Kualneskayomej tein tiknextiaj keman tiyouij nechikolmej

1, 2. 1) ¿Toni kiita Jiova keman tel miakej mosentiliaj uan kielnamikij imikilis Cristo? (Xikonita taixkopin ipeujyan tamachtilis.) 2) ¿Toni tikitaskej itech nejin tamachtilis?

¿TONI kiita Jiova keman tel miakej millones mosentiliaj noyampa taltikpak porin kielnamikij imikilis Cristo? Amo sayoj kiita ke tel miakej, ta kinita sejsemej akin youi. Kemej neskayot, kinita akin youij nochi xiujmej. Xa sekin youij maski kinteltajyouiltiaj. Oksekin amo youij nechikolmej nochi semanas, sayoj ke kiitaj ke motelneki yaskej keman moelnamiki imikilis Cristo. Jiova no kinita akin yekinika youij, xa porin kinekij kimatiskej toni mochiua.

² Jiova semi kiyolpaktia kiitas ke tel miakej mosentiliaj keman moelnamiki imikilis Cristo (Luc. 22:19). Sayoj ke, okachi kiyolpaktia kiitas keyej youij, uan amo kanachin youij. Itech nejin tamachtilis, tikitaskej se taman tein motelneki: ¿Keyej amo sayoj tiyouij keman moelnamiki imikilis Cristo, ta no itech nechikolmej tein Jiova kiixtalia maj kipiakan nochi semanas akin kitasojtaj? Maj tikitakan toni kualneskayomej techoliniaj maj tiyakan nechikolmej.

YOLYEMANILIS TECHOLINIA MAJ TIYAKAN NECHIKOLMEJ

3, 4. 1) ¿Keyej tiyouij nechikolmej? 2) ¿Toni kualneskayot tiknextiaj keman tiyouij nechikolmej? 3) Ijkon kemej kijtoua 1 Corintios 11:23-26, ¿keyej amo kuali yeskia maj amo tiyakan keman moelnamiki imikilis Cristo?

³ Tiyouij nechikolmej okachi porin poui itech totaueyichiualis. No tiyouij porin ijkuak Jiova techmachtia. Akin moueyinekij kinemiliaj ke amo akin uelis kinnextilis teisa (3 Juan 9). Sayoj ke, tejuan tiknekij maj Jiova techmachti itechkopa inechikol (Is. 30:20; Juan 6:45).

⁴ Keman tiyouij nechikolmej, tiknextiaj ke tiyolyemankej uan ke timokauaj maj Dios techmachti. Tiyouij keman moelnamiki imikilis Cristo porin tikitaj ke motelneki, uan no porin tiyolyemankej uan tiknekij tiktakamatiskej nejin itanauatil Jesús: “Nochi nijin xikchiuakan sayo para ika [nanechelnamikiskej]” (xikonixtajtolti 1 Corintios 11:23-26). Nejin nechikol techyekmatiltia ke melauak mochiuas tein tikchiaj uan techelnamiktia ke Jiova techteltasojta. Sayoj ke, yejuatsin kimati ke amo sayoj moneki techyolchikauaskej uan techyolseuiskej sayoj sepa itech xiuit. Yejua ika, kiixtalia maj tikpiakan nechikolmej nochi semanas uan technauatia maj tiyakan. Yolyemanilis techolinia maj tiktakamatikan. Miak horas itech semana timomachtiaj tein moitas itech nechikolmej uan timosentiliaj.

5. ¿Keyej akin yolyemankej kiseliaj itayoleualis Jiova?

⁵ Nochi xiujmej, Jiova kinyoleua taltikpakneminij maj kiixmatikan, uan miakej akin yolyemankej mokauaj maj kinmachti (Is. 50:4). Kemansa, yekinika youij keman moelnamiki imikilis Cristo uan ompa peua youij nochi okseki nechikolmej (Zac. 8:20-23). Akin tiktekitiliajya Jiova uan akin yankuikej techyolpaktia maj techixyekana uan maj techmachti Jiova, akin techpaleuia uan techmakixtia (Sal. 40:17). Tein melauj, amo onkak teisa tein okachi kuali uan okachi tayekantok ke tiyaskej nechikolmej kampa techmachtiskej Jiova uan Jesús, iKonetsin akin semi kitasojta (Mat. 17:5; 18:20; 28:20).

6. ¿Keniuj yolyemanilis kipaleuij se takat maj youi keman moelnamikik imikilis Cristo?

⁶ Xijxiujtika, timochikauaj tikinyoleuaskej tel miakej maj touan mosentilikan keman tikelnamikiskej imikilis Jesús. Miakej akin yolyemankej kiselianij nepaleuil porin touan mosentilijkej. Maj tikitakan se neskayot. Miak xiujmej achtoya, se tokniuj takat kimakak tayoleualis se takat, sayoj ke kijtoj ke amo ueliskia yas. Itech youak keman moelnamikik imikilis Cristo, tokniuj semi yolpakik keman kiitak ke ajsik itech Kali kampa tiMosentiliaj. Nejon takat kiteluelitak keniuj kitajpalojkej tokniuan uan yejua ika peuak youi nochi nechikolmej. Tein melauj, itech se xiuit sayoj expa amo yajki. ¿Toni kipaleuij maj kipata itanemilil uan kiixtalis yas nechikolmej? Tokniuj akin kiyoleuak kijtoj satepan: “Yejua semi yolyemanik”. Amo tiomeyolouaj ke Jiova kichiuak maj nejin takat poui itech ixolal. Axkan, yejua moauijya (2 Sam. 22:28; Juan 6:44).

7. ¿Keniuj techpaleuia maj tiyolyemankej tein timomachtiaj itech nechikolmej uan tein tikixtajtoltiaj itech Biblia?

⁷ Tein timomachtiaj itech nechikolmej uan tein tikixtajtoltiaj itech Biblia techpaleuia maj tiyolyemankej. Seki semanas achto ke moelnamikis imikilis Jesús, itech nechikolmej okachi timomachtiaj ineskayo uan yolyemanilis tein kinextij keman toka momikilij. Uan seki tonalmej achto, semi kuali komo tikixtajtoltiaj itech Biblia kampa ika motajtoua keman momikilij uan moajokuik. Nochi nejon kichiua maj okachi tiktasojkamatikan imikilis Jesús. Uan nejon techolinia maj tiyolyemankej kemej yejua uan maj tikchiuakan tein Dios kineki, hasta keman ouij techkisas (Luc. 22:41, 42).

YOLCHIKAUALIS TECHPALEUIA MAJ TIYAKAN NECHIKOLMEJ

8. ¿Keniuj kinextij Jesús ke katka yolchikauak?

⁸ Okse kualneskayot tein kinextij Jesús uan no tiknekij tiknextiskej yejua yolchikaualis. Maj tiknemilikan keniuj kinextij seki tonalmej achto ke kimiktiskiaj. Kuali kimatia ke kipijpinaujtiskiaj, kiuijuitekiskiaj uan kimiktiskiaj (Mat. 20:17-19). Maski ijkon, motemakak maj kimiktikan. Keman ajsik nejon tonal, kiniluij itatitaniluan akin amo kikaujkej uan iuan yetoyaj ompa Getsemaní: “Ximoketsakan uan tiyoue; porin uitsa ya ne naken nechtemaktis” (Mat. 26:36, 46). Uan keman tel miakej kikitskitoj, moketsak taixpan, kijtoj akoni katka uan kinnauatij tateuianij maj kinkauanij itatitaniluan maj yanij (Juan 18:3-8). ¿Melauj ke kinextij ke semi yolchikauak katka? Axkan, tokniuan taixpejpenalmej uan ‘okseki ichkamej’ timochikauaj tiyeskij tiyolchikaujkej kemej yejua. ¿Keniuj?

9. 1) ¿Keyej xa monekis maj tiyolchikaujkej uan ijkon tiyaskej nechikolmej? 2) ¿Keniuj tein tikchiuaj kinpaleuia tokniuan akin tsaktokej?

⁹ Xa tikpanotoskej seki taman tein kichiuas maj techouijmaka nochipa tiyaskej nechikolmej. Komo ijkon, moneki tiyeskij tiyolchikaujkej. Seki tokniuan motelkokouaj oso moteltayokoltiaj. Oksekin semi kintajyouiltiaj ininchankauan oso tekiuanij. Maj inintech titanemilikan tokniuan akin tsaktokej porin kiueyichiuaj Dios. ¿Tiknemilianijya ke tein tikchiuaj uelis kinpaleuis? (Heb. 13:3.) Keman kimatij ke tiksentokaj tiktekitiliaj Jiova maski tikpanouaj ouijkayomej, moyolchikauaj uan kisentokaj takuaujtamatij, yolchikaujkej uan kitakamatij Dios. Tatitanil Pablo kipanok nejon. Keman tsaktoya ompa Roma, yolpakia nochipa keman kikakia ke tokniuan kisentokayaj kitekitiliayaj Dios (Filip. 1:3-5, 12-14). Tepitsin achto ke kisaskia oso niman keman kisak, kintajkuilouilij tokniuan hebreos. Itech nejon amat kinnauatij maj kisentokanij mosentilianij uan kiniluij: “Xiksentokakan ximotasojtatiyakan se uan okse [...] keme nochi naniknime” (Heb. 10:24, 25; 13:1).

10, 11. 1) ¿Akonimej moneki tikinyoleuaskej maj touan mosentilikan keman tikelnamikiskej imikilis Cristo? 2) ¿Keyej kijtoua Efesios 1:7 ke moneki titayoleuaskej?

¹⁰ No tiknextiaj ke tiyolchikaujkej keman tikinyoleuaj maj touan kielnamikikan imikilis Cristo tochankauan, akin iniuan titekitij uan akin nemij kampa ika tejuan tinemij. ¿Keyej tikinyoleuaj? Porin tikteltasojkamatij tein Jiova uan Jesús toka kichiujkej. Uan no, tiknekij maj yejuan kimatikan keniuj uelis kinpaleuis iueyi teiknelilis Jiova ika imikilis Jesús (xikonixtajtolti Efesios 1:7; Rev. 22:17, TNM).

¹¹ Keman tiyouij nechikolmej, tiknextiaj okse kualneskayot tein motelneki, tein Jiova uan Jesús kinextianij kemej amo akin.

NETASOJTALIS TECHOLINIA MAJ TIYAKAN NECHIKOLMEJ

12. 1) ¿Keyej nechikolmej techpaleuiaj maj okachi tiktasojtakan Jiova uan Jesús? 2) ¿Keniuj uelis tikchiuaskej kemej Jesús, kemej kijtoua 2 Corintios 5:14, 15?

¹² Netasojtalis tein tikinpialiaj Jiova uan Jesús techolinia maj tiyakan nechikolmej. Uan tein ompa timomachtiaj techpaleuia maj tikchikauakan tonetasojtalis. ¿Keyej? Porin ompa miakpa techelnamiktiaj tein yejuan toka kichiuanij (Rom. 5:8). Keman tikelnamikij imikilis Cristo okachi tikelnamikij iueyi netasojtalis uan no ke kintasojta hasta akin ayamo kitasojkamatij imikilis. Tejuan semi timotasojkamatij, uan yejua ika timochikauaj tikchiuaskej kemej Jesús kemej timonejnemiltiaj (xikonixtajtolti 2 Corintios 5:14, 15). Uan no, toyolo techolinia maj tikueyichiuakan Jiova porin kitemakak iKonetsin. Se taman kemej tikueyichiuaj yejua keman titanankiliaj itech nechikolmej.

13. Xikonijto keniuj uelis tiknextiskej ke tikteltasojtaj Dios uan iKonetsin.

¹³ Tiknextiaj ke tikteltasojtaj Dios uan iKonetsin keman timotemakaj tikchiuaskej tein kinekij maski ouij techkisas. Miakpa, moneki tikchiuaskej miak chikaujkayot uan ijkon tiyaskej nechikolmej. Kemej neskayot, miakkan mochiua nechikol tiotakpa, keman xa tisioujtokej porin titekitikej. Uan okse nechikol mochiua itamian semana, keman taltikpakneminij moseuiaj. ¿Kiita Jiova ke tiyouij nechikolmej maski titelsioujtokej? Kemaj. Tein melauj, komo okachi timochikauaj, Jiova okachi kipatiuitas netasojtalis tein tiknextiliaj (Mar. 12:41-44).

14. ¿Toni tel kuali neskayot kikauak Jesús?

¹⁴ Jesús tel kuali kinextij keniuj se kitayekanaltis se kinpaleuis oksekin porin se kintasojta. Uan amo sayoj porin ininka momikilij itatojtokakauan, ta porin mojmostaj kitayekanaltij tein kinpaleuiskia. Kemej neskayot, iniuan mosentilij maski sioujtoya uan motekipachojtoya (Luc. 22:39-46). Uan kitayekanaltij tein ueliskia kinmakas oksekin, amo tein oksekin ueliskiaj kimakaskej yejua (Mat. 20:28). Komo no ijkon tikinteltasojtaj Jiova uan tokniuan, timochikauaskej tiyaskej keman moelnamikis imikilis Cristo uan nochi okseki nechikolmej.

15. ¿Akonimej okachi tiknekij tikinpaleuiskej?

¹⁵ Moajsi sayoj se oloch itatojtokakauan Cristo akin pouij kemej kalyetouanij. Tejuan ompa tipouij uan ika miak pakilis tikinyoleuaj oksekin maj no touan pouikan. Sayoj ke, okachi tiknekij tikinpaleuiskej “tokniuan taneltokani” akin amo monechikouajok nion tanojnotsajok (Gál. 6:10). Tikinnextiliaj ke tikintasojtaj keman tikinyoleuaj maj ualakan nechikolmej, okachiok keman moelnamiki imikilis Cristo. Ijkon kemej Jiova uan Jesús, techtelyolpaktia maj aksa akin amo monechikouayaok maj oksepa motoki iuan toTajtsin akin techyekpia kemej se ichkatajpixkej (Mat. 18:14).

16. 1) ¿Keniuj uelis timoyolchikauaskej se uan okse, uan keniuj techpaleuiskej nechikolmej? 2) ¿Keyej semi kuali maj itech nejin tonalmej tikelnamikikan itajtoluan Jesús tein moajsij itech Juan 3:16?

¹⁶ Itech nejin semanas, moneki tikinyoleuaskej nochin akin tiueliskej maj touan monechikokan keman tikelnamikiskej imikilis Cristo itech tonal viernes 19 metsti abril xiuit 2019 (xikonita kampa kijtoua “¿Tikinyoleuaskej oksekin?”). Uan itech nochi xiuit, maj timosenyolchikauakan keman nochipa tiyaskej nechikolmej. Okachi timotokiaj itech tonal keman ixpoliuis tein amo kuali. Yejua ika, motelneki maj tiyakan nechikolmej, tein techpaleuiskej maj tiksentokakan tiyolyemankej, maj tiyolchikaujkej uan maj titetasojtakan (1 Tes. 5:8-11). Maj tiknextilikan Jiova ke tikteltasojkamatij ueyi netasojtalis tein yejuatsin uan iKonetsin technextilianij (xikonixtajtolti Juan 3:16).