Maj okachi tikuelitakan titanojnotsaskej ijkon kemej Jesús

1. ¿Toni tein kichiuaj itaixpantijkauan Jehová amo kichiuaj okseki taneltokalismej?

TIITEKITIKAUAN Jehová semi tikuelitaj titanojnotsaskej, amo kemej okseki taneltokalismej kampa kijtouaj ke kichiuaj kemej Cristo (Tito 2:14). Sayoj ke kemansa xa tisekimej amo semi tiknekij titanojnotsaskej. Xa timomachiliaj kemej se tokniuj akin tel kuali tekititok kemej tayekankej, yejua kijtoj: “Kemansa amo nikneki nitanojnotsas”.

2. ¿Keyej kemansa amo semi tikuelitaj titanojnotsaskej?

² Xa okachi tikuelitaj tikchiuaskej okseki taman para tiktekitiliskej Jehová ke titanojnotsaskej. ¿Keyej? Porin keman tikchijchiuaj se Kali kampa tiMosentiliaj, keman tikitaj maj amo uejueliui, keman tikinpaleuiaj tokniuan akin tajyouiaj oso tikinyolchikauaj, niman tikitaj keniuj tapaleuia tein tikchiuaj uan kuali timomachiliaj. Uan keman titekitij iniuan tokniuan, tiyolpakij uan tiknextiaj ke timotasojtaj, uan tikmatij ke yejuan semi motasojkamatij porin tikinpaleuiaj. Xa kampa ixyetok titanojnotsaskej miak xiujmejya ompa titanojnotsanij uan amo kuali techkakijok uan sekin hasta amo kuali technankiliajok. Uan no tikmatij ke okachi techixnamikiskej porin amo uejkaua ixpoliuiti nochi tein amo kuali (Mat. 10:22). ¿Toni techpaleuis maj tiksentokakan titanojnotsakan oso maj okachi tikuelitakan tikchiuaskej?

3. ¿Toni techmachtia de Jesús tein kijtoua Lucas 13:​6-9?

³ Semi techpaleuis maj tikuelitakan okachi titanojnotsaskej komo tikitaj tein Jesús kichiuak. Keman yejua yetoya nikan taltikpak amo keman mosenkauak, ta okachi tanojnotsaya (xikonlero Lucas 13:​6-9). Yejua kijtoj ke katka kemej takat akin kipiaya se higojkouit uan eyi xiuit kiyekpixtoya, sayoj ke amo keman takia. Jesús no ijkon kichiuak, eyi xiuit kisentokak kinnojnotsak judíos sayoj ke amo miakej mochiujkej imomachtijkauan. Maski ijkon yejua amo mosenkauak, ta kichiuak kemej nejon takat akin kisentokaya kichiaya maj taki higojkouit. Jesús kisentokak kinnojnotsak judíos para maj kineltokanij kuali tanauatilmej.

4. ¿Toni naui taman no uelis tikchiuaskej ijkon kemej Jesús?

⁴ Itech nejin tamachtilis tikitaskej keniuj kinextij Jesús ke kiuelitaya tanojnotsas, okachiok itech chikuasen metsti achto ke yaskia iluikak (Lucas 10:1). Tikitaskej naui taman tein Jesús kichiuak uan tamachtij tein techpaleuis maj okachi tikuelitakan titanojnotsaskej: 1) nochipa kichiuak tein Jehová kinekia, 2) kimatia tein Biblia kijtouaya ke mochiuaskia, 3) nochipa takuaujtamatik ke Jehová kipaleuiskia uan 4) amo kinemilij ke amo akin kikakiskia.

NOCHIPA KICHIUAK TEIN JEHOVÁ KINEKIA

5. ¿Keniuj kinextij Jesús ke kichiuaya tein Jehová kinekia?

⁵ Jesús semi kiuelitaya kiteixmatiltis “kuali tanauatilmej tein ika tajtoua iTaixyekanalis Dios” porin kimatia ke Jehová kinekia maj ijkon kichiua (Luc. 4:43). Yejua kiitaya ke semi monekia maj tanojnotsa. Uan ijkon kisentokak kichiuak hasta chikuasen metsti achto ke yaskia iluikak, yejua “panotiaya itech uejueyi xolalmej uan xolaltsitsin uan tamachtijtiaya” (Luc. 13:22). Uan no kinmachtij okseki imomachtijkauan para maj no tanojnotsakan (Luc. 10:1).

6. ¿Keniuj okseki tekimej tein tikchiuaj no tapaleuiaj maj motanojnotsa? (No xikonita taixkopimej).

⁶ Axkan semi moneki maj titanojnotsakan, uan Jehová uan Jesús kinekij maj ijkon tikchiuakan (Mat. 24:14; 28:​19, 20). Nochi tein tikchiuaj para tiktekitiliskej Jehová tapaleuia para maj motanojnotsa. Keman tikchijchiuaj Kalmej kampa tiMosentiliaj, titapaleuiaj para maj ompa kiueyichiuakan Jehová akin tikinnojnotsaj. Uan nochi tekit tein mochiua Betel uan itech okseki kalmej no tapaleuia maj motanojnotsa. Uan keman panoua se tetsauit tikinpaleuiaj tokniuan maj kipiakan tein kinpoloua para maj ueli oksepa mosentilikan uan maj tanojnotsakan. Maj tikelnamikikan ke Jehová kitelneki maj titanojnotsakan. Nejon techpaleuis maj nochipa titanojnotsakan keman tiueliskej. Se tayekankej de Hungría akin monotsa János, kijtoua: “Nochipa nimoelnamiktia ke maski tikchiuaskej okseki tekimej para tiktekitiliskej Jehová, okachi moneki maj titanojnotsakan”.

7. ¿Keyej Jehová kineki maj tiksentokakan titanojnotsakan? (1 Timoteo 2:​3, 4).

⁷ Komo ininka timotekipachouaj akin tikinnojnotsaj ijkon kemej Jehová kichiua techpaleuis maj okachi tikuelitakan titanojnotsaskej. Yejua kineki maj tel miakej kikakikan kuali tanauatilmej uan maj kiixmatikan (xikonlero 1 Timoteo 2:​3, 4). Kemej kuali tanauatilmej uelis kinpaleuis miakej maj momakixtikan, Jehová kineki maj kuali titamachtikan. Uan folleto Maj tikintasojtakan kijtoua keniuj uelis peuas titanojnotsaskej para maj satepan momachtikan Biblia uan maj mochiuakan imomachtijkauan Jesús. Uan hasta komo amo techkakij axkan, xa uelisok techkakiskej keman mochiujtos tetsaujkatajyouilis. Tein tikiniluiskej axkan xa yejua tein kielnamikiskej satepan uan xa kinekiskej kitekitiliskej Jehová. Yejua ika semi moneki maj tiksentokakan titanojnotsakan.

KIMATIA TEIN BIBLIA KIJTOUAYA KE MOCHIUASKIA

8. ¿Keniuj kipaleuij Jesús maj kimatini tein panoskia?

⁸ Jesús kimatia keniuj mochiuaskia tein Biblia ipa kijtojkaya, uan yejua ika kimatia ke sayoj tanojnotsaskia eyi xiuit uan tajko (Dan. 9:​26, 27). No kimatia kemanian uan keniuj yaya kimiktitij, porin achto moijtojkaya (Luc. 18:​31-34). Kemej kuali kimatia toni yaya panoti, Jesús kinekia okachi tanojnotsas para kichiuas tein Dios kinauatijka.

9. ¿Keyej komo timomachtiaj tein Biblia kijtojka ke panoskia techpaleuia maj okachi tikuelitakan titanojnotsaskej?

⁹ Keman tikajsikamatij keniuj mochiujtokya tein Biblia achto kijtojka uan tein mochiuasok satepan okachi tiknekiskej titanojnotsaskej. Tikmatij ke amo uejkaua ixpoliuisya tein amo kuali. Biblia kijtojka toni kichiuaskiaj miakej uan toni panoskia axkan, uan tikitaj ke ijkon mochiujtokya. Biblia no kijtoua ke “itech itamian tonalmej”, tekiuaj akin taixyekana sur uan tekiuaj akin taixyekana norte moteuiskiaj. Tikajsikamatij keniuj mochiujtok nejin keman tikitaj keniuj akin taixyekanaj Gran Bretaña uan Estados Unidos moteuijtokej iuan akin taixyekana Rusia uan okseki tekiuanij akin kipaleuiaj (Dan. 11:40). No tikajsikamatij ke imetsuan ueyi takat tein ika tajtoua Daniel 2:​43-45 kiixnextia Reino Unido uan Estados Unidos. Keman timomachtiaj tein kijtouaj nejin versículos, okachi tikneltokaj ke amo uejkaua iTaixyekanalis Dios kinixpolos nochin akin taixyekanaj nikan taltikpak. Nochi nejin kinextia ke amo uejkaua ixpoliuisya nochi tein amo kuali yejua ika semi moneki maj titanojnotsakan, ijkon tikchiujtoskej tein okachi moneki.

10. Keman tikajsikamatij tein Biblia kijtojka ke mochiuaskia axkan uan tein mochiuasok, ¿keniuj nejin techyolchikaua maj tiksentokakan titanojnotsakan?

¹⁰ Tein Biblia kijtoua ke mochiuas satepan no kichiua maj tiknekikan tikinmatiltiskej oksekin nejon. Se tokniuj siuat akin monotsa Carrie uan tapaleuijtok ompa República Dominicana, kijtoua: “Keman itech nitanemilia nochi tein Jehová motenkaua ke kichiuas, okachi nikneki nikiniluis oksekin. Keman nikita nochi tein kinpanoua, nimomaka cuenta ke yejuan no moneki kimatiskej tein Jehová motenkaua kichiuas”. Tein Biblia kijtojka ke mochiuaskia axkan techyolchikaua maj tiksentokakan titanojnotsakan porin tikmatij ke Jehová techpaleuijtok. Leila akin nemi Hungría kijtoua: “Isaías 11:​6-9 kinextia ke Jehová uelis kinpaleuis miakej maj mopatakan. Nejin nechpaleuia maj niksentoka niktematilti kuali tanauatilmej maski moita ke sekin amo kinekij techkakiskej”. Uan Christopher se tokniuj akin nemi Zambia, kijtoua: “Marcos 13:10 kijtoua ke kuali tanauatilmej motematiltiskiaj itech nochi taltikpak, uan nejua nikita ke se tatiochiualis maj ueli nitapaleui itech nejin tekit”. Uan tejuatsin, ¿toni tein kijtoua Biblia ke mochiuaskia mitsonpaleuia xikonsentoka xiontanojnotsa?

TAKUAUJTAMATIK KE JEHOVÁ KIPALEUISKIA

11. ¿Keyej Jesús monekia takuaujtamatis iuan Jehová para maj kinekini kisentokas tanojnotsas? (Lucas 12:​49, 53).

¹¹ Jesús takuaujtamatik ke Jehová kipaleuiskia maj kisentoka kinejneki tanojnotsas. Keman yejua tanojnotsaya, nochipa kinextiaya ke tapoujkaitaya, sayoj ke kimatia ke sekin kualaniskiaj uan kiixnamikiskiaj keman kikakiskiaj ke kiteixmatiltiaya iTaixyekanalis Dios (xikonlero Lucas 12:​49, 53). Uan no, akin taixyekanayaj itech taneltokalis amo kiuelitayaj tein ika tanojnotsaya Jesús yejua ika miakpa kinekkej kimiktiskej (Juan 8:59; 10:​31, 39). Maski ijkon, Jesús kisentokak tanojnotsak porin kimatia ke iTajtsin iuan yetoya. Yejua kijtoj: “Amo nietok noselti, ta noTajtsin akin nechualtitanik nouan yetok” (Juan 8:16). Uan no kijtoj: “Amo nechkauani noselti, porin nejua nochipa nikchiua tein yejua kiyolpaktia” (Juan 8:29).

12. ¿Toni Jesús kiniluij imomachtijkauan para maj kisentokanij tanojnotsanij maski kinixnamikiaj?

¹² Jesús kinelnamiktij imomachtijkauan ke ueliskia takuaujtamatiskej ke Jehová kinpaleuiskia. Kemej kimatia ke kinixnamikiskiaj, miakpa kinelnamiktij ke Jehová kinpaleuiskia (Mat. 10:​18-20; Luc. 12:​11, 12). Uan no, kiniluij maj motachilianij (Mat. 10:16; Luc. 10:3). No kiniluij ke amo monekia kinchikaujkauiskej komo amo kinekiaj kinkakiskej (Luc. 10:​10, 11). Uan kinyolmajxitij ke komo kinixnamikiaj monekia niman choloskej (Mat. 10:23). Maski Jesús takuaujtamatia iuan Jehová uan kiuelitaya tanojnotsas, yaya okseko keman kiitaya ke ueliskia kipanos tein amo kuali (Juan 11:​53, 54).

13. ¿Keyej uelis tikonneltokas ke Jehová mitsonpaleuis?

¹³ Axkan no miakej techixnamikij, yejua ika moneki maj Jehová techpaleui para maj tiksentokakan tiknekikan titanojnotsaskej (Apoc. 12:17). Tein Jesús motataujtij itech Juan capítulo 17 kinextia ke Jehová no techpaleuis tisejsemej. Yejua kitajtanij iTajtsin maj kinyekpiani itatitaniluan uan yejua kikakik. Amatajkuilol Hechos kijtoua keniuj Dios kinpaleuij itatitaniluan maj kinekikan tanojnotsaskej maski kinixnamikiaj. Keman Jesús motataujtij no kitajtanij Jehová maj kinyekpia akin satepan kineltokaskiaj tein tatitanilmej ika tanojnotsayaj, nejon kijtosneki ke no toka motataujtij. Yejua ika uelis tikneltokaskej ke Jehová kisentokas kikakis tein Jesús motataujtij uan techpaleuis ijkon kemej kinpaleuij tatitanilmej (Juan 17:​11, 15, 20).

14. ¿Keyej tikneltokaj ke uelis tiksentokaskej titanojnotsaskej maski ouij yeski? (No xikonita taixkopin).

¹⁴ Kemej amo uejkaua ixpoliuisya tein amo kuali, xa satepan okachi ouij yeski titanojnotsaskej. Sayoj ke Jesús techiluij ke Jehová nochipa techpaleuiskia maj tiksentokakan tiknekikan titanojnotsaskej (Luc. 21:​12-15). Ijkon kemej yejua uan imomachtijkauan, tejuan amo no tikinchikaujkauiaj oksekin maj techkakikan uan amo no iniuan timokualantiaj. Uan tokniuan akin nemij itech altepemej kampa amo techkauaj maj titanojnotsakan, yejuan kisentokaj tanojnotsaj porin takuaujtamatij iuan Jehová uan amo itech tein yejuan uelij kichiuaj. Ijkon kemej Jehová kinpaleuij tokniuan itech yekinika siglo, no techpaleuia maj titanojnotsakan para maj moteixmatilti “nochi tein kijtoua itajtol” ijkon kemej yejua kineki maj tikchiuakan (2 Tim. 4:17). Maj tikneltokakan ke komo titakuaujtamatij iuan Jehová tiktelnekiskej tiksentokaskej titanojnotsaskej.

AMO KINEMILIJ KE AMO KIKAKISKIAJ

15. ¿Keniuj tikmatij ke Jesús amo kinemiliaya ke amo akin kikakiskia?

¹⁵ Jesús kimatia ke miakej kikakiskiaj kuali tanauatilmej uan nejon kipaleuij maj yolpaki uan maj kisentoka tanojnotsa. Kemej se xiuit satepan ke Jesús peuak tanojnotsa, momakak cuenta ke miakej kinekiaj kikakiskej kuali tanauatilmej uan kijtoj ke yejuan katkaj kemej tatok tein chikauakya uan tein ueliskiaya se kisentilis (Juan 4:35). Kemej se xiuit satepan, kiniluij imomachtijkauan: “Onkak miak tatok tein moneki mosentilis” (Mat. 9:​37, 38). Satepan oksepa kiniluij: “Onkak miak tatok tein moneki mosentilis, […] xiktataujtikan akin iaxka tatok maj kintitani tekitinij maj kisentilikan itatok” (Luc. 10:2). Jesús kimatia ke miakej kikakiskiaj kuali tanauatilmej uan keman semej ijkon kichiuaya, semi yolpakia (Luc. 10:21).

16. ¿Keniuj tein kijtoj Jesús kinpaleuij imomachtijkauan maj kinekikan tanojnotsaskej? (Lucas 13:​18-21; no xikonita taixkopin).

¹⁶ Jesús kinpaleuij imomachtijkauan maj kinekikan tanojnotsaskej keman kiniluij ke amo nenkaj yeskia. Maj tikitakan ome taman tein ika kinnojnotsak (xikonlero Lucas 13:​18-21). Yejua kijtoj ke kuali tanauatilmej de iTaixyekanalis Dios tamati kemej se xinachtsin tein kiluiaj mostaza, tein mochiuaskia kemej se ueyi kouit. Nejin kijtosnekia ke miakej kinekiskiaj kikakiskej kuali tanauatilmej uan ke amo teyi kintsakuiliskia. No kijtoj ke kuali tanauatilmej katka kemej levadura porin miakkan moteixmatiltiskia. Uan maski amo niman moitaskia, kichiuaskia maj mopatakan akin kikakiskiaj. Ika nejin, Jesús kiniluij imomachtijkauan ke tein tanojnotsaskiaj kinpaleuiskia miakej.

17. ¿Keyej amo moneki tiknemiliskej ke amo akin techkakis keman titanojnotsaskej?

¹⁷ Keman tikitaj keniuj itech nochi taltikpak miakej kinpaleuijtok keman titanojnotsaj, techyolchikaua maj tiksentokakan ijkon tikchiujtokan. Sejse xiuit tel miak millones touan mosentiliaj keman tikelnamikij imikilis Cristo uan miakej peua momachtiaj Biblia. Uan no, tel miakej peua touan tanojnotsaj uan moauiaj. Amo tikmatij kanachimejok kiseliskej kuali tanauatilmej, sayoj ke kemaj tikmatij ke Jehová kinsentilijtok tel miakej para maj makisakan keman mochiujtos tetsaujkatajyouilis (Apoc. 7:​9, 14). Jehová yejua iaxka tatok uan kimati ke miakej kisentokaskej kikakiskejok kuali tanauatilmej. Yejua ika moneki maj tiksentokakan titanojnotsakan.

18. ¿Toni tiknekij maj kiitakan oksekin?

¹⁸ Akin yekmelauj imomachtijkauan Jesús semi kiuelitaj kitematiltiskej kuali tanauatilmej. Itatitaniluan semi kiuelitayaj tanojnotsaskej uan katkaj yolchikaujkej, yejua ika akin kinitayaj ‘kimatiaj ke iuan yetoyaj Jesús’ (Hech. 4:13). Tejuan no tiknekij maj oksekin kiitakan ke tikuelitaj titanojnotsaskej uan ke tiyolchikaujkej, ijkon xa kiitaskej ke tikchiujtokej kemej Jesús.