Kampa monankilia netajtanilmej

◼ ¿Keniuj tinochin uelis titapaleuiskej maj amo teyi techkuejso keman timomachtijtoskej itech nechikolmej? (Deu. 31:12.)

Uelis tiknextiskej ke tikpoujkaitaj nechikolmej tein Jiova techmaka, komo tiajsij kualkan uan ijkon uelis tikakiskej tamachtilis. Semi kuali maj timotalikan taixpan uan maj tikinkauilikan maj motalikan taikampa akin kipiaj konemej, uan akin iksa ajsij tajkaj. Achto ke peuas nechikol, moneki tiktaliskej maj amo tsilini celular oso okseki teposmej tein uelis kinkuejsos takakinij. Komo tinochin tikajsikamatij ke itech nechikol tikueyichiujtokej Jiova, tikchiuaskej nochi tein uelis maj amo titakuejsokan (Ecl. 5:1; Fili. 2:4).

Keman tein yankuikej peuaj youij nechikolmej, se tokniuj tein kinixmati uelis imiuan motalis. Nejin okachi kinpaleuis kalyetouanij tein kinpiaj konemej tein ayamo momatij takakiskej. Kemej nejon kalyetouanij amo keman ijkon monechikouayaj, kitasojkamatiskej komo motaliaj taikampa. Ijkon, amo semi tapojpoloskej komo moneki kisaskej tepitsin itech nechikol uan ijkon kiitaskej tein kinpoloua konemej (Pro. 22:6, 15). Nejin kalyetouanij maj amo motalikan itech okse sala kampa konemej momachiliskej ke uelis kakistiskej. Xa okachi kuali maj kisa tepitsin tepopaj oso temomaj uan maj kintakakilti oso maj kinita tein kinpoloua, uan satepan oksepa maj kinuika kampa mosentilijtokej.

Tayektalianij tapaleuiaj maj amo teyi takuejso itech kali kampa titaueyichiuaj. Ika yemanik tajtolmej kiniluiaj kani motaliskej kalyetouanij uan tein iksa ajsij tajkaj. No kitemouaj keniuj amo tapojpoloskej keman kinuikaj kampa motaliskej. Yejuan kuali kinemiliaj toni kichiuaskej keman panoua teisa tein takuejsoua. Uan komo se konet kinpojpolojtok oksekin, yejuan tapaleuiaj ika miak pakilis.

Kemej tikitaj, tinochin itech nechikol uelis titapaleuiskej maj amo teyi takuejso, keman ika timomachtijtokej Jiova uan tein kiualkuis nikan taltikpak kampa onkas yolseuilis uan tein melauak (Heb. 10:24, 25).