Se tekit tein okachi motelneki
1. Komo tikitaj ke motelneki titanojnotsaskej, ¿toni techolinis maj tikchiuakan?
1 ¿Keyej miakpa techiluiaj maj tikuikan totonal, tochikaualis, uan totomin itech tanojnotsalis? ¡Porin yejua tekit tein okachi motelneki! Komo tiknemiliaj nochi tein kuali tein kiualkui tanojnotsalis, okachi tiknekiskej titeuantiskej itech tekit tein motelneki uan tein amo oksepa mochiuas (Hech. 20:24).
2. ¿Keniuj totanojnotsalis tapaleuia maj moueyitali itokay Jiova?
2 Kiueyitalia itokay Jiova. Ika tanojnotsalis okachi motematiltia ke iTekiuajyo Jiova tein moajsi imako Cristo, kinixpolos nochi taltikpak tekiuajyomej, uan senkis kitamis nochi tein kintajyouiltia taltikpakneminij (Mat. 6:9, 10). Senkis nesi ke sayoj Jiova uelis techkixtilis kokolis uan mikilis (Isa. 25:8; 33:24). Uan no, kemej tikuikaj itokay Jiova, keman kuali timonejnemiltiaj uan titanojnotsaj ika ueyi tanejnekilis, kinolinis oksekin maj kiueyichiuakan Jiova (1 Ped. 2:12). Yejika, ¡tel kuali timomachiliaj keman tikteixmatiltiaj itech nochi taltikpak itokay toTajtsin Jiova akin okachi Ueyi Taixyekankej! (Sal. 83:18.)
3. ¿Toni tein kuali kinualkuilia akin kiseliaj kuali tanauatilmej?
3 Kiualkui nemakixtilis. Jiova “amo kineki maj senmej ixpoliuikan. Ta, [...] kimonekiltia ke tinochin maj timoyolnemilikan de totajtakoluan” (2 Ped. 3:9). Sayoj ke komo amo akin kinmachtia, ¿keniuj kimatiskej toni kuali uan toni amo kuali? (Jon. 4:11; Rom. 10:13-15.) Keman se taltikpaknenkej kiselia kuali tanauatilmej uan kikaua tachiualismej tein teijtakoua, kipaleuia maj kipia se kuali nemilis uan kichia nemis nochipaya (Miq. 4:1-4). Kemej tikitaj, tiksentokaskej titekitiskej itech tanojnotsalis techpaleuia maj timomakixtikan tejuan uan akin techkakij (1 Tim. 4:16). ¡Se ueyi tatiochiualis titapaleuiskej itech tekit tein okachi motelneki!
4. ¿Keyej moneki tiksentokaskej titetapouiskej iTekiuajyo Dios uan tikinchiuaskej imomachtijkauan Jesús?
4 Amo uejkaua, keman ejkos ueyi tajyouilis, senkis tamis nochi tein amo kuali, sayoj makisaskej akin kiueyichiuaj Jiova. Yejika, titanojnotsaskej uan tikinchiuaskej imomachtijkauan Jesús, yejua tein okachi moneki tikchiuaskej ijsiujka porin tayekantok uan tel tapaleuia. ¡Maj tiktayekanaltikan nejon tekit itech tonemilis! (Mat. 6:33.)