Maj tiktemokan tein yekmelauj kipia ipatiuj

1, 2. ¿Keyej itech nejin tonalmej nochipa moajsiskej akin kipanouaj tatasojtilis?

TEIN mochiujtok itech nejin tonalmej semi ouij. Telpochmej amo kiajsij tekit. Miakej taltikpakneminij youij okseki uejueyi altepemej kampa okachi motatani, maski uelis kipoloskej ininnemilis. Hasta itech uejueyi altepemej kampa okachi motatani moajsij miakej akin amo kipiaj tomin. Akin tominpiaj okachi momiakilia inintomin uan akin kipanouaj tatasojtilis okachiok amo kinajsi tomin. Seki tapoualmej kinextiaj ke komo se kipoua tomin tein kipiaj akin tel tominpiaj itech nochi taltikpak yejua nejon tomin kipiaj millones taltikpakneminij senoloch. Maski amo ueli tikmatij ox melauak nejin, kemaj tikmatij ke tel miak millones taltikpakneminij kipanouaj tatasojtilis, sayoj ke oksekin kipiaj tel miak tomin tein ika uelis kintekipanoskej tel miakej ininchankauan akin satepan nemiskej. Jesús kinextij ke melauak nejin keman kijtoj: “Nachipa namouan yetoske naken amo teyi kipia” (Mar. 14:7). ¿Keyej panoua nejin?

² Se taman tein poui itech itaixyekanalis Satanás kitayekanaltia motomintis uan kintanejnektia taltikpakneminij maj kikouakan miak taman tein amo kinpoloua. Biblia kintokaytia “comerciantes” (Apoc. 18:3). Jesús kimatia ke sayoj iTekiuajyo Dios kipatas nejin. Tekiuajyomej uan taneltokalis tein amo melauak no pouij itech itaixyekanalis Satanás, sayoj ke itekitikauan Dios senkis amo kinpaleuiaj.

3. ¿Toni netajtanilmej tiknankiliskej?

³ Tiitekitikauan Dios moneki tiknemiliskej keniuj tikitaj tomin. Maj timotajtanikan: “¿Keniuj uelis niktekitiltis tein nikpia uan ika niknextis ke amo nikaua Dios? ¿Toni nechpaleuis maj amo nikteltemo nimotomintis? ¿Toni neskayomej kinextiaj ke tiitekitikauan Dios senkis iuan titakuaujtamatij?”.

TAYEKANKATAKEUAL AKIN AMO KIYEKTEKITILTIJ TOMIN

4, 5. 1) ¿Toni kipanok tayekankatakeual akin Jesús ika tajtoj? 2) ¿Toni Jesús kinyolmajxitij imomachtijkauan?

⁴ (Xikonixtajtolti Lucas 16:1-9.) Keman Jesús ika tajtoj tayekankatakeual akin amo kiyektekitiltij tomin techtanemililtia. Nejin takat yaya kipoloti itekiuj porin kiteiluilijkaj ke amo kuali kitekitiltiaya tein iaxka iteko.a Sayoj ke kinextij tamatilis uan mochiuak inintasojikniuj akin ueliskiaj kipaleuiskej keman amo kipiaskiaok tekit. Jesús amo kiniluijtoya imomachtijkauan maj kichiuanij tein amo kuali uan ijkon ueliskiaj moixpanoltiskej, ta kiniluij ke nejon kichiuaj “taltikpakuani ten amo taneltokani”. Jesús ika tajtoj nejin tayekankatakeual porin kinekia tamachtis se taman tein motelneki.

⁵ Tein kipanok tayekankatakeual ouij katka. Uan Jesús kimatia ke tel miakej imomachtijkauan no ouij kinkisaskia moixpanoltiskej itech nejin taltikpak kampa mochiua tein amo kuali. Yejua ika kinyolmajxitij: “Xikyektekitiltikan ika kuali namoricojyo ten poutok nikan taltikpak para ijkon nankipiaske miak namotasojikniuan”. Ijkon, keman nejon ‘ricojyot’ amo kipiaskiaok ipatiuj, nejon tasojiknimej, Jiova uan Jesús, kinseliskiaj ‘kampa senyetoskej nochipa’. ¿Toni techmachtia tein Jesús tayolmajxitij?

6. ¿Keniuj tikmatij ke Dios amo kiixtalij maj taltikpakneminij kiteltemokan motomintiskej?

⁶ Biblia kinextia ke Dios amo kiixtalij maj taltikpakneminij kiteltemokan motomintiskej. ¿Keyej tikijtouaj nejin? Porin itech xochital tein moajsia Edén Jiova kinmakak Adán uan Eva okachi ke tein kinpolouaya (Gén. 2:15, 16). Uan no, keman Dios kinmakak iyektikatsin espíritu tokniuan taixpejpenalmej itech yekinika siglo, “amo senme den tokniuan kiyolnemiliayaj ke sayo pouia de yejua den iaxkakopaka. Ta, nochi in tokniuan kiyolnemiliayaj ke kisepanpiaj ya nochi de inaxkakopaka” (Hech. 4:32). Tanauatijkej Isaías kijtoj ke ejkoskia se tonal keman nochin taltikpakneminij yolpakiskiaj ika tein motemaka itech taltikpak (Is. 25:6-9; 65:21, 22). Sayoj ke, hasta maj ejko nejon tonal, imomachtijkauan Jesús moneki kinextiskej tamatilis uan ijkon uelis moixpanoltiskej ika ‘ricojyot’ tein onkak nikan taltikpak, uan no, mochikauaskej kiyolpaktiskej Dios.

MAJ KUALI TIKTEKITILTIKAN ‘RICOJYOT’ TEIN ONKAK NIKAN TALTIKPAK

7. ¿Toni techmachtia Lucas 16:10-13?

⁷ (Xikonixtajtolti Lucas 16:10-13.) Tayekankatakeual akin Jesús ika tajtoj mochiuak inintasojikniuj miakej porin kitemouaya maj satepan kipaleuianij. Sayoj ke, Jesús kinyolchikauak imomachtijkauan maj mochiuanij itasojikniuan yejua uan Jiova, sayoj ke maj amo kitayekanaltianij inintanejnekilis. Kinekia techajsikamatiltis ke ijkon kemej tiktekitiltiaj ‘ricojyot tein poujtok nikan taltikpak’ uelis kinextis ox tiknekij tikyolpaktiskej Dios.

8, 9. ¿Keniuj seki tokniuan kitekitiltiaj tein kipiaj?

⁸ Se taman kemej tiknextiaj ke tiknekij tikyolpaktiskej Dios yejua keman titapaleuiaj ika tein tikpiaj maj mochiua tanojnotsalis noyampa taltikpak, tein Jesús kijtojka ke mochiuaskia (Mat. 24:14). Se siuapiltsin akin nemi itech altepet India, kipiaya se kaxontsin kampa kisentilijtiyaya tomin. Hasta amo mokouiliayaok auilmej. Keman amo akikok tomin itech ikaxontsin, kitetayokolij maj motekitilti itech tanojnotsalis. No ompa, se tokniuj akin kipia koujmej tein kitemakaj koujxiujtet no kinextia tamatilis. Yejua kitetayokolij tel miak koujxiujtet itech kali kampa motajtolkepaj amaixmej itech tajtol malayálam. Kemej tokniuan akin ompa tekitij kikouaj koujxiujtet, kiita ke okachi tapaleuia komo kintayokolia ke komo tapaleuia ika tomin. No ijkon, tokniuan akin nemij Grecia miakpa kintayokoliaj tokniuan akin tekitij Betel aceite de oliva, queso uan okseki taman takual.

⁹ Maj tikitakan tein kichiua se tokniuj kayot Sri Lanka akin nemi okseko. Kemej kampa kayot kipia se kali uan se tal, kinkaua tokniuan maj ompa kichiuakan nechikolmej uan uejueyi nechikolmej, uan maj ompa mokalotikan tokniuan akin kitekitiliaj Dios miak tonalmej. Maski tomin yejua temaka, ijkon kintelpaleuia tokniuan akin amo semi kipiaj tomin. Okseko kampa tokniuan amo kinkauaj maj tanojnotsakan, tokniuan kichiuaj nechikolmej ininchan. Ijkon, miakej precursores uan tanojnotsanij akin amo semi kipiaj tomin kipiaj kani mosentiliskej uan amo moneki taneuiskej se kali uan taxtaujtoskej.

10. ¿Keniuj techpaleuia keman titemakaj tein tikpiaj?

¹⁰ Nejin neskayomej kinextiaj ke itekitikauan Dios kitemouaj kiyolpaktiskej yejuatsin ijkon kemej kitekitiltiaj tein kipiaj, ta nejin okachi amo kipia ipatiuj ke tatiochiualismej tein Dios temaka (Luc. 16:10). ¿Keniuj kiitaj yejuan tein motemakaj kichiuaskej uan ijkon kuali mouikaskej iuan Jiova? Yejuan kimatij ke keman kitemakaj tein kipiaj kitantokej tein yekmelauj kipia ipatiuj (Luc. 16:11). Se tokniuj siuat akin nochipa tapaleuia ika tomin maj kisentoka motanojnotsa kimachilia ke ijkon kemej panouanij xiujmej kiseliani se tatiochiualis tein kitelpia ipatiuj. Yejua kijtoua: “Nikitani ke, keman okachi nitemaka tein nikpia, okachi amo nechouijmaka nitetapojpoluis, amo niyolijsiuis uan amo nikualanis komo amo mochiua tein nikchia uan no nikchiuas tein nechyolmajxitiaj”. Tel miakej okseki tokniuan kiitanij ke kinpaleuia keman kitemakaj tein kipiaj (Sal. 112:5; Prov. 22:9).

11. 1) ¿Keyej tiknextiaj tamatilis keman titemakaj tein tikpiaj? 2) ¿Keniuj momajxitia tein kinpoloua seki tokniuan? (Xikonita taixkopin ipeujyan tamachtilis.)

¹¹ No tiknextiaj tamatilis keman ika tein tikpiaj tikinpaleuiaj oksekin itech tanojnotsalis. Ijkon, komo amo tiuelij titanojnotsaj miak tonalmej oso titapaleuitij kampa monekij okachi tanojnotsanij, tiksentokaskej tikinpaleuijtoskej oksekin (Prov. 19:17). Ika tomin tein tiktemakaj, titapaleuiaj maj mochijchiuakan uan maj momoyauakan amaixmej, uan titapaleuiaj maj motanojnotsa kampa semi tatasojti kampa taltikpakneminij kinekij momachtiskej Biblia. Itech uejueyi altepemej kemej Congo, Madagascar uan Ruanda, tel miak xiujmej tokniuan monekia kiixpejpenaskej ox kikouaskiaj tein kikuaskiaj ininchankauan oso biblias, tein kemansa ininpatiuj tein kitanij itech se semana oso se metsti. Sayoj ke tomin tein ika tapaleuiaj miakej tokniuan kichiua maj ‘momajxiti ne tapaleuilis ten kinpoloa’ okseki tokniuan. Nejin tapaleuij maj itech inechikol Jiova motajtolkepani Biblia uan kinmakanij sejsemej itech kalyetouanij uan akin kinekij kiixmatiskej Dios (xikonixtajtolti 2 Corintios 8:13-15). Ijkon, akin tapaleuiaj uan akin kiseliaj nepaleuil uelis mochiuaskej itasojikniuan Jiova.

TONI TECHPALEUIS MAJ AMO TIKTELTEMOKAN TIMOTOMINTISKEJ

12. ¿Keniuj kinextij Abrahán ke takuaujtamatik iuan Dios?

¹² No techpaleuis maj timochiuakan tiitasojikniuan Jiova komo amo tikteltemouaj timotomintiskej uan komo tiktemouaj tein yekmelauj kipia ipatiuj. Yejua nejon kichiuak Abrahán, akin semi takuaujtamatik iuan Jiova. Kemej kinekia mochiuas itasojikniuj, kitakamatik, kisak itech xolal Ur uan nemik itech takenkalmej (Heb. 11:8-10). Yejua nochipa takuaujtamatik iuan Jiova uan amo itech tomin oso okseki taman (Gén. 14:22, 23). Satepan, Jesús kiluij se telpoch akin tominpiaya maj no ijkon takuaujtamatini. Yejua kiluij: “Komo tikneki tiyekchipaukanemis, ijkuakon xiyo xiknamakati nochi ten moaxka uan xikinxejxeluili in taka ten amo teyi kipiaj ten kuaske. Uan ijkon tikpias in ueyi pakilis uan yek yetolis nepa eluiyaktsinko. Uan xiuiki nouan” (Mat. 19:21). Nejon telpoch amo takuaujtamatia kemej Abrahán, sayoj ke oksekin kemaj kinextianij ke senkis takuaujtamatij iuan Jiova.

13. 1) ¿Toni Pablo kiluij Timoteo? 2) ¿Keniuj uelis tiktakamatiskej axkan nejon tayolmajxitilis?

¹³ Timoteo no kinextij ke takuaujtamatia. Pablo kiluij ke katka se itekitikauj “Cristo Jesús, ijkon keme se soldado”, uan satepan kiluij: “Porin in soldado amo mokalakitinemi tech miak tataman tekime. Ta, in soldado kineki kichiutinemis sayo ne tekit ten kinajnauatia ne tayekankasoldado” (2 Tim. 2:3, 4). Axkan, itatojtokakauan Jesús mochikauaj kitakamatiskej nejin tayolmajxitilis. Ompa no pouij panoua se millón tokniuan akin kitekitiliaj Dios miak tonalmej. Yejuan amo kikauaj maj kintanejnekti nochi taman tanamakalis tein moteixmatiltia nion tein onkak itech nejin taltikpak, uan kielnamikij ke “akin taneui teisa mochiua itakeual akin tetaneujtia” (Prov. 22:7). Satanás kineki maj tikuikan totiempo uan tochikaualis uan maj ika tiktemokan timotomintiskej. Sekin taneuij tel miak tomin porin kinekij kikouaskej se kali, se carro, kiixtauaskej se ueyi tamachtilis oso kichiuaskej se ueyi iluit keman monamiktiskej. Komo amo timoyekpiaj, uelis titauikatoskej tel miak xiujmej. Tiknextiaj tamatilis keman amo tiktemouaj tikpiaskej miak taman, amo timotauikaltiaj uan amo tikouaj miak taman. Ijkon amo tiktemoskej timotomintiskej uan uelis okachi tiktekitiliskej Dios (1 Tim. 6:10).

14. ¿Toni moneki tikixtaliskej tikchiuaskej? Xikonijto seki neskayomej.

¹⁴ Komo tiknekij amo tikpiaskej miak taman, moneki tiktayekanaltiskej iTekiuajyo Dios. Seki tokniuan namikuanij kipiayaj se tanamakaloyan kampa kitaniaj miak tomin. Sayoj ke yejuan kinekiaj oksepa kitekitiliskej Dios miak tonalmej. Yejua ika kinamakakej inintanamakaloyan, ininbarco uan okseki taman. Satepan tapaleuitoj maj mochijchiua ueyi kali kampa techixyekanaj (Warwick, Nueva York). Yejuan semi kipatiuitakej nejin, porin uelik tapaleuijkej ompa Betel iniuan ininsiuapil uan ininmontikauj. Uan no, miak semanas tekitikej ompa Warwick iniuan itatuan tepopaj. Se precursora akin nemi Colorado (Estados Unidos), kiajsik se tekit itech se banco kampa ueliskia tekitis sayoj seki hora. Akin kitakeujkaj semi kiuelitayaj kemej tekitia uan yejua ika kinekiaj kimakaskej se okachi ueyi tekit kampa monekiskia tekitis nochi semana uan kitaniskia ome achiok tein kitaxtauiayaj. Sayoj ke yejua amo kinekik porin nejon kichiuaskia maj amo semi tanojnotsaniok. Nejin sayoj seki neskayomej tein kinextiaj toni motemakaj kikauaskej miakej itekitikauan Jiova. Komo senkis tikixtalijtokej tiktayekanaltiskej iTekiuajyo Dios, tiknextiskej ke okachi tikpatiuitaj tokuali uikalis iuan uan tatiochiualismej tein temaka ke tomin uan okseki taman.

KEMAN TOMIN UAN OKSEKI TAMAN AMO KIPIASOK IPATIUJ

15. ¿Toni taman tein kipia ipatiuj okachi techyolpaktia?

¹⁵ Komo aksa kipia tomin oso okseki taman amo senkis kijtosneki ke kipia itatiochiualis Dios. Jiova kintatiochiuia akin ‘moricojtilitiyouij sayoj ika ne kuali tatakamatilis’ (xikonixtajtolti 1 Timoteo 6:17-19). Kemej neskayot, Lucia, se tokniuj kayot Italia, kimatik ke ompa Albania monekiaj okachi tanojnotsanij.b Yejua ika ompa mokaltalito itech xiuit 1993. Maski amo kipiaya tekit, takuaujtamatik ke Jiova kipaleuiskia. Momachtij tajtol albanés, uan kinpaleuiani panoua 60 taltikpakneminij maj moauikan. Melauak ke timiakej amo tel kuali techyoui kampa titanojnotsaj. Sayoj ke tein yeski taman tein tikchiuaskej tein ika tikinpaleuiskej oksekin maj kiixmatikan Jiova uan maj mochiuakan itasojikniuan yejua se taman tein kitelpia ipatiuj tein uejkauas nochipaya (Mat. 6:20).

16. 1) ¿Toni kipanos ‘ricojyot tein poujtok nikan taltikpak’? 2) Kemej tikmatij toni kipanoti ‘ricojyot tein poujtok nikan taltikpak’, ¿keniuj moneki tikitaskej?

¹⁶ Jesús amo kijtoj ke ‘ricojyot tein poujtok nikan taltikpak’ uelis tamis, ta ke yekmelauj tamis (Luc. 16:9). Itech nejin itamian tonalmej, tami tomin itech seki bancos uan tel amo ajsi tomin itech seki uejueyi altepemej. Sayoj ke amo uejkaua, okachi ouij yeski. Taltikpaktekiuajyomej, taneltokalismej tein amo melaujkej uan kemej ixyetok motekitiltis tomin tein poui itech nochi tein Satanás kiixyekantok senkis amo tapaleuiskejok. Tanauatijkej Ezequiel uan Sofonías kijtojkej ke oro uan plata amo kipiaskejok ininpatiuj, maski itech tel miak xiujmej taltikpakneminij yejua tein kiteltekitiltiayaj (Ezeq. 7:19; Sof. 1:18). ¿Keniuj timomachiliskiaj komo tixiuejkejya tiyeskiaj uan tikitaskiaj ke tikaujkej tein yekmelauj kipia ipatiuj porin tiknekkej tiksentiliskej miak ‘ricojyot’? Xa timomachiliskiaj kemej akin tekiti nochi inemilis porin kineki kitanis miak tomin uan satepan kiita ke nejon tomin amo kualtia (Prov. 18:11). ‘Ricojyot tein poujtok nikan taltikpak’ amo kipiasok ipatiuj. Yejua ika, maj tiktekitiltikan kemej techpaleuis maj timochiuakan tiitasojikniuan Jiova uan Jesús. Tein yeski taman tein ika tikpaleuiskej iTekiuajyo Jiova techpaleuis maj okachi kuali iuan timouikakan.

17, 18. ¿Toni kiseliskej itasojikniuan Dios satepan?

¹⁷ Keman taixyekanas iTekiuajyo Dios, amo akin monekis taxtauas kampa nemis oso taneuis tomin, amo monekisok maj moajsikan tapajtianij nion maj onka pajti. Nochin kipiaskej tein kikuaskej uan amo monekis kiixtauaskej. Itasojikniuan Jiova kipiaskej tein okachi kuali tein motemaka itech taltikpak. Amo tiktemoskej ika timotomintiskej oro, plata nion tetsitsin tein patiyojkej, ta tiktekitiltiskej kemej ika timokualnextiskej. Tinochin uelis tikchijchiuaskej kualtsitsin kalmej ika kuajkuali kouit, tet uan tepos. Uan totasojikniuan techpaleuiskej porin ijkon kinekiskej, amo porin kitemoskej maj tikintaxtauikan. Tinochin timouantiskej nochi tein motemakas itech taltikpak.

¹⁸ Nejin sayoj seki taman tein kitelpia ipatiuj tein kiseliskej akin mochiuaskej itasojikniuan Jiova uan Jesús. Nochin itekitikauan Jiova yolpakiskej keman kikakiskej ke Jesús kijtoua: “Xiualakan nouan namejuan, porin nantatiochiualme den Notajtsin Dios. Uan xikselikan nijin yek yetolis [...] ten Totajtsin Dios [...] ipa namechchijchiuilij ya desde ne tonal kuak tsinpeuak in taltikpak” (Mat. 25:34).