¿Akoni itajtakol?

Komo Dios amo itajtakol, ¿keyej tel miakej mayanmikij oso kipanouaj tatasojtilis? ¿Keyej onkak tel miak neteuilismej, kokolismej uan tetsaujmej? Biblia, iTajtol Dios, kimelaua ke eyi taman tein okachi kichiua maj titajyouikan:

1. Tiktayekanaltiskej totanejnekilis, xijxikuiyot uan netauelitalis. “Taltikpaknenkej kiixyekanani taltikpaknenkej uan ijkon kitajyouiltia” (Eclesiastés 8:9). Miakpa, akin kitayekanaltiaj inintanejnekilis ininka mauiltiaj oksekin.

2. Tachiualis tein amo momattok nochin kinpanoua. Biblia no kijtoua ke titajyouiaj “porin tonal uan tachiualis tein amo momattok nochin kinpanoua” (Eclesiastés 9:11). Nejin kijtosneki ke keman techpanoua se ijsiujkayot mochiua porin timoajsij kampa amo monekia, oso porin amo tiknemiliaj tein tikchiuaj oso timopolouaj.

3. Amokuali taixyekana nikan taltikpak. Biblia kinextia akoni itajtakol maj onka tajyouilis keman kijtoua: “Nochi in taltikpakuani kinyekana ok yejua in amokuali Satanás” (1 Juan 5:19). Amokuali yejua se ángel tel chikauak akin achto katka yolkuali, sayoj ke “amo keman tajtoa ika ten melau” (Juan 8:44). Okseki ángeles no kipaleuijkej Satanás porin kitayekanaltijkej tein kinejnekiaj, ijkon mochiujkej amo kuali ejekamej (Génesis 6:1-5). Keman kiixnamikkej Dios uan hasta axkan, Satanás uan iamo kuali ejekauan semi taijtakouanij nikan taltikpak, sayoj ke axkan okachiok kichiuaj. Amokuali tel kualantok uan “kinkajkayautinemi nochi in taltikpakuani”, yejua ika Biblia kijtoua: “Nanteikneltiani namejuan ten nankalyetokke tech in taltikpak uan apanian” (Apocalipsis [Revelación] 12:9, 12). Satanás tel amo yolkuali uan kiyolpaktia techtajyouiltis. Yejua itajtakol maj onka tajyouilis, amo Dios.

XIONTANEMILI ITECH NEJIN: Sayoj se akin tel amo yolkuali techtajyouiltiskia ijkon. Sayoj ke, Biblia kijtoua ke Dios “tetasojtatinemi” (1 Juan 4:8). Yejua ika, amo ueli tikneltokaj maj Dios akin melauak kichiua tein amo kuali (Job 34:10).

Sayoj ke tejuatsin xa tionmotajtania: “¿Kemanian Dios kitamis itaixyekanalis Satanás?”. Kemej tikitakejya, Dios kitauelita tein amo kuali uan yejua no semi tajyouia keman titajyouiaj. Uan no, iTajtol techiluia maj tiktapouikan tein techtekipachoua, porin yejuatsin toka motekipachoua (1 Pedro 5:7). Itech okse tamachtilis tikitaskej toni kinextia ke Dios semi techtasojta uan ke ueli kitamia tajyouilis uan teikamauiltilis.a