¿Toni panos satepan?
¿Kemansa tikonnemiliani toni panos satepan? Biblia kijtoua ke amo uejkaua tikitaskej seki taman tein tikmoujkaitaskej uan techijtakos.
Jesús kijtoj keniuj ueliskia tikmatiskej “ke itekiuajyo Dios amo uejka yetok” (Lucas 21:31, TNM). Kijtoj ke mochiuaskiaj uejueyi neteuilismej, chikauak taloliniskia, miakej kipanoskiaj mayan uan onkaskiaj kokolismej. Ijkon mochiujtok axkan (Lucas 21:10-17).
Biblia no kijtoua ke achto ke tamiskiaj taltikpaktekiuajyomej, tel miakej kichiuaskiaj tein amo kuali. Xikonixtajtolti itech 2 Timoteo 3:1-5. ¿Melauj ke nejin tajkuilol senkis kinextia ke tel miakej tel amo kuali monejnemiltiskiaj?
¿Toni kijtosneki nejin? Ke amo uejkaua iTekiuajyo Dios tayektalis uan kichiuas maj kualtsin tinemikan (Lucas 21:36). Itech Biblia, Dios kijtoua ke kichiuas tein kuali nikan taltikpak uan maj kuali tinemikan. Maj tikitakan seki taman.
KIIXTALIJ SE KUALI TAIXYEKANALIS
Jesús “kimaktilijkej taixyekanalis, poujkaitalis uan tekiuajyot, uan ijkon xolalmej, altepemej uan akin tajtouaj tataman tajtolmej nochin kitekitiliskiaj sayoj yejua. Itaixyekanalis yejua se taixyekanalis tein uejkauas nochipaya uan amo keman panos, uan itekiuajyo se tein amo keman kiixpoloskej” (DANIEL 7:14).
Tein kijtosneki: Uelis tinemiskej ika yolpakilis keman noyampa taltikpak taixyekanas iKonetsin Dios.
AMO ONKASOK KOKOLISMEJ
“Nion se taltikpaknenkej kijtos: ‘Nimokokoua.’” (ISAÍAS 33:24.)
Tein kijtosneki: Amo keman tikpiaskejok se kokolis. Uelis tinemiskej nochipaya.
SENKIS ONKAS YOLSEUILIS
“Yejua kitamia neteuilismej noyampa taltikpak.” (SALMO 46:9.)
Tein kijtosneki: Amo mochiuaskejok neteuilismej uan senkis tiyolseujkanemiskej.
NOYAMPA TALTIKPAK SAYOJ MOAJSISKEJ AKIN YOLKUALMEJ
“Akin amo yolkualmej amo nemiskejok; [...] akin yolnejmachmej ininaxkatis taltikpak.” (SALMO 37:10, 11.)
Tein kijtosneki: Amo moajsiskejok akin amo yolkualmej, ta sayoj moajsiskej akin kinekij kitakamatiskej Dios.
NOCHI TALTIKPAK TAKUALTSINKAN YESKI
“Kinchijchiuaskej kalmej uan ompa chanchiuaskej, uan kitokaskej uvajmekat uan kikuaskej itakilo.” (ISAÍAS 65:21, 22.)
Tein kijtosneki: Nochi taltikpak takualtsinkan yeski. Dios kichiuas tein tiktajtanianij: maj mochiua itanejnekilis “nikan taltikpak” (Mateo 6:10, TNM).