Chikaualis tein kipia mikilis

Tel miakej taltikpakneminij amo kiuelitaj ika tajtoskej mikilis; semi texokolia. Sayoj ke ejkos tonal keman tinochin tikpanoskej nejon tekokojkayot.

Amo onkak nion teyi tein uelis techpaleuis maj tikxikokan keman momikilis topopaj, tonamik oso se tokonetsin. Uelis ijsiujka ejkos oso yolik. Sayoj ke tein yeski panos, tekokojkayot tein kiualkui amo ueli se kitsakuilia uan semi timotayokoltiaj.

Ipopaj Antonio momikilij porin se tepos kitopeuak. Antonio kijtoua: “Kemej yeskia aksa senkis tatsakua mochan uan mitskuilia tein ika titatapoua. Amo kemanok tikalakis. Sayoj timokaua ika tein tikelnamiki. Yejua nejon tikpanotok axkan. Timotajtania keyej tejua mitspanok uan amo tikneki tikneltokas ke mochiuak nejon, sayoj ke amo uelisok tikchiuas nion teyi”.

Dorothy, akin katka anglicana uan tamachtiaya itech itaneltokalis itech tonal domingo, kipiaya 47 xiujmej keman momikilij itakauj. Maski amo keman kineltokak ke nochi tami keman aksa momikilia, amo kiyekmatia ox melauak nejon uan kitemoj kiajsis tanankilil. Yejua kitajtanij akin taixyekanaya itech itaneltokalis: “¿Toni techpanoua keman timomikiliaj?”. Yejua kinankilij: “Amo akin kimati. Moneki timochiaskej uan tikitaskej”.

¿Melauak tein kijtoj? ¿Moneki timochiaskej, oso onkak keniuj uelis tikmatiskej ox yekmelauj tami nochi keman timomikiliaj?