Diciembre

¿Ueliskiaya moauis ueyichiujkej akin kayot Etiopía? Maj tikitakan: Nejon takat akin kayot Etiopía “yajka Jerusalén kiueyichiuato Dios” (Hech. 8:27). Nesi ke yejua kiselijkaya inintaneltokalis judíos. Kiixmatia seki taman de Jehová porin momachtiaya Escrituras Hebreas, sayoj ke kinekia kimatis okachi. Tikmatij nejon porin keman Felipe kiajsito itech ojti, kiixtajtoltijtiaya amatajkuilol Isaías (Hech. 8:28). Nejon takat kinekia kisentokas kimatis okachi ke tein kimatiaya. Desde Etiopía yajka hasta Jerusalén para kiueyichiuas Jehová itech templo. Felipe peuak kimelauilia nejon ueyichiujkej seki tamachtilismej tein tayekantokej, semej yejua ke Jesús katka Mesías (Hech. 8:​34, 35). Yejua peuak okachi kitasojta Jehová uan iKonetsin Jesús, kinekik moauis uan mochiuas imomachtijkauj. Felipe kiitak ke ueliskiaya moauis uan yejua kiauij. w23.03 8, 9 § 3-6

Komo titakajkayauaj amo tikyolpaktiskej Jiova porin yejuatsin kitauelita nochi taman takajkayaualis (Prov. 6:​16, 17). Maski taltikpakneminij kinemiliaj ke kuali yetok maj se takajkayaua, tejuan tiknekij titanemiliskej kemej Jiova (Sal. 15:​1, 2). Xa amo titakajkayauaskej, sayoj ke amo no kuali yetok maj tiktatikan teisa tein tikmatij para maj oksekin kineltokakan ke melauj maski amo. No moneki maj amo ininka titajtokan oksekin (Prov. 25:23; 2 Tes. 3:11). Keman tikonkakis ke aksa peua ininka tajtoua oksekin okachi kuali ika xiontajto okse taman uan xikonijto teisa tein tapaleuia. Axkan semi miakej amo kualtsin tajtouaj. Yejua ika tejuan moneki timochikauaskej titajtoskej kemej Jiova kineki. Komo timochikauaj tikueyitaliskej Jiova ika tein tikijtouaj keman titanojnotsaj, itech nechikolmej uan keman titajtouaj iniuan oksekin, yejuatsin techtatiochiuis. Keman amo mochiuasok tein amo kuali tein onkak itech taltikpak, okachi amo ouij techkisas tikueyitaliskej Jiova ika tein tikijtoskej (Jud. 15). w22.04 9 § 18-20

Keman tiknemiliaj keniuj Jehová uan Jesús semi techtasojtaj, techolinia maj no tikintasojtakan (1 Juan 4:10). Uan okachi tikintasojtaj keman tikajsikamatij ke Jesús toka momikilij tisejsemej. Tatitanil Pablo semi kitasojkamatia inemilis Jesús tein kitemakak. Yejua ika kijkuiloj: “iKoneuj Dios […] nechtasojtak uan noka motemakak” (Gál. 2:20). Jehová kichiuak iuan xionmotoki uan kuali iuan xionmouika porin Jesús kitemakak inemilis (Juan 6:44). ¿Keniuj tionmomachilia tikonmatis ke Jehová kiitak se taman tein kuali itech moyolo uan yejua ika kitemakak akin okachi kitasojtaya para uelis kuali iuan tionmouikas? ¿Melauj ke techyololinia uan kichiua maj okachi tikintasojtakan Jehová uan Jesús? Yejua ika tinochin maj timotajtanikan: “¿Toni nechyololinia maj nikchiua?”. Kemej tikintasojtaj Dios uan Cristo, techolinia maj no tikintasojtakan oksekin (2 Cor. 5:​14, 15; 6:​1, 2). w23.01 28 § 6, 7

Tikmatij ke Jehová kikui Biblia para kinpaleuis itekitikauan maj ‘kisentekitilikan’. Yejuatsin kichiuak maj seki tamachtilismej tein kipia iTajtol moijkuilouanij kemej uelis kiajsikamatiskej sayoj akin amo ueyichiuanimej (Luc. 10:21). Biblia se amaix tein kiixtajtoltiaj nochin. Sayoj ke, sayoj akin yolyemankej ueli kiajsikamatij uan kichiuaj tein ompa kijtoua (2 Cor. 3:​15, 16). Maj tikitakan okse taman tein Biblia kinextia ke Jehová tamatkej. Yejuatsin kikui Biblia amo sayoj para techsenmachtis timiakej, ta no para techmachtis uan techyolseuis tisejsemej. Keman tikixtajtoltiaj iTajtol, tikitaj ke Jehová nochipa kiitstok tein techpoloua tisejsemej (Is. 30:21). Xa tikixtajtoltianij se texto tein ijkuak semi techpaleuij. Uan komo Biblia moijkuiloj para maj millones kiajsikamatikan tein ompa kijtoua, ¿keyej tamachtilis tein kipia ueli techpaleuia tisejsemej hasta axkan? Porin akin kichiuak maj moijkuilo Biblia, sayoj yejuatsin okachi tamatkej (2 Tim. 3:​16, 17). w23.02 4, 5 § 8-10

Akin tikchiuaj kemej Cristo, semi tiktasojtaj Jiova uan tiknekij semi kuali tiktekitiliskej. Sayoj ke, uelis tikchiuaskej nejin komo tikixtaliaj seki taman, kemej tiknextiskej kualneskayomej, timomachtiskej tikchiuaskej okseki taman uan tiktemoskej tikinpaleuiskej oksekin. ¿Keyej moneki tikixtaliskej okachi tiktekitiliskej Jiova uan ijkon tikchiuaskej? Yekinika, porin tiknekij tikyolpaktiskej toTajtsin, Jiova. Yejuatsin yolpaki keman tiktekitiliaj ika nochi tein tiuelij tikchiuaj. Uan no, tiknekij okachi kuali tiktekitiliskej porin ijkon uelis okachi tikinpaleuiskej tokniuan (1 Tes. 4:​9, 10). Maski uejkaujya tiktekitilijtokej Jiova oso amo, tinochin moneki timochikauaskej okachi kuali tikchiuaskej. w22.04 22 § 1, 2

Amo uejkaua nochi tekiuajyomej kiixnamikiskej Ueyi Babilonia, tein kijtosneki nochi taneltokalismej tein amo melaujkej. Keman mochiuas nejon, peuas okachi ueyi tajyouilis. ¿Kichiuas nejon maj semi miakej peua kiueyichiuakan Jiova? Amo. Kemej kijtoua Apocalipsis capítulo 6, ijkuak akin amo kitekitiliaj Jiova kitemoskej maj kinpaleuikan tekiuanij uan uejueyi tanamakanij itech nejin taltikpak. Itech nejin capítulo moijtoua ke kemej yeskia tepemej. Kemej amo kipaleuiskej iTekiuajyo Dios, Jiova kiitas ke kiixnamikij (Luc. 11:23; Apoc. 6:​15-17). Itech okachi ueyi tajyouilis, nochin kiitaskej ke itekitikauan Jiova semi tamamej. Sayoj yejuan kisentokaskej kitekitilijtoskej Jiova uan amo kinekiskej kipaleuiskej koujtajtapial oso “okuilin” (Apoc. 13:​14-17). w22.05 16, 17 § 8, 9

Itekitikauan Dios amo sayoj kiteixmatiltiaj tein kuali tein kichiuas iTekiuajyo Dios (Mat. 24:14). No moneki tekitiskej iniuan ángeles akin ininka motajtoua itech Apocalipsis capítulos 8 hasta 10. Nejin ángeles kiteixmatiltiaj nochi tein amo kuali tein kinpanos akin kiixtopeuaj iTekiuajyo Dios. Yejua ika, tiitaixpantijkauan Jiova tikteixmatiltianij ke amo uejkaua kintatsakuiltiskej, nejin kemej yeskia “tejsiuit uan tit” porin kinextia keniuj Dios kintatsakuiltis nochin akin kinixyekana Satanás (Apoc. 8:​7, 13). Nochin taltikpakneminij moneki kimatiskej ke amo uejkaua ixpoliuis tein amo kuali. Sayoj ijkon uelis kipataskej tein kichiuaj, uan momakixtiskej itech tonal keman Jiova kikixtis ikualanyo (Sof. 2:​2, 3). Kemej tein tikteixmatiltiaj amo kiuelitaj nochin, moneki tiyeskij tiyolchikaujkej. Tein tikteixmatiltiskej itech okachi ueyi tajyouilis okachi kinkualantis taltikpakneminij (Apoc. 16:21). w22.05 7 § 18, 19

Maj titanemilikan itech seki tetatmej akin moneki kiniskaltiskej ininkoneuan. Akin monamiktijkejya, xa miakpaya kikakinij tanojnotsmej kampa moijtoua keniuj moneki se kiniskaltis konemej. Sayoj ke keman yejuan kinpiaj ininkoneuan nochi mopataya. Axkan nejin tayolmajxitilismej kiitaj ke okachi moneki. ¡Tetatmej moneki kichiuaskej se ueyi tekit! Keman mopata teisa itech tonemilis, no mopata kemej tikitaj seki taman tein Biblia tayolmajxitia. Yejua ika, tiitekitikauan Jiova “mojmostaj” tikixtajtoltiaj Biblia uan itech titanemiliaj, ijkon kemej monekia kichiuaskej akin tekiuajtiaj Israel (Deut. 17:19). Tetatmej, namejuan nankipiaj ueyi tatiochiualis nankinpaleuiskej namokoneuan maj kiixmatikan Jiova. Sayoj ke, amo sayoj moneki maj kimatikan akoni Dios, ta moneki nankinpaleuiskej maj semi kitasojtakan. w22.05 26 § 2, 3

Amo sayoj moneki timotayokoltiskej, ta moneki tikchiuaskej teisa porin nejon okse taman tein kiita Jiova. Jiova no kiita okse taman tein semi moneki, kiita ox akin tajtakolchiuak mopata uan kinamiki kitapojpoluis. Nejin kijtosneki ke amo kichiuaok tein amo kuali uan peua kichiua tein yejuatsin kiyolpaktia (Is. 55:7). Moneki kipatas kemej tanemilia uan mochikauas tanemilis kemej Jiova (Rom. 12:2; Efes. 4:23). Moneki kiixtalis amo kinemilisok nion kichiuasok tein amo kuali (Col. 3:​7-9). Sayoj ke maj tikelnamikikan ke Jiova ueli techtapojpoluia porin Jesús toka momikilij, yejua ika semi moneki maj titakuaujtamatikan itech nejon. Keman Jiova kiita ke timochikaujtokej timopataskej, techtapojpoluia porin Jesús toka momikilij (1 Juan 1:7). w22.06 6 § 16, 17

Taltikpakneminij nochipa kinchiuilianij tein amo kuali oksekin (Ecl. 8:9). Kemej neskayot, miakej akin kipiaj tanauatil tetajyouiltiaj, sekin tateuiaj, kinuijuikaltiaj uan kinmojmoujtiaj akin iniuan momachtiaj oso kintajyouiltiaj hasta ininchankauan. Nochi nejin kichiua maj tikinmouilikan oksekin. ¿Toni kichiua Satanás keman kiita nejon? Keman tikinmouiliaj oksekin Satanás kitemoua maj amo titanojnotsakanok oso maj amo tikchiuakanok seki taman tein Jiova technauatia. Kichiuani maj seki tekiuanij amo techkauakan maj tikueyichiuakan Jiova kemej ipa tikchiuaj uan maj techtajyouiltikan (Luc. 21:12). Itech nejin taltikpak kampa taixyekana Satanás, miakej kintakajkayauiliaj itaixpantijkauan Jiova. Akin kineltokaskej nejon xa techtauelitaskej, techkejkeloskej oso techtajyouiltiskej (Mat. 10:36). Amo tikmoujkaitaj maj Satanás kichiua nejon porin ijkon kichiuaya itech yekinika siglo (Hech. 5:​27, 28, 40). w22.06 16 § 10, 11

¿Akonimej monekis kinpaleuiskej “maj kichiuakan tein kuali yetok”? Akin oksepa nemiskej, akin makisaskej keman mochiuas Armagedón uan konemej akin yoliskej itech xochital. Keman tamis mil xiujmej amo akin tajtakolejok yeski. Komo aksa amo tajtakolej amo kijtosneki ke nemis nochipaya. Maj inintech titanemilikan Adán uan Eva. Yejuan amo tajtakolejkej katkaj, sayoj ke monekia kitakamatiskej Jehová para ueliskia nemiskej nochipaya. Sayoj ke amo tatakamatkej (Rom. 5:12). Keman tamis mil xiujmej nochin akin nemiskej itech taltikpak amo tajtakolejkejok yeskij. Nochin kipaleuiskej iTaixyekanalis Jehová. ¿Oso sekin kichiuaskej kemej Adán uan Eva akin amo kitakamatkej Jehová maski amo tajtakolejkej katkaj? ¿Keniuj uelis momatis akonimej amo kikauaskej Jehová? w22.09 22, 23 § 12-14

Keman tikonita nochi tein mochiujtok itech taltikpak, xa tikonnemilia ke ouij yeski maj se tonal motayektali. Kalyetouanij amo motasojtajok, taltikpakneminij okachi tateuiaj uan sayoj inintech tanemiliaj, uan miakej ouij kinkisa inintech takuaujtamatiskej akin kinixyekanaj. Tein melauj, nochi nejin kichiua maj tikitakan ke amo uejkaua mochiuas tein kuali. ¿Keyej? Porin Biblia ipa kijtojkaya tein kichiuaskiaj taltikpakneminij itech “itamian tonalmej” (2 Timoteo 3:​1-5, TNM). Nochin akin kiseliaj tein Biblia tamachtia, kineltokaj ke yekmelauj mochiujtokya tein moijtojka, uan ke Jesucristo taixyekantokya itech iTekiuajyo Dios. Onkak okseki taman tein no moijtojka ika nejin Tekiuajyot. Nochi achtook moijtojka ke mochiuaskia kinamiki ika tein axkan mochiujtok, kemej yeskia keman se kisajsaloua se taixkopin tein tatetejtek. Nejin techpaleuis maj tikitakan itech katiyejua tonalmej tinentokej. w22.07 2 § 1, 2

Itech kokolis COVID-19 techiluijkej keniuj timonechikoskiaj uan keniuj titanojnotsaskiaj. Niman peuak tikchiuaj nechikolmej uan uejueyi nechikolmej ika internet uan peuak okachi titanojnotsaj ika carta uan ika teléfono. Jiova semi techtatiochiuiani porin timochikauaj tiksentokaskej tikueyichiuaskej. Itech miak kalmej Betel motematiltiani ke okachi momiakilianij tanojnotsanij. Uan miakej kipanouanij miak taman tein kuali. Seki tokniuan xa kinemilianij ke itech inechikol Jiova techiluianij miak taman kemej timoyekpiaskej ika kokolis COVID-19. Sayoj ke miakpa tikitanij ke tein techiluiaj semi techpaleuia. Kemej Jesús techixyekana kinextia ke techtasojta, keman tiknemiliaj nejon senkis tikneltokaj ke ika tein yeski tein panos satepan, Jiova uan Jesús techpaleuiskej (Heb. 13:​5, 6). w22.07 13 § 15, 16

Ika tonetataujtiluan tiknekij tikueyichiuaskej Jiova, sayoj ke no tiknekij tiktasojkamatiliskej nochi tein techmaka. Kemej neskayot, tataman xochimej, miak taman tein tikuaj tein semi uelik uan porin tikinpiaj akin kuali iniuan timouikaj. Yejuatsin techmaka miak taman porin kineki maj tiyolpakikan (Sal. 104:​12-15, 24). No tiktasojkamatiliaj nochi tamachtilis tein techmaka uan porin kichiua maj tikchiakan tein kuali. Kemansa uelis tikelkauaskej tiktasojkamatiliskej Jiova tein toka kichiua. ¿Toni uelis techpaleuis maj amo tikelkauakan? Uelis tikijkuiloskej tein tiktajtaniaj uan maj tikitstiakan keniuj technankilia, satepan maj tikchiuakan netataujtil uan maj tiktasojkamatilikan (Col. 3:15). w22.07 22 § 8, 9

Amo sayoj moneki timomachtiskej Biblia, ta komo tiknekij maj techpaleui moneki tikchiuaskej tein timomachtiaj, sayoj ijkon uelis yekmelauj tiyolpakiskej (Sant. 1:25). ¿Keniuj uelis tikmatiskej ox ijkon tikchiujtokejya? Se tokniuj takat kijtoua ke uelis tikitaskej toni tikchiujtokejya uan toniok moneki tikyekchiuaskej. Tatitanil Pablo kijtoj: “Maski kuali tiktekitilijtokejya Dios, maj ijkon tiksentokakan tikchiujtokan” (Filip. 3:​16, TNM). Maj itech titanemilikan nochi tein kuali tein tikseliaj keman timochikauaj tiksentokaskej itech tamachtilis tein melauak. Amo sayoj techpaleuia maj okachi kuali tinemikan, ta no tikyolpaktiaj Jiova uan tokniuan (Prov. 27:11; 3 Juan 4). ¡Nejin kichiua maj tikpatiuitakan tamachtilis tein melauak uan maj tikchiuakan tein timomachtiaj! w22.08 18, 19 § 16-18

Tayekananij uelis kinextiskej ke kintasojtaj Jehová uan Jesús keman kinyekpiaj uan kintasojtaj iichkauan Jesús (1 Ped. 5:1). ToTekotsin kipaleuij Pedro maj kiajsikamatini nejin. Kemej Pedro expa kijtojka ke amo kiixmatia xa semi kinekia kiluis Jesús ke kitasojtaya. Keman Jesús oksepa nemik, kitajtanij : “Simón ikoneuj Juan, ¿tinechtasojta?”. Tikyekmatij ke Pedro kichiuaskia tein yeski para kinextilis Jesús ke kitasojtaya. Uan Jesús kinankilij: “Xikinyekpia noichkatsitsin” (Juan 21:​15-17). Uan Pedro kemaj peuak kinyekpia uan kintasojta iichkauan toTekotsin uan ijkon kinextilij ke kitasojtaya. ¿Keniuj uelis tayekananij kinextiskej ke kichiuaj kemej tein Jesús kiluij Pedro? Uelis kinextiskej ke kitasojtaj Jehová uan Jesús komo kixelouaj tiempo para kinyolchikauaskej tokniuan uan kitemouaj kinpaleuiskej akin amo monechikouajok nion tanojnotsaj (Ezeq. 34:​11, 12). w23.01 29 § 10, 11

Maj amo tiknemilikan ke amo akin techajsikamati, porin nejon ueliskia kichiuas maj tiknemilikan ke amo keman uelis timokixtiliskej tein amo kuali tein tiknejnekij tikchiuaskej. Biblia kijtoua nejin: “Keman namechyoltilanas teisa para ximotajtakolmakakan, yejua namechpaleuis xitaxikokan”. Yejua ika, maski semi tiknekiskej tikchiuaskej teisa tein amo kuali, uelis tikixnamikiskej uan amo tikauaskej Jehová. Yejuatsin techpaleuis maj amo tikchiuakan tein amo kuali. Maj tikelnamikikan ke kemej titajtakouanij amo nochipa uelis timokixtiliskej tein amo kuali tein tiknejnekij. Keman techpanos nejon, moneki maj tikixtopeuakan, ijkon kemej kichiuak José keman kicholuij inamik Potifar (Gén. 39:12). Nejin techmachtia ke uelis tikixtopeuaskej tein amo kuali uan amo tikchiuaskej. w23.01 12, 13 § 16, 17

Okse taman tein kualtsin tein kinextia Jehová yejua ke kichiua nochi tein kuali yetok (Deut. 32:4). Keman aksa kichiua nochi tein kuali yetok amo techichikotasojta, uan Jehová amo techichikotasojta (Hech. 10:​34, 35). Keman Jehová kichiuak maj Biblia moijkuilouani itech tajtolmej tein ijkuak miakej tajtouayaj, kinextij amo techichikotasojtaya. Jehová kijtoj itech tonalmej keman ejkoskia tamilis ‘momiakiliskia tein yekmelauj taixmatilis’, tein kijtosneki ke miakej kiajsikamatiskiaj tein kijtoua Biblia (Dan. 12:4). Se taman tein kinpaleuiani miakej maj kiajsikamatikan, yejua porin Biblia uan okseki amaixmej motajtolkepanij, moamakixtianij uan momoyauanij. Ixolal Jehová kitajtolkepani Biblia ajsitok oso sayoj seki amatajkuilolmej itech panoua 240 tataman tajtolmej, nochin uelis kipiaskej se uan amo moneki kiixtauaskej. ¿Keniuj tapaleuiani nejin? Tel miak millones akin nemij itech tataman xolalmej momachtijtokej “kuali tanauatilmej tein ika tajtoua iTaixyekanalis Dios” achto ke tatamis (Mat. 24:14). Jehová kichiua nochi tein kuali yetok, uan kineki maj okachi miakej kiixmatikan keman kiixtajtoltiaj iTajtol. ¿Keyej? Porin semi techtasojta. w23.02 5 § 11, 12

Tejuatsin xa tikonchiua tein Dios kijtoua ke kuali yetok. Sayoj ke kemej titajtakolejkej, komo amo timoyekpiaj uelis tikitaskej tein kuali uan tein amo kuali kemej kiitaj akin amo kiueyichiuaj Jiova (Is. 5:20). Keman Jesús nemia nikan taltikpak, tayekananij itech taneltokalis kinemiliayaj ke amo keman mopolouayaj uan ke semi yolkualmej katkaj. Sayoj ke Jesús senkis kiniluij ke amo kuali tein kichiujtoyaj porin yejuan kiixtaliayaj toni monekia kichiuaskej oksekin uan toni amo, uan kinchikaujkauiayaj maj kichiuakan (Ecl. 7:16; Luc. 16:15). Axkan sekin no ijkon kichiuaj, porin kinemiliaj ke amo kichiujtokej tein amo kuali. No kinemiliaj ke okachi ueyichiuanimej ke oksekin uan taijijtouaj. Tein kichiuaj nion tepitsin kiyolpaktia Jiova porin amo kichiujtokej tein kuali ijkon kemej yejuatsin kineki. Se kichiuas tein kuali kijtosneki se kichiuas teisa kemej Jiova kineki. Uan nejin se taman tein semi kualtsin. Keman Biblia ika tajtoua “tein kuali yetok”, kijtosneki se kichiuas teisa kemej Jiova kiixtalijtok. w22.08 27 § 3-5

Jesús takuaujtamatik iniuan itatitaniluan maski mopolouayaj (Juan 15:16). Keman Santiago uan Juan kitajtanijkej uejueyi tekimej keman taixyekanaskia, Jesús amo kinemilij ke kitekitiliayaj Jehová porin kinekiaj kiseliskej teisa nion kiniluij ke amo yeskiajok itatitaniluan (Mar. 10:​35-40). Uan youak keman Jesús kikitskijkej nochin kikaujteujkej (Mat. 26:56). Maski ijkon, Jesús kisentokak takuaujtamatik iniuan. Maski kimatia ke mopolouayaj “kisentokak kintasojtak hasta keman momikilij” (Juan 13:1). Uan satepan ke oksepa nemik, kiniluij 11 itatitaniluan akin amo keman kikaujkaj maj kiixyekananij tekit keman kinpaleuiskiaj oksekin maj kitojtokakan uan maj kinyekpianij iichkauan (Mat. 28:​19, 20; Juan 21:​15-17). Uan kuali tein kichiuak Jesús porin nochin itatitaniluan kisentokakej kitekitilijkej Jehová hasta keman momikilijkej. Kemej tikitakejya, Jesús takuaujtamatkej iniuan oksekin maski tajtakolejkej katkaj. Tein kichiujkej techpaleuia maj no ijkon tikchiuakan. w22.09 6 § 12

Satanás amo uelis techmojmoujtis komo senkis tikneltokaj ke Jiova techtasojta uan techpaleuia. Kemej neskayot, akin kijkuiloj Salmo 118 kipanok seki taman tein semi kitekipachouaya. Miakej kitauelitayaj, uan sekin katkaj ueyichiuanimej (versículo 9 uan 10). Kemansa kitajyouiltijkej (versículo 13). Uan no, Jiova kitakakiltij (versículo 18). Maski ijkon, kijtoj itech inekuikatil: “Amo nimouis”. Maski Jiova kitakakiltijka yejua amo mouia porin kimatia ke yejuatsin kitasojtaya. Nejin salmista kimatia ke Jiova nochipa kipaleuiskia (Sal. 118:29). Moneki tikneltokaskej ke Jiova techtasojta tisejsemej. Nejon techpaleuis maj amo tikmouilikanok nejin eyi taman: 1) keniuj tikinixpanoltiskej tochankauan, 2) keman se kinmouilia oksekin uan 3) keman tikmouiliaj timomikiliskej. w22.06 15 § 3, 4

Tejuan moneki tiktayekanaltiskej tikueyichiuaskej Jehová. Kemej Jehová techchijchiuak kinamiki maj tikueyichiuakan (Apoc. 4:11; 14:​6, 7). Yejua ika, moneki tiktayekanaltiskej tikueyichiuaskej kemej yejuatsin kineki. Nejin kijtosneki ke tikueyichiuaj porin ‘techixyekana ika ichikaualis uan porin tikixmatij tein melauakʼ (Juan 4:​23, 24). Tiknekij maj ichikaualis Dios techpaleui maj tikueyichiuakan ijkon kemej kijtoua Biblia. Moneki tiktayekanaltiskej tiktekitiliskej maski tinemiskej kampa tekiuanij amo techkauaj maj titaueyichiuakan. Itech nejin tonalmej panoua 100 tokniuan tsaktokej sayoj porin kitekitiliaj Jehová. Maski ijkon, yolpakij porin mochikauaj motataujtiskej, momachtiskej uan kiteixmatiltiskej Jehová uan iTaixyekanalis. Keman techijijtouaj oso techtajyouiltiaj, tiyolpakij porin Jehová techpaleuia maj titaxikokan uan porin tikmatij ke techtatiochiuis (1 Ped. 4:14). w22.10 9 § 13

Itech amatajkuilol Proverbios moajsi miak tayolmajxitilis tein nochipa uelis techpaleuis komo tikchiuaj. Maj tikitakan ome. Yekinika, maj tiyolpakikan ika tein tikpiaj. Proverbios 23:​4, 5 tayolmajxitia: “Amo xiktemo tikpias miak tomin. […] Porin kisas iajtapaluan kemej se águila uan patantias iluikak”. Maski ijkon, akin tominpiajya oso akin pobres kitelnejnekij kitaniskej miak tomin. Nejon kichiua maj oksekin amo kuali kinitakanok, maj amo kuali mouikakanok iniuan oksekin uan hasta maj kokolispeuakan (Prov. 28:20; 1 Tim. 6:​9, 10). Ojpatika, maj achto tiknemilikan tein tikijtoskej. Komo amo tikchiuaj, xa tikijtoskej teisa tein uelis kiyolkokos aksa. Proverbios 12:18 kijtoua: “Tajtol tein amo se kinemilia tamati kemej ijkuak tetsoponiaj ika se espada, sayoj ke inintajtoluan tamatinij tepajtia”. Komo amo tikintenkuitinemij oksekin, uelis kuali timouikaskej iniuan oksekin (Prov. 20:19). w22.10 21 § 14; 22 § 16, 17

Ezequiel monekia kuali kiajsikamatis tein yaya kitematiltiti. Monekia kineltokas tein Jehová kiluij porin nejon kichiuaskia maj kinekini kiteixmatiltis. Ompa, Ezequiel kiyekoj ke nejon amatatetekuinol “katka tsopek kemej nekti” (Ezeq. 3:3). ¿Keyej? Porin yejua kiitaya ke katka se tatiochiualis yeski itanauatijkauj Jehová, katka kemej se teisa tein tsopek oso kualtsin (Sal. 19:​8-11). Semi motasojkamatia porin Jehová kiixpejpenka maj kichiua nejon tekit. Satepan Jehová kiluij Ezequiel: “Xikaki uan kuali xikseli nochi tein nimitsiluia” (Ezeq. 3:10). Jehová kiluijtoya maj mochikauani kielnamikis nochi tein ijkuiliujtoya itech amatatetekuinol uan maj itech tanemiliani. Nejon kipaleuiskia maj okachi takuaujtamati uan maj okachi kiajsikamati tein monekia kitematiltis (Ezeq. 3:11). Keman Ezequiel kuali kiajsikamatik uan kineltokak tein Jehová kiluij, ueliskiaya tanojnotsas uan matamis nejon tekit. w22.11 6 § 12-14

¿Toni uelis tikonchiuas para amo tikonkauas Jehová komo teisa mopata itech inechikol? Keman israelitas yajtinemiaj taluakyan, levitas akin katkaj ichankauan Cohat kipiayaj se kualtsin tekit. Keman israelitas monekia yaskej okseko, seki cohatitas kiuikayaj ininixpan nochin israelitas kaxon tein kiixnextia tein Dios motenkauak (Núm. 3:​29, 31; 10:33; Jos. 3:​2-4). ¡Se kualtsin tatiochiualis! Sayoj ke, keman israelitas ajsikej itech Tal tein Dios motenkaujka kinmakas, amo monekiaok kioliniskej nejon kaxon. Yejua ika seki cohatitas kiitayaj okseki taman (1 Crón. 6:​31-33; 26:​1, 24). Biblia amo kijtoua ke cohatitas amo kiuelitayaj tekit tein kipiayaj, oso ke tajtaniaj maj kinmakakan okachi kuali tekimej porin achto kipiayaj uejueyi tekimej. ¿Toni techmachtia nejin? Ke moneki senkis titapaleuiskej keman mopatas teisa itech inechikol Jehová, maski mopatas tekit tein tikchiuayaj. Maj tiyolpakikan ika tein yeski tekit tein axkan tikpiaj. Maj tikelnamikikan ke Jehová techpatiuita maski amo tikpiaskej uejueyi tekimej itech inechikol. Yejuatsin kiita ke okachi kipia ipatiuj maj tiktakamatikan. w22.11 23 § 10, 11

Onesíforo kitemoj tatitanil Pablo uan keman kiajsik kipaleuij maski ueliskia kimiktiskej. ¿Toni techmachtia nejin? Ke maski timouiskej maj amo tikauakan maj nejon kichiua maj amo tikinpaleuikan tokniuan akin kintajyouiltiaj, ta maj timochikauakan tikinpaleuiskej (Prov. 17:17). Moneki tikinnextiliskej ke tikintasojtaj uan ke tikinpaleuiaj. Itech xiontanemili tein kichiuaj tokniuan akin nemij Rusia keman okseki tokniuan kintsakuaj. Keman moneki yaskej ininixpan tamelauanij, miakej tokniuan youij para kinpaleuiskej. ¿Toni techmachtia nejin? Keman kintakajkayauiliskej, kintsakuaskej oso kintajyouiltiskej tokniuan akin techixyekanaj, maj amo timomoujtikan, ta maj ininka timotataujtikan, maj tikinyekpiakan ininchankauan uan maj tiktemokan okseki taman kemej uelis tikinpaleuiskej (Hech. 12:5; 2 Cor. 1:​10, 11). w22.11 17 § 11, 12

Jehová kinnauatia tayekananij maj kinyekpiakan uan maj kinyolchikauakan ika Biblia tokniuan akin tajyouijtokej (1 Ped. 5:2). Keman mochiua se tetsauit, yekinika moneki kiitaskej maj sejse tokniuj kuali yeto, maj kipia toni kikuas, toni motalilis uan kani mokauas. Sayoj ke xa monekis maj miak metsti kisentokakan kinpaleuikan uan maj kiyolchikauakan ika Biblia (Juan 21:15). Harold, semej akin taixyekana itech se kali Betel uan tajtouani iniuan tokniuan akin tajyouianij porin mochiuak se tetsauit, kijtoua: “Amo ueli niman kielkauaj tein mochiuak. Tokniuan xa mochikauaskej nemiskej kemej achto, sayoj ke komo momikilij aksa akin kitasojtayaj, kipolojkej teisa tein kipatiuitayaj oso yaya momikilitij, ipa oksepa kielnamikiskej. Keman kielnamikij tein kinpanok, uelis oksepa motayokoltiskej. Nejin amo kijtosneki ke amo takuaujtamatijok, ta ipa ijkon se momachilia”. Semi moneki maj tayekananij kichiuakan tein kijtoua nejin texto: “Xichokakan iniuan akin chokaj” (Rom. 12:15). w22.12 22 § 1; 24, 25 § 10, 11

Jehová semi yolkuali uan techmaka ichikaualis tein techpaleuia maj tiksentokakan tikchiuakan tein kuali. Keman timomachtiaj iTajtol tikauaj maj ichikaualis techpaleui. Jehová no techmaka ichikaualis keman tiouij nechikolmej. Ompa ueli tietokej iniuan tokniuan akin no kitemouaj kichiuaskej tein kuali uan nejon techyolchikaua (Heb. 10:​24, 25; 13:7). Uan keman tiktataujtiaj Jehová ika nochi toyolo maj techpaleui maj amo tikchiuakanok se taman tein amo kuali, yejuatsin techmaka ichikaualis uan techpaleuia maj amo tikchiuakan. Maski nochi nejin amo kichiuas maj amo tiknemilikanok tein amo kuali, kemaj techpaleuis maj amo tikchiuakan. Keman peuasya tikchiuaskej tein techpaleuis maj kuali timouikakan iuan Jehová, moneki maj ijkon tiksentokakan tikchiujtokan uan maj tiknemilikan tein kuali. w23.01 11 § 13, 14

Maski Biblia amo ika tajtoua keniuj timopajtiskej nion kijtoua toni moneki tikuaskej, kemaj techiluia tein Jehová kinemilia ika nejin taman. Ompa techyolmajxitia: “Xikixtopeua nochi tein uelis mitsijtakos” (Ecl. 11:10). Biblia kijtoua ke amo moneki titeltakuaskej oso titeltayiskej tein teuintij. Nejin uelis techkokolispeualtis oso hasta ika timomikiliskej (Prov. 23:20). Yejua ika, keman tikixpejpenaskej tein tikuaskej oso titayiskej uan ox miak oso amo, Jehová kineki maj amo timotelpanoltikan (1 Cor. 9:25). Komo tiknekij tikixpejpenaskej teisa tein kinextis ke tiktasojkamatij maj Jehová techmaka tonemilis, moneki kuali tikuiskej totanemilil (Sal. 119:​99, 100; Prov. 2:11). Se taman kemej tikchiuaj yejua keman achto kuali tiknemiliaj toni tikuaskej. Komo tikueliliaj teisa tein tikmatij ke techijtakoua, okachi kuali maj amo tikuakan. No tiknextiaj ke titamattokej keman kuali tikochij, tikchiuaj ejercicio, timochipauaj uan timotachipauiaj kalijtik. w23.02 21 § 6, 7

¿Keniuj uelis tikajsiskej nejon tamachtilismej tein kipia Biblia? Maj timomachtikan tein kijtoua 2 Timoteo 3:​16, 17. Ompa kijtoua ke “nochi tein ijkuiliujtok itech Tajkuilolamatsin […] tapaleuia” itech naui taman: titamachtiskej, technextilia tein amo kuali yetok, tikyektaliskej nochi uan titatakamatiskej. Hasta amatajkuilolmej tein kipia Biblia tein amo semi ika titajtouaj no techpaleuiaj. Maj kuali timomachtikan tein tikixtajtoltiaj para tikitaskej toni techmachtia de Jehová, tein kiixtalijtok kichiuas oso tein techyolmajxitia. Uan, ¿keniuj uelis technextilis tein amo kuali yetok keman titaixtajtoltiskej? Maj tiktemokan tein techpaleuis maj tikmatikan uan maj tikixtopeuakan tein amo kuali tein xa tikchiuajok uan tein techpaleuis maj amo keman tikauakan Jehová. Maj tikitakan keniuj se versículo uelis techpaleuis para tikyektaliskej se taman tein amo kuali yetok tein xa techiluijkej itech tanojnotsalis. ¿Toni moneki tikchiuaskej para maj tein tikixtajtoltiaj techpaleui maj titatakamatikan? Maj tiktemokan nochi tein techpaleuis maj titanemilikan kemej Jehová. Komo tikchiuaj nejin naui taman tikajsiskej tamachtilismej tein okachi techpaleuis keman tikixtajtoltiskej Biblia. w23.02 11 § 11

Okse taman tein moijtojka itech amatajkuilol Daniel, kinextia ke yeskia satepan ke panoskia chikome xiuit, ¿keniuj uelis tikmatiskej kemanian panok nejon? (Dan. 4:​10-17). “Chikome xiuit” kiixnextia 2,520 xiujmej. Nejin xiujmej peujkej mopouaj itech xiuit 607 achto ke ualaskia Cristo, keman babilonios kiajchiujkej tekiuaj akin Jiova kikaujka maj kemej yeskia motali itech itrono ompa Jerusalén. Nejin xiujmej tankej itech xiuit 1914, keman Jiova kichiuak maj Jesús peua taixyekana itech iTekiuajyo, porin yejua “akin senkis kinamiki” taixyekanas (Ezeq. 21:​25-27). ¿Keniuj techpaleuia nejin tein achtook moijtojka? Keman tikajsikamatij tein kijtosneki “chikome xiuit” techpaleuia maj titakuaujtamatikan ke Jiova kichiua tein motenkaua keman moneki. Jiova kiixtalijkaya kemanian peuaskia tekiuajtiskia Jesús, uan ijkon kichiuak keman ajsik nejon tonal. No ijkon, Jiova kichiuas tein motenkauak itech tonal tein kiixtalijtok, nejin kinextia ke itonal Jiova “amo motajkajtilis” (Hab. 2:3). w22.07 3 § 3-5