¿Keyej moneki timosentiliskej keman tikueyichiuaj Dios?

1-3. 1) ¿Keniuj tikmatij ke itekitikauan Dios nochipa kiitanij ke motelnekij nechikolmej? (Xikonita taixkopin ipeujyan tamachtilis.) 2) ¿Toni tikitaskej itech nejin tamachtilis?

CORINNA kipiaya 17 xiujmej keman tekiuanij uejka kitsakuatoj imomaj kampa kichikaujkauiayaj maj tel tekiti. Satepan Corinna no kiuikakej tel miak kilómetros uejka hasta Siberia. Ompa kiteltekitiltiayaj kampa kiniskaltiayaj tapialmej. Kemansa kichikaujkauiayaj maj tekiti kalampa keman tel taseseyaya uan amo semi miak taken kimakayaj tein kipaleuiskia maj amo tel sekui. Maski ijkon, Corinna uan okse tokniuj siuat kiixtalijkej ke kichiuaskiaj nochi tein ueliskiaj uan yaskiaj se nechikol tein mochiuaya uejka kampa tekitiaj.

² Nejin ome tokniuan kiskej tiotakpa uan nejnenkej 25 kilómetros hasta kampa kisaya tren. Corinna kijtoj: “Tren kisak ome hora kualkan, uan ojtokak chikuasen hora. Keman titemokej, monekik tinejnemiskej 10 kilómetros hasta kampa mochiuaskia nechikol”. Corinna amo moyolkokoj porin tel uejka ojtokak. Yejua kijtoj: “Itech nechikol timomachtijkej amaix Tanejmachtijkej uan timokuikatijkej nekuikatilmej tein ika titaueyichiuaj. Nejon techtelpaleuij uan kichikauak totakuaujtamatilis”. Eyi tonal satepan mokepkej kampa tekitiaj. Uan akin ompa tajpiaya amo keman kimatik ke kiskaj.

³ Itekitikauan Dios nochipa kiitanij ke motelnekij nechikolmej. Kemej neskayot, yekinika itatojtokakauan Cristo kiteluelitayaj monechikoskej uan kisenueyichiuaskej Jiova uan momachtiskej keniuj tamati (Hech. 2:42). Amo tiomeyolouaj ke tinochin tikteluelitaj tiyaskej nechikolmej. Sayoj ke sekin xa techouijmaka tiyaskej nochi nechikolmej. Tisekimej xa moneki titekitiskej miak horas, xa moneki tikchiuaskej tel miak taman oso xa titelsioujtokej. ¿Toni techpaleuis maj amo titapolokan?^[1] ¿Keniuj uelis tikinyolchikauaskej akin tikinmachtiaj uan oksekin maj yakan nechikolmej? Itech nejin tamachtilis tikitaskej eyi taman. Yekinika, keyej semi kuali maj tiyakan nechikolmej. Ojpatika, keyej kinpaleuia oksekin keman tiyouij nechikolmej. Uan expatika, keyej Jiova kiyolpaktia maj tiyakan nechikolmej.^[2]

KEYEJ SEMI KUALI MAJ TIYAKAN NECHIKOLMEJ

4. ¿Keniuj techpaleuiaj nechikolmej maj okachi kuali tikixmatikan Jiova?

⁴ Porin nechikolmej techmachtiaj. Nechikolmej techpaleuiaj maj okachi kuali tikixmatikan Jiova. ¿Keniuj? Kemej neskayot, keman timomachtijkej amatajkuilol “Xiksentokakan itech inetasojtalis Dios” itech Nemachtil ika Biblia itech Nechikol, ¿toni tikmachiliayaj keman ika titajtouayaj ikualneskayouan Dios uan tikakiaj keniuj tokniuan kitasojtaj? Tein melauj, nejon kichiuaya maj okachi tiktasojtakan Jiova. Uan no, itech nechikolmej okachi tikixmatij tein tamachtia Biblia keman kuali tikakij tanojnotsmej tein motemakaj, ixneskayomej uan tajkuilolmej tein tikixtajtoltiaj (Neh. 8:8). Uan nochi semanas tikajsikamatij miak taman tein motelneki keman timomachtiaj capítulos tein ixyetok moitas itech semana uan keman tikakij tein tokniuan tanankiliaj.

5. ¿Keniuj nechikolmej mitsonpaleuianij itech tanojnotsalis uan no xikonchiua tein tionmomachtia itech Biblia?

⁵ Nechikolmej techpaleuiaj maj tikitakan keniuj uelis tikchiuaskej tein timomachtiaj itech Biblia (1 Tes. 4:9, 10). Kemej neskayot, xa itech se nechikol tikitakej se tamachtilis itech amaix Tanejmachtijkej tein techyolchikauak maj okachi tiktekitilikan Jiova, maj okachi kuali tikchiuakan tonetataujtiluan oso maj tiktapojpoluikan se tokniuj akin teisa techchiuilij. Uan itech nechikol tein tikpiaj itajkotian semana timomachtiaj keniuj titanojnotsaskej uan tikinmachtiskej oksekin tein yekmelauj tamachtia Biblia (Mat. 28:19, 20).

6. ¿Keniuj techyolchikauaj nechikolmej?

⁶ Porin nechikolmej techyolchikauaj. Nochi tein kiixyekana Satanás kitemoua maj tikpolokan totakuaujtamatilis uan maj tiyolkuetauikan. Sayoj ke nechikolmej techyolchikauaj maj tiksentokakan tiktekitilikan Jiova (xikonixtajtolti Hechos 15:30-32). Miakpa, itech nechikolmej ika titajtouaj keniuj mochiuakya seki taman tein uejkaujya moijkuiloj itech Biblia. Nejin techpaleuia maj okachiok tikneltokakan ke Jiova kichiuas nochi tein motenkaujtok. Uan no, tokniuan techyolchikauaj keman kitemakaj tanojnotsmej uan kipanoltiaj ixneskayomej, sayoj ke no keman tanankiliaj uan keman mokuikatiaj iixpan Jiova ika nochi ininyolo (1 Cor. 14:26). Komo titajtouaj iniuan tokniuan achto ke peuas nechikol uan satepan ke tamis no se taman tein techyolchikaua, porin tikitaj ke tikpiaj miakej totasojikniuan akin toka motekipachouaj (1 Cor. 16:17, 18).

7. ¿Keyej motelneki maj tiyakan nechikolmej?

⁷ Porin itech nechikolmej, Dios techpaleuia ika iyektikatsin espíritu. Jesús kitekitiltia iyektikatsin espíritu Dios uan ika kinixyekana nechikolmej. Yejua kijtoj ke nochin tokniuan moneki “ma kiyekakilikan ne tanojnotsalis tenika in [y]ektikatsin [e]spíritu kinnojnotstok” (Apoc. 2:7). Yektikatsin espíritu uelis techpaleuis maj amo tikchiuakan tein amo kuali, maj titanojnotsakan ika yolchikaualis uan maj kuali titaixpejpenakan. Yejua ika motelneki maj tikchiuakan nochi tein uelis tein techpaleuis maj tiyetokan itech nochi nechikolmej. Ijkon tikseliskej nepaleuil tein Dios techmaka ika iespíritu.

KEYEJ KINPALEUIA OKSEKIN KEMAN TIYOUIJ NECHIKOLMEJ

8. ¿Keniuj kinpaleuia oksekin keman techitaj itech nechikolmej, kikakij totanankililuan uan keman timokuikatiaj? (No xikonita kampa kijtoua “Nochipa okachi kuali momachilia keman mokepa kalijtik”.)

⁸ Porin itech nechikolmej ueli tikinnextiliaj tokniuan ke tikintasojtaj. Miakej tokniuan kixikojtokej uejueyi ouijkayomej. Tatitanil Pablo kijkuiloj: “Moneki ma tiktemolijtiyakan de keniu timopaleuijtiyaske se uan okse” (Heb. 10:24, 25). Ika nejin tajtolmej, Pablo kinekik kiteajsikamatiltis ke moneki timotekipachoskej se uan okse. Se taman kemej ueli tikchiuaj nejin yejua keman timonechikouaj uan timoyolchikauaj. Keman tiyouij nechikolmej, tikinnextiliaj tokniuan ke tiknekij iniuan tiyetoskej, iniuan titajtoskej uan tikmatiskej keniuj momachiliaj. No tikinyolchikauaj ika totanankililuan uan keman timokuikatiaj iixpan Jiova ika nochi toyolo (Col. 3:16).

9, 10. 1) Xikonmelaua keyej tein kijtoj Jesús itech Juan 10:16 techpaleuia maj tikajsikamatikan keyej motelneki maj tiyakan nechikolmej. 2) ¿Keniuj kinpaleuia tokniuan akin ininchankauan kinixtopeujkej komo tiyouij nechikolmej?

⁹ Porin keman tiyouij nechikolmej, titapaleuiaj maj amo tixexeliujtokan (xikonixtajtolti Juan 10:16). Jesús kijtoj ke yejua kemej yeskia se ichkatajpixkej uan ke itatojtokakauan kemej yeskiaj se oloch ichkamej. Keman ichkamej pouij sayoj seko, nochipa senyetokej uan kitojtokaj ichkatajpixkej. Sayoj ke komo ome ichkamej yetokej ikuapan se tepet, ome moajsij itech se atauit uan se ichkat okseko moajsi, ¿melauj ke amo tikijtoskiaj ke nejon makuil ichkamej pouij sayoj seko? No ijkon, komo tiknekij tipouiskej itech “sayo se sen oloch” uan tiktojtokaskej “sayo se tapixke”, moneki nochipa tiyaskej nechikolmej uan ijkon uelis tiyetoskej iniuan tokniuan.

¹⁰ Nechikolmej techpaleuiaj maj amo tixexeliujtokan uan maj tipouikan kemej kalyetouanij akin motasojtaj (Sal. 133:1). Seki tokniuan inintatuan oso ininikniuan kinixtopeujkej porin mochiujkej itaixpantijkauan Jiova. Sayoj ke Jesús motenkauak ke kinmakaskia akin kintasojtaskiaj uan kinyekpiaskiaj akin mochiuaskiaj kemej ininchankauan (Mar. 10:29, 30). Komo amo timopolouiliaj nechikolmej, nejin tokniuan uelis techitaskej kemej tiinintatuan oso tiininikniuan uan moyolchikauaskej. Komo titanemiliaj itech nejin, tikchiuaskej nochi tein uelis uan ijkon amo timopolouiliskej nion se nechikol.

KEYEJ JIOVA KIYOLPAKTIA MAJ TIYAKAN NECHIKOLMEJ

11. ¿Keniuj techpaleuiaj nechikolmej maj tikmakakan Jiova tein kinamiki?

¹¹ Porin itech nechikolmej tikmakaj Jiova tein kinamiki. Kemej Jiova techchijchiuak kinamiki maj tiktasojkamatilikan uan maj tikueyichiuakan (xikonixtajtolti Apocalipsis 7:12). Tikchiuaj nejin itech nechikolmej keman tiktataujtiaj, timokuikatiaj iixpan uan ika titajtouaj. Nochi semanas tikpiaj ueyi tatiochiualis tikueyichiuaskej Jiova.

12. ¿Keniuj momachilia Jiova keman tiktakamatij itanauatil tein kinextia ke moneki timonechikoskej?

¹² Kemej Jiova techchijchiuak, no kinamiki maj tiktakamatikan. Yejuatsin technauatia maj nochipa timonechikokan, okachiok axkan ke amo uejkauaok kiixpolos tein amo kuali. Jiova semi yolpaki keman tiktakamatij nejin tanauatil (1 Juan 3:22). Yejuatsin kimati nochi chikaujkayot tein tikchiuaj keman tiyouij nechikolmej uan kipatiuita (Heb. 6:10).

13, 14. ¿Keniuj techpaleuiaj nechikolmej maj timotokikan iuan Jiova uan Jesús?

¹³ Porin keman timonechikouaj, tiknextiliaj Jiova ke tiknekij okachi timotokiskej iuan uan iuan iKonetsin. Itech nechikolmej timomachtiaj Biblia uan tikitaj tein Jiova kineki maj tikchiuakan (Is. 30:20, 21). Hasta sekin akin amo kitekitiliaj Jiova uan uitsej nechikolmej kiajsikamatij ke yejuatsin techixyekana (1 Cor. 14:23-25). Kemej Jiova taixyekana itech nechikolmej ika iyektikatsin espíritu, tein timomachtiaj ompa ualeua itech. Yejua ika, keman tiyouij nechikolmej ueli tikakij Dios uan tikmachiliaj keniuj techteltasojta. Ijkon, okachi timotokiaj iuan.

¹⁴ Jesús yejua akin taixyekana itech nechikol. Yejua kijtoj: “Kampa mosentiliske se ome eyi den notaneltokakauan ika in chikaualis de notokaytsin, ompa Nejuatsin niyetos tatajkoyan de yejuan” (Mat. 18:20). Biblia no tamachtia ke Jesús taixyekana itech nechikolmej (Apoc. 1:20–2:1). Yejua ika keman tiyouij nechikolmej, okachi timotokiaj iuan Jesús. Amo tiomeyolouaj ke Jiova uan Jesús touan yetokej uan techyolchikauaj keman tiyetokej itech nechikolmej. ¿Keniuj tikonnemilia ke momachilia Jiova keman kiita nochi chikaujkayot tein tikonchiua porin tikonneki tionmotokis iuan uan iuan iKonetsin?

15. ¿Toni tiknextiliaj Jiova keman tiyouij nechikolmej?

¹⁵ Porin keman tiyouij nechikolmej, tiknextiliaj Jiova ke tiknekij tiktakamatiskej. Yejuatsin amo techchikaujkauia maj tiktakamatikan itanauatil tein kinextia maj timonechikokan (Is. 43:23). Yejua ika, ¿toni tikchiuaskej komo toteko techtajtania maj titeltekitikan uan amo ueliok tiyouij nochi nechikolmej? ¿Toni tikchiuaskej komo tekiuanij kiixtaliaj ke techtaxtaualtiskej komo timonechikouaj, techtsakuaskej oso okachi techtatsakuiltiskej? ¿Toni tikchiuaskej komo tiknemiliaj timopolouiliskej se nechikol porin tiknekij tikchiuaskej okse taman? Keman panoua nejin moneki tikixpejpenaskej toni tikchiuaskej (Hech. 5:29). Komo tikixtaliaj tiktakamatiskej Jiova uan tiyouij nechikolmej, tiknextiliaj ke tiktasojtaj uan ke tikajsikamatij ke yejuatsin kinamiki techiluis toni tikchiuaskej (Rom. 6:17). Nejin kichiuas maj Jiova semi yolpaki (Prov. 27:11).

MAJ NOCHIPA TIYAKAN NECHIKOLMEJ

16, 17. 1) ¿Keniuj tikmatij ke tokniuan itech yekinika siglo kiitayaj ke motelnekia monechikoskej? 2) ¿Keniuj kiitaya nechikolmej tokniuj George Gangas?

¹⁶ Satepan keman panok iluit Pentecostés itech xiuit 33, itatojtokakauan Cristo “momachtijtiayaj uan kitakamatiayaj nochi in tajtolme ten in tatitanilme de Jesús kinnextiliayaj. [...] Uan no nochi in tokniuan mosentiliayaj” (Hech. 2:42). Uan kisentokakej monechikojkej maski tekiuanij romanos uan akin taixyekanayaj itech inintaneltokalis judíos kintajyouiltijkej. Ouij kinkisak, sayoj ke kichiujkej nochi tein uelkej uan kisentokakej kichiujkej nechikolmej.

¹⁷ Itech nejin tonalmej, tiitekitikauan Jiova no semi timotasojkamatij porin ueli tikpiaj nechikolmej. Maj titanemilikan itech ineskayo tokniuj George Gangas, akin pouik iniuan Oloch Taojtokaltianij panoua 22 xiujmej. Yejua kijtoj ke semi kiyolchikauaya monechikos iniuan tokniuan uan ke kiitaya ke katka “se taman tein okachi teualkuilia yolpakilis”. Nochipa keman uelia, kiuelitaya kualkan ajsis itech Kali kampa tiMosentiliaj uan amo niman kisaya keman tatamia. Kemej semi kiyolpaktiaya tajtos iniuan tokniuan, kijtoj: “Keman iniuan niyetok nikmachilia ke niyetok nochan iniuan nochankauan”. Kimachiliaya kemej yeskia nemiaya itech Xochital. Uan no kijtoj ke kitelnekia monechikos iniuan iikniuan.

18. 1) ¿Keniuj tikonita tejuatsin nechikolmej? 2) ¿Toni tikonixtalijya tikonchiuas?

¹⁸ Uan tejuatsin, ¿tionmomachilia kemej tokniuj Gangas? Komo ijkon, xikonsentoka xikonchiua nochi tein tionuelis uan ijkon tionyetos iniuan mokniuan itech nechikolmej, maski kemansa ouij yeski. Xikonnextili Jiova ke no tionmomachilia kemej tekiuaj David, akin kijtoj ke kitasojtaya kali kampa kiueyichiuaya Jiova (Sal. 26:8).