¿Uelis se takuaujtamatis itech taneltokalis? Tomin

Estelle,a akin nochipa yaya itech itaneltokalis iuan ikoneuan, kiiluij akin ompa taixyekanaya ke kinekia kiajsikamatis Biblia. Kemej yejua amo keman kipaleuij, amo yajkiok. Yejua kijtoj: “Taixyekananij itech notaneltokalis nechtajkuilouilijkej, uan nechajsikamatiltijkej ke komo amo niuelia niyas, sayoj maj niktitani notomin kemej se netetayokolil. Nikajsikamatik ke sayoj kinekiaj tomin”.

Angelina akin semi taneltokakej, kijtoj: “Keman timosentiliayaj itech notaneltokalis expa kipanoltiayaj kampa se kitalis tomin, uan monekia maj expa titemakanij tepitsin. Nochipa tajtantoyaj tomin. Nikijtoj: ‘Amo kipiaj iespíritu Dios’”.

Xiontanemili itech taneltokalismej tein tikonixmati. ¿Kitemouaj miak taman keniuj tachikaujkauiskej maj kitemakakan tomin? ¿Mouika iuan tein kijtoua Biblia?

¿TONI TAMACHTIA BIBLIA?

Jesús, akin kipeualtij taneltokalis kampa moajsiaj itatojtokakauan, kijtoj: “Ijkon keme Dios namechtayokolij [...], no ijkon [...] amo teyi xikintopaluikan” (Mateo 10:8). Kuali tamachtilis tein kipia Biblia amo ueli monamaka uan moneki uelis kiajsis akin yeski.

Yekinika itatojtokakauan Cristo, ¿keniuj kiixtauayaj nochi tein monekia kampa mosentiliayaj?

Sejse kitemakaya “itapaleuilis ijkon keme yejua kinemilij ya ke kitemakas. Uan [...] amo [...] ika ne yolkokolis [...] [nion] porin kimachilia[ya] ke Dios kifuerzajuia ma kitemaka. Porin Totajtsin Dios kitasojta se tagat ten kitemaka itapaleuilis ika yolpakilis” (2 Corintios 9:7). Tatitanil Pablo kijtsomaya tein ika kichijchiuayaj takenkalmej uan ijkon moixpanoltiaya keman kitekitiliaya Dios (Hechos 18:2, 3). Yejua kijtoj: “Youalitonal timotekitiltiayaj para ma amo [tamechtelkauiliskej] xitechpaleuikan. Ika ya nojon tejuan timotekipanoayaj nochi in tonalme kuak tamechnojnotstinemiaj ika in Tajtoltsin” (1 Tesalonicenses 2:9).

¿TONI KICHIUAJ ITAIXPANTIJKAUAN JIOVA?

Kampa monechikouaj itaixpantijkauan Jiova, motokaytia Kali kampa Mosentiliaj uan amo kipia tein tel patiyoj. ¿Keniuj kiixtauaj nochi tein ompa moneki? Yejuan amo keman kipanoltiaj teisa kampa se kitalis tomin nion kititaniliaj aksa se amat kampa tajtanij maj kitemakakan tomin. Ta akin kitasojkamati tamachtilis tein ompa motemaka, ueli kitalia tomin itech se kaxontsin tein moajsi itech kali uan amo kichiua maj oksekin kiitakan.

Maski tein melauj, mokixtis amaixmej uan momoyauas moneki tomin. Sayoj ke amo keman tikonitas itech toamaixuan maj kijto ke monamaka nion motajtani tomin. Ta sayoj kiteixmatiltia tein tamachtia Biblia.

¿Keniuj tikonita? Kemej moixtaua tein moneki, ¿mouika iuan tein kijtoj Jesús uan neskayot tein kikaujkej yekinika itatojtokakauan?