Carta tein kijkuiloj Oloch Taojtokaltianij
Tokniuan tein no nanitaixpantijkauan Jiova:
¡Se ueyi tatiochiualis maj tikuikakan itokay Dios Jiova akin okachi Ueyi Taixyekankej itech nochi! Nejon tokayit amo onkak okse ijkuitik, sesaj uan amo keman mopatas. Uan yejuatsin Jiova akin techmakak maj tikuikakan nejon tokayit tein ika timoteixmatiltiaj. Nejon senkis peuak itech xiuit 1931 (Isa. 43:10). Yejika nion tepitsin timopinaujmatij timotokaytiskej tiitaixpantijkauan Jiova.
Sayoj ke Amokuali senkis kitemoua keniuj kiixpolos itokay Dios. Taltikpakneminij akin kinixyekana, no ijkon kichiuaj. Uan Ueyi Babilonia, nochi taneltokalismej tein amo melaujkej tein moajsij itech nochi taltikpak, kikixtilia itech miak Biblias itokay Dios. Sayoj ke Jesús amo kichiuak nejon. Yejua kiueyitalij nejon tokayit, ta achto yejua kinextij itech netataujtil kemej se neskayot tein kinkauilij imomachtijkauan: “Namejuan moneki nankichiuaskej netataujtil ijkuin: ‘ToTajtsin tein tiyetok iluikak, maj moueyitali motokayʼ” (Mat. 6:9, NM). Ompa, itech se netataujtil kiiluij Jiova ika nochi iyolo: “Nikinixmatiltijya motokay takamej tein tinechinmakak tein kiskej itech taltikpakneminij” (Juan 17:6, NM). Tejuan no ika ueyi tanejnekilis, senkis tiknekij tikteixmatiltiskej itokay Dios noyampa taltikpak.
Texto tein mokuik itech xiuit 2009 ‘Maj ajsitok titetapouikan kuali tanauatilmejʼ, techyolchikauak maj senkis tikchiuakan itekiyo Dios (Hech. 20:24). Uan moyekitak ke Jiova tel senka kitiochiuak chikaujkayot tein tikchiujkej itech xiujtekit tein tiualpanokej, ta semi tikmoujkaitaj keniuj itech nochi taltikpak uelik tikteixmatiltijkej iTajtol Dios tein semi kiueyitalij itokay Dios Jiova. Uan no, okachi momiakilijkej tanojnotsanij, ajsik 7,313,173. Nochin yejuan tanojnotskej noyampa uan kinmachtijkej akin yolmelaujkej tein kinekij kimatiskej akoni uelis kitamis kuejmolmej tein tikpiaj mojmostaj. Uan 18,168,323 tein mosentilijkej keman tikelnamikkej imikilis Cristo, senkis kinextia ke achto ke tamis nochi tein amo kuali, tel miakejok satepan no kiteixmatiltiskej itokay Dios Jiova.
Hasta keman Jiova techkauas, ika ueyi tanejnekilis tiksentokaskej tikteixmatiltiskej kuali tanauatilmej, uan tikuiskej nochi taman tein techpaleuis maj tikinajsikan tein nemij kampa titanojnotsaj: kemej kajkalpan, itech ojti, ika carta, ika teléfono oso kampa timoajsiskej (Mat. 24:14; Mar. 13:10). Moneki maj tiksentokakan tikintapouikan itokay Jiova uan itanejnekilis nochi taltikpakneminij tein uelis.
Moajsi miak taman keyej tikijtoskej ke amo uejkaua Jiova senkis kiueyitalis itokay (Eze. 36:23). Ijsiujka motokijtok tonal keman nochin tein kimouispolouaj itokay Dios amo moajsiskejok. ¡Tel yolpakiskej nejon tonal itekitikauan Jiova tein amo kikauaj, akin kitetapouiaj itokay uan kipaleuiaj iueyi taixyekanalis itech iluikak uan taltikpak!
Jiova kinyekpia itekitikauan ika netasojtalis. Uan nejon senkis nesik itech uejueyi nechikolmej ijkon kemej uejueyi nechikolmej internacionales “¡Xitachixtokan!” tein mochiujkej noyampa taltikpak itech 2009. Nejon uejueyi nechikolmej yejua tein okachi moelnamikis itech itekiyo Dios. Uan techpaleuij maj kuali tikajsikamatikan ke motelneki senkis tikchixtoskej itonal Jiova (Mar. 13:37; 1 Tes. 5:1, 2, 4).
Moyekita ke Jiova tel yolkuali touan. Techmaka miak taman tein techyolpaktia, kichiua maj kemej eskia timoajsikan itech ixtauat, uan techuika kampa onkak miak at uan uelis ompa timoseuiskej (Sal. 23:1, 2; 100:2, 5).
Tokniuantsitsin, senkis xikelnamikikan ke Jiova kisentokas namechtatiochiuis komo nankisentokaj nankitekitiliaj.
Tamechtajkuilouiliaj ika ueyi netasojtalis.
Namokniuan,
Oloch Taojtokaltianij tein kinixyekanaj iTaixpantijkauan Jiova