¿Onkak nemilis satepan ke timomikiliaj?

MIAKEJ kipiaj tataman tanemililmej ika nemilis uan mikilis. Moajsij akin kinemiliaj ke satepan ke momikiliskej kisentokaskej nemiskej okseko. Oksekin kineltokaj ke oksepa yoliskej. Uan oksekin kinemiliaj ke nochi tami ijkuak se momikilia.

Xa tejuatsin tikonneltoka okse taman porin motatuan ijkon mitsonmachtijkej oso tikonneltoka tein kijtouaj kampa tionnemi. Sayoj ke, kemej tel miak tataman tanemililmej moajsij ika tein tepanoua satepan ke se momikilia, ¿yekmelauj uelis se kinankilis nejin netajtanil tein miakej mochiuiliaj?

Tel miak xiujmejya, tayekananij itech taneltokalis tamachtianij ke ijkuak aksa momikilia kisa teisa tein kisentoka yoltok. Tel miak taneltokalismej kemej, kampa kijtouaj ke kichiuaj kemej Cristo, hinduismo, judaísmo uan islam senkis kijtouaj ke tikpiaj teisa tein amo momikilia uan ke nemiti kampa moajsij espíritus. Sayoj ke, budistas kineltokaj ke satepan ke aksa miakpa oksepa yoli amo tajyouiaok uan senkis yolpaki, nejon moixmati kemej nirvana.

Nochi nejin tamachtilismej kichiuani maj miakej kineltokakan ke ijkuak aksa momikilia nemiti okseko. Yejua ika, miakej kiitaj ke tinochin moneki timomikiliskej uan ke Dios ijkon kiixtalij. Sayoj ke ¿toni kijtoua Biblia? Timitsonyoleuaj xikonixtajtolti okse tamachtilis. Xa tikonmoujkaitas tanankilil.