¿Toni tanankiliskia Jesús?
¿Kuali yetok maj taneltokalis mosentili iuan política? Miakej tein taneltokaj ika nochi ininyolo kinemiliaj ke kemaj, kijtouaj ke amo sayoj uelis tapaleuis itech política, ta moneki kichiuas uan ijkon tapaleuis maj momelaua kuejmolmej tein kipiaj taltikpakneminij. Sayoj ke oksekin kinemiliaj ke taneltokalis amo uelis mosentilis iuan política. ¿Toni tikonnemilia tejuatsin? ¿Moneki maj sentekitikan?
MIAKEJ kiitaj Jesucristo kemej “se takat akin okachi kipoujkaitanij itech taneltokalis”. Komo kitajtaniskiaj ox kuali yetok maj taneltokalis mosentili iuan política, ¿toni tikonnemilia ke tanankiliskia? ¿Tikonmatia ke ijkuak yetoya nikan taltikpak, kinankilij nejon netajtanil? Uan no, kinextij tein kinemiliaya ika itachiualisuan. Kemej neskayot, itech tamachtilis tein kitemakak itech se tepet, kijtoj tajtolmej tein kinpaleuiskia itatojtokakauan maj kimatikan hasta kani ueliskiaj mosentiliskiaj itech tachiualismej tein mochiuaj kampa nemij. Maj tikitakan seki taman tein kijtoj.
Moneki kinpaleuiskej oksekin
Jesús kimelauak keniuj itatojtokakauan moneki kinitaskej oksekin taltikpakneminij keman kijtoj: “Namejuan [...] keme istat nikan taltikpak; [...] uan takan in istat kipoloa nichikaualis, ¿ijkuakon kenin uelis oksepa poyeyas, komo amo kipia nipoyekayot? Uan ijkon amo teyi kualtia ok. Ta, sayo kualtia para kitamotaske kalan uan kitsojtsoniksaske san. [...] Xikintanextilikan nijin taltikpakuani ika namochipaukanemilis. Uan kuak yejuan kitaske ya den namokualitachiualisuan; ijkuakon yejuan no kimouistiliske Namoueyitajtsin ten yetika ne eluiyaktsinko” (Mateo 5:13-16). ¿Keyej Jesús kijtoj ke itatojtokakauan tamatij kemej istat uan tanex?
Jesús amo kijtoj ke itatojtokakauan monekia mochiuaskej kemej istat uan tanex sayoj ininixpan seki taltikpakneminij. Ta, kiteajsikamatiltij ke monekia mochiuaskej kemej istat ininixpan nochin taltikpakneminij, uan monekia kinmakaskej nejon tanex nochin akin kinekiskiaj kiixmatiskej Dios. Nejin kiyeknextia ke Jesús amo kinekia maj itatojtokakauan moxelouanij uan maj amo mouikanij iniuan oksekin. ¿Keyej amo?
Maj titanemilikan itech nejin: istat amo ueli kipaleuia takual komo amo mosentilia iuan tapalol. Se tauil amo ueli tatanextia itech se kali kampa tayouayan komo amo ompa moajsi tauil. Yejua ika, Jesús amo keman kinnauatij itatojtokakauan maj amo mosentilianij iniuan taltikpakneminij tein okse taneltokalis kipiayaj. Ta, kemej istat moneki mosentilis iuan takual, uan tanex moneki yetos kampa tayouayan, no ijkon itatojtokakauan Jesús moneki mosentiliskej iniuan oksekin, uan ijkon uelis kinpaleuiskej itech ininnemilis.
Amo pouij nikan taltikpak
Ika tein Jesús kijtoj, kichiua maj sekin motajtanikan keniuj itatojtokakauan moneki kiitaskej política. ¿Keyej? Porin tepitsin achto ke Jesús momikiliskia, kitataujtij Dios maj kinpaleuiani itatojtokakauan ika nejin tajtolmej: “Nimitsontajtanilia ke amo xikinajchiua nomomachtijkauan de nikan taltikpak. Ta, nimitsontatautilia de ke xikinyekpixtinemi [...] para ke in amokuali Satanás ma amo kinkajkayaua. Uan ijkon keme Nejuatsin amo nipoutinemi nikan taltikpak, no ijkon [...] yejuan amo no poutinemij nikan taltikpak” (Juan 17:15, 16). Sayoj ke komo Jesús kijtoj ke itatojtokakauan amo pouiskiaj nikan taltikpak, ¿keniuj ueliskiaj kinpaleuiskiaj oksekin itech ininnemilis? Techpaleuis maj tikajsikan tanankilil komo achto tiknankiliaj okseki ome netajtanilmej:
• ¿Keniuj kiitaya Jesús política?
• ¿Toni moneki kichiuaskej itatojtokakauan axkan?