“Xiktekitilikan Jiova kemej takeualmej”

1. ¿Keniuj miakej kinemiliaj ke kijtosneki se mochiuas takeual, uan keniuj semi taman maj se mochiua itakeual Dios kemej kijtoua Romanos 12:11?

MIAKEJ kinemiliaj ke se takeual amo uelis kichiuas tein kinekis uan kemansa iteko semi ika mauiltia. Sayoj ke se mochiuas itakeual oso itekitikauj Dios semi taman. Biblia ika tajtoua takeualmej akin kiixpejpenkej mochiuaskej itakeualuan se ininTeko tetasojtakej. Tein melauj, keman tatitanil Pablo kinyoleuak yekinika itatojtokakauan Cristo maj kitekitilianij “Jiova kemej takeualmej”, kinextij ke monekia kichiuaskej porin kitasojtaj (Rom. 12:11, TNM). ¿Toni kijtosneki se mochiuas takeual? ¿Toni techpaleuis maj amo timochiuakan itakeualuan Satanás nion tein kiixyekana nikan taltikpak? ¿Toni tatiochiualismej kiseliskej itakeualuan Jiova akin amo kikauaj?

“YEKMELAUJ NIKTASOJTA NOTEKO”

2. 1) ¿Toni kioliniaya se israelita maj kineki kisentokas tekitis kemej takeual? 2) ¿Toni kijtosnekia ijkuak se takeual kinakaskoyoniayaj?

² Tanauatil tein Jiova kimakak Israel, techpaleuia maj tikajsikamatikan toni taman takeual moneki timochiuaskej. Takeualmej judíos monekia kinkajkauaskej satepan ke kiajxitiskiaj chikuasen xiuit kemej takeualmej (Éx. 21:2). Sayoj ke komo kitasojtaya iteko uan kinekia kisentokas kitekitilis, Tanauatil kinextiaya ke ueliskia kisentokas tekitis. Iteko monekia kinakastalis takeual itech se puerta oso ikaltenkouj uan kikoyoniliskia ika se tepos (Éx. 21:5, 6). ¿Keyej monekia kichiuas nejon? Itech tajtol hebreo keman aksa tatakamatia moijtouaya ika se tajtol tein kijtosnekia ke takaki. Yejua ika, ijkuak kinakaskoyoniayaj, kinextiaya ke kinekia kisentokas kitakamatis uan kitekitilis iteko. Nejon techpaleuia maj tikajsikamatikan ke ijkuak timotemaktiaj iuan Jiova, tikijtouaj ke tiktakamatiskej ika miak pakilis porin tiktasojtaj.

3. ¿Keyej timotemaktiaj iuan Dios?

³ Achto ke timoauiskiaj, tikixtalijkej timotemaktiskej iuan Jiova oso timochiuaskej itakeualuan. Keman timotemaktijkej iuan, tikiluijkej ke tiknekij tiktakamatiskej uan tikchiuaskej itanejnekilis. Amo akin techchikaujkauij. Uan hasta telpochmej no motemaktiaj iuan Dios uan moauiaj porin kinekij kichiuaskej, amo sayoj porin kinekij kinyolpaktiskej inintatuan. Kemej tikitaj, ijkuak timotemaktiaj iuan Dios tikchiuaj porin tiktasojtaj toTeko Jiova akin nemi iluikak. Tatitanil Juan kijkuiloj: “Nestinemi ke melau tikpiaj ne tetasojtalis de Dios, kuak no tiktakamatij ya in tanauatil” (1 Juan 5:3).

TAKEUALMEJ TEIN AMO MOAJSIJ TEMAKO

4. ¿Keniuj uelis timochiuaskej ‘tekitini de [...] ne yolchipaualis’?

⁴ Semi tiktasojkamatij maj Jiova techkaua maj timochiuakan itakeualuan. Totakuaujtamatilis itech inemilis Jesús tein kitemakak techkixtia imako tajtakol. Uan maski titajtakouanijok, tikixpejpenkej timoajsiskej imako Jiova uan Jesús uan tikinitaskej kemej totekouan. Pablo kiyekmelauak nejon itech se amat tein kijkuiloj ika ichikaualis Dios: “Ximopouakan ke nanmomikilijke ya [itech] [...] tajtakol, [uan] [...] nanyoltinemij axkan para nankiueyipanchiuaske [...] Dios porin nanpoutinemij iuan [...] Cristo Jesús. Uan no namejuan kuali nankimatokke ya ke takan nanmotemaktij[kej] ya keme nantakeualme de nantakoualme imako [...] tajtakol [...,] namechualkuilia tamilis san. Pero kuak namejuan nankitakamatij [...] Dios, [...] namechualkuilis se yolchipaualis [...]. Uan namejuan ne achtopa ya nankatkaj nanitekitikauan den tajtakol [...]. Pero tiktasojkamachiliaj [...] Dios ke axkan namejuan ika nochi namotalnamikilis nankitakamatinemij ya nojon chipauak tanextililis [...]. Uan axkan namejuan nankisekokauke ya de ne tajtakol [...]. Uan nanmochiuakoj [...] nantekitini de [...] ne yolchipaualis” (Rom. 6:11, 16-18). Tikitaj ke Pablo kijtoj maj titatakamatikan ika ‘nochi totalnamikilis’ oso toyolo. Keman timotemaktiaj tiknextiaj ke tiknekij tiktakamatiskej Jiova ika nochi toyolo. Uan kemej yejuatsin kinextia melaujkayot, keman timotemaktiaj iuan, timochiuaj ‘tekitini de [...] ne yolchipaualis’.

5. ¿Toni tein techtilana tinochin moneki tikixnamikiskej uan keyej?

⁵ Sayoj ke komo tiknekij tinemiskej kemej kijtosneki tonetemaktilis, tikixnamikiskej ouijkayomej. Tikpiaj ome taman tein moneki tiktaniskej. Yekinika yejua tajtakol tein Pablo monekik kiixnamikis: “No nimoyolajxilia ke nejua semi nechyolpaktia ne tanauatil de Dios [...]. Pero no nikyolitstok ke yetok okse uelilis ten nechma[j]pachojtinemi tech notalnamikilis. [...] Uan yejua ne nechmautok ika tajtakol [...] uan nechtsijtsikojtinemi” (Rom. 7:22, 23). Tejuan no mojmostaj techtilana tanejnekilis tein amo kuali porin titajtakouanij. Yejua ika tatitanil Pedro techyolmajxitia: “Amo namechtsijtsikoutok ok Satanás ika nichikaualis. Ika ya nojon xiktekitilijtinemikan Dios. Uan amo xikkemilojtiyakan namotajtakoluan” (1 Ped. 2:16).

6, 7. ¿Keniuj Satanás kichiua maj moita ke tel kualtsin tein poui nikan taltikpak?

⁶ Ojpatika, moneki tikixnamikiskej tein poui nikan taltikpak tein kiixyekanaj amokuali ejekamej. Satanás akin taixyekana nikan taltikpak, kikui miak taman tein ika kineki kichiuas maj tikauakan Jiova uan Jesús. Kineki maj timochiuakan itakeualuan, yejua ika kitalia tayejyekolis (xikonixtajtolti Efesios 6:11, 12). Se taman tein kikui yejua tein poui nikan taltikpak tein kichiua maj nesi ke tel kualtsin. Tatitanil Juan tanejmachtij: “Komo nankitasojtaj ne tajtakolnemilis de nikan taltikpak, ijkuakon amo nankitasojtaj in Totajtsin Dios. Amo teyi ongak tajtakolnemilis ten ualeua de Totajtsin Dios. Ta, sayo ualeua itech ne amokuali Satanas [...]: yejua ne tanejnekilis den pitsotik ten eua itech in tonakayo; uan yejua ne taixnejnekilis kuak kiyokolitaj in toixtololouan; uan yejua ne moueyinekilis ten eua itech miak tataman de se kipixtok” (1 Juan 2:15, 16).

⁷ Axkan nikan taltikpak semi kinekij kipiaskej miak taman. Satanás kichiua maj tiknemilikan ke yejua tomin tein yekinika kiualkui yolpakilis. Kampa yeski onkak uejueyi tanamakaloyan. Tetanejnektianij kinextiaj ke semi kuali maj se kipia tein okachi kualtsin uan maj se moixpetani. Akin tekitij kampa kinpaleuiaj akin youij kansaika, teiluiaj ke kipiaj nochi tein ika uelis se yas kampa tel takualtsinkan sayoj ke miakpa iniuan akin amo kiixmatij Dios. Kampa yeski tikakij ke teiluiaj maj okachi kuali se nemi sayoj ke ijkon kemej nikan taltikpak kiitaj nemilis.

8, 9. ¿Toni uelis techpanos uan keyej semi tamouilil?

⁸ Keman Pedro ininka tajtoj akin moajsiaj itech nechikol sayoj ke peujkej tanemiliaj kemej nikan taltikpak, kijtoj: “Yejuan [moyolpaktijtinemij] [...] maski tech in tonayan. Uan [...] kuak namouan tatakuatij [...] mouelitstinemij ika ne tajtakolpakilis [...]. Uan ne tamachtiani takajkayauani [...] moueyimatinemij san ika ninmijmikilotajtoluan ten nenkajti san. Uan yejuan [...] kintanemililtiaj ika tanejnekilis ten kuika tajtakol san, maski ne taneltokani yekin ya mochikokixtijke ya de [...] nekes ten nentinemij ok tech tajtakolnemilis. Uan [...] yejuan no kinyekiliaj in taneltokani [...] [ke] nochi uelis ya kichiutinemiske keme yejuan kinekij. Pero kuak in tajtakol kixijxikojtinemi in tagat, ijuakon [...] momajpachojtok ya in tajtakol ten yejua kichiutinemi” (2 Ped. 2:13, 18, 19).

⁹ Komo tiktemouaj tikpiaskej “ne taixnejnekilis kuak kiyokolitaj in toixtololouan”, amo kijtosneki ke timajkaujtokej. Ta techchiua itakeualuan Satanás, iteko tein poui nikan taltikpak (1 Juan 5:19). Sayoj ke nejon semi tamouilil: uelis timochiuaskej kemej yeskia itakeual tominpialis tein semi ouij timokixtiliskej.

TEIN OKACHI KIUALKUI YOLPAKILIS

10, 11. ¿Akonimej Satanás okachi kineki kintilanas uan keyej ueyi tamachtilis uelis kinualkuilis kuejmolmej?

¹⁰ Ijkon kemej Satanás kichiuak ompa Edén, axkan no kitemoua kinuetsiltis akin amo kipiaj kuali taixejekolis uan okachi kineki kintilanas telpochmej uan ichpochmej. Yejua nion tepitsin kiyolpaktia keman yejuan oso akin yeski mochiua itekitikauj Jiova. Kitemoua kichiuas maj nochin akin motemaktiaj iuan Dios kikauakan uan maj amo kiueyichiuakan.

¹¹ Maj oksepa tikelnamikikan takeual akin kiseliaya maj kinakaskoyonikan. Tikyekmatij ke yekinika kikokoj sayoj ke satepan pajtik uan sayoj nesia ke nakaskoyoktik tein nochipa kinextiaya ke katka se takeual. No ijkon se telpoch kiitas ke semi ouij oso hasta kikokos kiixpejpenas okse taman ojti ke tein kitojtokaj iuampoyuan. Satanás kinextia ke sayoj ueyi tamachtilis kiualkui yolpakilis, sayoj ke akin tiktojtokaj Cristo moneki amo tikelkauaskej ke yekmelauj yolpakilis tikpiaj keman tikchiuaj tein Jesús kijtoj: “Yolpakij akin kimachiliaj ke moneki motokiskej iuan Dios” (Mat. 5:3, TNM). Timotemaktiaj iuan porin tiknekij tiktekitiliskej yejuatsin uan amo Satanás. Tiktasojtaj itanauatil Jiova uan itech titanemiliaj youal uan tonal (xikonixtajtolti Salmo 1:1-3). Sayoj ke akin kiixtaliaj kiseliskej uejueyi tamachtilis, amo semi ueliok tanemiliaj itech iTajtol nion kitekitiliaj.

12. ¿Toni moneki kiixpejpenaskej miakej telpochmej uan ichpochmej?

¹² Itech yekinika amat tein Pablo kintitanilij tokniuan corintios, kijtoj: “Dios namechijitak ke ximochiuakan taneltokani, maski ipa nantetekitiliani ten nantakoualme [...], pero ika nijin amo ximoyolkuejmolokan. Uan komo uelis nanmochiuaske ke amo nantanamakatekitini ok, ijkuakon xikchiuati ke ma amo xitanamakme” (1 Cor. 7:21). Itech yekinika siglo, moajsiaj tekomej akin ueliskiaj kichiuaskej maj kipia ouijkayomej se itekitikauj Dios. Komo ijkon kipanouaya, okachi kuali maj amo kitekitilianiok. Axkan itech miak uejueyi altepemej telpoch oso ichpoch moneki yas tamachtiloyan seki xiujmej. Satepan, yejua kijtos toni kichiuas, uan uelis kiixpejpenas tekitis kemej precursor oso okse tekit kemej nejon. Sayoj ke uelis kitsakuilis maj kichiua nejon, komo kiixpejpena kiselis se ueyi tamachtilis (xikonixtajtolti 1 Corintios 7:23).

¿KATIYEJUA OKACHI KUALI TAMACHTILIS?

13. ¿Toni taman tamachtilis okachi kinpaleuia itekitikauan Jiova?

¹³ Pablo kinnejmachtij itatojtokakauan Cristo akin nemiaj Colosas: “Ximoyekpiakan [...] ma amo aken namechkajkayaua ika tamachilis [...] uan [...] ne tajtolteuilis ten amo teyi ika namechpaleuis. Porin ne takajkayauani amo motachikauilijtinemij tech Cristo. Ta, [...] tech miak tataman taneltokalis den uejkaukayome” (Col. 2:8). Axkan miakej kitenextiliaj “tamachilis [...] uan [...] ne tajtolteuilis ten amo teyi ika namechpaleuis”. Itech uejueyi tamachtiloyan kampa kitemakaj nejon tamachtilis, akin ompa youij, keman kisajya, miakej amo kinpaleuia maj uelikan kiixnamikikan ouijkayomej itech nemilis. Sayoj ke itekitikauan Jiova kiixpejpenaj kiseliskej se tamachtilis tein kinpaleuis maj nemikan ika amo miak taman uan ijkon kitayekanaltiskej itekiyo Dios. Senkis kitojtokaj tein Pablo kiyolmajxitij Timoteo: “Melau ke ika tochipaukataneltokalis mochiuakiu keme yeskia se ueyi ricojyot. [...] Tajkon tikpiaj ya totakualisuan uan totakenuan, ijkuakon ma ti[mo]yolpaktiyakan ya ika ten tikpiaj” (1 Tim. 6:6, 8). Akin kichiuaj kemej Cristo amo kitemouaj uejueyi tokaymej itech tekit, ta kisaj tanojnotsatij nochi tonalmej tein ueliskej uan ijkon kinpaleuiskej oksekin maj mochiuakan imomachtijkauan Jesús (xikonixtajtolti 2 Corintios 3:1-3).

14. Ijkon kemej kijtoua Filipenses 3:8, ¿keniuj kiitaya Pablo keman kipiak tatiochiualis mochiuas itekitikauj Dios uan Cristo?

¹⁴ Xikonnemili tein kipanok tatitanil Pablo. Yejua kiselij ueyi tamachtilis imako Gamaliel, akin tamachtiaya ika ininTanauatil judíos. Nejon tamachtilis katka kemej tein axkan kiseliaj itech universidad. ¿Keniuj kiitaya nejon satepan ke kipiak tatiochiualis mochiuas itekitikauj Dios uan Cristo? Yejua tanankilia: “Nochi nojon nikpoua ke amo teyi kualtia. Porin axkan nikixmatinemi ya Notekotsin Cristo Jesús, uan Yejuatsin kachi ueyi tapaleuilis nechmakati. [...] Ika ya nojon [...] nikpoua ne [...] keme yeskia tajsol san. Uan ijkon nikyolnemilijtinemi porin nikneki sepa san nimoteaxkatilijtiyas iuan Cristo” (Filip. 3:8). Nejon itanemilil Pablo uelis kinpaleuis telpochmej uan ichpochmej uan inintatuan akin kichiuaj kemej Cristo maj kuali taixpejpenakan ika tamachtilis (xikonita taixkopimej).

MAJ TIKSELIKAN OKACHI KUALI TAMACHTILIS

15, 16. ¿Toni tamachtilis kitemaka inechikol Jiova uan keyej?

¹⁵ ¿Toni tanemilil moita itech miak uejueyi tamachtiloyan tein moajsi nikan taltikpak? ¿Melauj ke ompa ixua tanemilil tein kinuika maj taixnamikikan uan maj kualanikan iuan tekiuanij uan semi auilnemij uan tel tatayij? (Efes. 2:2.) Sayoj ke itech inechikol Jiova kampa onkak yolseuilis, motemaka okachi ueyi tamachtilis. Kampa timosentiliaj tinochin uelis tikseliskej tamachtilis tein motemaka nochi semanas itech Escuela tein Techmachtia iTekiyo Dios. No moajsi okseki tamachtilis tein kiseliaj takamej precursores akin ininselti (Tamachtilis ika Biblia tein kiseliaj Takamej akin Ininselti) uan namikuanij akin tekitij kemej precursor (Tamachtilis ika Biblia tein kiseliaj Tokniuan Namikuanij). Nejin tamachtilis tein kitemaka inechikol Jiova techpaleuia maj tiktakamatikan toueyiTeko Dios.

¹⁶ No uelis tiktemoskej tel kuali tamachtilis itech Índice de las publicaciones Watch Tower uan tein itokay Watchtower Library. Nejin tamachtilis kineki techpaleuis maj tikueyichiuakan Jiova. Uan no maj tiuelikan titapaleuikan maj kipiakan se kuali uikalis iuan Dios (2 Cor. 5:20). Ijkon yejuan no uelis kinmachtiskej oksekin (2 Tim. 2:2).

TAKEUAL KISELIA TEIN KUALI

17. ¿Toni tatiochiualismej kiseliaj akin kiixpejpenaj okachi ueyi tamachtilis tein onkak?

¹⁷ Itech neskayot kampa Jesús ika tajtoj istak tomin, ome takeualmej takuaujtamachmej ininteko kiniluij ke kuali tekit tein kichiujkej uan nejon semi kiyolpaktij, yejua ika kinmakak okseki tekit (xikonixtajtolti Mateo 25:21, 23). Komo axkan tikixpejpenaj okachi ueyi tamachtilis tein onkak, techualkuilis yolpakilis uan tatiochiualismej. Kemej neskayot, maj tikitakan tein kipanok Michael. Yejua tel kuali momachtijkej katka uan itamachtijkauan kiyoleujkej itech se nechikol kampa kiitaskiaj xa ueliskia yas universidad. Sayoj ke semi kimoujkakakkej ijkuak Michael kiixtalij kiselis tamachtilis tein amo semi ueyi kampa momachtiskia kichiuas seki tekit. Uan amo uejkauak, ueliaya moixpanoltiaya uan katka precursor regular. ¿Kimachilia ke teisa mopolouilij? Yejua kijtoua: “Tamachtilis tein nikselij kemej precursor uan axkan kemej tayekankej itech nechikol, amo onkak okse kemej nejon. Tatiochiualismej uan tekimej tein nikpiani semi okachi ueyi ke tomin tein ueliskia niktanis. Semi niyolpaki maj amo nikixtaliani niyas itech se ueyi tamachtiloyan”.

18. ¿Keyej uelis tikijtoskej ke tamachtilis tein kitemaka Dios yejua tein okachi kuali?

¹⁸ Tamachtilis tein kitemaka Dios yejua tein okachi kuali, porin techpaleuia maj tiktekitilikan Jiova kemej takeualmej uan ueli tikixmatij itanejnekilis. No technextilia ke uelis tikchiaskej maj techkixtilikan “ijtakauilis” uan tikpiaskej “ueyi nemakixtilis kemej tein kipiaj ikoneuan Dios” (Rom. 8:21, TNM). Sayoj ke okachi techmachtia keniuj uelis tiknextiskej ke tikteltasojtaj toTeko Jiova (Éx. 21:5).