Jesús tein kipaleuij maj kipia yekmelauj yolpakilis itech inemilis

¿YEKMELAUJ kipiak Jesús yolpakilis itech inemilis? Kemej tikmatij, yejua moskaltij itech se kali kampa amo tominpiayaj uan itech nochi inemilis amo miak taman kipiak, tein melauj nion kipiaya ‘kani mokuatekas’ (Lucas 9:57, 58). Uan no, akin kiixnamikiaj kitauelitakej, kitakajkayauilijkej uan satepan kimiktijkej.

Xa uelis tikonnemilis: “Nejon amo yejua yekmelauj yolpakilis”. Sayoj ke moajsi okseki taman tein kichiuak Jesús itech inemilis tein no moneki timomachtiskej. Maj tikitakan naui.

1. JESUS KUALI KIMATIA KEYEJ NEMIA: KICHIUAS ITANEJNEKILIS DIOS.

“Notakualis yejua nijin, ma nikchiua in tekit ijkon keme kimonekiltia Notajtsin Dios ten nechualtitanik.” (Juan 4:34.)

Jesús kitayekanaltij itanejnekilis Jiova Dios ika tein kijtoj uan ika tein kichiuak.a Kemej kinextia tajkuilol tein achto moijtoj, yejua semi kiyolpaktiaya kichiuas nejon uan kimachiliaya kemej yeskia takual. Maj tikitakan keniuj moajsia keman kijtoj nejon tajtolmej.

Nepantaj katka keman Jesús kijtoj nejon (Juan 4:6). Yejua ojtokak nochi kualkan kampa tepeyoj itech tal tein pouia Samaria uan tikyekmatij ke mayanaya. Tein melauj, imomachtijkauan kitataujtijkej: “Tamachtijke, xikmaseua tepitsin nijin takualis” (Juan 4:31). Ika tein Jesús tanankilij, kinextij ke tekit tein Dios kikauilijka kimakaya chikaualis kemej yeskia takual. ¿Melauj ke Jesús kipiaya yekmelauj yolpakilis itech inemilis?

2. JESUS KITASOJTAYA ITAJTSIN IKA NOCHI IYOLO.

“Nejuatsin niktasojta Notajtsin Dios.” (Juan 14:31.)

Jesús kipiaya se tel kuali uikalis iuan iTajtsin keman yetoya iluikak. Ueyi netasojtalis tein kipialiaya kiolinij maj kiteixmatilti itokay, itanejnekilis uan kemej tamati yejuatsin. Ika tein kijtoj, ika tein kichiuak uan kemej monejnemiltij, Jesús senkis kuali kinextij kemej tamati iTajtsin, uan keman tikixtajtoltiaj tein kichiuak kemej yeskia tikixtajtoltiaj tein kichiuak yejuatsin. Yejua ika, keman Felipe kiiluij: “Xitechnextili Motajtsin Dios”, Jesús tanankilij: “Ijkon keme Nejuatsin tinechitstinemi, no ijkon Totajtsin Dios tikitstinemi” (Juan 14:8, 9).

Jesús kiteltasojtaya iTajtsin uan kinekik kitakamatis hasta keman kimiktijkej (Filipenses 2:7, 8; 1 Juan 5:3). Nejon netasojtalis tein kipialiaya Dios kiualkuilij yekmelauj yolpakilis.

3. JESUS KINTASOJTAYA TALTIKPAKNEMINIJ.

“Tetasojtalis ten kachi ueyi yejua nijin: -Moneki ma [...] kitemaka inemilis para ijkon kinpaleuis oksekin itasojikniuan.” (Juan 15:13.)

Kemej titajtakouanij, tel amo kuali tein techpanoua itech tonemilis. Biblia kijtoua: “Itechkakopaka ne achtopa tagat Adán [...] tajtakol momauak ya tech nochi senmanauak. Uan [...] ongak mikilis [...] ika por ne tajtakol [...]. Uan no ne mikilis mosouako uan takitskijtinemiko inpan nochi in taltikpakuani porin [...] motajtakolmakakke” (Romanos 5:12). Toselti amo uelis timokixtiliskej mikilis tein kiualkui tajtakol (Romanos 6:23).

Sayoj ke Jiova, ika iueyi netasojtalis, kitemaka tein techmakixtia. Kiualtitanik iKonetsin akin amo kipiaya tajtakol maj tajyouiki uan maj momikiliki uan ijkon ueliskia techkixtilis tajtakol uan mikilis. Netasojtalis tein Jesús kipialiaya Dios uan taltikpakneminij kiolinij maj ika miak pakilis kichiuani tein monekia uan kitemakak inemilis tein amo kipiaya tajtakol tein ika techpaleuia (Romanos 5:6-8). Nejon netasojtalis tein kiolinij maj tapaleui kiualkuilij yekmelauj yolpakilis.b

4. JESÚS KIMATIA KE KIPIAYA INETASOJTALIS UAN ITATIOCHIUALIS DIOS.

“Yejuatsin nijin Notasojkonetsin tenika semi nimoyolpakiltia.” (Mateo 3:17.)

Ika nejin tajtolmej tein Jiova kiualijtoj keman Jesús moauij, senkis kinextij ke kitasojtaya uan kiseliaya iKonetsin; yejua ika Jesús uelik senkis kijtoj: “Notajtsin Dios nechtasojta” (Juan 10:17). Kemej Jesús kimatia ke kipiaya inetasojtalis uan itatiochiualis Dios, uelik kixikoj ika yolchikaualis keman taixnamikinij kitajyouiltijkej uan kijijtojkej uan no kipaleuij maj motemaka mikis (Juan 10:18). Kemej kiyekmatia ke kipiaya inetasojtalis uan itatiochiualis Dios, okachi kiualkuilij yekmelauj yolpakilis.

Moyekita ke Jesús kipiak yekmelauj yolpakilis itech inemilis. Uan tejuan uelis techmachtis neskayot tein kikauak. Itech okse tamachtilis moijtoua seki kuali tayolmajxitilis tein kinmakak imomachtijkauan tein kinpaleuiskia maj no kipiakan yekmelauj yolpakilis.