Tiksentokaj titanojnotsaj porin titetasojtaj

1. ¿Toni timomachtijkej itech nechikol tein mochiuak itech xiuit 2023?

¡SEMI kualtsin katka nechikol tein mochiuak itech xiuit 2023!a Ompa okachi kuali momelauak seki taman tein tikneltokaj uan motanauatij seki taman tein tikchiuaj itech tanojnotsalis. Techmelauilijkej ke sekin xa uelis kitekitiliskejok Jehová satepan ke ixpoliuis Ueyi Babilonia. No techiluijkej ke desde noviembre xiuit 2023 amo monekiaok tikijkuiloskej nochi tein tikchiuaj keman titanojnotsaj. ¿Kijtosneki ke amo semi monekiok maj titanojnotsakan? ¡Amo!

2. ¿Keyej ijkon kemej panotiuj tonalmej okachi moneki maj titanojnotsakan? (Marcos 13:10).

² Ijkon kemej panotiuj tonalmej okachi moneki maj titanojnotsakan. ¿Keyej? Porin amo uejkaua tamisya nochi tein amo kuali. Maj tikelnamikikan keniuj kijtoj Jesús ke titanojnotsaskiaj itech tonalmej keman tatamitiya (xikonixtajtolti Marcos 13:10). Itech amatajkuilol Mateo, kampa no ika tajtoua nejin, Jesús kijtoj ke kuali tanauatilmej moteixmatiltiskiaj itech nochi taltikpak achto ke “tatamis” (Mat. 24:14). Nejin kijtosneki keman ixpoliuis nochi tein kiixyekana Satanás. Jehová kiixtalijya “tonal uan hora” keman mochiuas tein kijtoj (Mat. 24:36; 25:13; Hech. 1:7). Uan ijkon kemej panotiuj tonalmej okachi amo poliuiok para mochiuas (Rom. 13:11). Sayoj ke, kemej ayamo ejko nejon tonal moneki tiksentokaskej titanojnotsaskej.

3. ¿Keyej titanojnotsaj?

³ Tinochin moneki timotajtaniskej nejin: ¿keyej tikteixmatiltiaj kuali tanauatilmej? Porin titetasojtaj. Keman titanojnotsaj tiknextiaj ke tiktasojtaj tein Biblia tamachtia, ke tikintasojtaj nochin uan ke tiktasojtaj Jehová uan itokay. Maj timomachtikan sejse taman.

TITANOJNOTSAJ PORIN TIKTASOJTAJ TEIN BIBLIA TAMACHTIA

4. ¿Toni tikchiuaj keman tikakij se kuali tanauatil?

⁴ ¿Tikonelnamiki keman aksa mitsoniluij teisa tein kuali? Xa mitsoniluijkej ke se mochankauj kipiak se pili oso aksa mitsonmakak tekit keman tikontemojtoya. ¿Keniuj tionmomachilij? Xa semi tionyolpakik uan hasta tikonnekia tikontapouis mochankauan uan akin kuali iniuan tionmouika. ¿No ijkon mitsonpanok keman tikonkakik kuali tanauatilmej?

5. ¿Keniuj tionmomachilij keman tionmomachtijtoya Biblia? (No xikonita taixkopimej).

⁵ No xikonnemili keniuj tionmomachiliaya keman mitsonmachtijtoyaj Biblia. Tionmomachtij ke Jehová mitsontasojta, ke kineki xikonueyichiua iniuan oksekin tokniuan, ke motenkaua kiixpolos nochi tein techtajyouiltia uan ke itech xochital kichiuas maj oksepa nemikan akin tikontasojta (Mar. 10:​29, 30; Juan 5:​28, 29; Rom. 8:​38, 39; Apoc. 21:​3, 4). Semi tikonuelitak nochi nejon tein tionmomachtij (Luc. 24:32). Tikontasojtak tein tionmomachtijtoya uan tikonnekia tikontapouis nochin (no xikonita Jeremías 20:9).

6. ¿Toni mitsonmachtia tein kipanok Ernest uan Rose?

⁶ Maj tikitakan tein kipanok se tokniuj takat akin monotsa Ernest.b Yejua kijtoua ke keman kipiaya majtakti xiuit, ipopaj momikilij. Yejua kijtoua: “Nimotajtaniaya ox nopaj yajka iluikak oso senkis ixpoliujka uan amo keman nikitaskiaok. Nikinnexikoluiaya okseki pipil akin kipiayaj inintatuan”. Yejua mojmostaj yaya kampa kitokkaj itat, motankuaketsaya uan motataujtiaya: “Dios, nikneki nikmatis kani yetok nopaj”. Keman kipiaya 27 xiujmej, kiluijkej ox kinekia momachtis Biblia, uan yejua niman kinekik. Kiuelkakik keman kimatik ke mikemej amo teyi kimatij, ke kemej yeskia kochtokej, uan ke Biblia kijtoua ke oksepa nemiskej (Ecl. 9:​5, 10; Hech. 24:15). Kiajsikamatik tein miak xiujmej kinekia kimatis. Semi yolpakia porin momachtijtoya tein yekmelauj tamachtia Biblia. Isiuatsin Rose no peuak iuan momachtia, uan no semi kiuelitaya. Satepan, itech xiuit 1978 moauijkej. Niman peuak kinnojnotsaj ininchankauan, akin kuali iniuan mouikayaj uan nochin akin kinekiaj kinkakiskej. Ijkon Ernest uan Rose uelini kinpaleuianij kemej 70 maj no kiixmatikan Jehová uan maj moauikan.

7. ¿Toni tikchiuaskej komo semi tiktasojtaj tein Biblia tamachtia? (Lucas 6:45).

⁷ Komo yekmelauj tiktasojtaj tein tamachtia Biblia, tiknekiskej ika titajtoskej (xikonixtajtolti Lucas 6:45). No timomachiliaj kemej tokniuan itech yekinika siglo akin kijtojkej: “Tiksentokaskej ika titajtoskej tein tikitanij uan tikakinij” (Hech. 4:20). Semi tiktasojtaj tein Biblia tamachtia uan tiknekij tikintapouiskej nochin akin tiueliskej.

TITANOJNOTSAJ PORIN TIKINTASOJTAJ OKSEKIN

8. ¿Keyej tiknekij tikinnojnotsaskej oksekin? (Xikonita recuadro “Maj tikintasojtakan akin tikinmachtiaj”; no xikonita taixkopin).

⁸ Ijkon kemej Jehová uan Jesús, tejuan no tikintasojtaj oksekin (Prov. 8:31; Juan 3:16). Tikinikneliaj akin amo kichiaj tein kuali uan akin ‘amo kiixmatij Dios’ (Efes. 2:12). Yejuan kemej yeskia atojtolojtokej porin kipiaj kuejmolmej uan tejuan tikpiaj tein kinpaleuis: kuali tanauatilmej tein ika tajtoua iTaixyekanalis Dios. Kemej tikintasojtaj uan tikinikneliaj tiknekij tikchiuaskej nochi tein tiueliskej para tikinnojnotsaskej. Nejon kinpaleuia maj kichiakan tein kuali, maj yolpakikan axkan uan ‘maj yekmelauj kualtsin nemikan’ nochipaya itech xochital (1 Tim. 6:19).

9. ¿Toni tikiniluiaj oksekin ke mochiuas amo uejkaua, uan keyej? (Ezequiel 33:​7, 8).

⁹ Kemej titetasojtaj tiknekij tikiniluiskej oksekin ke amo uejkaua tamis nochi tein amo kuali (xikonixtajtolti Ezequiel 33:​7, 8). Techyolkokoua tikitaskej keniuj akin tikinnojnotsaj uan tochankauan akin amo itaixpantijkauan Jehová kichiuaj tein kinekij uan amo kinekij kimatiskej tein amo uejkaua panos. Mateo 24:21 kijtoua ke “mochiuas se tetsaujkatajyouilis” tein ‘amo keman ijkon mochiuani desde keman peuak taltikpak hasta axkan, uan amo keman oksepa mochiuas’. Tiknekij maj kimatikan tein panos ijkuak: yekinika ixpoliuiskej nochi taneltokalismej tein takajkayauaj, uan satepan itech Armagedón, ixpoliuis nochi tein amo kuali (Apoc. 16:​14, 16; 17:​16, 17; 19:​11, 19, 20). Tiktajtaniaj Jehová maj miakej kinekikan techkakiskej uan maj kinekikan kitekitiliskej touan axkan. Sayoj ke, ¿toni kinpanos akin amo kinekiskej techkakiskej uan sekin xa yeskij tochankauan?

10. ¿Keyej motelneki maj tiksentokakan titanojnotsakan?

¹⁰ Kemej tikitakej itech okse tamachtilis, xa Jehová kinmakixtis akin moyolpataskej keman kiitaskej ke ixpoliui Ueyi Babilonia. Nejin techpaleuia maj tikajsikamatikan keyej moneki tiksentokaskej titanojnotsaskej. ¿Keyej? Maj tiknemilikan nejin: tein axkan tikiniluiskej xa yejua tein kielnamikiskej satepan (no xikonita Ezequiel 33:33). Xa kielnamikiskej tein tikiniluiaj uan kiixtaliskej touan kitekitiliskej Jehová achto ke ixpoliuis nochi tein amo kuali. Ijkon kemej kipanok tajpixkej de Filipos keman taneltokak porin chikauak talolinik. Xa axkan amo kinekij kikakiskej tein Biblia tamachtia, sayoj ke xa kinekiskej kikakiskej keman kemej yeskia ‘talolinis’ keman ixpoliuis Ueyi Babilonia (Hech. 16:​25-34).

TITANOJNOTSAJ PORIN TIKTASOJTAJ JEHOVÁ UAN ITOKAY

11. ¿Keniuj tikueyitaliaj uan tikueyichiuaj Jehová? (Apocalipsis 4:11; no xikonita taixkopimej).

¹¹ Tikteixmatiltiaj kuali tanauatilmej porin tiktasojtaj Jehová uan itokay. Keman titanojnotsaj no ika tikueyitaliaj Dios. No tiknemiliaj ke Jehová kinamiki ‘maj tikueyitalikan uan maj tikueyichiuakan’ (xikonixtajtolti Apocalipsis 4:11). ¿Keniuj tikueyitaliaj uan tikueyichiuaj? Keman tikinnextiliaj oksekin ke Jehová yejua akin kichijchiuak nochi uan kichiua maj tinemikan. ¿Uan keniuj tikmakaj tochikaualis? Keman titanojnotsaj nochi tein tiuelij uan tikuij totiempo, tochikaualis uan tein tikpiaj (Mat. 6:33; Luc. 13:24; Col. 3:23). Semi tikuelitaj ika titajtoskej Dios akin tiktasojtaj. Sayoj ke no tiknekij ika titajtoskej itokay uan tein kijtosneki. ¿Keyej?

12. ¿Keyej keman titanojnotsaj titapaleuiaj maj itokay Jehová yektik?

¹² Kemej tiktasojtaj Jehová, tiknekij maj itokay yektik (Mat. 6:​9, nota). Nejin kijtosneki ke tiknekij tikinmatiltiskej oksekin ke amo melauj tein Satanás kitakajkayauiliani Jehová (Gén. 3:​1-5; Job 2:4; Juan 8:44). Yejua ika keman tiouij titanojnotsatij, tiknekij tikiniluiskej akoni Jehová uan keniuj tamati yejuatsin. Tiknekij maj nochin kimatikan ke semi tetasojta, ke nochipa kichiua tein kuali yetok uan ke iTaixyekanalis kichiuas maj amo titajyouikanok, maj tiyolseujtokan uan maj tiyolpakikan (Sal. 37:​10, 11, 29; 1 Juan 4:8). Keman tikchiuaj nochi nejin, titapaleuiaj maj itokay Jehová yektik. Uan no tiyolpakij porin tikchiuaj tein moneki kichiuas se itaixpantijkauj Jehová. ¿Keyej tikijtouaj nejin?

13. ¿Keyej semi tikuelitaj maj techixmatikan kemej tiitaixpantijkauan Jehová? (Isaías 43:​10-12).

¹³ Jehová techixpejpenak maj tiitaixpantijkauan (xikonixtajtolti Isaías 43:​10-12). Seki xiujmej achto, tokniuan Oloch Taojtokaltianij kijkuilojkej nejin: “Semi techyolpaktia maj techixmatikan kemej itaixpantijkauan Jehová”.c Maj tiknemilikan ke aksa techpantia ke tikchiujkej tein amo kuali uan moneki maj aksa kijto ke tein techijtouilijkej amo melauj. Xa tikixpejpenaskiaj aksa akin kuali tikixmatij, iuan titakuaujtamatij uan akin kuali ika tajtouaj para maj kineltokilikan. No ijkon, kemej Jehová kuali techixmati uan touan takuaujtamati techixpejpenak para maj tikteixmatiltikan ke yejua Dios akin melauak. Semi tikuelitaj tiyeskij tiitaixpantijkauan, yejua ika tikteixmatiltiaj itokay uan tiknextiaj ke tein kijtouiliaj amo melauj. Ijkon tikchiuaj kemej se itaixpantijkauj Jehová (Sal. 83:18; Rom. 10:​13-15).

TIKSENTOKASKEJ TITANOJNOTSASKEJ HASTA KEMAN AMO MONEKISOK

14. ¿Toni tikchiaj maj pano amo uejkaua?

¹⁴ Techyolpaktia tikmatiskej tein panos amo uejkaua. Uan tiknekij maj Jehová okachi miakej kinpaleui maj kinekikan kimatiskej tein Biblia tamachtia achto ke peuas tetsaujkatajyouilis. Sayoj ke, no techyolpaktia tikmatiskej ke sekin xa no kinekiskej touan kiueyichiuaskej Jehová keman mochiujtos tetsaujkatajyouilis (Hech. 13:48).

15, 16. ¿Toni tiksentokaskej tikchiujtoskej, uan hasta kemanian?

¹⁵ Sayoj ke axkan tikpiaj se tekit tein moneki tikchiuaskej, moneki tikteixmatiltiskej kuali tanauatilmej itech nochi taltikpak, nejin amo keman oksepa mochiuas. Uan no, moneki tikinmatiltiskej oksekin ke amo uejkaua ixpoliuis nochi tein amo kuali. Keman Jehová taixejekos, sekin kielnamikiskej ke tein ika tikinnojnotsayaj yejua tein kinekia kinmatiltis (Ezeq. 38:23).

¹⁶ ¿Toni tiknekij tiksentokaskej tikchiuaskej? Kemej semi tiktasojtaj tein Biblia tamachtia, tikintasojtaj akin tikinnojnotsaj, uan okachiok Jehová uan itokay, tiksentokaskej nochipa titanojnotsaskej hasta keman Dios kijtos maj amo tikchiuakanok.