekantokej itech Biblia, komo tikinpaleuiaj ika seki taman tein kinpoloua uan komo tikinpaleuiaj akin amo semi kuali mouikajok iuan Jiova. Tejuan no uelis ijkon tiyolpakiskej komo tikinpaleuiaj tokniuan. Keman aksa kichijchiua se kali kimati ke satepan uejueliuis, sayoj ke keman tikinyolchikauaj tokniuan uelis kinpaleuis nochipaya. w22.08 22 § 6; 25 § 17, 18

Jesús kijtoj ke para tikajsikamatiskej tein tikixtajtoltiaj itech Biblia moneki kuali itech titanemiliskej (Mat. 24:15). ¿Keniuj uelis tikchiuaskej? Moneki kuali tiknemiliskej keniuj se tanemilil mouika iuan okse uan keniuj okseki tanemililmej tataman, uan no maj se kiajsikamati tein amo moyekmelaua. Uan ijkon kemej Jesús kijtoj, komo kuali tikajsikamatij techpaleuis maj tikitakan ke seki taman tein panokya uan tein panotok kinextia ke yekmelauj mochiua tein achto moijtojka. Uan no, semi moneki kuali tikajsikamatiskej porin nejin kichiuas maj nochi tein tikixtajtoltiaj itech Biblia techpaleui. Jehová kinpaleuia itekitikauan maj kuali kiajsikamatikan tein kiixtajtoltiaj. Yejua ika moneki tiktataujtiskej uan tiktajtaniskej maj techpaleui. Sayoj ke no moneki tikchiuaskej okse taman. Moneki yolik timomachtiskej tein tikixtajtoltiaj uan tikitaskej keniuj mouika ika tein tikmatijya. Maj tikajsikamatikan tein ika tajtoua Biblia uan tikitaskej keniuj uelis tikchiuaskej tein timomachtiaj (Heb. 5:14). Komo itech titanemiliaj tein tikixtajtoltiaj itech Biblia, techpaleuis maj okachi kuali tikajsikamatikan. w23.02 10 § 7, 8

Xikonnemili ke se motasojikniuj mitsontayokolia se dibujo tein uejkaujya kichijchiujkaj sayoj ke semi kipia ipatiuj. Maski miak taman kichiua maj amo moyekitaok, soltikya uan ixkisakya, komo tikonnamakaskia ueliskia mitsonmakaskej tel miak tomin. ¿Melauj ke tikonpatiuitaskia uan tikonyekpiaskia? Jehová no techmakani se taman tein kitelpia ipatiuj: tonemilis. Jehová semi kipatiuita, hasta kitemakak ikonetsin maj toka momikili (Juan 3:16). Jehová ‘kichiua maj tiyoltokan’ (Sal. 36:9). Tatitanil Pablo ika tajtoj nejon keman kijtoj: “Yejua kichiua maj tiyoltokan, maj timoolinikan uan maj tinemikan” (Hech. 17:25). Yejua ika uelis tikijtoskej ke Dios techtayokolijtok tonemilis. Uan kemej techtasojta, techmaka tein moneki para tiyoltoskej (Hech. 14:​15-17). Sayoj ke Jehová amo kichiua milagros para maj amo teyi techpano, ta kineki maj timoyekpiakan para amo tikokolispeuaskej uan tiksentokaskej tiktekitiliskej (2 Cor. 7:1). w23.02 20 § 1, 2

¡Semi tiktasojkamatiliaj Jehová porin techmakak Biblia! Itech iTajtol, yejuatsin techyolmajxitia tein uelis tikchiuaskej keman tikpiaskej kuejmolmej, no techiluia ke uelis tikchiaskej tein kuali satepan. Uan no, technextilia se taman tein semi moneki porin kijtoua keniuj tamati yejuatsin. Keman itech titanemiliaj kualtsitsin taman tein kinextia Jehová, techpaleuia maj tiknekikan timotokiskej iuan uan maj kuali iuan timouikakan (Sal. 25:14). Jehová kineki maj tikixmatikan. Ne uejkauj kichiuak maj seki itekitikauan takochitakan, kiitakan seki taman uan hasta kintitanik ángeles para maj kitematiltikan tein yejua kinekia (Núm. 12:6; Hech. 10:​3, 4). Sayoj ke komo amo moijkuiloskia nochi nejon, amo ueliskia timomachtiskej. Yejua ika, Jehová kichiuak maj seki takamej kijkuilokan “itech se amaix” nochi tein yejuatsin kinekia maj tikmatikan. Uelis tikyekmatiskej ke Dios kichiuak maj kuali moijkuilouani nejin tein semi techpaleuia, porin “ojti tein iaxka akin yekmelauj Dios amo teyi kipoloua” (Sal. 18:30). w23.02 2 § 1, 2

Xikixtali tikchiuas tein yekmelauj mitspaleuis. ¿Kemej toni? Tein kichiuas okachi xitakuaujtamati iuan Dios uan okachi xikchiua kemej Cristo (Efes. 3:16). Kemej neskayot xa uelis okachi timomachtis moselti uan tikixtajtoltis Biblia (Sal. 1:​2, 3). Oso xa uelis tikixtalis okachi tiktataujtis Jiova uan tikiluis nochi tein tikmachilia. Xa monekis kuali tikixpejpenas tein ika timoixpetania uan okachi kuali tikuis motiempo (Efes. 5:​15, 16). Keman tikinpaleuia oksekin, mitspaleuia okachi kuali ximouika iuan Jiova. Kemej neskayot, uelis tikixtalis tikinpaleuis akin mokokouaj oso akin xiuejkejya. Xa uelis tikchiuas teisa ininchan oso tikinpaleuis maj ueli kitekitiltikan inincelular oso inintableta. No uelis tiknextis ke tikintasojta akin amo kiixmatij Jiova komo tikinmatiltia tein Biblia tamachtia (Mat. 9:​36, 37). Uan komo tiueli, xikixtali timochiuas precursor, titekitis Betel, oso titapaleuis keman mochijchiuaj kalmej kampa titaueyichiuaj. w22.08 6 § 16, 17