Febrero

Keman tekiuaj Ezequías semi mokokouaya, kitataujtij Jehová maj kipajti uan yejuatsin kipajtij (2 Rey. 20:​1-6). Sayoj ke keman tatitanil Pablo kitataujtij Jehová maj kikixtiliani teisa tein katka ‘kemej se uitsti itech inakayo’, yejuatsin amo kikixtilij (2 Cor. 12:​7-9). Tekiuaj Herodes kinekia kinmiktis tatitanilmej Santiago uan Pedro. Santiago, ipa kimiktijkej, uan Jehová kimakixtij Pedro ika se milagro (Hech. 12:​1-11). Xa timotajtaniskej keyej Jehová kimakixtij Pedro uan Santiago amo. Maski Biblia amo kijtoua keyej, tikmatij ke Jehová nochipa “kichiua tein kuali” uan ke yejuatsin kintasojtaya nochin omen (Deut. 32:4). Xa kemansa Jehová amo technankilia kemej tiknekiskiaj. Sayoj ke kemej tikmatij ke yejuatsin nochipa tetasojta uan kichiua tein kuali yetok keman technankilia, amo tikijtouaj ke amo tikuelitakej kemej technankilij (Job 33:13). w23.11 21 § 6

Santiago, semej akin kijkuiloj Biblia kijtoj ke akin tamattok “niman tatakamati”. ¿Toni kijtosneki nejon? Ke moneki maj tikintakamatikan akin Jehová kinkaujtok maj taixyekanakan uan maj tiknejnekikan tikchiuaskej. Sayoj ke Jehová amo kineki maj tiktakamatikan aksa akin techiluia maj amo tikchiuakan tein yejuatsin technauatia (Hech. 4:​18-20). Kemej Jehová amo mopoloua uan tein technauatia techpaleuia, okachi amo ouij techkisa tiktakamatiskej yejuatsin ke tein technauatiaj oksekin (Sal. 19:7). Jehová amo kemej akin taixyekanaj nikan taltikpak porin yejuan tajtakolejkej. Maski ijkon, yejuatsin kinkauani maj techixyekanakan totatuan, tekiuanij uan tayekananij (Prov. 6:20; 1 Tes. 5:12; 1 Ped. 2:​13, 14). Tein melauj, keman tikintakamatij yejuan, tiktakamattokej Jehová. w23.10 6 § 2, 3

Se taman kemej uelis okachi titakuaujtamatiskej yejua komo itech titanemiliaj ichikaualis Jehová. Yejuatsin ueli kichiua nochi tein motenkaua. Porin Jehová kipia nochi chikaualis (Job 42:2; Mar. 10:27; Efes. 3:20). Kiniluij Abrahán uan Sara ke kipiaskiaj se konetsin maski xiuejkejya katkaj (Gén. 17:​15-17). No kiluij Abrahán ke kinmakaskia ikoneuan tal tein pouia Canaán. Sayoj ke miak tiempo, ikoneuan Abrahán oso israelitas katkaj takeualmej ompa Egipto, yejua ika xa kinemilijkej ke tein Dios motenkaujka amo keman mochiuaskia. Jehová kiluij se ichpoch akin monotsaya María, ke kipiaskia iKonetsin, ijkon mochiuaskia tein miak xiujmej achto Jehová motenkaujka itech xochital Edén (Gén. 3:15). Keman itech titanemiliaj nochi tein Jehová motenkauak uan keniuj kichiuak, tikitaj ke tel chikauak. Nejin kichiua maj okachi titakuaujtamatikan ke yejuatsin kichiuas xochital (Jos. 23:14; Is. 55:​10, 11). w23.04 28 § 10-12

Jehová kinankilij inetataujtiluan uan kimakixtij (1 Sam. 19:​10, 18-20; 2 Sam. 5:​17-25). Uan tejuan no uelis tikneltokaskej nejon (Sal. 145:18). Xa Jehová amo kinankilis tonetataujtiluan kemej tiknekiskiaj. Pablo kijtoj ke ‘kemej yeskia kipiaya se uitsti itech inakayo’, katka se ueyi ouijkayot. Uan expa kitajtanij Dios maj kikixtili. ¿Kinankilij Jehová tein kitajtanij? Kemaj, sayoj ke amo kemej Pablo kinekia. Maski Jehová amo kiajchiuilij ouijkayot, kemaj kipaleuij maj taxiko uan maj kisentoka kitekitili (2 Cor. 12:​7-10). Kemansa Jehová xa no technankilis kemej amo tikchiaj. Sayoj ke uelis tikneltokaskej ke yejuatsin kuali kimati toni okachi techpaleuis, uan hasta “ueli kichiua okachi miak ke nochi tein tiktajtaniaj oso tiknemiliaj” (Efes. 3:20). Yejua ika, ueli technankilia keman amo tikmattokej oso keman amo tikchiaj. w23.05 8, 9 § 4-6

Kemansa semi kuali maj itech titanemilikan tein panos keman oksepa nemiskej akin momikilijkejya. ¿Keyej? Porin amo tikmatij kemanian uelis tikokolispeuaskej oso tikokoxkakuiskej, oso ijsiujka momikilis se akin tiktasojtaj (Ecl. 9:11; Sant. 4:​13, 14). Keman tikmatij ke oksepa nemiskej akin momikilijkejya, techpaleuia maj titaxikokan (1 Tes. 4:13). Biblia techiluia ke toTajtsin kuali techixmati uan semi techtasojta (Luc. 12:7). Kemej kuali techixmati, kichiuas maj oksepa tinemikan kemej achto titamatiaj uan maj nochi tikelnamikikan. Uan kemej semi techtasojta kichiuas maj tinemikan nochipaya uan maski timomikiliskej, oksepa tinemiskej. ¿Keyej uelis tikneltokaskej ke oksepa nemiskej akin momikilijkejya? Porin moneki titakuaujtamatiskej ke akin motenkaua kinejneki kichiuas uan ueli kichiua. w23.04 8, 9 § 2-4

José uan María mosenpaleuijkej para nochipa kuali mouikaskej iuan Jehová. Yejuan kimatiaj ke semi monekia kisenueyichiuaskej iniuan ininkoneuan (Luc. 2:​22-24; 4:16).¡Nejin semi kinmachtia akin monamiktijkejya! Komo no nankinpiaj konemej, xa ouij namechkisa nanyaskej nechikolmej uan nankixeloskej tiempo para nankiueyichiuaskej Jehová iniuan namochankauan. Uan para namosenmachtiskej uan namosentataujtiskej sayoj nanomen xa okachi ouij yeski. Sayoj ke xikelnamikikan ke komo nankisenueyichiuaj Jehová, okachi kuali iuan namouikaskej uan namejuan nanomen no. Yejua ika nochipa xiktemokan nankiueyichiuaskej Jehová. Komo nankipiaj kuejmolmej, xa amo nankinekiskej nantaueyichiuaskej kemej kalyetonij. Komo ijkon, peua ximomachtikan teisa tein amo ouij uan tein nankiuelitaskej. Nejin yejua yekinika taman tein namechpaleuis okachi ximotasojtakan uan xiknekikan nankisenueyichiuaskej Jehová. w23.05 22 § 7, 8

¿Keniuj kipaleuij nejin? Amo takajkayauaya uan itech takuaujtamatiaj. Yejua ika, tekiuaj kiixtalij maj taixyekana ichan (no xikonita Nehemías 7:2). No semi yolchikauak katka porin kimojkatokaya Dios, se taman tein satepan monekik kinextis. ¿Keyej? Porin nemik keman taixyekantoya Acab, se takat akin tel amo yolkuali katka (1 Rey. 16:30). Uan no, Acab monamiktijka iuan Jezabel, akin kiueyichiuaya Baal uan semi kitauelitaya Jehová, hasta kintsakuilisnekia majtakti uejueyi kalyetonij maj amo kiueyichiuanijok yejuatsin. Uan no kinmiktij miakej itanauatijkauan Dios (1 Rey. 18:4). Keman Jezabel kintemojtinemia itanauatijkauan Jehová para kinmiktis, Abdías kincholtij itech tepekoyokmej 100 tanauatianij, uan kintalij sijcincuenta uan kinmakaya toni tayiskej uan toni kikuaskej (1 Rey. 18:​13, 14). Komo Jezabel kimatiskia nejon, kimiktiskia nejin takat akin semi yolchikauak katka. Uan tikajsikamatij ke Abdías mouia maj kimiktikan. Sayoj ke yejua okachi kitasojtaya Jehová uan itekitikauan ke inemilis. w23.06 16 § 9, 10

Axkan Jehová kisentoka kiixyekana ixolal ijkon kemej kichiuak ne uejkauj uan kichiua ika iTajtol uan iKonetsin akin taixyekana itech nechikol. ¿Ueli tikitaj ke Jehová kisentoka kinixtalia takamej para maj techixyekanakan? Kemaj, maj tiknemilikan tein panok satepan den xiuit 1870. Charles Russell uan itasojikniuan kiajsikamatkej ke itech xiuit 1914, iTaixyekanalis Dios peuaskia taixyekanaskia ijkon kemej Biblia kijtojka ke mochiuaskia (Dan. 4:​25, 26). ¿Keniuj kimatkej nejin? Momachtijkej tein Biblia kijtojka ke panoskia. Uan Jehová kinpaleuij maj kiajsikamatikan tein momachtiayaj. Tein panok itech nochi taltikpak itech xiuit 1914, kinextij ke iTaixyekanalis Dios peujkaya taixyekana: peuak yekinika Ueyi neteuilis itech nochi taltikpak uan peuak mochiuaj tetsaujkakokolismej, miakkan talolinia uan mayanmikiaj (Luc. 21:​10, 11). Moyekitak ke Jehová kinkuitoya nejon takamej akin yolkualmej para kipaleuis ixolal. w24.02 22 § 11

Akin tiktekitiliaj Jehová tikmatij ke yejuatsin techtasojta uan kineki maj kuali tietokan (Rom. 8:​35-39). No tikmatij ke komo tiktakamatij tein kijtoua Biblia, nochipa techpaleuis (Is. 48:​17, 18). Sayoj ke, ¿toni uelis tikchiuaskej komo techpanoua teisa tein amo tikchiayaj? Xa semej tochankauan techiluia oso techchiuilia teisa tein ika techyolkokoua. Xa timokokouaj uan nejon kichiua maj amo semi tiktekitilikan Jehová. Xa titajyouijtokej porin mochiuak se tetsauit kampa tinemij. Oso xa techtajyouiltiaj porin tiktekitiliaj Jehová. Keman tikpiaj nejin ouijkayomej, xa timotajtaniaj: “¿Keyej nechpanotok nejin? ¿Nikchiuak teisa tein amo kuali? ¿Kijtosneki ke Jehová amo nechtatiochiuijtok?”. Komo ijkon tionmomachiliani, amo xionmosenkaua. Miakej itekitikauan Jehová akin amo keman kikauanij no ijkon kinpanouani (Sal. 22:​1, 2; Hab. 1:​2, 3). w23.04 14 § 1, 2

Komo tein tiknemiliaj oso tein tikchiuaj ika uelis timotajtakolmakaskej, niman tikixtopeuaj para uelis tiksentokaskej kuali timouikaskej iuan Dios. Jehová kineki maj ‘tiktakamatikan ika nochi toyolo’ (Rom. 6:17). Tejuan amo ueli tikixpejpenaj katiyejua tanauatil tiknekij tiktakamatiskej, sayoj ke moneki tikelnamikiskej ke tein technauatia nochipa techpaleuia (Is. 48:​17, 18; 1 Cor. 6:​9, 10). Satanás kichiua maj techchikaujkauikan uan maj techtajyouiltikan para amo tiktakamatiskej Jehová, yejua kemej yeskia kineki techkuas, kijtosneki ke kineki maj amo kuali timouikakanok iuan Jehová (1 Ped. 5:8). Tokniuan itech yekinika siglo, kinmojmoujtijkej, kinmagakej, uan kinmiktijkej porin kiixtalijkajya kitakamatiskej Jehová (Hech. 5:​27, 28, 40; 7:​54-60). Uan axkan, Satanás no kichiua maj techtajyouiltikan. Uan nejin ueli tikitaj porin ompa Rusia uan itech okseki altepemej semi kintajyouiltianij tokniuan. Uan okseki tokniuan tataman kemej kinixnamikij. Satanás amo sayoj techtajyouiltia, ta no kitemoua ‘keniuj techuetsiltis’ (Efes. 6:11). w23.07 15, 16 § 6-9

Keman peuak tionmomachtia iTajtol Dios, okachi tikontasojtak Jehová. Nejon mitsonpaleuij xikonchiua tein tionmomachtiaya. Peuak kuali tikonixpejpena toni tikonchiuas porin tikonkauak maj Biblia mitsonyolmajxiti. Kemej tikonnekia tikonyolpaktis Dios peuak tiontanemilia kemej yejuatsin uan tikonchiua tein kuali. Ijkon kemej se konetsin kichiua kemej ipopaj, tejuatsin no peuak tikonchiua kemej toTajtsin (Efes. 5:​1, 2). Maj timotajtanikan: “¿Okachi niktasojta Jehová axkan ke keman nimoauij? ¿Niknextia ke nitanemilia uan nikchiua kemej Jehová okachiok keman moneki nikintasojtas tokniuan?”. Komo amo semi titetasojtajok maj amo timosenkauakan. Tokniuan itech yekinika siglo no ijkon kinpanok. Sayoj ke Jesús amo kinemilij ke amo ueliskiajok mopataskej, uan tejuan no ijkon techita (Apoc. 2:​4, 7). Kimattok ke uelis oksepa titetasojtaskej kemej keman peuak timomachtiaj. w23.07 8 § 2, 3

Tatitanil Pedro kichiuak seki taman tein kiuikak maj tajtako. Yekinika, Pedro kinemiliaya ke amo mopoloskia, uan ke amo kikauaskia Jesús maski okseki tatitanilmej kikauaskiaj (Mar. 14:​27-29). Satepan, miakpa kochik (Mar. 14:​32, 37-41). Uan keman kikitskijkej Jesús, Pedro kikaujteuak (Mar. 14:50). Satepan, expa kiyekijtoj ke amo kiixmatia (Mar. 14:​66-71). ¿Keniuj momachilij Pedro keman kiitak ke tajtakolchiujka? Motelyolkokoj uan peuak tayokolchoka (Mar. 14:72). Jesús amo kielnamiktij Pedro tein kichiujka, ta kiluij ke kiseliskia okseki uejueyi tekimej (Juan 21:​15-17). Maski Pedro kimatia ke tajtakolchiujka, amo mosenkauak. ¿Toni techmachtia? Jehová kineki maj tikmatikan ke techtasojta uan techtapojpoluia (Rom. 8:​38, 39). w24.03 18, 19 § 13-15

Akin nochipa auilnemij xa pinauaj, kimachiliaj ke amo akin kinpatiuita, kinpiaj konemej maski amo kinekij oso kichiuaj maj amo senyetokanok kemej kalyetonij. Kemej tikitaj, okachi kuali maj se kiixtopeua “siuat akin amo tanemilia” keman teyoleua. Miakej akin peuaj auilnemij amo sayoj amo mouikajok iuan Jehová, ta no kokolispeuaj uan momikiliaj (Prov. 7:23). Itamian Proverbios 9:18 kijtoua nejin: “Akin kinyoleuak yetokej uejkatan itech Miketekoch”. Uan komo kinpanoua tein amo kuali, ¿keyej tel miakej kiseliaj keman kinyoleua? (Prov. 9:​13-18). Axkan kampa yeski nesi auilnemilis yejua ika moneki timoyekpiaskej. Sekin kinemiliaj ke akin kiita amo kiijtakoua, sayoj ke nejon amo melauak. Akin kiita auilnemilis semi moijtakoua, amo mopoujkaitaok uan amo kinpoujkaita oksekin uan kineki nochipa kiitstos. Akin kiita taixkopimej kampa nesi auilnemilis, amo ueli ijsiujka kielkaua. Uan no, akin kiita auilnemilis amo kipaleuia maj kikaua tein amo kuali tein kinejneki, ta okachi kinejneki auilnemis (Col. 3:5; Sant. 1:​14, 15). Uan miakej akin kiitaj nejon no auilnemij. w23.06 23 § 10, 11

Maski kemansa xa oksekin xolalmej kiixnamikiskej amo uelis kiixpataskej. Uan tikmatij nejin porin Daniel achto kijtojka ke “tet” oso iTaixyekanalis Dios kiixpolos imetsuan ueyi takat tamachijchiuj (Dan. 2:​34, 35, 45). ¿Tikonneltoka tein Daniel kijtoj keman kimelauak toni kijtosneki imetsuan ueyi takat tamachijchiuj? Komo ijkon, nesis ika tein tikonchiua. Amo tikontemos tikonpias miak tomin oso miak taman tein kipia ipatiuj porin tikonmati ke amo uejkaua nochi ixpoliuis (Luc. 12:​16-21; 1 Juan 2:​15-17). Uan no, komo tikonajsikamati tein achto moijtojka ke mochiuaskia, mitsonpaleuis xikonita ke motelneki xiontanojnotsa uan xiontamachti (Mat. 6:33; 28:​18-20). Axkan ke tikmatijya toni kijtosneki imetsuan ueyi takat tamachijchiuj, maj timotajtanikan: “¿Kinextia tein nikixpejpena nikchiuas ke nikneltoka ke amo uejkaua iTaixyekanalis Dios kinixpolos akin taixyekanaj nikan taltikpak?”. w23.08 11 § 13, 14

Komo tionyolyemanik tikonajsikamatis ke amo ueli tikonchiuaok tein achto tikonchiuaya porin tionxiuejya, tionmokokoua oso mitsonpanoua okseki taman. Komo tionmokokoua, xikonchiua kemej Barzilái uan xikonijto ke amo ueli tikonchiua teisa (2 Sam. 19:​35, 36). Oso kemej Moisés, xikonkaua maj mitsonpaleuikan uan komo ueli xikonilui oksekin maj kichiuakan tein tikonchiuaskia (Éx. 18:​21, 22). Komo tionyolyemanik amo tikonnekis tikonchiuas tein amo tionueli. Tejuan amo moneki timotajtakoltiskej porin oksekin kiixpejpenaj kichiuaskej tein amo kuali. Tejuan amo uelis tikixpejpenaskej tein tiknekij maj kichiuakan oksekin, nion uelis tikchiuaskej maj amo tajyouikan porin amo kuali taixpejpenkej. Xa se tekoneuj kiixtalis kikauas Jehová, uan nejon uelis semi kinyolkokos itatuan. Sayoj ke tetatmej akin motajtakoltiaj porin ininkoneuj amo kuali taixpejpenak, kemej yeskia momamaltiaj teisa tein semi etik, uan nejon se taman tein Jehová amo kineki maj kichiuakan. w23.08 29 § 11, 12

Sansón katka tajtakolej kemej tejuan, yejua ika kemansa amo kuali taixpejpenaya. Uan keman se tonal ijkon kichiuak tel amo kuali tein kipanok porin amo kichiuak tein Jehová kinauatijka. Sansón katkaya juez se tiempo keman “semi kiueuelitak se siuat akin monotsaya Dalila. Yejua nemia kampa tal tamanis tein moixmati kemej Sorec”. Achto ke kiixmatiskia Dalila, kinekia monamiktis iuan se siuat filistea. Biblia kijtoua “ke Jehová kichiujtoya maj kinekini iuan monamiktis nejon siuat. Yejua kitemojtoya keniuj kintatsakuiltis filisteos”. Satepan, Sansón yajki Gaza, itech se xolal kampa nemiaj filisteos uan mokauak ichan se siuaauilnenkej. Ijkuak Jehová kichikauak Sansón para maj kiuikani puertas tein ika tatsaktoyaj xolal uan ijkon amo ueliskiaj mopaleuiskej (Juec. 14:​1-4; 16:​1-3). Sayoj ke Dalila amo ueliskia kipaleuis maj kintani filisteos porin xa katka israelita. Filisteos kinekiaj maj Dalila kikajkayaua Sansón. Yejua ika kiluijkej ke kimakaskiaj miak plata, uan yejua kinekik. w23.09 5 § 12, 13

Komo tiyektanemiliaj uelis semi techpaleuis. Akin yektanemilia kimati keniuj motsakuilis keman kitajtaniaj toni kineltoka. Miakpa keman aksa techtajtania teisa, amo techiluia keyej techtajtania. Yejua ika, achto ke titanankiliskej moneki tikelnamikiskej ke xa amo tikmatij keyej techtajtanij (Prov. 16:23). Maj tikelnamikikan keniuj Gedeón kinnankilij takamej de Efraín. Yejuan kualantoyaj keman kitajtanijkej keyej amo kinnotsak keman kinteuito akin kintauelitayaj israelitas. ¿Keyej kualantoyaj? ¿Moyolkokojtoyaj? Maski ijkon, Gedeón yektanemilij, kiajsikamatik tein kimachiliayaj uan amo kualanik keman kinnankilij. ¿Keniuj tapaleuij? “Keman kiniluij nejin, yejuan yolseujkej” (Juec. 8:​1-3). w23.09 16 § 8, 9

Tikmatij ke nion se tetat tel kuali mouika iuan ikonetsin ijkon kemej Jehová uan Jesús tel kuali mouikaj. Tikmatij ke Jehová semi kiyolkokoj keman kiitak ke iKonetsin kitajyouiltiayaj, kiixtopeuayaj uan kichiuiliayaj tein amo kuali. Tetatmej akin momikiliani se ininkonetsin kimatij keniuj se tajyouia keman ijkon tepanoua. Maski tikneltokaj ke oksepa nemiskej akin momikilijkejya, ipa titajyouiaj keman momikilia aksa akin tiktasojtaj. Nejin techpaleuia maj tikajsikamatikan keniuj momachilij Jehová itech xiuit 33 keman kiitak ke iKonetsin tajyouij uan momikilij (Mat. 3:17). Achto ke tikelnamikiskej imikilis Cristo, ¿keyej amo tionmomachtia moselti oso iniuan mochankauan seki taman tein ika tajtoua nochi tein Jehová uan Jesús kichiujkej para techmakixtiskej? Uan amo xikonelkaua tikonitas tamachtilis tein mopanoltia kualkampa nejon tonal. Komo tikchiuaj tein moneki achto ke tikelnamikiskej imikilis Cristo, uelis titapaleuiskej para maj nejon nechikol no kinpaleui oksekin (Esd. 7:10). w24.01 11 § 10-12

Jehová uelis techchikauas komo tiktataujtiaj. Yejuatsin technankilia keman techmaka “chikaualis tein toselti amo ueli tikpiaj” (2 Cor. 4:7). No techmaka ichikaualis keman tikixtajtoltiaj Biblia uan itech titanemiliaj (Sal. 86:11). Tein yejuatsin techiluia itech iTajtol “semi chikauak” uan tein kijtoua techpaleuia (Heb. 4:12). Yeua ika komo tikontataujtia Jehová uan tikonixtajtoltia iTajtol, mitsonpaleuis xiontaxiko, xionyolpaki keman tikontekitilis oso ueli xikonchiua se tekit tein ouij. Maj tikitakan keniuj Jehová kiyolchikauak tanauatijkej Jonás. Jonás mouik yas kampa Jehová kititanka, yajki okseko itech se barco. Yejua ika, Jonás uan nochin akin yetoyaj itech barco yaya momikilitijya keman chikaujkakiouik. Keman akin kiuikayaj barco kipankajkaujkej itech ueyiat, se ueyi pescado kitoloj, Jonás yetoya iijtik ueyi pescado kampa tayouayan katka. ¿Toni kichiuak Jonás para moyolchikauas keman yetoya iselti iijtik ueyi pescado? Kitataujtij Jehová (Jon. 2:​1, 2, 7). w23.10 13 § 4-6

Maski tatitanil Pedro kinijkuilouilij tokniuan itech yekinika siglo nejin cartas, Jehová kinekik maj no moijkuilokan itech Biblia para maj techpaleui (Rom. 15:4). Miakej amo kineltokaj tein Biblia kijtoua ke mochiuas satepan. Kemej miak xiujmejya tiktematiltiaj ke amo uejkaua ixpoliuis nochi tein amo kuali, xa miakej akin techixnamikij techkejkelouaj uan hasta kijtouaj ke amo keman mochiuas tein tikchiaj (2 Ped. 3:​3, 4). Komo kampa titekitij, semej tochankauan oso keman titanojnotsaj techiluiskiaj nejon, xa amo semi titakuaujtamatiskiajok. Pedro kimelauak tein uelis techpaleuis. Xa sekin kinemiliaj ke Jehová yolikati uan amo ijsiujka kiixpoloua nochi tein amo kuali tein mochiujtok. Tein kijtoj Pedro techyolchikaua porin techelnamiktia ke Jehová amo kiita tonalmej kemej tejuan tikitaj (2 Ped. 3:​8, 9). Para Jehová mil xiujmej kemej yeskia se tonal. Uan no, yejuatsin amo yolijsiui uan amo kineki maj nion akin ixpoliui. Sayoj ke itonal Jehová ejkos uan kiixpolos nochi tein amo kuali. w23.09 26, 27 § 2-5

¿Keyej tatitanil Pablo kintajkuilouilij tokniuan hebreos akin nemiaj Judea? Yekinika para kinyolchikauas. Achto miakej kitojtokayaj inintaneltokalis judíos uan satepan mochiujkej imomachtijkauan Jesús, yejua ika xa akin taixyekanayaj itech taneltokalis kinkejkelouayaj. ¿Keyej? Porin imomachtijkauan Cristo amo kipiayaj se templo kampa kiueyichiuaskiaj Dios ijkon kemej judíos, nion se altar kampa kinchichinoskiaj tapialmej uan amo no kinpiayaj tiopixkamej. Nejin xa kichiuak maj amo kuali momachilikanok imomachtijkauan Cristo uan maj amo semi takuaujtamatikanok (Heb. 3:​12, 14). Sekin xa hasta kinemiliayaj oksepa kitojtokaskej inintaneltokalis judíos. Ojpatika, Pablo kiniluij tokniuan hebreos ke amo mochikaujtoyaj kiajsikamatiskej tamachtilis tein okachi yankuik oso tein okachi ouij tein kemej yeskia “tapalol” tein moajsi itech iTajtol Dios (Heb. 5:​11-14). Sekin kichiuayajok tein iTanauatil Moisés kijtouaya. w23.10 24, 25 § 3, 4

Sekin xa kiixpejpenaj amo monamiktiskej (Mat. 19:​10-12). Komo amo tikpia motakatsin amo xiknemili ke Jehová uan Jesús amo semi mitspatiuitaj. Itech nochi taltikpak, tokniuan siuamej akin ininselti semi tapaleuiaj itech nechikol. Kemej semi kintasojtaj uan ininka motekipachouaj oksekin, tokniuan kinitaj kemej ininikniuan uan kemej ininnan (Mar. 10:​29, 30). Sekin kiixtalianij kitekitiliskej Jehová miak tonalmej. Itech nochi taltikpak yejuan tokniuan siuamej akin okachi tanojnotsaj (Sal. 68:11). ¿Uelisya tikixtalis tiktekitilis Jehová miak tonalmej? Xa uelis timochiuas precursora, titapaleuis maj mochijchiuakan kalmej kampa titaueyichiuaj oso titapaleuis Betel. ¿Toni mitspaleuis xikchiua tein tikixtalij? Xiktataujti Jehová, xitajto iniuan akin kichiujtokejya nejon tekit, uan xitajtani toni moneki para uelis tikchiuas nejon tekit. Ompa xikijkuilo keniuj tikchiuas tein tikixtalijtok uan ijkon xikchiua. Komo tiktekitilia Jehová miak tonalmej, uelis tikchiuas miak taman tein mitsyolpaktis keman tiktekitilis yejuatsin. w23.12 22 § 16, 17

Kemej tikmatij ke amo uejkaua peuas tetsaujkatajyouilis, okachi moneki maj tiktakamatikan tanauatil tein kijtoua ke moneki tikteixmatiltiskej kuali tanauatilmej. Sayoj ke keman tikpiaj ouijkayomej porin amo tikpiaj tomin, oso tekiuanij amo techkauaj maj titanojnotsakan, xa ouij techkisas tiksentokaskej tiktekitiliskej Jehová. ¿Toni techpaleuis maj tikchiuakan tein Jehová kineki? Maj tikelnamikikan ke “Jehová, akin kinixyekana iangeluan” techpaleuijtok. Jehová techpaleuis komo tikchiuaj tein kiyolpaktia uan amo tein tejuan tiknejnekij. Yejua ika amo teyi moneki tikmouiliskej (Ageo 2:4). Jehová kineki maj tiksentokakan tikinpaleuikan oksekin maj kiixmatikan yejuatsin porin ijkon uelis momakixtiskej. Ageo kinyolchikauak judíos maj oksepa kisentokanij kiyekchijchiuanij templo. Kemej yeskia kiniluij maj oksepa kitalianij itsineualoni templo uan maj kielkauanij nochi nejon xiujmej keman amo teyi kichiujkaj. Jehová motenkauak iniuan ke komo kitakamatiaj, kintatiochiuiskia (Ageo 2:​18, 19). Tejuan no tikmatij ke Jehová techtatiochiuis komo okachi tiktekitiliaj. w23.11 16 § 8; 17 § 11

Itech carta tein kinijkuilouilij romanos, tatitanil Pablo kijtoj ke tinochin titajtakolejkej. Komo ijkon, ¿keniuj Dios ueli kiyolpaktia tein tikchiuaj uan keyej kiita ke tiyolmelaujkej? Tatitanil Pablo kinpaleuij nochin tokniuan maj kiajsikamatikan nejin keman ika tajtoj tein kichiuak Abrahán. Abrahán nemia Canaán keman Jehová kijtoj ke katka yolmelauak. ¿Keyej ijkon kijtoj? Jehová amo kijtoj ke Abrahán katka yolmelauak porin nochipa kitakamatia iTanauatil Moisés (Rom. 4:13). ¿Keniuj tikmatij? Porin israelitas kiselijkej nejin tanauatil hasta panoua 400 xiujmej satepan. Komo ijkon, ¿keyej Jehová kijtoj ke Abrahán katka yolmelauak? Porin takuaujtamatia uan yejua ika Jehová kitatiochiuiaya maski amo kinamikia (Rom. 4:​2-4). w23.12 3 § 4, 5

Nejon youak tanauatijkej Natán iuan tajtojkaya tekiuaj David, Jehová kimatiltijka David ke amo yejua kichijchiuaskia templo (1 Crón. 17:​3, 4, 11, 12). ¿Toni kichiuak David keman kikakik? Peuak kisentilia tomin uan tein monekia para maj iokichpil Salomón kichiuani nejon ueyi tekit (1 Crón. 29:​1-5). Tepitsin satepan ke Jehová kiluij David ke amo yejua kichijchiuaskia templo, motenkauak iuan ke semej ikoneuan tekiuajtiskia nochipaya (2 Sam. 7:16). Itech xochital, keman Jesús tekiuajtitos mil xiujmej, David semi yolpakis keman kimatis ke semej ichankauan tekiuajtitok. Nejin tein panok, techmachtia ke maski axkan amo ueli tiktekitiliaj Jehová kemej tiknekiskiaj, toDios uelis techtatiochiuis kemej amo tikchiaj. w23.04 16 § 8-10

Seki amatajkuilolmej tein kipia Biblia okachi mitsonyolchikauaskej keman tionmouis, kemej amatajkuilolmej Job, Salmos uan Proverbios, uan tein kijtoj Jesús itech Mateo capítulo 6. Komo tejuatsin tikontataujtia Jehová uan tikonixtajtoltia iTajtol, tikonitas keniuj mitsonyolseuia. Maj tikelnamikikan ke Jehová nochipa techpaleuis hasta keman tikpanoskej tein tel amo kuali. Amo keman techkauas toselti (Sal. 23:4). Maj tikelnamikikan ke yejua motenkauak techyekpias, amo techkauas maj kemej yeskia tiuetsikan, techpaleuis uan techyolseuis. Isaías kiluij Jehová: “Tikinyekpias akin senkis mouan takuaujtamatij, tikinpaleuis maj nochipa yolseujtokan, porin mouan takuaujtamatij” (Is. 26:3). Yejua ika xiontakuaujtamati iuan Jehová uan xikonseli tein ika mitsonpaleuia. Komo ijkon tikonchiua, uelis tiontaxikos hasta keman mitsonpanos tein tel amo kuali. w24.01 25 § 16, 17

Tajtolmej tein achto moijtojka ke mochiuaskia, mochiujtokya axkan. No mochiujtokya nejin okseki tajtolmej: “Jehová kinmachtis nochin mokoneuan, uan mokoneuan semi yolseujtoskej. Tinemis kampa nochipa mochiuas tein kuali yetok. […] Amo tikmouilis nion teyi uan amo teyi mitsmojmoujtis, porin amo timouisok” (Is. 54:​13, 14). Nion Satanás, “dios tein taixyekantok nikan taltikpak”, amo uelis kitsakuilis maj amo motamachtiok kemej kichiujtok ixolal Jehová (2 Cor. 4:4). Axkan tikueyichiuajya Jehová kemej kiyolpaktia uan nochipa ijkon tikchiuaskej. Amo teyi techchiuilis nion se tepos tein kichijchiuaskej para ika techixnamikiskej. w24.02 4 § 10

Tiitekitikauan Jehová tikitaj ke semi moneki maj tikchiuakan tein timotenkaujkej keman timotemaktijkej. Uan tiknextiaj keman tikixpejpenaj teisa uan keman tochankauan kipiaj ouijkayomej. Tikinyekpiaj tochankauan kemej Biblia kijtoua ke moneki tikchiuaskej, sayoj ke nochipa tikchiuaj tein Jehová kiyolpaktia uan amo tein tochankauan kinekij (Mat. 10:​35, 36; 1 Tim. 5:8). Kemansa xa tikchiuaskej teisa tein kiyolpaktia Jehová, sayoj ke tochankauan amo kiuelitaskej. Jehová kichiuak maj tikinpiakan tochankauan uan kineki maj tiyolpakikan iniuan (Efes. 3:​14, 15). Komo tiknekij yekmelauj tiyolpakiskej, moneki tikchiuaskej tein Jehová technauatia. Yejuatsin kiita uan kipatiuita tein tikchiuaj para tiktekitiliskej, uan no kiita keman tikinyekpiaj tochankauan, keman tikintasojtaj uan tikinpoujkaitaj (Rom. 12:10). w24.02 18 § 11, 13