¿Toni kichiuani Dios?

Komo tiknekij okachi kuali tikixmatiskej aksa, motelneki tikmatiskej toni kichiuani. No ijkon, komo tikonneki okachi kuali tikonixmatis Dios, moneki tikonmatis tein kichiuani. Tikonmoujkaitas tikonmatis keniuj mitsonpaleuia tein Dios kichiuani uan keniuj mitsonpaleuis satepan.

DIOS TOKA TANEMILIJ KEMAN TACHIJCHIUAK

Jiova yejua toTachijchiujkauj uan kualtsitsin taman tein kinextia “uelis tikixmatiske [...] ika por ne itachijchiualuan ten Yejuatsin kichijchiuak. Porin kuali tikitstinemij itachijchiu de Dios desde kuak Yejuatsin kitsineualtij in taltikpak” (Romanos 1:20). “Yejuatsin Akin kichijchiuak taltikpak ika ichikaujkauelilis, Akin ika itamatilis kichijchiuak taltikpak kampa motachiua uan Akin ika itaajsikamatilis kipatauak iluikak.” (Jeremías 10:12.) Itachijchiualis tein kualtsin no technextilia ke Dios semi techtasojta.

Xikonnemili keniuj semi techpaleuia maj Jiova techchijchiuani “kemej yejuatsin tamati” (Génesis 1:27). Ijkon ueli tiknextiaj kualtsitsin taman tein yejuatsin kinextia. Uan no uelis tikajsikamatiskej tein kinemilia uan itanauatiluan. Keman tikintakamatij, okachi tiyolpakij. Uan no, uelis kuali iuan timouikaskej.

Taltikpak kinextia ke Jiova semi techtasojta. Pablo, se imomachtijkauj Jesús, kijtoj ke “Dios ipa kinnextilijtiualaya in taltikpakuani akoni Yejuatsin kuak [...] kinualtitaniliaya in kioutsin uan kinmaktiliaya kuajkuali takilome [...,] uel miak in takualis para nanixuitoske uan para nanmoyolpaktijtoske” (Hechos 14:17). Dios kichijchiuak taltikpak ika nochi tein techpaleuiskia maj tiyoltokan uan maj tiyolpakikan. Nejin kinextia nochi tein techmakas satepan.

Jiova kichijchiuak taltikpak kemej ueliskia nochipaya nikan tinemiskej. Biblia kijtoua ke “taltikpak kinmaktilij ininkoneuan taltikpakneminij” uan ke “amo sayoj nenkaj kichijchiuak, ta kichijchiuak maj ompa nemikan” (Salmo 115:16; Isaías 45:18). ¿Akonimej itech nemiskiaj uan kanachi tonalmej? Biblia kijtoua: “Akin yolmelaujkej ininaxkatis taltikpak, uan ompa nemiskej nochipaya” (Salmo 37:29).

Jiova kinchijchiuak Adán uan Eva maj neminij nochipaya. Kintalij itech se xochital kampa ‘tatokaskiaj uan kiyekpiaskiaj’ (Génesis 2:8, 15). Dios kinnauatij se taman tein kinyolpaktiskia: “Xikinpiakan konemej uan ximomiakilikan, ximomoyauakan itech taltikpak uan xikixyekanakan” (Génesis 1:28). Yejua ika, Adán uan Eva ueliskiaj yolpakiskej nochipaya itech taltikpak. Sayoj ke, tetayokoltij tikijtoskej ke kiixtalijkej amo kitakamatiskej Dios uan amo uelikok pouij iniuan “akin yolmelaujkej” akin “ininaxkatis taltikpak”. Sayoj ke, kemej tikitaskej satepan, tein kichiujkej amo kipatak kemej Jiova kiixtalij maj tinemikan itech taltikpak. Sayoj ke achto maj tikitakan okse taman tein yejuatsin kichiuani.

DIOS TECHMAKAK IAMATAJKUILOL

¿Keyej Jiova techmakak iTajtol, Biblia? Yekinika, porin kineki maj tikixmatikan (Proverbios 2:1-5). Melauak ke Biblia amo kinankilia nochi tein timotajtaniaj kemej tamati Dios uan nion se amatajkuilol kinankilia (Eclesiastés 3:11). Sayoj ke, nochi tein kijtoua techpaleuia maj tikixmatikan. Ueli tikmatij keniuj tamati Dios porin tikitaj keniuj techpaleuia uan akonimej kiyolpaktiaj (Salmo 15:1-5). Tikmatij keniuj kineki maj tikueyichiuakan, katiyejua itanauatiluan uan keniuj kiita se kitemos se kipias miak taman. Uan no, Biblia techpaleuia maj okachi tikixmatikan toTachijchiujkauj ika tein iKonetsin, Jesucristo, kijtoj uan kichiuak (Juan 14:9).

Jiova no techmakak iTajtol porin ompa techiluia keniuj uelis tiyolpakiskej. No techiluia keniuj tiyolpakiskej kemej kalyetouanij, keniuj kuali timomachiliskej uan keniuj amo semi timotekipachoskej. Kemej tikitaskej satepan, Biblia kinankilia netajtanilmej tein okachi motelnekij, kemej keyej onkak miak tajyouilis uan toni panos satepan. No kijtoua tein Dios kichiuani tein tapaleuia maj mochiua tein kiixtalijtok.

Onkak okseki taman tein kichiua maj tikmoujkaitakan tein Biblia kijtoua uan tein kinextia ke Dios kichiuak maj moijkuilo. Maski kijkuilojkej kemej 40 takamej kemej itech 1,600 xiujmej, nochi tein kijtoua amo moixnamiki (2 Timoteo 3:16). Seki uejkauj amatajkuilolmej mopata tein kijtouaj ijkon kemej panouaj xiujmej. Sayoj ke, tein kijtoua Biblia amo mopatani ijkon kemej nesi itech amatajkuilolmej tein yekinika moijkuilojkej. Uan no, Biblia kisentoka moajsi maski kitemouanij maj amo motajtolkepa, momoyaua uan maj moixtajtolti. Axkan, yejua amatajkuilol tein okachi monamaka uan momoyaua itech nochi taltikpak. Maj axkan tikpiakan Biblia kinextia ke iTajtol Dios “uejkaua nochipaya” (Isaías 40:8).

DIOS KINEXTIJ KE KICHIUAS TEIN KIIXTALIJTOK

Dios kitemakak se taman tein kitelpia ipatiuj tein ika kinextij ke senkis kichiuas tein kiixtalijtok. Kemej achto tikijtojkej, Dios kinekia maj tinemikan nochipaya nikan taltikpak. Sayoj ke, keman Adán amo kitakamatik, amo uelikok nemik nochipaya uan yejua ika ikoneuan no momikiliaj. “Itechkakopaka ne achtopa tagat Adán ten motajtakolmakak in tajtakol momauak ya tech nochi senmanauak. [...] Uan no ne mikilis mosouako uan takitskijtinemiko inpan nochi in taltikpakuani porin nochi in taltikpakuani motajtakolmakakke.” (Romanos 5:12.) Yejua ika, nesia ke tein Jiova kiixtalij amo mochiuaskia. Sayoj ke ¿toni kichiuak?

Tein kichiuak senkis kinextia kemej tamati yejuatsin. Kinextij melaujkayot uan kintatsakuiltij Adán uan Eva porin amo tatakamatkej. Sayoj ke kemej tetasojta, kichiuak tein techpaleuiskia satepan. Ika tamatilis, Jiova kiixtalij keniuj kiyektaliskia nejon kuejmol uan niman kijtoj keniuj kichiuaskia (Génesis 3:15). Itechkopa iKonetsin, Jesucristo, techkixtiliskia tajtakol uan mikilis. ¿Keniuj kichiuaskia?

Jiova kiixtalij kiyektalis nochi tein amo kuali tein kiualkuik itaixnamikilis Adán. Yejua ika, kiualtitanik Jesús nikan taltikpak maj tamachtiki tein techpaleuis maj tinemikan nochipaya uan no maj ‘kitemakani innemilis para [...] kinmakixtis nijin taltikpakuanij’a (Mateo 20:28; Juan 14:6). Jesús uelik techmakixtij porin amo kipiaya tajtakol kemej Adán uan nochipa kitakamatik Dios, hasta keman momikilij. Kemej Jesús amo kinamikia momikilis, Jiova oksepa kimakak nemilis uan kikauak maj mokepa iluikak. Ijkon, Jesús kichiuak tein Adán amo uelik kichiuak: techpaleuij maj akin tiktakamatij Dios tiuelikan tinemikan nochipaya. Maski Adán techpanoltilij tajtakol, “Totajtsin Dios techpouas ke tiyolchipauke timiakke [...] itechkakopaka se tagat ten monotsa Jesucristo porin Yejuatsin kitakamatik Itajtsin Dios” (Romanos 5:19). Ika inemilis Jesús tein kitemakak, Dios kichiuas tein motenkauak: maj tinemikan nochipaya nikan taltikpak.

Kemej Jiova kiyektalij kuejmolmej tein kiualkuik itaixnamikilis Adán techpaleuia maj okachi kuali tikixmatikan yejuatsin. Tikitaj ke amo teyi ueli kitsakuilia maj mochiua tein kiixtalia. ITajtol nochipa “mochiua” (Isaías 55:11). Jiova no kinextia ke semi techtasojta. “Dios technextilij ya ne itetasojtalistsin ijkuin: Dios techualtitanilij ya ne iyojtsin Konetsin nikan taltikpak para maj tejuan tikpiakan ne nachipa nemilis [...]. In tetasojtalis de Dios monextijtinemi ijkuin, ke amo tejuan achtopa tiktasojtakke Totajtsin Dios. Ta, achto Yejuatsin techtasojtak tejuan. Uan Yejuatsin techualtitanilij Nikonetsin yojtsin para ma Yejuatsin technekixtiltiki ka in mikilis den totajtakoluan.” (1 Juan 4:9, 10.)

Kemej Dios toka kitemakak iKonetsin, uelis tikyekmatiskej ke “techtayokolijtiyas nochi” tein motenkauak techmakas (Romanos 8:32). ¿Toni okseki taman motenkauak techmakas? Maj tikitakan.