Yejua kiixmatia ojti
GUY HOLLIS PIERCE, akin pouia iniuan Oloch Taojtokaltianij akin kinixyekanaj iTaixpantijkauan Jiova, tamik inemilis nikan taltikpak martes 18 metsti marzo xiuit 2014, keman kipiaya 79 xiujmej. Uan kemej katka semej iikniuan Cristo, kiselij nemilis ompa iluikak (Heb. 2:10-12; 1 Ped. 3:18).
Guy Pierce yolik ompa Auburn (California, Estados Unidos) itech tonal 6 metsti noviembre xiuit 1934, uan moauij itech xiuit 1955. Itech xiuit 1977 monamiktij iuan Penny, akin kiteltasojtaya, uan kinpiakej konemej. Yejua ika kinextiaya netasojtalis kemej se tepopaj. Itech xiuit 1982, yejua uan Penny peuak kichiuaj tekit kemej precursor. Itech xiuit 1986 peuak tekiti kemej takalpanojkej ompa Estados Unidos uan kichiujkej nejon tekit majtaktiose xiuit.
Itech xiuit 1997 kinyoleujkej maj tekitiskiaj itech kali Betel ompa Estados Unidos, kampa tokniuj Pierce tekitik Kampa kiitaj iTekiyo Dios. Itech xiuit 1998 peuak kinpaleuia Tokniuan akin kiitaj nochi tein mouika iniuan Akin moajsij Betel akin tekitij iniuan Oloch Taojtokaltianij. Ompa, itech tonal 2 metsti octubre xiuit 1999, itech nechikol tein xijxiujtika kichiua Watch Tower Bible and Tract Society of Pennsylvania, motematiltij ke tokniuj Pierce peuaskia tekitiskia kemej semej Oloch Taojtokaltianij. Seki xiujmej achto ke momikiliskia, pouik iniuan Tokniuan akin kiitaj nochi tein mouika iniuan Akin moajsij Betel, akin kiitaj tein Moijkuilos itech amaixmej, akin kiitaj Tekit tein mochiua kampa mokixtiaj Amaixmej uan iniuan Tokniuan akin Taixyekanaj.
Akin yeski kuali momachiliaya iuan porin nochipa ixuetskatoya uan yolpakia. Sayoj ke okachi kitasojtayaj porin kinextiaya yolyemanilis, netasojtalis, kipoujkaitaya tein Jiova tanauatia uan tayolmajxitia uan porin senkis takuaujtamatia iuan. Tokniuj Pierce kiitaya ke okachi taixejekol yeskia maj Tonaltsin amo kisaskia ke maj Jiova amo kichiuaskia tein motenkauaya, uan kinekia maj noyampa taltikpak kimatiskiaj nejon.
Tokniuj Pierce mochikauak nochipa kitekitilis Jiova. Meuaya kualkan uan miakpa tekitia hasta keman youakya katka. Yajtinemik noyampa taltikpak porin kinekia kinyolchikauas tokniuan uan amo keman kijtoj ke amo kemantia komo akin tekitij Betel oso okseki tokniuan kitajtaniayaj maj kinpaleuiskia oso maj kinyolmajxitiskia, oso komo sayoj kinekiaj iuan yetoskej. Akin kiixmatkej amo kielkauaj kuali uikalis tein kipiayaj iuan, keniuj kuali kinseliaya uan keniuj kinyolchikauaya ika Biblia.
Tikyekmatij ke inamik, chikuasen ikoneuan, iixuiuan, uan ininkoneuan iixuiuan, ijkon kemej akin kiitayaj kemej ininpopaj, semi kitemoskej tokniuj akin kitasojtayaj uan kuali mouikayaj iuan. Ompa Betel tein moajsi Brooklyn, itech sábado 22 metsti marzo xiuit 2014, tokniuj Mark Sanderson, akin no semej Oloch Taojtokaltianij, kitemakak tanojnots tein ika moelnamikik tein kichiuak tokniuj Pierce itech itekiyo Dios. Kijtoj ke tokniuj Pierce kichiaya kiselis nemilis ompa iluikak, uan kiixtajtoltij nejin tein Jesús kijtoj: “Kampa ichantsin de Totajtsin Dios ongak miak kaltsitsin [...]. Uan komo Nejuatsin niyo namechsesekotaliliti ya ne kaltsitsin, ijkuakon Nejuatsin oksepa nimoualuikas [...] para namechajokuikiu uan namechuikatiu nepa kampa eluiyaktsinko kampa noixpantsinko. Uan ijkon kampa Nejuatsin niyetos, namejuan no ompa nanyetoske [...]. Uan namejuan kuali nankimatij ya kan niyo uan no nankixmatij ya in ojtsin” (Juan 14:2-4).
Semi tiktemoskej tokniuj Pierce, sayoj ke tiyolpakij porin yejua kiixmatia ojti tein kiuikaskia ichan kampa nochipa nemis.