Tamatilis “monextijtiyas tech in chipaujkanemilis”
1. ¿Keniuj miakej kiitaj totanojnotsalis?
1 Kemansa itech tanojnotsalis tikajsij aksa akin amo kuali techselia. Xa kichiua nejon porin amo kuali techita, oso kitekakilia tein kinijtouiliaj itaixpantijkauan Jiova xa itech se amat oso okseko kampa kijtouaj sayoj tein taijtakoua. Itech seki altepemej hasta techijtouiliaj ke “titaixkuepanij”. ¿Keniuj monekiskia titanankiliskej?
2. ¿Toni techpaleuis maj amo timosenkauakan keman techijijtoskej?
2 Maj tikchiuakan kemej Jesús. Itech yekinika siglo, Jesús uan oksekin itekitikauan Jiova, amo kuali kinitayaj uan kinijtouiliayaj miak taman (Hech. 28:22). Sayoj ke yejuan amo kikaujkej maj nejon kinuikani maj mopinaujmatikan tanojnotsaskej. Jesús kijtoj ke tamatilis “monextijtiyas tech in chipaujkanemilis” (Mat. 11:18, 19). Yejika, ika ueyi tanejnekilis, Jesús kisentokak kichiuak itanejnekilis Dios uan senkis kineltokaya ke akin yekmelauj kineki kiajsis tein melauak, kiitas nepaleuil tein kiualkui kuali tanauatilmej. Tikelnamikiskej ke iKonetsin Dios no kipanok nejon, techpaleuis maj amo timosenkauakan.
3. ¿Keyej moneki maj amo tikmoujkakakikan komo techijtouiliaj tein amo melauak oso techixnamikij?
3 Jesús kijtoj ke taltikpakneminij kintauelitaskiaj itatojtokakauan ijkon kemej yejua kitauelitakej (Juan 15:18-20). Yejika, amo tikmoujkakakij komo techijtouiliaj tein amo melauak oso techixnamikij. Uan no, tikchiaj maj okachi momiakili nejon tachiualismej ijkon kemej motokijtiuj itamilis tein mochiujtok uan Satanás okachi mokualantia (Apo. 12:12). Techyolpaktia tikitaskej nejon, ta kinextia ke amo miak tonalmejok kipia Satanás.
4. ¿Keniuj moneki titanankiliskej komo aksa amo kuali technankilia?
4 Maj titanankilikan ika yemanik tajtolmej. Keman amo kuali technankiliaj, tejuan nochipa moneki titanankiliskej ika yemanik tajtolmej (Pro. 15:1; Col. 4:5, 6). Komo ueli uan taltikpaknenkej yolmelauak, uelis tiktajtaniskej keyej ijkon kinemilia, oso tikmelauiliskej ke moajsi miak taman tein kinijtouiliaj itaixpantijkauan Jiova. Keman titanankiliaj ika yemanik tajtolmej, taltikpaknenkej uelis motajtanis ox melauak tein techijtouiliaj uan xa satepan kinekis kikakis se itaixpantijkauj Jiova keman oksepa kikalpanos. Sayoj ke komo tikitaj ke tel kualantok, xa okachi kuali maj timonauatikan ika poujkaitalis. Maj amo timotekipachokan, ta tikyekmatij ke maski sekin amo kuali techitaj, Jiova kemaj kipatiuita tekit tein tikchiuaj (Isa. 52:7).