¿Uelis oksepa nikinitas nouejkaujtatuan?

SEKI xiujmej achto, itech periódico coreano The Chosun Ilbo ixnesik itokay se tajkuilol tein kijtouaya: “Shim Cheong, se siuat akin kichiuak tein motelneki akin nion tepitsin kiixmatik Jesús. ¿Yajki miktan?”.

Nejin itokay tajkuilol kichiuak maj tataman kiitanij nejon, porin ichpoch Shim Cheong akin ika motajtoua itech nejin tetapouilis tein motelixmati, semi kitasojtaj porin motemakak kipaleuis ipopaj akin amo tachiaya maski monekik momikilis. Ijkon kemej panouanij xiujmej kiitanij ke tel kuali tein kichiuak, yejua ika kiitaj kemej se neskayot tein moneki kitojtokaskej ichpochmej akin kayomej Corea.

Miakej taltikpakneminij kiitaj ke tel amo kuali uan hasta kinkualantia kinemiliskej maj aksa kemej Shim Cheong kitatsakuiltikan miktan sayoj porin amo moauij kemej Cristo tamachtij. Uan no, tetapouilis mochiuak achto ke ajsiskia tamachtilis ika Cristo itech xolal kampa ichpoch nemia.

Tajkuilol tami ika seki netajtanilmej tein kichiuiliaj se tiopixkat. Keman kitajtanijkej ox nochin mikemej akin amo kiixmatkej Jesús kintatsakuiltiskej miktan, tanankilij: “Amo tikmatij, sayoj tiknemiliaj ke Dios xa kinpialia se nepaleuil [nejon akin ijkon momikilijkej]”.

¿SAYOJ KOMO MOAUIJKEJ UELIS MAKISASKEJ?

Amatajkuilol The New Catholic Encyclopedia kinextia: “Sayoj komo moauiaj uelis makisaskej. Kemej Cristo kijtoj, komo amo oksepa yolij itech at uan Yektikatsin Espíritu amo uelis kalakiskej itech iTekiuajyo Dios (Jn 3.5)”. Yejua ika, sekin kinemiliaj ke akin momikiliaj uan amo moauijkej youij miktan oso okse taman tajyouilis kipiaj.

Sayoj ke oksekin kiitaj ke nejin tamachtilis amo taixejekol. Tel miakej akin momikilijkej amo kiixmatkej Biblia. Yejua ika, ¿yekmelauj kinnamiki maj nochipaya tajyouijtokan? ¿Toni kijtoua Biblia ika nejon?

TEIN BIBLIA KIJTOUA KE UELIS TIKCHIASKEJ

Biblia kiyeknextia ke Dios amo kinixtopeua akin amo uelij kiixmatij itanauatiluan. Hechos 17:30 techyekiluia: “Dios amo semi kichiuak cuenta ten nintajtakoluan den taltikpakuani porin yejuan amo kajsikamatiaj toni kichiutinemiaj”. Komo ijkon, ¿toni uelis tikchiaskej maj mochiua iniuan akin momikilijkej uan amo kiixmatkej Dios?

Tikajsij tanankilil itech itajtoluan Jesús tein kiluij semej amo yolkualmej akin mikik inakastan. Nejon takat kitataujtijka: “Xinechelnamiki keman tikalakis itech motekiuajyo”. ¿Toni kinankilij Jesús? “Yekmelauj nimitsiluia axkan: ‘Nouan tiyetos itech Xochital’.” (Lucas 23:39-43, TNM.)

¿Kiluijtoya Jesús nejon takat ke yaskia iluikak? Amo, ta nejon takat amo yankuikayolik, amo yolik ika at uan ika espíritu, uan nejon se taman tein moneki kipiaskej akin kalakij itech iTekiuajyo Dios ne iluikak (Juan 3:3-6). Jesús motenkauak ke nemiskia “itech Xochital”. Nejon takat akin katka judío, xa kikakik maj ika tajtouanij Xochital tein moajsik Edén tein ika motajtoua itech yekinika amatajkuilol tein kipia Biblia (Génesis 2:8). Tein melauj, Jesús kiluijtoya ke ueliskia kichias maj oksepa nemi nikan taltikpak keman mochiuas se xochital.

Biblia motenkaua ke “se tonal Totajtsin Dios kinpankixtis yoltokke nochi in animajme [oso mikemej], amo sayo in yolkualime. Ta, no nekes ten amo yolkualime” (Hechos 24:15). Akin amo yolkualmej yejuan akin amo kitakamatkej itanauatiluan Dios tein melaujkej porin amo kiixmatkej. Jesús oksepa kimakas nemilis itech Xochital nikan taltikpak nejon takat amo yolkuali akin mikik inakastan uan millones oso miles de millones akin momikilijkej akin amo kiixmatkej Dios. Ompa, nochin kiixmatiskej itanauatiluan Dios uan uelis kiixpejpenaskej kitakamatiskej uan ijkon kinextiskej ke kitasojtaj.

¿TONI PANOS KEMAN MOAJOKUISKEJ AKIN AMO YOLKUALMEJ?

Keman moajokuiskej akin amo yolkualmej, ¿moijtos toni kinnamiki kiseliskej ika tein kichiujkej achto ke momikiliskiaj? Amo. Biblia kijtoua: “Akin momikilia ompa tami itajtakol” (Romanos 6:7, TNM). Kemej tikitaj, keman momikilijkej akin amo yolkualmej kiixtaujkej inintajtakoluan, yejua ika moijtos toni kinnamiki kiseliskej ika tein kichiuaskej satepan ke moajokuiskej, amo ika tein kichiujkej achto ke momikiliskiaj. ¿Keyej tel kuali nejon?

Porin kinkauaskej maj uelikan momachtikan itanauatiluan Dios, tein motematiltis keman motapos kemej yeskia seki amatajkuilolmej. Satepan, moijtos toni kinnamiki kiseliskej ika tein kichiuaskej, tein kijtosneki komo kitakamatkej oso amo nejon tanauatilmej (Revelación [Apocalipsis] 20:12, 13, TNM). Miakej akin moajokuiskej, amo ika ojpa momachtiskej, ta tein melauj yeski yekinika keman uelis momachtiskej uan kichiuaskej itanejnekilis Dios uan ijkon uelis kipiaskej nemilis nochipaya nikan taltikpak.

Nejin tamachtilis tein kitemaka Biblia kinpaleuiani miakej taltikpakneminij maj oksepa takuaujtamatikan iuan Dios. Semej yejua siuat akin itokay Yeong Sug. Yejua kiiskaltijkej itech taneltokalis católico uan tel taneltokakej katka. Seki ichankauan katkaj tiopixkamej. Kemej kinekia mochiuas monja, yajki itech kali kampa moajsij monjas, sayoj ke niman satepan kisak porin amo kiyolpaktij tein ompa kiitak ke mochiuaya. Uan no amo uelia kineltokaya maj taltikpakneminij tajyouitij miktan; kiitaya ke tel amo kuali nejon uan se teikamauiltilis.

Satepan, se siuat akin itaixpantijkauj Jiova kinextilij nejin tein kijtoua Biblia: “Akin yoltokej kiyekmattokej ke momikiliskej; sayoj ke akin momikilijkejya, yejuan amo kimatijok nion teyi” (Eclesiastés 9:5). Kimelauilij ke iuejkaujtatuan amo tajyouijtokej miktan, ta kochtokej itech mikilis hasta keman ajsis tonal ijkuak moajokuiskej.

Kemej Yeong Sug kimatia ke miakej taltikpakneminij amo kiixmatij tein yekmelauj tamachtia Biblia, kiixtalij no tapaleuis maj mochiua tein Jesús kijtoj: “Nejin kuali tanauatilmej ika tekiuajyot motetapouis semanauak taltikpak kampa nemij uan ijkon nochin kimatiskej; uan ompa ejkos tamilis” (Mateo 24:14, TNM). Axkan kintapouia taltikpakneminij kualtsitsin tajtolmej uan kinmatiltia kualtsin taman tein kichia tein kiajsik itech Biblia.

“DIOS AMO [KINCHICHIKOTASOJTA] IN TAGAYOT”

Biblia kijtoua: “Dios amo [kinchichikotasojta] in tagayot. Ta, Yejuatsin kiniknelia tagayot tech nochi in senmanauak komo yejuan kimouistiliaj [...] uan chipaukanentinemij” (Hechos 10:34, 35). Ika nejin moita ke Dios senkis kinextia melaujkayot kemej tikchiaj maj kichiua. ¿Keyej? Porin “Yejuatsin kitasojta melaujkayot uan tein melauak” (Salmo 33:5).