Maj tinemikan “ika yolseuilis uan ika yolyemanalis iuan nochi taltikpakuani”
1. ¿Toni tein techyolmajxitia Biblia uelis techpaleuis keman timoajsiskej iuan se taltikpaknenkej akin mokuejmoloua?
1 Nochin akin pouij itech ixolal Jiova kiuelitaj yolseujtoskej uan tanojnotsaj ika se tanauatil tein kiualkui yolseuilis (Is. 52:7). Maski ijkon, kemansa timoajsij iniuan taltikpakneminij akin mokuejmolouaj porin titanotsaj ininchan. ¿Toni techpaleuis maj tiyolseuikan ijkuak timoajsiskej itech nejon ouijkayot? (Rom. 12:18.)
2. ¿Keyej motelneki maj tikpiakan kuali taixejekolis?
2 Maj tikpiakan kuali taixejekolis. Maski sekin mokuejmolouaj porin kiixnamikij tein tamachtia Biblia, oksekin xa mokuejmolouaj ika okseki taman. Xa tiajsitij keman amo ueli techselia oso xa ipa mokuejmolojtoya porin kipia okseki kuejmolmej. Uan maski totanojnotsalis kichiuas maj mokuejmolo, moneki tikelnamikiskej ke ijkon tanankilia xa porin kinneltokilia akin amo kuali toka tajtouaj (2 Cor. 4:4). Komo tikpiaj kuali taixejekolis techpaleuis maj tiyolseuikan uan maj amo tiknemilikan ke tejuan techkualauiaj (Prov. 19:11).
3. ¿Keniuj uelis tiknextiskej ke tikinpoujkaitaj taltikpakneminij?
3 Maj tiknextikan ke tikinpoujkaitaj. Itech seki xolalmej miakej taltikpakneminij kitelpoujkaitaj tein kinmachtiaj itech inintaneltokalis (2 Cor. 10:4). Uan tein melauj yejuan kimatij ox techkakiskej oso amo. Maj amo keman tiknextikan ke amo kipia ipatiuj tein kineltoka aksa oso tikchiuaskej maj kinemili ke tejuan okachi tikixmatij Biblia ke yejua. Komo techiluia maj tiyakan, ika poujkaitalis moneki timonauatiskej uan tiyaskej.
4. ¿Toni techpaleuis maj kuali titajtokan?
4 Maj amo teyolxokoli totajtoluan. Maski techiluiskej tein amo kualtsin, keman titanankiliskej moneki maj tiyolseujtokan uan maj tikijtokan kuali tajtolmej (Col. 4:6; 1 Ped. 2:23). Maj amo tiktemokan timotajtolteuiskej, ta okachi kuali maj tikiluikan se tanemilil tein iuan mouikas tein taltikpaknenkej kinemilia. Xa ika miak poujkaitalis uelis tiktajtaniskej maj techilui keyej amo techselia. Kemansa okachi kuali monekis tiyaskej, ijkon amo okachi mokuejmolos (Prov. 9:7; 17:14).
5. ¿Toni tatiochiualismej tikseliskej itech tanojnotsalis keman tiyolseujtokej?
5 Komo kuali titanankiliaj, taltikpaknenkej uelis kielnamikis nejon uan xa kikakis okse tokniuj akin kinojnotsatiuj okse tonal (Rom. 12:20, 21). Uan maski moitas ke tel chikauak taixnamiki, se tonal uelis mochiuas tokniuj (Gal. 1:13, 14). Maski ajsis tonal kinekis kiixmatis tein kijtoua Biblia oso amo, tikmatij ke tikueyichiujtokej Jiova uan tikualnextiaj totamachtilis keman tiknextiaj ke tiyolseujtokej uan amo titanankiliaj ika kualanyot (2 Cor. 6:3).